ལྕམ་ནན་སི་པེ་ལོ་སི་མཆོག་ཨ་རིའི་གྲོས་ཚོགས་འོག་མའི་ནང་མང་མོས་འོས་བསྡུའི་ལམ་ནས་སླར་ཡང་གྲོས་ཚོགས་འོག་མའི་ཚོགས་གཙོར་འདེམས་ཐོན་བྱུང་བར་དགའ་སྤོབས་སྐྱེ་ཡི་ཡོད་སྐོར་གསུངས། 
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ད་ལྟ་ཨ་རིའི་གཞུང་འཛིན་འཕོ་འགྱུར་གཏོང་ལ་ཉེ་བའི་སྐབས་འདིར་དམངས་གཙོ་ཚོགས་པར་ཨ་རིའི་གྲོས་ཚོགས་འོག་མའི་ནང་རྒྱལ་ཁ་ཐོབ་ཡོད་པ་ལྟར། ཁ་སང་ཨ་རིའི་གྲོས་ཚོགས་འོག་མའི་ནང་ཚོགས་གཙོའི་འོས་བསྡུ་བྱས་པ་བརྒྱུད། སྤྱི་མཐུན་ཚོགས་པའི་འཐུས་མི་གེ་ཝིན་ (Kevin McCarthy) ལགས་སུ་འོས་གྲངས་ ༢༠༩ དང་ལྕམ་ནན་སི་པེ་ལོ་སི་མཆོག་ལ་འོས་གྲངས་ ༢༡༦ བྱུང་སྟེ། ལྕམ་ནན་སི་པེ་ལོ་སི་མཆོག་སླར་ཡང་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་ཡོད་པ་རེད།
དེ་རིང་༧གོང་ས་རྒྱལ་བ་རིན་པོ་ཆེ་མཆོག་གིས། ལྕམ་ནན་སི་པེ་ལོ་སི་མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བར་འཚམས་འདྲི་ཞུས་པ་དང་སྦྲགས། ལོ་གསར་བར་ཡང་འཚམས་འདྲི་ཞུས་གནང་འདུག་ལ། འཚམས་འཕྲིན་ནང་༧གོང་ས་མཆོག་གིས། ཁྱེད་རང་གིས་གྲོས་ཚོགས་འོག་མའི་ཚོགས་གཙོའི་ལས་འགན་འཁུར་ཏེ། འཛམ་གླིང་ཞི་བདེ་དང་འཆམ་མཐུན་བསྐྲུན་རྒྱུ་མཚོན་པའི་ཨ་རིའི་མི་མང་གི་མངོན་འདོད་དང་རེ་མདུན་སྐོང་ཐུབ་པར་ཐེ་ཚོམ་མེད། ཅེས་དང་། ཁྱེད་ཀྱིས་ངོས་ལ་གྲོགས་པོའི་མཛའ་བརྩེ་བཅིངས་པ་དང་བློ་སེམས་འགྱུར་མེད་ངང་བོད་དང་བོད་མི་མང་ལ་རྒྱབ་སྐྱོར་གནང་བར་ངོས་ནས་བཀའ་དྲིན་ཆེ་ཞུ་རྒྱུ་ཡིན། ཞེས་གསུངས།
