འདི་ལོའི་ཕྱི་ཟླ་ ༡༠ ཚེས་ ༡ ཉིན་ནས་ལག་བསྟར་བྱ་འཆར་ཡོད་པའི་རྒྱལ་སྲུང་དང་འབྲེལ་བའི་ཁྲིམས་སྒྲིག་གསར་པའི་ནང་དམག་འཁྲུག་འབྱུང་ཚེ་མངའ་ཁོངས་གཅིག་གྱུར། བདེ་འཇགས། འཕེལ་རྒྱས་བཅས་ཀྱི་མིང་ཐོག་ནས། ཚོགས་སྒེར་ཁག་གི་དངུལ་དངོས་དང་། ཐོན་ཁུངས། འགྲིམ་འགྲུལ་སོགས་རྒྱལ་ཁབ་ཀྱིས་བདག་བཟུང་བྱས་ནས་བེད་དུ་སྤྱད་དེ་རྒྱལ་སྲུང་གི་ལས་དོན་ཟེར་བ་གཉེར་རྒྱུ་ཡིན་འདུག
ཕྱི་ཟླ་ ༨ ཚེས་ ༣༠ ཉིན་རྒྱལ་ཡོངས་མི་དམངས་འཐུས་མི་ཚོགས་ཆེན་རྒྱུན་ལས་ལྷན་ཚོགས་ཀྱིས་ཁྲིམས་སྒྲིག་དེ་དང་འབྲེལ་ནས་གསལ་བསྒྲགས་བྱས་པའི་ཁྲོད། ཁྲིམས་སྒྲིག་དེས་རྒྱལ་ཁབ་ཀྱི་དམག་དོན་དང་སྤྱི་དམངས་ཀྱི་ལས་འགན། འགན་ཁུར་བཅས་གསལ་བཤད་བྱས་ཡོད་ཅིང་། དེས་རྒྱལ་ཁབ་ཀྱི་སྲུང་སྐྱོབ་དང་། བདེ་འཇགས་ཀྱི་དགོས་མཁོ། དཔལ་འབྱོར། སྤྱི་ཚོགས་འཕེལ་རྒྱས། མཐུན་སྦྱོར། ཛ་དྲག་གི་ལན་འདེབས་ལམ་སྲོལ། འབྲེལ་མཐུད་བཅས་ལ་དམིགས་ཡོད་ཅིང་། ད་ལན་བསྐྱར་བཅོས་བྱས་པ་དེས། སྒྲིག་འཛུགས་ཀྱི་མགོ་ཁྲིད་དང་དེའི་དབང་ཚད། རྒྱལ་ཁབ་ཀྱི་སྲུང་སྐྱོབ་སྒྲིག་འཛུགས་ཀྱི་འཆར་འགོད། དམག་དོན་ཞིབ་འཇུག དམག་མི་མཁོ་བསྡུ་དང་སྐུལ་སློང་། སྤྱི་དམངས་ཀྱི་ཐོན་ཁུངས་གཞུང་བཞེས་དང་། སྐྱིན་ཚབ་བཅས་ཀྱི་གནད་དོན་རྣམས་ཞིབ་ཕྲ་བཀོད་ཡོད་ལུགས་བསྒྲགས་ཡོད།
དེ་བཞིན་རྒྱ་ནག་གཞུང་གིས་ཁྲིམས་ལུགས་དེས་རྒྱལ་ཁབ་ཀྱི་སྲུང་སྐྱོབ་མངའ་ཁོངས་ཟེར་བ་རྒྱ་སྐྱེད་བྱས་ཡོད་ཅིང་། དེས་རྒྱལ་ཁབ་ཀྱི་རང་བཙན་དང་། གོང་བུ་གཅིག་གྱུར། མངའ་ཁོངས་གཅིག་གྱུར། བདེ་འཇགས། འཕེལ་རྒྱས་ཟེར་བ་བཅས་ལ་འཇིགས་སྐུལ་འབྱུང་སྐབས། ཁྲིམས་ཐོག་ནས་དམག་འཁྲུག་རྒྱག་ཆོག་པའི་མུར། རྒྱལ་ཁབ་ཀྱི་དཔལ་འབྱོར་དང་སྤྱི་ཚོགས་ཀྱི་ནུས་ཤུགས་ཐོན་ཁུངས་ཧྲིལ་པོ་དམག་འཁྲུག་གི་ཆེད་དུ་ཁ་བསྒྱུར་ནས་རྒྱལ་སྲུང་གི་ལས་དོན་ལ་གཞོལ་དགོས་ལུགས་བཤད་འདུག་ཀྱང་། ཐའེ་པེ་དུས་བབ་གསར་ཁང་ནང་། རྒྱ་ནག་གཞུང་གིས་ད་ལྟ་ནས་མ་འོངས་པར་འབྱུང་ཉེན་ཡོད་པའི་དམག་འཁྲུག་ཁག་ལ་གྲ་སྒྲིག་བྱེད་ཀྱིན་ཡོད་པ་མ་ཟད། ཚོགས་སྒེར་ཁག་གི་བཟོ་གྲྭ་དང་། ཐོན་ཁུངས། ནུས་ཤུགས། འགྲིམ་འགྲུལ། དཔལ་འབྱོར་སོགས་གཞུང་གིས་དབང་འཛིན་བྱ་རྒྱུ་དང་། ཐ་ན་རྒྱལ་ཁབ་བདེ་སྲུང་དང་མཐའ་སྲུང་ལ་ཁ་གཡར་ནས་མི་སྒེར་ལ་དབང་བའི་ས་ཆ་སོགས་འཕྲོག་ཉེན་ཡོད་སྐོར་་གསལ་འདུག
