ཆབ་མདོ་ངག་ཕུན།
དེ་རིང་ངས་སྙིང་དབུས་ནས་ཐུགས་རྗེ་ཆེ་ཞེས་ཞུ་འདོད་བྱུང་ཞིང་། དེ་ཡང་རང་རེའི་བོད་རྒྱལ་ཁབ་ཆེན་པོ་རྒྱ་དམར་གྱི་འོག་ཏུ་ཤོར་ནས་༸རྒྱལ་བ་རིན་པོ་ཆེས་གཙོས་སྐུ་འཁོར་ཧྲག་བསྡུས་ཤིག་བོད་མི་རིགས་དང་། གང་སྒོས་སངས་རྒྱས་བསྟན་པའི་དོན་དུ་མི་ཡུལ་དུ་ཕེབས་དགོས་བྱུང་སྟེ་མི་ལོ་དྲུག་ཅུ་རེ་གཅིག་སླེབས་ཟིན་ཞིང་། མི་ཡུལ་ནས་རྒྱལ་བ་རིན་པོ་ཆེས་དགོངས་པ་བླ་ན་མེད་པ་བཞེས་གནང་མཛད་དེ་དང་ཐོག་མ་སུ་རི་ལ་གནད་ཡོད་མི་སྣ་ ༣༠ ལྷག་བརྒལ་བའི་ཚོགས་ཆེན་ཐོག་ཏུ་ད་ཡོད་ཁ་ཚ་དགོས་གཏུགས་ལས་བསྒོ་བསྐྱོན་གནང་མཛད་པ་དང་། དུས་སྐབས་དེར་ཕྱག་ལས་ནང་སྲིད་དང་། ཕྱི་སྲིད། འདུ་འགོད། ཤེས་རིག །ཆོས་དོན་བཅས་གཏན་འབེབས་གནང་བ་རེད་ཅེས་གསལ་ཞིང་།
ལྷག་པར་ཤེས་ཡོན་ནི་གལ་ཆེ་རང་བཞིན་ཡིན་པ་དགོངས་པ་བཞེས་ཏེ་བོད་གཞུང་ཤེས་རིག་ལས་ཁུངས་ཕྱི་ལོ་ ༡༩༦༠ ཟླ་ ༡༠ ཚེས་ ༤ ཉིན་མོར་གསར་འཛུགས་བསྐྱངས་གནང་མཛད་པ་ནས་བཟུང་སྟེ་ཤེས་རིག་ཐོག་ཏུ་འགན་འཁུར་གཙོ་བོ་བཞེས་ཏེ་ཕྱག་ལས་གནང་དང་གནང་མུས་ཡིན་པ་རེད་ལ། རང་རེའི་སྤྱི་ཚོགས་ཐོག་ཏུ་ཕན་ཐོག་རླབས་ཆེན་བྱུང་ཡོད་པ་ཡོད་ནི་བརྗོད་མ་དགོས་པའི་གནས་སྟངས་ཤིག་རེད། ཕྱི་ལོ་ ༡༩༦༠ ལོར་བོད་ཀྱི་ཤེས་རིག་ལས་ཁུངས་ཀྱི་སློབ་གྲྭ་ཁག་གི་སློབ་དེབ་རྩོམ་སྒྲིག་ཚོགས་ཆུང་གསར་འཛུགས་གནང་སྟེ་ཕྱག་ལས་གནང་འགོ་བཙུགས་པ་ནང་བཞིན་རང་རེའི་སྤྱི་ཚོགས་ཐོག་ཏུ་ཕན་ཐོགས་བླ་ན་མེད་པ་བྱུང་ཡོད་ལ། བོད་པའི་སློབ་གྲྭ་ཡོངས་རྫོགས་ལ་སློབ་དེབ་རྩོམ་སྒྲིག་གནང་སྟེ་འགྲེམས་སྤེལ་གནང་དང་གནང་བཞིན་ཡོད་པ་རེད། དེ་ཡང་ཤེས་རིག་ལས་ཁུངས་མ་ལག་དང་བཅས་པའི་ལོ་རྒྱུས་ཀྱི་སྔོན་གླེང་ལས། ལྷག་པར་དུ་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ཤེས་ཡོན་གྱི་ལས་དོན་འདི་ཉིད་