རྒྱ་གར་གྱི་འཕྲོད་ལས་པ་དང་ལྷན་དུ་བཙན་བྱོལ་བོད་རིགས་སྨན་པ་དང་སྨན་ཞབས་སོགས་འཕྲོད་ལས་པ་མི་ཉུང་པ་ཞིག་ལ་ཏོག་དབྱིབས་སྨན་ཁབ་བརྒྱབ་རྒྱུ་ཡིན་འདུག
སང་ཉིན་ཕྱི་ཚེས་ ༡༦ ཉིན་ནས་བཟུང་རྒྱ་གར་རྒྱལ་ཡོངས་སུ་ཏོག་དབྱིབས་གཉན་རིམས་སྔོན་འགོག་གི་སྨན་ཁབ་ (Covishield) དང་རྒྱ་གར་གྱིས་བཟོས་པའི་ (COVAXIN) སྨན་ཁབ་རྒྱག་གཏན་འཁེལ་ཡོད་པ་ལྟར། འདི་གའི་གསར་འགོད་པས་རྒྱུས་ལོན་བྱུང་བའི་གནས་ཚུལ་ལྟར་ན། རྒྱ་གར་རྒྱལ་ཡོངས་ཀྱི་སྨན་པ་དང་སྨན་ཞབས། དེ་བཞིན། ཏོག་དབྱིབས་གཉན་རིམས་ལ་གདོང་ལེན་གནང་མཁན་གྱི་ཆེད་མཁས་འཕྲོད་ལས་པ་མི་གྲངས་འབུམ་ ༦ ལྷག་ལ་ཏོག་དབྱིབས་སྨན་ཁབ་བརྒྱབ་རྒྱུ་འཆར་གཞིའི་ཁྲོད། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སྨན་ཁང་ཁག་གི་གཙོས་དགོན་སྡེ་དང་སློབ་གྲྭ བོད་ཀྱི་སྨན་རྩིས་ཁང་གི་ཁྱབ་ཁོངས་སྨན་ཁང་ཁག་གི་སྨན་པ་དང་སྨན་ཞབས་སོགས་ཁྱོན་བཙན་བྱོལ་བོད་མི་ཁྱོན་ ༨༥༠ ལྷག་ལ་ཏོག་དབྱིབས་སྨན་ཁབ་རྒྱག་གཏན་འཁེལ་ཡོད་པ་རེད།
འདི་གའི་གསར་འགོད་པས་ཁ་པར་བརྒྱུད་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་དྲུང་ཆེ་དཔལ་ལྡན་དོན་འགྲུབ་ལགས་སུ་བཀའ་འདྲི་ཞུས་པར་ཁོང་གིས། འཕྲོད་བསྟེན་ལས་ཁུངས་ཀྱིས་འདས་ལོའི་ཕྱི་ཟླ་ ༡༢ ཚེས་ ༡༥ ཉིན་ནས་རྒྱ་གར་ནང་གི་ཁྱབ་ཁོངས་ས་གནས་ཀྱི་སྨན་ཁང་ཁག་གི་འགན་འཛིན་རྣམས་ལ་བརྡ་ལན་ཕུལ་ཏེ། འབྲེལ་ཡོད་ས་གནས་གཞུང་ལ་འབྲེལ་བ་གནང་དགོས་སྐོར་བརྗོད་པ་ལྟར། ཁོ་ཚོས་འབྲེལ་བ་གནང་སྟེ་ད་ལྟ་ང་ཚོའི་སྨན་ཁང་མང་ཆེ་བ་སྨན་ཁབ་ས་ཚིགས་ཆགས་ཡོང་གི་འདུག ང་ཚོའི་ཁྱབ་ཁོངས་ཀྱི་སྨན་པ་དང་སྨན་ཞབས་སོགས་ཁྱོན་མི་གྲངས་ ༥༠༠ ཙམ་སྨན་ཁབ་བརྒྱབ་རྒྱུའི་ཐོ་འགོད་བྱས་ཡོད། ཅེས་བརྗོད་སོང་བ་དང་། དེའི་ཁྲོད་བཞུགས་སྒར་ཁུལ་གྱི་བདེ་ལེགས་སྨན་ཁང་གཙོས་པའི་འཕྲོད་བསྟེན་ལས་བྱེད་སོགས་ཁྱོན་མི་གྲངས་ ༩༠ ཙམ་ཐོ་འགོད་བྱས་ཡོད་འདུག
