བོད་ཧིན་ས་མཚམས་སུ་གྲོང་གསེབ་གསར་པ་ཞིག་འཛུགས་སྐྲུན་བྱས་འདུག

རྒྱ་ནག་གཞུང་གིས་བོད་ཧིན་ས་མཚམས་སུ་ཁང་པ་ ༡༠༡ ལྷག་ཡོད་པའི་གྲོང་གསེབ་གསར་པ་ཞིག་འཛུགས་སྐྲུན་བྱས་ཡོད་པའི་གནས་ཚུལ་ཁ་གསལ་ཆགས་ཡོད་པས་རྒྱ་གར་གཞུང་ཕྱོགས་ནས་ཀྱང་དེ་བསྟུན་གྱི་འཛུགས་སྐྲུན་དང་སྲུང་སྐྱོབ་ཀྱི་ལས་དོན་སྒྲུབ་བཞིན་ཡོད་པར་བཤད།

དེ་རིང་རྒྱ་གར་གྱི་གསར་ལམ་ཆེ་ཁག་ནང་གནས་ཚུལ་ཐོན་པ་ལྟར་ན། འདས་ལོར་རྒྱ་དཀར་ནག་བར་གྱི་ས་མཚམས་རྩོད་རྙོག་དང་འབྲེལ་ནས་ཕྱོགས་གཉིས་ཀྱི་འབྲེལ་ལམ་ཆེས་ཛ་དྲག་ཏུ་གྱུར་མིན་ལ་མ་ལྟོས་པར། རྒྱ་ནག་གཞུང་གིས་བོད་དང་ས་འབྲེལ་དུ་འཁེལ་བའི་རྒྱ་གར་གྱི་བྱང་ཤར་ཨ་རུ་ན་ཅལ་མངའ་སྡེའི་བྱང་ཕྱོགས་སུ་ཁང་པ་ ༡༠༡ ལྷག་ཡོད་པའི་གྲོང་གསེབ་གསར་པ་ཞིག་འཛུགས་སྐྲུན་བྱས་པའི་གནས་ཚུལ་ཐོན་པ་བསྟུན། རྒྱ་གར་གྱི་ཕྱི་སྲིད་ལྷན་ཁང་ངོས་ནས་རྒྱལ་ཁབ་ཀྱི་བདེ་སྲུང་དང་འབྲེལ་བའི་གནད་དོན་ཡོངས་རྫོགས་ལ་ལྟ་ཞིབ་བྱེད་ཀྱི་ཡོད་པ་མ་ཟད། རྒྱ་གར་གྱི་ས་ཁོངས་བདག་དབང་དང་གཅིག་གྱུར་གྱི་ཐད་ལ་ཐབས་ཇུས་ཇི་མཁོ་སྤེལ་རྒྱུ་ཡིན་སྐོར་གྱི་བརྡ་ལན་སྤྲད་ཡོད་འདུག