རྒྱ་ནག་གཞུང་གིས་མི་འགྱངས་བར་ལག་བསྟར་བྱ་འཆར་ཡོད་པའི་ཁྲིམས་སྒྲིག་དེའི་ཁྲོད། འབྱུང་འགྱུར་དམག་འཁྲུག་འབྱུང་སྐབས། རྒྱ་གཞུང་གིས་རྒྱབ་གཅིག་གྱུར་ཞེས་པའི་མིང་འོག་ནས་ཚོགས་སྒེར་ཁག་གིས་གཉེར་བའི་ཚོང་དོན་དང་། ནུས་ཤུགས། འགྲིམ་འགྲུལ། དྲིལ་བསྒྲགས་སོགས་བེད་དུ་སྤྱད་ནས་རྒྱལ་སྲུང་ལས་དོན་གཉེར་རྒྱུ་ཡིན་པ་དང་། མི་སེར་རྣམས་དམག་དོན་གྱི་ཡུལ་དངོས་ལ་ཞུགས་དགོས་པ་མ་ཟད། སྐྱེས་པ་ལོ་ ༡༨ ནས་ ༦༠ བར་དང་། བུད་མེད་ལོ་ ༡༨ ནས་ ༥༥ བར་རྒྱལ་སྲུང་ཞེས་པའི་མིང་འོག་ནས་དམག་དོན་གྱི་སྦྱོང་བརྡར་དང་མཐའ་སྲུང་ལས་དོན་ནང་ཞུགས་དགོས་ཀྱི་ཡོད་འདུག དེ་བཞིན་རྒྱ་ནག་གཞུང་གིས་ཁྲིམས་སྒྲིག་དེ་བརྒྱུད་ནས། མི་མེད་གནམ་གྲུ་དང་བཅོས་མའི་རིག་ནུས་སོགས་ཀྱང་རྒྱལ་སྲུང་གི་ལས་དོན་ཐོག་བེད་སྤྱོད་བྱ་རྒྱུ་ཡིན་འདུག
ད་ལྟའི་ཆར་རྒྱ་གར་གཞུང་དང་ཐའེ་ཝན་གྱིས་ཚོར་སྣང་སྐྱེན་པོས་ཁྲིམས་ཡིག་གསར་པ་འདིར་བལྟ་ཉན་དང་ཞིབ་གཤེར་བྱེད་མུས་ཡིན་ཞིང་། སྤྱིར་འདས་པའི་ལོ་ཤས་གོང་ནས་རྒྱ་དཀར་ནག་གི་དམག་མིའི་བར་ཧིན་བོད་མཐའ་མཚམས་ཁག་ཏུ་གདོང་ཐུག་དང་རྩོད་གླེང་ལན་མང་བྱུང་སྟབས། ད་ལྟ་ཕྱོགས་གཉིས་ཀྱིས་མཐའ་མཚམས་སུ་འགོག་སྲུང་ནན་མོ་བྱེད་ཀྱིན་ཡོད་པ་མ་ཟད། འདས་ལོའི་ཕྱི་ཟླ་ ༡ ཚེས་ ༡ ཉིན་ནས་རྒྱ་ནག་གིས་བོད་ནང་གི་སྐྱེས་པ་ལོ་ ༡༨ ཡན་རྣམས་ངེས་པར་དུ་དམག་ལ་ཞུགས་དགོས་པའི་བཀའ་ཁྱབ་བསྒྲགས་ཡོད་ལ། ལྷག་པར་རྒྱ་ནག་གཞུང་གིས་ཧིན་བོད་མཐའ་མཚམས་ཀྱི་བོད་མངའ་རིས་རུ་ཐོག་ཁུལ་གྱི་སྐྱེས་པ་རང་ལོ་ ༡༨ ཡན་རྣམས་མཐའ་སྲུང་སླད་བཙན་གྱིས་དམག་མིར་ཞུགས་བཅུག་ཡོད།
ཕྱི་ལོ་ ༢༠༡༠ ཟླ་ ༧ ཚེས་ ༡ ཉིན་རྒྱ་ནག་གི་རྒྱལ་སྲུང་སྐུལ་སློང་གི་བཅའ་ཁྲིམས་(China’s National Defence Mobilisation Law) དེ་རྒྱལ་སྲུང་དང་དམག་འཁྲུག་གི་ཉེན་ཁ་གཞིར་བཞག་ནས་ལག་བསྟར་བྱས་ཡོད་ཅིང་། ད་ཐེངས་བསྐྱར་བཅོས་བྱས་པའི་ཁྲིམས་ཡིག་ནང་ལེའུ་གསར་པ་༤ དང་། དོན་ཚན་ ༤༤ ཁ་སྣོན་བྱས་ཏེ། ཁྱོན་ལེའུ་ ༡༤ དང་དོན་ཚན་ ༨༢ ཡོད་ལ། ཁྲིམས་སྒྲིག་དེ་ནི་མི་ལོ་བཅུ་དྲུག་གི་རྗེས་སུ་བསྐྱར་བཅོས་བྱས་པ་ཞིག་ཡིན་འདུག
གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
