༧གོང་ས་མཆོག་གིས་ཉིན་གསུམ་རིང་གི་ཤེས་རབ་སྙིང་པོའི་བཀའ་ཆོས་དབུ་འཛུགས་གནང་།

༧གོང་ས་མཆོག་གིས་ཀོ་རི་ཡའི་ནང་པ་ཚོར་སྟོང་ཉིད་ཀྱི་ལྟ་བ་དང་བྱང་ཆུབ་སེམས་ཀྱི་ཉམས་ལེན་ཐོག་ནས་ཆགས་སྡང་གི་ཉོན་རྨོངས་མཚོན་པའི་ཉོན་རྨོངས་ཤུགས་ཆུང་ངུར་གཏོང་དགོས་ཀྱི་ཡོད་ཅེས་གསུངས། ཀོ་རི་ཡའི་ནང་པའི་དད་ལྡན་དོན་གཉེར་བ་ཚོས་ཇི་ལྟར་གསོལ་འདེབས་ཞུས་དོན་བཞིན། དེ་རིང་ཕྱི་ཚེས་ ༥ ནས་ ༧ བར་ཉིན་གྲངས་གསུམ་རིང་༸གོང་ས་རྒྱལ་བ་རིན་པོ་ཆེ་མཆོག་གིས་བཞུགས་སྒར་རྒྱལ་བའི་ཕོ་བྲང་ནས་དྲ་ལམ་བརྒྱུད་ཤེས་རབ་སྙིང་པོའི་བཀའ་ཆོས་དབུ་འཛུགས་གནང་སོང་བ་དང་། སྐབས་དེར་མགོན་པོ་གང་ཉིད་མཆོག་གིས་ང་རང་ཚོ་མིའི་འཚོ་བའི་རྩ་བ་ནི་བྱམས་བརྩེ་ཡིན་པས་བྱིས་པ་ཆུང་དུས་ནས་བྱམས་བརྩེ་སློབ་འཁྲིད་གནང་རྒྱུ་གལ་ཆེན་ཡིན་ཞེས་གསུངས།

གསུང་ཆོས་དབུ་འཛུགས་ཀྱི་ཐོག་མར་༧གོང་ས་མཆོག་གིས། དེ་རིང་ཀོ་རི་ཡའི་ཆོས་གྲོགས་ཚོར་ཉིན་གསུམ་རིང་ཤེས་རབ་སྙིང་པོ་འགྲེལ་བཤད་བསྐྱོན་རྒྱུའི་གོ་སྐབས་བྱུང་བ་ནི་བསྐལ་བ་བཟང་པོ་ཡིན་པའི་འཚམས་འདྲི་དང་སྦྲགས། སྔོན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་པའི་ཤེས་རབ་ཟེར་བ་ནི་སངས་རྒྱས་པའི་ཆོས་ནང་གི་དད་པ་གཅིག་པུ་མ་ཡིན་པར་གཙོ་བོ་ཆོས་རབ་ཏུ་རྣམ་འབྱེད་ཀྱི་ཤེས་རབ་བསམ་བློ་བཏང་ནས། དད་པ་དང་ཤེས་རབ་གཉིས་ལས་གཙོ་བོ་ཤེས་རབ་རེད། དད་པ་དེ་ཡང་ཤེས་རབ་ཀྱིས་བགྲང་བའི་དད་པ་ཞིག་དགོས་ཀྱི་ཡོད། སྤྱིར་བཏང་དད་པ་ལ་དབང་རྟུལ་དད་པའི་རྗེས་འབྲང་དང་དབང་སྣོན་ཆོས་ཀྱི་རྗེས་འབྲང་ཞེས་བཤད་རྒྱུན་ཡོད་པ་རེད། ད་ལྟ་ང་ཚོས་ཤེས་རབ་ཀྱི་ཕ་རོལ་ཏུ་ཕྱིན་པ་ཟེར་བའི་སྐབས་ཀྱི་ཤེས་རབ་དེ་དབང་སྣོན་ཆོས་ཀྱི་རྗེས་སུ་འབྲངས་ཏེ། རྒྱུ་མཚན་ལྡན་པ་དང་དངོས་ཡོད་གནས་ཚུལ་གང་ཡིན་ལ་ཤེས་རབ་ཀྱིས་དཔྱད་པ་བཏང་ནས་ཤེས་པར་བྱ་བ་ཞིག་ཡིན། དེར་བརྟེན། སངས་རྒྱས་བཅོམ་ལྡན་འདས་ཀྱིས། དགེ་སློང་དག་གམ་མཁས་རྣམས་ཀྱིས། །སྲེག་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། ། གསུངས་ཡོད་པ་དེར་ནུས་པ་ཆེན་པོ་འདུག ཅེས་གསུངས།