ལས་དོན་ཀུན་གྱི་ནང་ནས་གལ་འགངས་ཆེ་ཤོས་ཤིག་ཡིན་པ་དང་། རང་རེའི་བོད་ཀྱི་མ་འོངས་པའི་གསོན་རྩར་གྱུར་པའི་བོད་ཕྲུག་རྣམས་ལ་ཤེས་རིག་ཡོན་ཏན་སློབ་སྦྱོང་བྱ་རྒྱུ་སྤྱི་སྒེར་གཉིས་ཀར་འཕྲལ་ཡུན་སྒོ་གང་ས་ནས་ཤིན་ཏུ་གནད་ཆེ་བར་བརྟེན། ཞེས་གསལ་བ་དང་། དེ་བཞིན་ཤེས་རིག་རྩོམ་སྒྲོག་སྡེ་ཚན་ནས་འགྲེམས་སྤེལ་གནང་བའི་ཨ་ཁུ་ཕག་པའི་དེབ་ཀྱི་སྔོན་གླེང་ནང་དུ་ཡང་། འདི་ག་བོད་གཞུང་ཤེས་རིག་ལས་ཁུངས་ཀྱི་རྩོམ་སྒྲིག་སྡེ་ཚན་ནས་ལོ་མང་རིང་བོད་ཕྲུག་ཚོའི་ཤེས་ཡོན་ཡར་རྒྱས་ཡོང་སླད། ཕ་ཡུལ། ན་གཞོན་བརྙན་དེབ་དང་། གངས་ལྗོངས། བྱིས་པའི་བརྙན་དེབ་གཉིས་རྩོམ་སྒྲིག་དང་འགྲེམས་སྤེལ་བྱས་ནས་ལོ་ངོ་ ༡༥ ཙམ་འགྲོ་མུས་ཡིན་པ། ཞེས་གསལ་དོན་ལྟར་ན། ཕྱི་ལོ་ ༡༩༨༩ ལོ་ནས་བྱིས་པའི་བརྙན་དེབ་གཉིས་དེ་མགོ་བཙུགས་པ་འདྲ་ཞིང་། དེ་ནས་ཕྱི་ལོ་ ༢༠༢༠ དབར་ལོ་ངོ་ ༣༡ ཙམ་འགྲོ་བཞིན་འདུག་ཅིང་། དེ་བཞིན་ཕ་ཡུལ་ཕྱོགས་བསྒྲིགས་གནང་ནས་དེབ་ཕྲེང་ ༦༡ ལྷག་ཙམ་སློབ་གྲྭ་ལ་སོགས་འགྲེམས་སྤེལ་གནང་བ་དེ་དག་དངོས་གནས་དགའ་སྒོམ་འོས་པའི་གནས་སྟངས་ཤིག་ཀྱང་ལོས་ཡིན། ལྷག་དོན་རང་ཡུལ་དང་ཁ་བྲལ་ནས་མི་ཡུལ་ལུང་པར་གཞན་བསྟེན་འོག་ཏུ་གནས་དགོས་ཡོད་ནའང་བཙན་བྱོལ་བོད་མིའི་སྒྲིག་འཛུགས་དང་། དེ་བཞིན་ལས་ཁུངས་ཀྱི་འབྲེལ་ཡོད་འགོ་ལས་ཡོངས་ཀྱི་ངལ་བ་ཁྱད་བསད་ཀྱིས་དེང་སྐབས་བྱིས་སྒྲུང་དུ་མ་ཞིག་བོད་སྒྱུར་དང་གནང་མུས་རེད་འདུག་ཅིང་། དེ་དག་ནི་རང་རེའི་ལོ་ཆུང་ཚོའི་བློ་གྲོས་འཚམས་པ་ཡིན་པ་ནི་འགྲེལ་བརྗོད་མ་དགོས། ང་ཚོའི་སྤྱི་ཚོགས་ནང་དུ་སྔོན་མ་ཡིན་ན་བྱིས་སྒྲུང་ཧ་ཅང་ཉུང་ཉུང་ཡིན་ཞིང་། ཕལ་ཆེར་མེད་པ་རེད་ལབ་པ་ཡིན་ན་མི་ཆོག་པ་མེད་པའི་གནས་སྟངས་དེ་འདྲ་ཞིག་ཏུ་གྱུར་ཡོད།