ཡང་གསར་འགོད་པས་ལྷོ་ཕྱོགས་ལྷོ་སྤྱི་ལས་ཁུངས་ཀྱི་ཁོངས་གཏོགས་སུ་སྨན་ཁབ་བརྒྱབ་རྒྱུར་ཐོ་འགོད་བྱས་པའི་མི་གྲངས་ག་ཚོད་ཅིག་མེད་སྐོར་ལ་ལྷོ་སྤྱི་ཆོས་འཕེལ་ཐུབ་བསྟན་ལགས་སུ་བཀའ་འདྲི་ཞུས་སྐབས། ལྷོ་སྤྱི་ལས་ཁུངས་སུ་འབྱོར་བའི་ཐོ་གཞུང་ནང་ཁྱོན་མི་གྲངས་ ༣༧༥ ཙམ་ཡོད་པ་དང་། དེའི་ཁྲོད་འཕྲོད་བསྟེན་ལས་ཁུངས་ཀྱི་སྨན་པ་དང་སྨན་ཞབས་རྣམས་ཕུད་པའི་དགོན་སྡེ་ཁག་གི་སྨན་པ་དང་སྨན་ཞབས། བོད་ཀྱི་སྨན་རྩིས་ཁང་གི་སྨན་པ་དང་སྨན་ཞབས་བཅས་ཡོད་པ་མ་ཟད། ད་དུང་ས་གནས་བརྒྱ་དཔོན་ཁ་ཤས་ཀྱང་ཡོད་སྐོར་བརྗོད་བྱུང་།
ད་ལྟའི་ཆར་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སུ། དེང་རབས་ཀྱི་གསོ་རིག་ཐོག་ནས་གཞི་རིམ་བརྟག་དཔྱད་དང་སྨན་བཅོས། ནད་གསོ་ཁང་བཅས་ཀྱི་མཐུན་རྐྱེན་ཚང་བའི་བདེ་ལེགས་སྨན་ཁང་དང་ཁྱབ་ཁོངས་བོད་མིའི་གཞིས་སྒར་ཁག་ནང་ཕྱི་ལུགས་སྨན་ཁང་ཆེ་ཁག ༧ དང་གཞི་རིམ་འཕྲོད་བསྟེན་སྨན་ཁང་འབྲིང་བ་ ༤ ། དེ་བཞིན་སྨན་ཁང་ཆུང་གྲས་ ༤༣ བཅས་སྨན་ཁང་ཆེ་ཆུང་ཁྱོན་ ༥༤ ཡོད་པ་དང་། དེ་བཞིན། བོད་ཀྱི་གསོ་རིག་ཐོག་ནས་བརྟག་དཔྱད་སྨན་བཅོས། ནད་གསོ་བཅས་ཀྱི་ཕྱག་ལས་གནང་བཞིན་པ་རྒྱ་བལ་འབྲུག་གསུམ་ནང་བོད་ཀྱི་སྨན་རྩིས་ཁང་ལ་ཡན་ལག་སྨན་རྩིས་ཁང་ ༤༩ ཡོད་འདུག
རྒྱ་གར་དབུས་གཞུང་གི་གནས་ཚུལ་ལྟར་ན། ད་ལྟ་རྒྱ་གར་རྒྱལ་ཡོངས་སུ་རྫོང་ ༧༡༨ ཡོད་པའི་ཁྲོད། རྫོང་རེ་རེའི་ནང་གཞུང་འབྲེལ་སྨན་ཁང་གཉིས་དང་གཞུང་འབྲེལ་མིན་པའི་སྨན་ཁང་གཅིག་བཅས་ལ་སྨན་ཁབ་ལག་བསྟར་གྱི་སྦྱོང་བརྡར་རམ་ཚོད་ལྟའི་ས་ཚིགས་གཏན་འཁེལ་དགོས་པའི་བཀའ་ཁྱབ་བཏང་བ་ལྟར། རྒྱ་གར་རྒྱལ་ཡོངས་ཀྱི་འཕྲོད་ལས་པ་གྲངས་འབུམ་ ༦ ལྷག་ལ་སྔོན་འགོག་སྨན་ཁབ་ལག་ལེན་བསྟར་ཕྱོགས་ཀྱི་སྦྱོང་བརྡར་སྤྲད་ཡོད་པ་དང་། སྨན་ཁབ་དེ་ཐོག་མར་སྨན་པ་དང་འཕྲོད་ལས་པ་རྣམས་ལ་བརྒྱབ་རྗེས། ལོ་ན་ ༥༠ ཡན་དང་ཏོག་དབྱིབས་གཉན་རིམས་ཕོགས་ཏེ་ཛ་དྲག་གི་གནས་སྟངས་འོག་ཡོད་མཁན་རྣམས་ལ་རྒྱག་འཆར་ཡོད་འདུག
གསར་འགོད་པ། སྐལ་བཟང་སྦྱིན་པ།
