དབྱིན་ཡུལ་རྒྱལ་ས་ལོན་ཌོན་དང་ཨ་རིའི་མི་ནེ་སོ་ཊའི་ཁུལ་དུ་འོས་བསྡུའི་ཚེས་གྲངས་ཉིན་གཅིག་སྔ་ནུར་དང་ཧྥ་རན་སིའི་ནང་འོས་བསྡུའི་ས་ཚིགས་གསུམ་གཏན་འཁེལ་བྱས་འདུག 
ཁ་སང་དབྱིན་ཡུལ་ས་གནས་འོས་བསྡུ་ལས་ཁང་གིས་ས་གནས་མི་མང་ལ་ཡོངས་ཁྱབ་གསལ་བསྒྲགས་ཤིག་སྤེལ་ཏེ། ཡོང་ལ་ཉེ་བའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་ཏོག་དབྱིབས་གཉན་རིམས་འགོས་ཁྱབ་དང་ལྷག་པར་དུ་དབྱིན་ཡུལ་ནང་ཏོག་དབྱིབས་གཉན་རིམས་ཀྱི་ནད་འབུའི་ངོ་བོ་གསར་པ་ཞིག་བྱུང་བའི་གནས་སྟངས་འོག རྒྱལ་ས་ལོན་ཌོན་ནང་ཁྱིམ་སྡོད་བཀའ་རྒྱ་འགྲོ་ཡི་ཡོད་པར་བརྟེན། རྒྱལ་ས་ལོན་ཌོན་ནང་གི་འོས་བསྡུའི་ཚེས་གྲངས་ཉིན་གཅིག་སྔ་ནུར་གྱིས་ཕྱི་ཟླ་ ༡ ཚེས་ ༢ དང་ ༣ བཅས་ཉིན་གྲངས་ ༢ རིང་འོས་འཕེན་གྱི་ཉིན་མོར་གཏན་འཁེལ་བྱས་འདུག
ས་གནས་འོས་བསྡུ་ལས་ཁང་གི་གསལ་བསྒྲགས་ནང་། ཉེ་དུས་དབྱིན་ཡུལ་ནང་ཏོག་དབྱིབས་ནད་འབུ་གསར་ཐོན་རྐྱེན་པས་གཞུང་གིས་ཁུལ་སོ་སོའི་གནས་བབ་དང་བསྟུན་ནས་དམ་བསྒྲགས་བཀའ་རྒྱ་རིམ་པ་མི་འདྲ་བ་ཁག་ཅིག་དང་། ལྷག་པར་ལོན་ཌོན་ནང༌ (Tier 4) དམ་བསྒྲགས་མུ་མཐུད་གནས་ཡོད་སྟབས། ས་གནས་འོས་བསྡུ་ལས་ཁང་ནས་སྐབས་མཚམས་སོ་སོར་དབུས་འོས་བསྡུ་ལས་ཁང་ལ་ ཡིག་ངག་གཉིས་ནས་སྙན་སེང་ཞུས་འབྲས་སུ། ད་ཆ་དབྱིན་ཡུལ་ནས་འོས་འཕེན་ས་ས་ཁུལ་ལྔ་དང༌། ལོན་ཌོན་ནང་འོས་བསྡུ་ཆེན་མོ་སྔ་སྣུར་གྱིས་ཕྱི་ཟླ་ ༡ ཚེས་ ༢ དང་ཚེས་ ༣ བཅས་ཉིན་གྲངས་གཉིས་ལ་འོས་བསྡུ་ཆོག་པའི་བཀའ་འཁྲོལ་ཞུས་དོན་ལྟར་བསྩལ་སོང་། ཞེས་བཀོད་འདུག
ཡང་ཕྱི་ཚེས་ ༢༦ ཉིན་བྱང་ཨ་རི་མི་ནི་སོ་ཊའི་ས་གནས་འོས་བསྡུའི་ཚོགས་ཆུང་གིས། ཨ་རིའི་ནང་ཏོག་དབྱིབས་ནད་རིམས་ཀྱི་དཀལ་ངལ་དང་འབྲེལ། མི་ནེ་སོ་ཊའི་ཁུལ་སྔོན་འགྲོའི་འོས་བསྡུ་ཉིན་གཅིག་སྔ་སྣུར་གྱིས་ཚེས་ ༢ ནས་ ༣ བར་ཉིན་གྲངས་ ༢ རིང་འོས་འཕེན་རྒྱུ་གཏན་འཁེལ་དང་། ཨ་རི་ཁ་ལི་ཧྥོ་ནེ་ཡའི་བོད་རིགས་ཚོགས་པ་དང་ཁེ་ན་ཌའི་གངས་ལྗོངས་ཆོས་ལྡན་གླིང་ཁུལ་དུ་ཕྱི་ཟླ་ ༡ དང་ ༢ དེ་བཞིན་ཚེས་ ༣ བཅས་སོ་སོར་གནང་རྒྱུའི་གསལ་བསྒྲགས་གནང་ཡོད་པ་རེད།
དེ་བཞིན་ཧྥ་རན་སིའི་ས་གནས་འོས་བསྡུ་ཚོགས་ཆུང་གིས། ཡུལ་ཁྲིམས་དང་འོས་འཕེན་པའི་འཕྲོད་བསྟེན་སོགས་ལ་དོ་ཁུར་གྱིས། ཕྱི་ཟླ་ ༡ ཚེས་ ༣ ཉིན་ཧྥ་རན་སིའི་མི་མང་ལ་འོས་བསྡུའི་ས་ཁུལ་གསུམ་གཏན་འཁེལ་བྱས་ཡོད་པའི་གསལ་བསྒྲགས་སྤེལ་འདུག་ལ། ཉེ་ཆར་བལ་ཡུལ་དང་འབྲུག་གཉིས་ནང་ས་ཁུལ་ཆབ་སྲིད་ཀྱི་གནས་བབ་འོག་གསང་བའི་འོས་བསྡུ་བྱས་པར། བལ་ཡུལ་ནང་རྒྱལ་ས་ཀ་ཐི་མན་ཌིའི་ས་གནས་ཉེན་རྟོག་པས་མཆོད་རྟེན་བྱ་རུང་ཁ་ཤོར་ཁུལ་གྱི་མཆོད་འབྱོར་ས་གནས་མགོ་འཛིན་དང་བོད་མི་གཞན་གསུམ། དེ་བཞིན་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་བཅས་ཁྱོན་མི་ ༥ འཛིན་བཟུང་བྱས་ཏེ། ཉིན་དེའི་ཉིན་རྒྱབ་ཏུ་ཁོ་ཚོ་ཀློད་གྲོལ་བཏང་ཡོད་པ་འདི་གའི་གསར་འགོད་པར་བོད་མི་ཞིག་གིས་འགྲེལ་བརྗོད་གནང་བྱུང་།
གསར་འགོད་པ། སྐལ་བཟང་སྦྱིན་པ།