ཕྱི་ལོ་བརྒྱད་ཅུ་གྱ་གྲངས་ནས་ཤེས་རིག་ལས་ཁུངས་ཀྱིས་གངས་ལྗོངས་ལོ་རེར་ཐེངས་རེ་འདོན་སྤེལ་གནང་སྟེ་ད་ལྟ་གངས་ལྗོངས་འདོན་ཐེངས་ཉི་ཤུ་རྩ་གྲངས་སླེབས་ཟིན་ཡོད་ཅིང་། དེ་ཡང་ཁ་ཆེམས་རླུང་ལ་བསྐུར་བ་ཞེས་སྒྲུང་གཏམ་གྱི་སྔོན་གླེང་ལས། རང་རེའི་སློབ་ཕྲུག་ཆེ་འབྲིང་ཆུང་གསུམ་རྣམས་ལ་བོད་ཡིག་གི་ཟུར་ལྟའི་བཀླག་དེབ་ཧ་ཅང་གི་ཉུང་སྐྱོན་དང་། རྩོམ་ཡིག་འབྲི་མཁན་དཀོན་ཞིང་། བྲིས་པའི་རྩོམ་ཡིག་མི་ཉུང་བ་ཞིག་ལ་སྐྱོན་དང་ཞན་ཆ་སྣ་ཚོགས་ཡོད་པ་སོགས་ཀྱི་དཀའ་ངལ་དེ་རྣམས་སེལ་བར་ཕན་ཐོགས་ཡོང་སླད། ཞེས་གསལ་དོན་ལྟར། རང་རེའི་ན་གཞོན་རྣམས་ལ་ས་བཅད་མ་སྟོང་ཙམ་དུ་བརྩམས་སྒྲུང་བཀླག་རྒྱུ་ཡོང་གི་ཡོད་པ་རེད་ལ། དེ་བཞིན་རང་རེའི་ན་གཞོན་རྣམས་ལ་རྩོམ་ཡིག་འབྲི་བར་དོ་སྣང་ཡོང་བར་ཕན་ཐོགས་རླབས་ཆེན་ཡང་བྱུང་ཡོད།
ལྷག་པར་ཤེས་རིག་ཚོགས་ཆེན་ཐེངས་དང་པོའི་ཐོག་ཏུ་རྒྱལ་བ་རིན་པོ་ཆེའི་བཀའ་སློབ་ལས། ང་ཚོས་གསར་བརྗེ་ཟེར་བ་དེ་ཡར་རྒྱས་གཏོང་བར་ཟེར། བླ་མ་ཟེར་བ་དེ་རྩ་ཆེར་འཛིན་གྱི་ཡོད་པ་གང་ཡིན་ཞེ་ན། ལེགས་ཉེས་ཀྱི་སློབ་སྟོན་བྱེད་མཁན་ཞིག་ཡིན་སྟབས་གལ་ཆེར་བརྩི་བཀུར་བྱེད་པ་ཞིག་ཁྱེད་རང་དགེ་རྒན་རྣམས་ནས་ཀྱང་གནས་ཚུལ་དེར་བསམས་ཏེ་བོད་ཕྲུག་ཁྲི་ཕྲག་གི་ཁེ་ཕན་ལ་ཐུག་གི་ཡོད་པར་བརྟེན་རང་སྤོབས་བསྐྱེད་དེ་རང་གི་སེམས་ཤུགས་ཆེན་པོས་ལས་ཀ་བྱེད་དགོས། ཞེས་བཀའ་སློབ་ལམ་སྟོན་གནང་དོན་ལས་ཐོག་ཏུ་ཉི་མ་གང་འཁྱོལ་ཚུལ་དུ་ཡིན་པ་འབད་བརྩོན་གནང་དགོས་པ་ཞིག་རེད། ཤེས་ཡོན་གྱི་སྣེ་ལ་བཞུགས་མཁན་རྣམས་ནི་ཧ་ཅང་གལ་གནད་ཆེན་པོ་ཞིག་ཡིན་པ་རེད། མ་འོངས་པ་བོད་རིགས་ན་གཞོན་རྣམས་ལ་ཤེས་ཡོན་གྱི་ལེགས་ཉེས་གང་འདྲ་ཞིག་ཡོང་མིན་ད་ལྟའི་ལས་ཀྱི་སྣེ་མོ་བ་ཚོས་ལྷག་བསམ་ལ་རག་ལས་ཡོད། དེ་དག་ནི་ཞོར་འཕྲོས་ཙམ་ཡིན། ད་སྐབས་གངས་ལྗོངས་འདོན་ཐེངས་ཉི་ཤུ་རྩ་གྲངས་ལ་འདོན་སླེལ་ཟིན་ཡོད་ཅིང་། དེ་དག་ནི་རང་རེའི་སྤྱི་ཚོགས་ཀྱི་བློ་གསར་ན་ཆུང་རྣམས་ཀྱི་བློ་གྲོས་ལ་འཚམས་པའི་བྱིས་སྒྲུང་ཐོག་མ་དེ་ཡིན་ལབ་པ་ཡིན་ན་མི་ཆོག་པ་ཞིག་ཡོད་ཀྱི་མ་རེད་སྙམ། ང་ཚོར་ནང་དོན་རིག་པའི་གཞུང་ལུགས་ནི་ཕྱི་མི་ལ་ངོམ་རིན་ཆོག་པ་ཡོད་མོད། ན་ཆུང་གི་བློ་གྲོས་དང་འཚམས་པའི་བྱིས་སྒྲུང་མེད་པས་སྟོང་ཆ་དེ་ཉིད་ཁ་སྐོང་དགོས་ཤིང་། འཛམ་གླིང་བྱིས་སྒྲུང་གྲགས་ཅན་རྣམས་མིག་དཔེ་བལྟས་ཏེ་གསར་གཏོད་བྱེད་དགོས་པ་ཞིག་ལས། ད་དུང་ང་ཚོ་གསར་བཏོད་མེད་པའི་སྙིང་ཞུམ་ནས་བསྡད་ན་ང་ཚོ་མི་རིགས་འདི་ཉིད་དེང་རབས་ཀྱི་རྗེས་མི་ཟིན་ཞིང་། དེང་རབས་ཀྱི་རྗེས་སུ་མདུན་བསྐྱོད་མ་ཐུབ་ཚེ། ང་ཚོའི་མི་རིགས་འདི་ཉིད་རིམ་གྱིས་ཉམས་རྒྱུ་ཡིན་པ་ནི་བརྗོད་མ་དགོས་པའི་མིག་མཐོང་ལག་ཟིན་གྱི་གནས་སྟངས་ཤིག་རེད་སྙམ། ངས་དེ་འདྲ་ཞིག་བརྗོད་དུས་དེ་ལྟར་གནང་གི་འདུག་གཏན་ནས་བརྗོད་ཀྱི་མེད། གལ་པོ་ཆེ་ལ་ནན་ཏན་གྱི་ཚུལ་དུ་བརྗོད་པ་ཡིན་པ་ལས་གཞན་པའི་དམིགས་ཡུལ་གང་ཡང་མེད།
ལྷག་པར་ཤེས་རིག་ཚོགས་ཆེན་གསུམ་པའི་ཐོག་ཏུ་གྲོས་ཆོད་ལས། ད་ལྟའི་ཆར་བོད་ཡིག་སྦྱང་གཞི་བོད་ཡིག་སློབ་དེབ་ཙམ་ལས་མེད་གཤིས་བོད་ཕྲུག་རྣམས་ནས་བོད་ཡིག་ཐོག་དོ་སྣང་དགའ་མོས་སྐྱེད་སྤེལ་སྔར་ལྷག་ཡོང་ཐབས་སུ་དུས་གསེང་ནམ་ཡིན་ལ་བོད་ཡོག་ཀློག་དེབ་གཞི་སངས་རྒྱས་ཀྱི་འཁྲུངས་རབས་དང་། སྔོན་བྱོན་ལོ་པཎ་བཀའ་དྲིན་ཅན་རྣམས་ཀྱི་མཛད་པའི་རྣམ་ཐར། རྒྱལ་རབས་ལོ་རྒྱུས། བོད་མིའི་སྤྱི་ཚོགས་ནང་དུས་དྲན་སྲུང་བརྩི་བྱ་ཕྱོགས། བོད་ཀྱི་སྣོད་བཅུད་ཆགས་རབས་སོགས་དེང་དུས་དང་མཐུན་པའི་སྒྲུང་གཏམ་འདྲ་རིས་སོགས་གསར་སྣོད་ཀྱིས་བརྙན་དེབ་གང་མང་གསར་རྩོམ་འདོན་སྤེལ་གནང་ཐབས་ཞེས་གྲོས་ཆོད་བཞག་དོན་ལྟར་དེ་དག་ཐོག་ཏུ་གལ་ཆེ་དོན་ཆེ་གཟིགས་ནས་ལས་དོན་གནང་བའི་དྲིན་གྱིས་དེང་སྐབས་ལོ་རེ་ལོ་རེ་བྱིས་སྒྲུང་དུ་མ་ཞིག་བོད་སྒྱུར་གྱིས་འགྲེམས་གནང་བཞིན་འདུག་པས། སྙིང་དབུས་ནས་བཀའ་དྲིན་ཞུ་བཞིན་ཡོད།