དེ་ཡང་རྒྱ་གར་གྱི་ཨེན་ཌི་བརྙན་འཕྲིན་ཁང་གིས་སྲུང་སྐར་གྱི་པར་རིས་བརྒྱུད་གསལ་པོ་ཤེས་རྟོགས་བྱུང་བ་ལྟར་ན། ད་ལན་རྒྱ་ནག་གི་འཛུགས་སྐྲུན་བྱས་པའི་གྲོང་གསེབ་དེ་ཡུལ་གཉིས་ཀྱི་ས་མཚམས་བཅད་ཐིག་Line of Actual control བརྒལ་ཏེ་ཨ་རུ་ན་ཅལ་མངའ་སྡེའི་བྱང་ཕྱོགས་ཀྱི་སུ་བྷན་སི་རི་སྟོད་མའི་ (Upper Subansiri) རྫོང་ཁོངས་སུ་བཞུར་བའི་རྩ་རི་ཆུ་མོའི་ (River Tsari Chu) འགྲམ་བརྒྱུད་དུ་ཡོད་ཅིང་། རྒྱ་གར་གྱི་གཞུང་འབྲེལ་ས་ཁྲ་ལྟར་ན། གྲོང་གསེབ་དེ་བོད་ཧིན་ས་མཚམས་ལས་སྤྱི་ལེ་ ༤།༥ བརྒལ་ཏེ་རྒྱ་གར་གྱི་མངའ་ཁོངས་སུ་བརྒྱབ་ཡོད་འདུག གཞན་ཡང་། ཕྱི་ལོ་ ༢༠༡༩ ཟླ་ ༨ པའི་ནང་སྲུང་སྐར་བརྒྱུད་བླངས་པའི་ཁུལ་དེའི་པར་རིས་ནང་། ད་ཐེངས་གྲོང་གསེབ་གྱི་འཛུགས་སྐྲུན་རིགས་གསལ་གྱི་མེད་སྟབས། རྒྱ་ནག་གཞུང་གིས་གྲོང་གསེབ་དེ་འདས་ལོར་གསར་སྐྲུན་བྱས་པ་ཞིག་ཡིན་པ་ཤེེས་རྟོགས་བྱུང་ཡོད་འདུགརྒྱ་གར་གྱིས་ཕྱི་འབྲེལ་གྱི་བརྒྱུད་ལམ་ཐོག་ནས་རྒྱ་ནག་གཞུང་ལ་ད་ཐེངས་ཀྱི་འཛུགས་སྐྲུན་དེའི་ཐད་གླེང་སློང་བྱས་ཡོད་མེད་ཁ་གསལ་མི་འདུག་ཀྱང་། ཕྱི་སྲིད་ལྷན་ཁང་གིས་ཨེན་ཌི་བརྙན་འཕྲིན་གསར་ཁང་ལ། ཉེ་ལམ་ང་ཚོར་རྒྱ་ནག་གཞུང་གིས་ས་མཚམས་ཁུལ་དུ་འཛུགས་སྐྲུན་གྱི་ལས་གཞི་སྤེལ་བཞིན་པའི་གནས་ཚུལ་འབྱོར་བྱུང་། རྒྱ་ནག་གཞུང་གིས་འདས་པའི་ལོ་ཤས་རིང་ནས་ས་མཚམས་ཁུལ་དུ་གཞུང་ལམ་སོགས་ཀྱི་འཛུགས་སྐྲུན་ལས་གཞི་སྤེལ་མུས་རེད། ཅེས་དང་། རྒྱ་གར་གཞུང་ངོས་ནས་ཀྱང་ས་མཚམས་ཁུལ་དུ་གཞུང་ལམ་དང་། ཟམ་པ་སོགས་བརྒྱབ་སྟེ་ས་གནས་ཀྱི་མི་མང་ཚོར་འགྲིམ་འགྲུལ་བདེ་པོ་བཟོས་ཡོད་ལ། རྒྱ་གར་ངོས་ནས་རང་གི་ས་ཁོངས་བདག་དབང་སྲུང་སྐྱོབ་ཆེད་ཐབས་ཇུས་གང་འདྲ་ཡིན་ནའང་སྤེལ་ངེས་ཡིན་སྐོར་བཤད་འདུག

ཕྱི་ལོ་ ༡༩༥༩ ལོ་ནས་བཟུང་རྒྱ་ནག་གཞུང་གིས་ཁུལ་དེ་བཙན་བཟུང་བྱས་ཡོད་པ་མ་ཟད། ཕྱི་ལོ་ ༢༠༠༠ ལོར་རྒྱ་ནག་གིས་དམག་སྒར་ཞིག་གསར་འཛུགས་བྱས་ཡོད་པ་དེའང་འདས་པའི་ལོ་ཤས་རིང་རྒྱ་སྐྱེད་ཡར་རྒྱས་ཆེན་པོ་བཏང་ཡོད་སྐོར་རྒྱ་གར་གཞུང་ཕྱོགས་ནས་ཤེས་རྟོགས་བྱུང་སྐོར་བརྗོད་འདུག

གསར་འགོད་པ། པ་སངས་ཚེ་རིང་།