ལྕམ་ནན་སི་པེ་ལོ་སི་མཆོག་གིས། ང་རང་གྲོས་ཚོགས་འོག་མའི་ཚོགས་གཙོའི་ལས་གནས་ཐོག་ཞབས་ཕྱི་ཞུའི་གོ་སྐབས་བྱུང་བར་སྤོབས་པ་སྐྱེ་ཡི་ཡོད། ཅེས་དང་། ད་རེས་གྲོས་ཚོགས་འོག་མའི་ཚོགས་གཙོ་འོས་འདེམས་བྱེད་སྐབས། ཏོག་དབྱིབས་གཉན་རིམས་འགོས་ཁྱབ་ཀྱི་དཀལ་ངལ་འོག་དམངད་གཙོ་ཚོགས་པའི་འཐུས་མི་གང་འཚམ་ཞིག་གིས་ཆ་ཤས་ལེན་ཐུབ་མེད་པར་བརྟེན། སྤྱི་མཐུན་ཚོགས་པ་དང་དམངས་གཙོ་ཚོགས་པའི་འོས་མིའི་བར་འོས་ཤོག་གི་ཁྱད་པར་ཞེ་དྲགས་ཤོར་མེད་པ་དང་། ད་རེས་ནི་ཨ་རིའི་གྲོས་ཚོགས་འོག་མའི་ཚོགས་གཙོའི་འོས་བསྡུའི་ཁྲོད་འདས་པའི་ལོ་བཅུ་ཕྲག་གཅིག་རིང་མང་གཙོ་ཚོགས་པར་འོས་གྲངས་ཆེས་ཉུང་ཤོས་ཐོབ་པ་ཞིག་ཆགས་ཡོད་འདུག
ད་རེས་ནི་ལྕམ་ནན་སི་པེ་ལོ་སི་མཆོག་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་བ་ཐེངས་ ༤ པ་དེ་ཆགས་ཀྱི་ཡོད་པ་དང་། ཕྱི་ལོ་ ༢༠༠༧ ལོར་ཁོ་མོ་གྲོས་ཚོགས་འོག་མའི་ཚོགས་གཙོ་ཐོག་མར་གྱུར་སྐབས། གྲོས་ཚོགས་འོག་མའི་ལོ་རྒྱུས་ནང་གི་བུད་མེད་ཚོགས་གཙོ་ཐོག་མ་ཆགས་ཡོད་ཅིང་། ལྕམ་ནན་སི་པེ་ལོ་སི་མཆོག་ནི་ཕྱི་ལོ་ ༡༩༨༧ ལོ་ནས་ཨ་རིའི་གྲོས་ཚོགས་འཐུས་མི་དང་། ཕྱི་ལོ་ ༢༠༠༣ ནས་དམངས་གཙོ་ཚོགས་པའི་མགོ་འཁྲིད་གནང་ཞིང་། ཨ་རིའི་ལོ་རྒྱུས་ནང་གི་སྲིད་དོན་ཚོགས་པ་ཞིག་དབུ་འཁྲིད་གནང་མཁན་གྱི་བུད་མེད་ཐོག་མ་ཆགས་ཡོད་འདུག
༧གོང་ས་མཆོག་གིས་ནམ་རྒྱུན་ལྕམ་ནན་སི་པེ་ལོ་སི་མཆོག་ནི་མཛའ་བརྩེ་ཟབ་པའི་གྲོགས་པོ་ཞིག་དང་འདས་པའི་ལོ་མང་རིང་ལྷག་སེམས་རྣམ་དག་དང་བློ་སེམས་འགྱུར་མེད་ཀྱིས་བོད་ཀྱི་འཐབ་རྩོད་ཐོག་རྒྱབ་སྐྱོར་ཤུགས་ཆེན་བསྐྱོན་མཁན་ཞིག་ཡིན་ཞེས་གསུངས་ཡོད་པ་ལྟར། ལྕམ་ནན་སི་པེ་ལོ་སི་མཆོག་ནི་ཨ་རིའི་གྲོས་ཚོགས་འཐུས་མིའི་ནང་ནས་བོད་དང་བོད་མིར་དམིགས་བསལ་གྱི་འབྲེལ་ལམ་ཟབ་ཅིང་བོད་དོན་ལ་རྒྱུས་མངའ་དང་རྒྱབ་སྐྱོར་ཤུགས་ཆེན་གནང་མཁན་ཞིག་ཡིན་པ་དང་། ཕྱི་ལོ་ ༢༠༠༧ དང་ ༢༠༠༨ ། དེ་བཞིན་ཕྱི་ལོ་ ༢༠༡༧ ལོའི་ཟླ་ ༤ བཅས་ཀྱི་ནང་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་གི་སྣེ་འཁྲིད་དེ། བལ་ཡུལ་དང་བཞུགས་སྒར་དྷ་ས་ནས་༧གོང་ས་མཆོག་ལ་མཇལ་འཕྲད་དང་བོད་མིའི་སྒྲིག་འཛུགས་ཀྱི་གཙོས་ཉེ་འཁྲིས་བཙན་བྱོལ་བོད་མིའི་སློབ་གྲྭ་དང་ཚོགས་སྡེ་ཁག་བཅས་མི་མང་གི་བདེ་སྡུག་ལ་གཟིགས་ཞིབ་གནང་ཡོད་ལ། ཕྱི་ལོ་ ༢༠༡༥ ལོར་ཁོ་མོས་ཨ་རིའི་གྲོས་ཚོགས་ཀྱི་སྐུ་ཚབ་ཚོགས་ཆུང་ཞིག་གི་སྣེ་འཁྲིད་ཀྱིས། བོད་ནང་བསྐྱོད་དེ་བོད་ནང་གི་བོད་མིའི་གནས་སྟངས་ལ་གཟིགས་ཞིབ་གནང་ཡོད་པ་རེད།
ཨ་རིའི་གྲོས་ཚོགས་འོག་མའི་ཚོགས་གཙོའི་ལས་ཡུན་སྐབས་དང་པོའི་རིང་། ལྕམ་ནན་སི་པེ་ལོ་སི་མཆོག་ནི་སྲིད་འཛིན་ཟུར་བ་ཨོ་བྷ་མའི་གཞུང་གི་ཆབ་སྲིད་དང་དཔལ་འབྱོར། དེ་བཞིན། འཕྲོད་བསྟེན་སོགས་དང་འབྲེལ་བའི་སྲིད་བྱུས་མང་དག་ཅིག་གི་རྒྱབ་རྟེན་ཤུགས་ཆེ་ཤོས་ཤིག་ཡིན་པ་དང་། ཕྱི་ལོ་ ༢༠༡༩ ལོར་ཁོང་མོ་སྐབས་གསུམ་པའི་ཚོགས་གཙོ་ཡིན་སྐབས་ཨ་རིའི་སྲིད་འཛིན་ཊོམ་ཕུ་ལགས་ཀྱིས་དབང་ཆ་ལོག་སྤྱོད་དང་གྲོས་ཚོགས་ཀྱི་ལས་དོན་ལ་འགལ་རྐྱེན་བསྐྲུན་པའི་ཉེས་འཛུགས་སོགས་བྱས་ཡོད་པ་རེད་ལ། ཨ་རིའི་མང་གཙོ་ཚོགས་པའི་གྲོས་ཚོགས་འཐུས་མི་རྣམས་དང་སྲིད་དོན་མང་པོའི་དགའ་མོས་བྱེད་སའི་ཆབ་སྲིད་མི་སྣ་ཞིག་ལ་ངོས་འཛིན་བྱེད་ཀྱི་ཡོད་འདུག
ལྕམ་ནན་སི་པོལ་སི་མཆོག་ནི་ཕྱི་ལོ་ ༡༩༤༠ ཟླ་ ༣ ཚེས་ ༢༦ ཉིན་ཨ་རིའི་མངའ་སྡེ་མའེ་རེ་ལན་ཌའི་གྲོང་ཁྱེར་ (Baltimore) ནང་སྐྱེས་ཤིང་། ཁོ་མོའི་པ་ལགས་ཐའོ་མ་སི་(Thomas D’Alesandro Jr) ལགས་ནི་མའེ་རེ་ལན་ཌིའི་གྲོས་ཚོགས་འཐུས་མི་དང་ཨ་མ་ (Anunciata D’Alesandro) ལགས་ནི་སྲིད་དོན་ཐོག་དོ་དབྱིངས་ཆེན་པོ་གནང་མཁན་ཞིག་ཡིན་སྟབས། ལྕམ་ནན་སི་པེ་ལོ་སི་མཆོག་ཆུང་དུས་ནས་ཕ་མ་གཉིས་ཀྱི་ཤུགས་རྐྱེན་འོག་ཨ་རིའི་ཆབ་སྲིད་ནང་ཞུགས། ཁོང་མོ་དང་བཟའ་ཟླ་པོལ་པེ་ལོ་སི་ (Paul Pelosi) གཉིས་ལ་བྱིས་པ་ལྔ་ཡོད།
གསར་འགོད་པ། སྐལ་བཟང་སྦྱིན་པ།