དེ་བཞིན་རང་རེའི་སྤྱི་ཚོགས་ནང་གི་ཤེས་ཡོན་ཐོག་ཏུ་དོ་སྣང་ཡོད་མཁན་དང་། ལྷག་པར་ཕྲུ་གུའི་ཕ་མ་ཚོས་ཀྱང་འཛམ་གླིང་གི་བྱིས་པའི་སློབ་གསོ་སྤྲོད་སྟངས་ཐོག་ཏུ་དོ་སྣང་སླེབས་ཏེ་རང་རེའི་སྤྱི་ཚོགས་ནང་དུ་ཕྲུ་གུ་བློ་གྲོས་དང་འཚམས་པའི་བྱིས་སྒྲུང་དེ་ཡང་གལ་ཆེ་རང་བཞིན་ཅན་ཞིག་ཡིན་པ་ཚོར་ནས། རང་གཞུང་ལ་རེ་སྐུལ་དང་བསམ་ཚུལ་ཡང་ཡང་བཤད་པའི་དབང་གིས་རང་གཞུང་གིས་ཀྱང་། གལ་ཆེ་དོན་ཆེ་ཞིག་ཏུ་གཟིགས་ནས་སྐུ་ངལ་ལ་མ་འཛེམས་པས་རོགས་དངུལ་སོགས་ཐབས་འཚོལ་གནང་སྟེ་ད་སྐབས་བྱིས་སྒྲུང་ཀློག་མཁན་མ་རག་པ་དཀའ་ངལ་མ་གཏོགས་བཀླག་རྒྱུ་མི་རག་པའི་དཀའ་ངལ་དེ་དག་རིམ་གྱིས་སེལ་ཐུབ་པ་བྱུང་འདུག་སྙམ།
ད་དུང་མུ་མཐུད་དེ་ལས་གཞི་དེ་དག་རྒྱ་ཆེ་རུ་དང་། ཕུན་སུམ་ཇེ་ལེགས་ཡོང་ཐབས་སུ་སྒོ་ཀུན་ནས་སྙིང་སྟོབས་ཞུམ་མེད་ཀྱིས་འབད་བརྩོན་གནང་དགོས་པའི་གནད་དོན་ཞིག་ཀྱང་རེད་ལ། རང་རེའི་སྤྱི་ཚོགས་ནང་དུ་མི་སྒེར་པ་དང་། ཚོགས་སྡེ་དེ་འདྲའི་བྱིས་སྒྲུང་དུ་མ་ཞིག་རང་རེའི་སྤྱི་ཚོགས་ཐོག་ཏུ་འགྲེམས་སྤེལ་གནང་བཞིན་འདུག་པ་དེ་དག་ནི་དགའ་འོས་པའི་གནས་སྟངས་ཤིག་ཀྱང་ལོས་ཡིན། ཁོང་རྣམ་ཚོ་ལའང་བཀའ་དྲིན་ཆེ་ཞུ་འདོད་བྱུང་། རྒྱུ་མཚན་ནི་སྤྱི་ཚོགས་གཅིག་ཡར་རྒྱས་དང་། མི་རིགས་ཤིག་གསོན་གནས་ཡོང་མིན་ནི་རང་རེའི་མ་འོངས་པའི་གསོན་རྩ་ན་གཞོན་རྣམས་ཡིན་དུས་དེ་དག་ལ་ཤེས་ཡོན་འཔེལ་རྒྱས་ཡོང་བར་མཐུན་འགྱུར་གནང་མཁན་རང་རེའི་སྤྱི་སྒེར་ཚང་མར་འགན་འཁྲི་ཡོད་པ་ཞིག་ཀྱང་རེད། སྤྱི་སྒེར་ཚང་མས་ཕྱ་བ་གྲུ་འདེབས་གནང་དགོས་པ་ཞིག་ལས་སྤྱི་པ་གཅིག་པུ་གང་དུ་གཡུག་རྒྱུ་མེད་པ་དེ་ཡང་ཤེས་དགོས་པའི་གནས་སྟངས་ཤིག་ཀྱང་ལོས་ཡིན་སྙམ།