ཡང་མགོན་པོ་གང་ཉིད་མཆོག་གིས། ང་རང་ཚོ་བྱིས་པ་སྐྱེས་པའི་སྐབས་ནས་བཟུང་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་ཡིན་པ་འགྲེལ་བཤད་རྒྱག་མི་དགོས་པ་ཞིག་རེད། ང་ཚོར་རིང་བཞིན་གྱིས་སྡུག་བསྔལ་མི་འདོད་པ་དང་བདེ་བ་འདོད་པ་ཡོད་ཡོད་པ་རེད། བདེ་བའི་རྩ་བ་བྱམས་བརྩེ་ཡིན་པ་དང་བུ་གུ་སྐྱེས་མ་ཐག་ནས་མའི་བྱམས་བརྩེའི་འོག་ནས་འཚོ་ཡི་ཡོད། བུ་གུར་ལྟོ་ཆས་སྤྲད་པ་ཙམ་མ་ཡིན་པར་ཨ་མའི་འོ་མ་སྤྲོད་དགོས་པ་དང་ཨ་མའི་འོ་མ་དེ་བྱམས་བརྩེའི་འབྲས་བུ་ཡིན། དེར་བརྟེན། ང་ཚོའི་མི་ཚེ་མགོ་ས་དེ་བྱམས་བརྩེའི་འོག་མགོ་རྩོམ་གྱི་ཡོད། ཆོས་ཀྱི་སྐད་ཆ་མ་ཡིན་པར་སེམས་ཅན་དུད་འགྲོ་ཚོའི་བར་མ་དང་བུའི་བརྩེ་བ་རིང་བཞིན་གྱི་ཡོང་གི་ཡོད། ང་ཚོ་མིའི་ལུས་རྟེན་གྱི་མཚོན་པའི་སྲོག་ཆགས་མང་པོ་ཞིག་མའི་བརྩེ་བའི་འོག་འཚོ་བསྡད་ཡོད་པ་དང་མའི་བརྩེ་བ་མེད་ཚེ་སྲོག་ཆགས་ཚོའང་འཚོ་ཐབས་མེད། བུ་གུ་ལོ་བཞི་ལྔ་ཡིན་དུས་ནང་ཁུལ་ལ་མི་རིགས་དང་ཆོས་ལུགས་སོགས་ཀྱི་དབྱེ་བ་མེད་པར་སྐྱིད་པོ་ཞེ་དྲགས་ཡོད་པ་རེད། དེ་ནས་སློབ་གྲྭར་ཞུགས་པ་དང་སློབ་གྲྭས་བྱམས་བརྩེ་གལ་ཆེན་པོ་ཡིན་པའི་དམིགས་བསལ་སློབ་འཁྲིད་བྱེད་ཀྱི་མེད་པ་དང་། སློབ་གྲྭའི་ནང་ནས་བུ་གུ་ཚོར་མི་རིགས་དང་ཆོས་ལུགས། དབུལ་བོ་དང་ཕྱུག་པོ་སོགས་ཀྱི་དབྱེ་བ་བསླབ་ཡོང་གི་ཡོད་པ་རེད། ང་རང་ཚོ་མིའི་འཚོ་བའི་རྩ་བ་ནི་བྱམས་བརྩེ་ཡིན་ཡང་ད་ལྟ་བསླབ་བསྡད་པའི་སློབ་ཚན་ནང་བྱམས་བརྩེ་མེད་པ་རེད། དེར་བརྟེན། བྱམས་བརྩེ་ནི་ཆོས་ཀྱི་སྐད་ཆ་མ་ཡིན་པར་སློབ་ཚན་ཏུ་འཁྲིད་རྒྱུ་གལ་ཆེན་པོ་ཡིན། ཞེས་གསུངས།

