ཨ་རིས་ཐའེ་ཝན་ལ་བཟུང་བའི་འབྲེལ་ལམ་སྐོར་གྱི་ཁྲིམས་མེད་པ་བཟོས་པར་རྒྱ་ནག་གཞུང་གིས་ངོས་ལེན་མེད་པ་མ་ཟད་མཐའ་གཅིག་ཏུ་ངོ་རྒོལ་ཡོད་པའི་ལན་འདེབས་བྱས་འདུག
ཁ་སང་རྒྱ་ནག་གཞུང་འབྲེལ་གོ་ལའི་དུས་བབ་གསར་ཁང་སྟེང་། ཟླ་འདིའི་ཕྱི་ཚེས་ ༩ ཉིན་ཨ་རིའི་གཞུང་འབྲེལ་ཐོག་ཐའེ་ཝན་ལ་བཟུང་བའི་འབྲེལ་ལམ་སྐོར་གྱི་སྲིད་ཇུས་ལ་འགྱུར་བ་བཏང་སྟེ། མ་འོངས་པར་ཨ་རི་དང་ཐའེ་ཝན་བར་འབྲེལ་ལམ་བྱེད་པར་རྒྱ་ནག་གཞུང་ལ་བསྟེན་བསྟུན་དགོས་པའི་བཀག་རྒྱ་བཀྲོལ་བར་བརྟེན། ཨ་རིའི་སྲིད་འཛིན་ཊོམ་ཕུ་གཞུང་གིས་སྲིད་དབང་མཇུག་བསྡུ་ལ་ཉེ་བའི་སྐབས་སྐབས་འདིར། རྒྱ་ནག་དང་ཨ་རིའི་འབྲེལ་ལམ་ལ་གཏོར་བརླག་དང་ཐའེ་ཝན་ཁུལ་གྱི་ལྷིང་འཇགས་ལ་ཉེན་ཁ་བསྐྲུན་ཡོད་སྐོར་གྱི་སྐྱོན་བརྗོད་བྱས་འདུག
དེ་འབྲེལ་ཐད་གོ་ལའི་དུས་བབ་ཟེར་བས། དེ་རིང་ཁ་སང་གི་རྒྱལ་སྤྱིའི་གནས་བབ་གཞིར་བཟུང་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་རྒྱ་ནག་གཅིག་གི་སྲིད་ཇུས་ལ་ངོས་འཛིན་གྱིས། འཛམ་གླིང་རྒྱལ་ཁབ་ཕལ་ཆེ་བས་ཐའེ་ཝན་ལ་གཞུང་འབྲེལ་འབྲེལ་ལམ་འཛུགས་ཀྱི་མེད་པས། རྒྱལ་སྤྱིའི་ཁས་ལེན་གཞིར་བཟུང་ཨ་རིས་ཀྱང་ཐའེ་ཝན་ལ་གཞུང་འབྲེལ་གྱི་འབྲེལ་བ་མི་བྱེད་པའི་ཁས་ལེན་རྒྱུན་སྐྱོང་བྱེད་དགོས་ཀྱི་ཡོད། གལ་སྲིད་ཨ་རིས་ཐའེ་ཝན་ལ་གང་བྱུང་འབྲེལ་འདྲིས་བྱས་ཚེ། ཨ་རྒྱ་གཉིས་ཀྱི་འབྲེལ་ལམ་བརླག་པ་ཙམ་དུ་མ་ཟད་འཐབ་འཁྲུག་ཀྱང་བརྒྱབ་དགོས་བྱུང་གི་རེད་ལ། རྒྱལ་སྤྱིའི་སྟེང་ཐའེ་ཝན་ཁུལ་དུ་ཞི་བདེ་ལྷིང་འཇགས་དགོས་པའི་གནས་བབ་ཀྱང་འགྱུར་ངེས་རེད། ཅེས་བརྗོད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅིན་ཟེར་བས། རྒྱ་ནག་གིས་ཨ་རིའི་བྱ་སྤྱོད་ལ་ངོས་ལེན་མེད་པ་མ་ཟད་མཐའ་གཅིག་ཏུ་ངོ་རྒོལ་བྱེད་ཀྱི་ཡོད། ཨ་རིའི་ཐའེ་ཝན་ལ་བཟུང་བའི་འབྲེལ་ལམ་སྐོར་གྱི་ཁྲིམས་དེས། རྒྱ་ནག་གཅིག་གི་སྲིད་ཇུས་དང་ཕྱི་ལོ་ ༡༩༧༢ ལོར་ཨ་རྒྱ་གཉིས་བར་བཞག་པའི་གྲོས་མཐུན་སོགས་ལ་རྡོག་རོལ་གཏོང་གི་ཡོད། ཅེས་ཨ་རིར་སྐྱོན་བརྗོད་བྱས་འདུག་པ་དང་། རྒྱ་ནག་གིས་ཐའེ་ཝན་ནི་ཁ་བྲལ་ཐབས་མེད་པའི་རྒྱ་ནག་གི་ཆ་ཤས་ཤིག་ཡིན་པས། ཐའེ་ཝན་རྒྱ་ནག་གི་ཁོངས་གཏོགས་སུ་བསྡུ་ཐབས་སུ་དམག་ཤུགས་བཀོལ་དགོས་བྱུང་ཡང་བཀོལ་གྱི་ཡིན་ཞེས་ནམ་རྒྱུན་འཇིགས་སྐུལ་བྱེད་ཀྱི་ཡོད་པ་རེད།
ཕྱི་ཚེས་ ༩ ཉིན་ཨ་རིའི་རྒྱལ་སྲིད་དྲུང་ཆེ་མེག་པོམ་པེ་མཆོག་གིས། འདས་པའི་ལོ་བཅུ་ཕྲག་འགའི་རིང་ཨ་རིས་རྒྱ་ནག་གཞུང་ལ་བསྟུན་ཐབས་སུ། ཨ་རིའི་དང་ཐའེ་ཝན་བར་གཞུང་འབྲེལ་གྱི་འབྲེལ་ལམ་འཛུགས་མི་ཆོག་པའི་བཀག་རྒྱ་རྩིས་མེད་དུ་བཏང་སྟེ། ཐའེ་ཝན་ནི་མང་གཙོ་དང་ཨ་རིའི་ཡི་ཆེས་བློ་འགེལ་ཆོག་པའི་མཉམ་ལས་ཚོང་གྲོགས་ཤིག་ཡིན་པས། རྒྱ་ནག་ལ་བསྟུན་ཐབས་ཀྱི་བཀག་རྒྱ་དེ་དག་དགོས་དོན་མེད། ཅེས་ཡོངས་བསྒྲགས་བྱས་པ་དང་། དེ་མ་ཐག་ཐའེ་ཝན་ཕྱི་སྲིད་བློན་ཆེན་ཇོ་སི་ཧྥི་ཝའོ་(Joseph Wu) ལགས་ཀྱིས། ཨ་རིའི་ཐག་གཅོད་དེར་དགའ་བསུ་དང་སྦྲགས། རྒྱལ་སྲིད་དྲུང་ཆེ་མེག་པོམ་པེ་མཆོག་ལ་ཐུགས་རྗེ་ཆེ་ཞུས་ཡོད་པ་རེད།
རོའུ་ཊར་གསར་ཁང་གི་གནས་ཚུལ་ནང་། ཨ་རིའི་རྒྱལ་ས་ཝ་ཤིན་ཊོན་གྱི་ཐའེ་ཝན་གྱི་ཚབ་མཚོན་དོན་གཅོད་པ་བྷི་ཁེམ་ (Hsiao Bi-khim) ལགས་ཀྱིས། དེ་རིང་ཨ་རིས་འདས་པའི་ལོ་བཅུ་ཕྲག་འགའི་དབྱེ་འབྱེད་མཚམས་འཇོག་བྱས་པར་བརྟེན། དེ་རིང་ནི་ཨ་རི་དང་ཐའེ་ཝན་གྱི་འབྲེལ་ལམ་ལ་གལ་ཆེ་བའི་ཉིན་མོ་ཞིག་ཡིན། ཞེས་བརྗོད་ཡོད་པ་དང་། སྤྱིར་བཏང་ཨ་རི་དང་ཐའེ་ཝན་གྱི་སྐུ་ཚབ་མི་སྣ་བར་སྤྱི་བཏང་གི་མགྲོན་ཁང་དང་སྤྲོ་སྐྱིད་ཁང་སོགས་ནས་ཐུག་འཕྲད་བྱེད་སྲོལ་ཡོད་པ་ལས། གཞུང་འབྲེལ་གྱི་ཚབ་མཚོན་ཐུབ་པའི་ལས་ཁུངས་ཁག་ཏུ་ཐུག་འཕྲད་བྱས་མྱོང་མེད་པ་རེད།
ཡང་ད་ལྟ་ཨ་རིའི་སྲིད་འཛིན་གསར་རྙིང་བར་སྲིད་དབང་རྩིས་སྤྲོད་བྱེད་པར་ཉིན་གྲངས་ ༩ ལས་མེད་པའི་སྐབས་འདིར། ཊོམ་ཕུ་གཞུང་གིས་རྒྱ་ནག་ལ་ཁ་གཏད་གཅོག་ཐབས་ཀྱི་ལངས་ཕྱོགས་ཆེན་པོ་ཞིག་བཟོས་པར་བྷའེ་ཌན་གཞུང་ལ་དཀའ་ངལ་བཟོས་ཡོད་པ་དང་། དཔྱད་ཞིབ་པས་བྷའེ་ཌན་གཞུང་ཊོམ་ཕུའི་ཐག་གཅོད་དེར་དགའ་པོ་བྱེད་ཀྱི་མེད་པ་མ་ཟད། ཨ་རིའི་རྒྱལ་སྲིད་དྲུང་ཆེ་གསར་པ་ཨན་ཊོ་ནེ་ (Antony Blinken) ལགས་ཀྱིས། ཐེངས་འདིའི་ཐག་གཅོད་རྩིས་མེད་བཏང་སྟེ་ཨ་རི་དང་ཐའེ་བར་གྱི་འབྲེལ་ལམ་སྔར་རྒྱུན་བཞིན་སྐྱོང་སྲིད་སྐོར་བརྗོད་འདུག
ད་ལྟའི་ཆར་འཛམ་གླིང་རྒྱལ་ཁབ་མང་པོ་ཞིག་གིས། རྒྱ་ནག་གཅིག་གི་སྲིད་ཇུས་ཀྱི་གནོན་ཤུགས་འོག་ཐའེ་ཝན་ལ་འབྲེལ་འདྲིས་བྱེད་མཁན་ཉུང་ཤས་ལས་མེད་པ་དང་། ཨ་རིའི་སྲིད་འཛིན་ཊོམ་ཕུ་གཞུང་གིས་ཨ་རི་དང་པོ་དང་རྒྱ་ནག་གི་གཡོ་འོག་ཏུ་ཚུད་མི་ཉན་པ་སོགས་ཀྱི་ལངས་ཕྱོགས་བཟུང་སྟེ། ཕྱི་ལོ ༢༠༡༨ ནས་ད་བར་ཨ་རྒྱ་གཉིས་བར་ཚོང་འབྲེལ་འཐབ་འཁྲུག་གཙོས་པའི་ཕྱི་སྲིད་ཀྱི་ཐོག་ནས་ཁ་གཏད་གཅོག་རེས་གང་མང་བྱས་ཡོད་པ་དང་། དམིགས་བསལ་ཕྱི་སྲིད་ལས་དོན་གྱི་ཁྲོད་ནས་ཨ་རིས་བོད་དང་ཐའེ་ཝན། ཧོང་ཀོང་། དེ་བཞིན། ཡུ་གུར་སོགས་ཀྱི་གནས་སྟངས་གླེང་སློང་བྱས་ཡོད་པ་རེད།
ཕྱི་ལོ་ ༢༠༡༨ ལོར་ཊོམ་ཕུ་གཞུང་གིས་ཐའེ་ཝན་སྐོར་སྐྱོད་ (Taiwan Travel Act) ཀྱི་ཁྲིམས་ཡིག་གཏན་འབེབས་བཟོས་ཏེ། ཨ་ཐའེ་གཉིས་ཀྱི་འབྲེལ་ལམ་གཞུང་འབྲེལ་མིན་པ་ནས་ཕྱེད་གཞུང་འབྲེལ་ལྟ་བུར་བསྒྱུར་ཞིང་། ཕྱོགས་གཉིས་ཀྱི་གནད་ཡོད་མི་སྣ་རྒྱལ་ཁབ་ཕན་ཚུན་བར་གཞུང་འབྲེལ་སྐོར་བསྐྱོད་བྱེད་ཆོག་པ་མཚོན་པའི་ཨ་ཐའེ་གཉིས་ཀྱི་འབྲེལ་ལམ་ལ་ལོ་རྒྱུས་གསར་པ་ཞིག་བསྐྲུན་ཡོད་པ་དང་། འདས་ལོའི་ཕྱི་ཟླ་ ༨ ནང་ཨ་རིའི་མི་ཆ་དང་འཕྲོད་བསྟེན་དྲུང་ཆེ་ཨེ་ལེག་སི་ཨ་ཛར་ (Alex Azar) ལགས་ཐའེ་ཝན་ནང་གཞུང་འབྲེལ་སྐོར་བསྐྱོད་བྱས་ཏེ། ཉེ་བའི་ལོ་ལྔ་བཅུ་ལྷག་རིང་ཨ་རིའི་ཚད་མཐོའི་མགོ་འཁྲིད་ཅིག་ཐའེ་ཝན་ནང་ཕེབས་པ་ཐོག་མ་ཆགས་པ་རེད།
གསར་འགོད་པ། སྐལ་བཟང་སྦྱིན་པ།
