ཟླ་འདིའི་ཕྱི་ཚེས་ ༡༦ ཉིན་ནས་རྒྱ་གར་རྒྱ་ཡོངས་སུ་ཏོག་དབྱིབས་སྔོན་འགོག་སྨན་ཁབ་རྒྱག་མགོ་འཛུགས་རྒྱུ་ཡིན་པས་བཞུགས་སྒར་དྷ་ས་ཁུལ་ནས་བདེ་ལེགས་སྨན་ཁང་དུ་སྨན་ཁབ་ས་ཚིགས་ཤིག་ཚོད་ལྟའི་ཚུལ་དུ་བཙུགས་འདུག
སྔོན་འགོག་སྨན་ཁབ་དང་འབྲེལ་ནས་སྲིད་བློན་མུ་དྷི་མཆོག་སྒེར་གྱི་ཊུ་ཝེ་ཊུར་སྤྱི་ཚོགས་དྲ་ལམ་སྟེང་། ཕྱི་ཚེས་ ༡༦ ཉིན་རྒྱ་གར་གྱིས་ཏོག་དབྱིབས་གཉན་རིམས་གདོང་ལེན་གྱི་གོམ་སྟབས་ཆེན་པོ་ཞིག་སྤོ་རྒྱུ་ཡིན་པ་དང་། ཉིན་དེ་ནས་བཟུང་རྒྱལ་ཡོངས་ཀྱི་སྨན་ཁབ་ལས་གཞི་མགོ་འཛུགས་ཏེ། རྒྱལ་ཡོངས་ཀྱི་དཔའ་ངར་ལྡན་པའི་སྨན་པ་དང་སྨན་ཞབས་པ། ནད་ཡམས་ལ་གདོང་ལེན་བྱེད་པའི་ལས་དོན་གྱི་གདོང་ལ་འབུད་མཁན་རྣམས་གཙོར་འཛིན་བྱ་རྒྱུ་ཡིན། ཞེས་བཀོད་འདུག
ད་ལྟ་རྒྱ་གར་རྒྱལ་ཡོངས་ཀྱི་རྫོང་ ༧༠༠ ཙམ་གྱི་ནང་སྨན་ཁབ་ས་ཚིགས་བཙུགས་ཡོད་འདུག་ལ། འཕྲོད་ལས་པ་གྲངས་ཁྲི་ ༡༥ ཙམ་ལ་སྔོན་འགོག་སྨན་ཁབ་ལག་ལེན་བསྟར་ཕྱོགས་ཀྱི་སྦྱོང་བརྡར་སྤྲད་ཡོད་འདུག དེ་བཞིན་སྨན་ཁབ་དེ་ཐོག་མར་སྨན་པ་དང་འཕྲོད་ལས་པ་རྣམས་ལ་བརྒྱབ་རྗེས། ལོ་ན་ ༥༠ ཡན་དང་ཏོག་དབྱིབས་གཉན་རིམས་ཕོགས་ཏེ་ཛ་དྲག་གི་གནས་སྟངས་འོག་ཡོད་མཁན་རྣམས་ལ་རྒྱག་འཆར་ཡོད་འདུག
དབུས་གཞུང་གི་བཀའ་རྒྱ་ཕེབས་པ་བཞིན་རྫོང་རེ་རེའི་ནང་གཞུང་འབྲེལ་སྨན་ཁང་གཉིས་དང་གཞུང་འབྲེལ་མིན་པའི་སྨན་ཁང་གཅིག་བཅས་ལ་སྨན་ཁབ་ལག་བསྟར་གྱི་སྦྱོང་བརྡར་རམ་ཚོད་ལྟའི་ས་ཚིགས་དགོས་པ་བཀའ་ཁྱབ་བཏང་བ་བཞིན། ཕྱི་ཚེས་ ༦ ཉིན་བཞུགས་སྒར་དྷ་ས་ཁུལ་གྱི་ས་གནས་ཀང་རཱ་རྫོང་གཞུང་གིས་གཞུང་འབྲེལ་མིན་པའི་སྨན་ཁང་དེ་བདེ་ལེགས་སྨན་ཁང་བདམས་ཏེ། བདེ་ལེགས་སྨན་ཁང་དུ་སྔོན་འགོག་སྨན་ཁབ་ས་ཚིགས་བཟོས་ཚེ་དཀའ་ཁག་ཅི་ཡོང་ལ་ཚོད་ལྟ་བྱེད་བཞིན་ཡོད་འདུག་ལ། ཕྱི་ཚེས་ ༨ ཉིན་བདེ་ལེགས་སྨན་ཁང་གི་ཚོད་ལྟའི་ས་ཚིགས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཀྱང་ཕེབས་ཏེ་གཟིགས་ཞིབ་གནང་ཡོད་འདུག