ལྷག་པར་ང་ཚོ་བཙན་བྱོལ་སྒྲིག་འཛུགས་ལ་ཆ་མཚོན་ན་ཕྱིའི་རོགས་དངུལ་ལས་གཞན་ཡོང་ཁུངས་གང་ཡང་མེད་པ་སྒྲིག་འཛུགས་ཤིག་ཡིན་དུས་ལོ་གཅིག་གི་ནང་དུ་དེ་འདྲའི་བྱིས་སྒྲུང་དུ་མ་ཞིག་ཕབ་སྒྱུར་གྱིས་པར་སྐྲུན་གནང་སྟེ་རང་རེའི་སྤྱི་ཚོགས་ཀྱི་སློབ་གྲྭ་ཁག་ཏུ་འགྲེམས་སྤེལ་གནང་ཐུབ་པ་ནི་ཧ་ཅང་གི་རླབས་ཆེན་དང་། གཟི་བརྗིད་དང་དོན་སྙིང་ལྡན་པ་ཞིག་ཀྱང་རེད་ལ། དགའ་འོས་པའི་གཏམ་བཟང་གི་གནས་སྟངས་ཤིག་ཀྱང་ལོས་ཡིན། བསྐྱར་དུ་འབྲེལ་ཡོད་ལས་བྱེད་རྣམ་པར་བཀའ་དྲིན་ཆེ་ཞུ་དགོས་པའི་གནད་དོན་ཞིག་ཀྱང་ལོས་ཡིན། འབྲེལ་ཡོད་ཚོས་ལྷག་བསམ་དང་སེམས་ཤུགས་ལས་བྱུང་བའི་ལས་དོན་ཞིག་ལ་ངོས་འཛིན་ཞུ་བཞིན་ཡོད་ཅིང་། ད་དུང་ཡིན་ན་མུ་མཐུད་དེ་འགོ་ལས་ཚང་མས་ནུས་ཤུགས་གཅིག་ཏུ་སྤུངས་ཏེ་གནའ་སྒྲུང་ཁག་བརྙན་དེབ་ལམ་ནས་ན་ཆུང་རྣམས་ལ་ངོ་སྤྲོད་གནང་ཐུབ་ཚེ་དགེ་མཚན་ཡོད་པ་ནི་འབྲེལ་བརྗོད་མ་དགོས་པའི་གནས་སྟངས་ཤིག་རེད་སྙམ། དེ་བཞིན་ཕ་ཕ་ཚོས་ཀྱང་སོ་སོའི་བུ་ཕྲུག་རྣམས་ལ་ངེས་པར་སྒྲུང་དེབ་འདི་དག་ཉོ་ནས་ལྟ་ཀློག་གནང་བཅུག་ཚེ་ཕན་ལས་གནད་པ་གང་ཡང་མེད་པ་དེ་རེད། བཀའ་དྲིན་ཆེ། བོད་ཀྱི་ཤེས་རིག་ལས་ཁུངས། དེ་ཡང་སྟོང་ལོ་ཉེར་གཅིག་གི་གནམ་ལོ་གསར་ཚེས་ལ་བོད་གཞིས་བྱེས་གཉིས་སུ་གནས་པའི་རང་རེའི་སྤུན་ཟླ་ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་བ་དང་འབྲེལ། བོད་མི་རིགས་ལ་བཀའ་དྲིན་བླ་མེད་དུ་ཆེ་བའི་༸རྒྱལ་དབང་རིན་པོ་ཆེ་མཆོག་སྐུ་ཚེ་ཡུན་རིང་བརྟན་ཞིང་། མཛད་འཕྲིན་དབྱར་མཚོ་ལྟར་རྒྱས་པ་དང་། ཐུགས་ཀྱིས་བཞེད་དགོངས་མཐའ་དག་གེགས་མེད་ལྷུན་འགྲུབ་ཡོང་བའི་སྨོན་འདུན་ཤུགས་དྲག་དང་བཅས། དེ་བཞིན་བོད་དོན་བདེན་མཐའ་མྱུར་དུ་གསལ་བའི་སྨོན་འདུན་གྲངས་མེད་ཞུ།