དེ་རྗེས་དྲི་བ་དྲིས་ལན་སྐབས་ནང་ཆོས་དང་ཚན་རིག་གི་དམིགས་ཡུལ་མི་འདྲ་དོན་གང་ཡིན་དྲིས་པར་ཁོང་གིས། ང་ཚོས་གློ་བུར་དུ་ནང་ཆོས་དང་ཚན་རིག་གི་དམིགས་ཡུལ་མི་འདྲ་ཞེས་བཤད་ཆོག་གི་ཡོད། ནང་ཆོས་ཀྱིས་སེམས་ཁམས་རིག་པ་གཙོ་བོ་བཤད་ཀྱི་ཡོད་པ་དང་། ཚན་རིག་གིས་དངོས་ཁམས་རིག་པ་གཙོ་བོ་བཤད་ཀྱི་ཡོད། འོན་ཀྱང་། ཞིབ་ཚགས་པོའི་ཐོག་ནས་བསམ་བློ་བཏང་བ་ཡིན་ན། ནང་ཆོས་ཀྱིས་སེམས་ཀྱི་ཞི་བདེ་བསྐྲུན་གྱི་ཡོད་པ་དང་། ད་ལྟའི་བར་དེང་རབས་ཚན་རིག་གིས། ཕྱི་དངོས་པོ་ཙམ་མ་གཏོགས་ནང་སེམས་ཁམས་རིག་པའི་སྐོར་ལ་དོ་སྣང་དེ་ཙམ་བྱས་མེད་མོད། ད་ལྟ་རིམ་བཞིན་དུ་ཚན་རིག་པས་ཀྱང་སེམས་ཁམས་རིག་པའི་ཐོག་དོ་སྣང་ཆེ་རུ་ཕྱིན་ཏེ། ཀླད་པའི་ཚན་རིག་མཁས་པ་ཚོས་སེམས་ཀྱི་རྣམ་རྟོག་འདྲ་མིན་ཐོག་དོ་སྣང་གསར་པ་བྱེད་ཀྱི་ཡོད་པ་རེད། ངོས་ནས་ནང་ཆོས་ཀྱིས་ནང་སེམས་ཀྱི་འཕྲོད་བསྟེན་དང་ཞི་བདེ་བསྐྲུན་རྒྱུ་དང་། ཚན་རིག་གིས་ལུས་པོའི་འཕྲོད་བསྟེན་དང་བདེ་ཐང་སྐོར་བཤད་ཀྱི་ཡོད། རྩ་བའི་ལུས་པོའི་བདེ་ཐང་གི་རྩ་བ་དེ་ནང་སེམས་ལ་ཐུག་ཡོད་དུས། ད་རིང་ཁ་སང་ཚན་རིག་པས་ནང་ཆོས་ཀྱི་སེམས་ཁམས་རིག་པའི་སྐོར་ལ་དོ་སྣང་བྱེད་མཁན་ཤུགས་ཆེར་འགྲོ་ཡི་འདུག ངོས་ནས་ཚན་རིག་པར་འབྲེལ་བ་ཞུས་ཏེ་ལོ་བཅུ་ཕྲག་ཁ་ཤས་ཕྱིན་ཡོད་པ་རེད། ཚན་རིག་པའི་ནང་ནས་སྐྱེ་བ་སྔ་ཕྱི་དང་ཐར་བ་དང་ཐམས་ཅན་མཁྱེན་པའི་གོ་འཕང་སྐོར་བཤད་ཀྱི་མེད་པར་འཕྲལ་སེལ་སེམས་ཀྱི་བདེ་སྐྱིད་ཡོང་ཐབས་སྐོར་ལ་ཚན་རིག་པའི་དོ་སྣང་ཤུགས་ཆེར་ཕྱིན་འདུག དེར་བརྟེན། ནང་ཆོས་དང་ཚན་རིག་བར་ཕན་ཚུན་གཉིས་ཕན་ཡོང་ཐུབ་པ་ཞིག་རེད། ཅེས་གསུངས།

ཡང་བཀའ་ཆོས་ཞུ་མཁན་བཙུན་མ་ཞིག་གིས་འདོད་ཆགས་དང་ཉོན་རྨོངས་སྐྱེས་པ་ན་ལྡོག་ཐབས་གང་ཡོད་གསུངས་རོགས་ཞུས་པར་༧གོང་ས་མཆོག་གིས། འདོད་ཆགས་མཚོན་པའི་ཞེ་སྡང་གི་གྲས་དེ་ཚོ་མངོན་འགྱུར་བ་ཤུགས་ཆེན་པོ་ཡིན་དུས་གཉེན་པོ་བསྟེན་རྒྱུ་ལས་སླ་པོ་ཡོད། དེ་ཚོ་གྲས་དེ་རྐྱེན་དང་འཕྲད་ན་མགྱོགས་པོ་ཡོང་བསྡད་པ་ཞིག་དང་གཏིང་རིང་བ་ཡོད་དུས། འཕྲལ་སེལ་གྱིས་མི་རྟག་པ་སྒོམ་ནས་འདོད་ཆགས་ཀྱི་གཉེན་པོ་བསྟེན་རྒྱུ་དང་ཡུན་རིང་ཤུགས་ཆེན་པོས་བྱམས་པ་སྒོམ་ནས་ཞེ་སྡང་ཇེ་ཆུང་དུ་གཏང་རྒྱུ་དང་། ལྷག་པར་དུ་སྟོང་ཉིད་ཀྱི་ལྟ་བ་དང་བྱང་ཆུབ་སེམས་ཀྱི་ཉམས་ལེན་ཐོག་ནས་ཆགས་སྡང་གི་ཉོན་རྨོངས་མཚོན་པའི་ཉོན་རྨོངས་དེ་ཚོ་ཤུགས་ཆུང་ངུར་གཏོང་དགོས་ཀྱི་ཡོད། ཅེས་གསུངས།

གསར་འགོད་པ། སྐལ་བཟང་སྦྱིན་པ།