འདི་གའི་གསར་འགོད་པས་ཁ་པར་བརྒྱུད་བདེ་ལེགས་སྨན་ཁང་གི་སྨན་པ་བསྟན་འཛིན་བརྩོན་འགྲུས་ལགས་སུ་སྔོན་འགོག་སྨན་ཁབ་དང་དེའི་ས་ཚིགས་ཀྱི་སྐོར་དྲིས་པར་ཁོང་གིས། ས་གནས་རྫོང་གཞུང་གིས་བདེ་ལེགས་སྨན་ཁང་སྨན་ཁབ་ས་ཚིགས་སུ་ད་དུང་གཏན་འཁེལ་བྱས་མེད་ནའང་། དྷ་སའི་ཉེ་འཁོར་དུ་བདེ་ལེགས་སྨན་ཁང་སྨན་ཁབ་ས་ཚིགས་སུ་བཟོ་རྒྱུ་ཡིན་པ་ཕལ་ཆེར་གཏན་འཁེལ་བ་ལྟ་བུ་ཞིག་ཡིན་སྐོར་དང་། དབུས་གཞུང་གིས་ཆོག་མཆན་ཡོད་པའི་སྔོན་འགོག་སྨན་ཁབ་གཉིས་ཡོད་པ་ནས་གང་རྒྱག་འཆར་ཡོད་པ་དང་དུས་ནམ་ཞིག་ནས་རྒྱག་མགོ་བརྩམ་རྒྱུ་ཡིན་སྐོར་སོགས་ཀྱི་ཐད་ས་གནས་གཞུང་གིས་བཀའ་ཁྱབ་ཁ་གསལ་གང་ཡང་གནང་མེད་པ་དང་། གལ་སྲིད་བདེ་ལེགས་སྨན་ཁང་སྔོན་འགོག་སྨན་ཁབ་ས་ཚིགས་སུ་གཏན་འཁེལ་བྱུང་ཚེ། དེའི་ནང་ཉེ་འཁོར་གྱི་ས་གནས་ཡུལ་མི་དང་བོད་མི་རྣམས་ལ་སྨན་ཁབ་རྒྱག་དགོས་ངེས་ཤིག་ཡིན་སྐོར་འབྲེལ་བརྗོད་གནང་བྱུང་།
འདི་ལོའི་ཕྱི་ཚེས་ ༣ ཉིན་རྒྱ་གར་གཞུང་གིས་དབྱིན་ཡུལ་དང་སི་ཝེ་ཊན་གཉིས་ཀྱིས་བཟོས་པའི་ཀོ་ཝིཌ་ཤིལ་ཌི་ (Covidshield) སྨན་ཁབ་དང་། རྒྱ་གར་གྱིས་བཟོས་པའི་ཀོ་ཝེག་སིན་ (COVAXIN) ཏོག་དབྱིབས་སྨན་ཁབ་གཉིས་ལ་ཛ་དྲག་ངང་སྤྱོད་ཆོག་པའི་ཆོག་མཆན་སྤྲད་ཡོད་པ་དང་། རྒྱ་གར་རྒྱལ་ཡོངས་སྨན་རྫས་སྟངས་འཛིན་ལྷན་ཚོགས་ཀྱིས་ཏོག་དབྱིབས་སྨན་ཁབ་དེ་གཉིས་ཀ་བེད་སྤྱོད་བཏང་ན་བདེ་ཐང་ཡིན་པའི་ཡིག་ཆ་ཁག་ལྷན་ཚོགས་སུ་འབྱོར་ཡོད་སྐོར་བརྗོད་ཡོད་ནའང་། རྒྱ་གར་གྱི་སྨན་པ་དང་སྲིད་འཛིན་ཁ་གཏད་ཚོགས་པའི་ཆབ་སྲིད་པ་ཁག་ཅིག་གིས་སྨན་ཁབ་དེ་གཉིས་ཀྱི་བརྟག་དཔྱད་ཀྱི་བརྒྱུད་རིམ་དང་གྲུབ་དོན་སོགས་ཁ་གསལ་མེད་པའི་སྐྱོན་བརྗོད་བྱེད་ཀྱིན་ཡོད་པ་རེད་ལ། སྲིད་བློན་མུ་དྷུ་མཆོག་ནས་འདི་ལོའི་ཕྱི་ཟླ་ ༧ བར་དུ་མི་གྲངས་ས་ཡ་ ༣༠༠ ཙམ་ལ་སྨན་ཁབ་རྒྱག་འཆར་ཡོད་སྐོར་གསུངས་ཡོད་པ་རེད།
རྒྱ་གར་ནི་ཨ་རི་ཕུད་པའི་ཏོག་དབྱིབས་གཉན་རིམས་ཀྱི་ནད་པའི་གྲངས་མང་ཤོས་དེ་ཆགས་ཡོད་པ་དང་། ཉེ་ལམ་ནས་ནད་པའི་གྲངས་ཉུང་དུ་འགྲོ་བཞིན་ཡོད་ནའང་། འདས་པའི་ཆུ་ཚོད་ཉེར་བཞིའི་རིང་རྒྱ་གར་རྒྱལ་ཡོངས་སུ་ཏོག་དབྱིབས་ནད་པ་གྲངས་ ༡༦༣༡༡ ཐོན་ཡོད་པ་རེད། ད་སྔ་བར་རྒྱ་གར་ནང་ཁྱོན་ནད་པ་གྲངས་ས་ཡ་ ༡༠།༤ ལྷག་བྱུང་ཡོད་པའི་ཁྲོད་ནད་པ་ཁྲི་ ༡༥ ཙམ་རྐྱེན་འདས་སུ་ཕྱིན་ཡོད་པ་རེད། ད་ལྟའི་ཆར་ནད་མནར་བཞིན་པ་གྲངས་ ༢,༢༢,༥༢༦ ཡོད་འདུག
གསར་འགོད་པ། ཀླུ་མགོན་ཐར།
