རྒྱལ་ཚོགས་ནང་རྒྱ་ནག་གཞུང་གི་ཁ་གཏད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་གནང་མཁན་གྱི་མིང་གཞུང་རྒྱ་ནག་ལ་རྩིས་སྤྲོད་བྱེད་ཀྱི་ཡོད་འདུག 
དེ་རིང་བརྒྱུད་ལམ་ཁག་ཏུ་ཐོན་པའི་གནས་ཚུལ་ལྟར་ན། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལས་ཁུངས་ནས། རྒྱལ་ཚོགས་ནང་རྒྱ་ནག་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་བྱེད་མཁན་བོད་མི་དང་ཡུ་གུར། དེ་བཞིན། ཧོང་ཀོང་གི་ལས་འགུལ་བ་སོགས་ཀྱི་མིང་གཞུང་རྒྱ་ནག་གཞུང་ལ་རྩིས་སྤྲོད་བྱེད་ཀྱི་ཡོད་པར་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་ནས་སྐྱོན་བརྗོད་བྱེད་ཀྱི་ཡོད་པ་རེད།
དེ་འབྲེལ་ཐད་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་བྱེད་དང་ཁྲིམས་རྩོད་པ་ཨེ་མཱ་རེའུ་ལི་ (Emma Reilly) ལགས་ཀྱིས་གསལ་འདོན་བྱས་པའི་གནས་ཚུལ་ནང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་ ༢༡ པ་དང་འབྲེལ། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་བྱེད་ཅིག་གིས། ཕྱི་ལོ་ ༢༠༡༢ ཟླ་ ༩ ཚེས་ ༧ ཉིན་རྒྱ་ནག་ལ་འཕྲིན་ཡིག་ཅིག་བསྐུར་ཏེ། འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་ཌོལ་ཀུན་སཱ་ (Dolkun Isa) དང་རྒྱལ་སྤྱིའི་སྟེང་གྲགས་ཆེ་བའི་རྒྱ་ནག་གི་འགྲོ་བ་མིའི་ཐོབ་ཐང་ཁྲིམས་རྩོད་པ་ (Gao Zhisheng) གྱི་བཟའ་ཟླ་ཧེ་ཀན་ (He Geng) གཉིས་ཀྱི་མིང་རྒྱ་ནག་ལ་རྩིས་སྤྲོད་བྱས་ཡོད་སྐོར་བརྗོད་འདུག
ཁ་སང་ཁྲིམས་རྩོད་པ་ཨེ་མཱ་རེའུ་ལི་ལགས་ཀྱིས་ཊུ་ཝི་ཊར་སྟེང་། ཉེ་སྔོན་རང་ཉིད་ཀྱི་ལས་ཡུན་སྐབས་རྒྱལ་ཚོགས་ནང་ཁུལ་གྱི་འཕྲིན་ཡིག་ཁག་ལ་ལྟ་ཞིབ་བྱས་ཏེ། རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་གླེང་སློང་བྱེད་མཁན་རིགས་ཀྱི་མིང་རྒྱ་ནག་ལ་རྩིས་སྤྲོད་བྱེད་ཀྱི་ཡོད་པ་ར་སྤྲོད་བྱུང་ཡོད་པ་མ་ཟད། མོས་དེའི་ཁྲོད་ཀྱི་ཡིག་འབྲེལ་ཁག་ཅིག་བརྒྱུད་ལམ་ཁག་ཏུ་འགྲེམས་སྤེལ་གྱིས་ཁོ་ཚོའི་བྱ་སྤྱོད་ཐེར་འདོན་བྱས་ཡོད་པ་དང་། དེ་བཞིན། རྒྱལ་ཚོགས་ནང་རང་དབང་ལྡན་པའི་ཞིབ་འཇུག་ཚོགས་ཆུང་ཞིག་བཙུགས་ཏེ་གནད་དོན་དེར་རྩད་ཞིབ་དགོས་པའི་འབོད་སྐུལ་ཞུས་འདུག་ལ། ཨེ་མཱ་ལགས་ཀྱིས་རྒྱལ་སྤྱིའི་སྲིད་གཞུང་ཁག་ལ་རྒྱལ་ཚོགས་ཀྱི་བྱ་སྤྱོད་ངན་པ་འདིའི་རིགས་ཐེར་འདོན་བྱས་སྟབས། ད་ལྟའི་ཆར་མོ་ལ་ཞིབ་འཇུག་བྱེད་ཀྱི་ཡོད་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་ཁུངས་ཀྱིས། རྒྱ་ནག་ལ་རྩིས་སྤྲོད་བྱས་པའི་གནས་ཚུལ་ཞིག་གཏན་ནས་བྱུང་མེད་སྐོར་བརྗོད་དེ་ཁས་ལེན་བྱེད་ཀྱི་མེད་པ་རེད།
རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་ཁུངས་ཀྱིས། རྒྱ་ནག་གཞུང་དང་རྒྱལ་ཁབ་གཞན་གྱི་འབྲེལ་ཡོད་མི་སྣས། རྒྱུན་པར་འགྲོ་བ་མིའི་ཐོབ་ཐང་གི་ལྷན་ཚོགས་མ་འཛོམས་གོང་། ཚོགས་འདུའི་ཐོག་མཉམ་ཞུགས་བྱེད་མཁན་མི་སྒེར་དང་གཞུང་འབྲེལ་མ་ཡིན་པའི་ཚོགས་སྡེ་དང་། དེ་བཞིན། འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་མི་སུ་ཞིག་ཚོགས་ཞུགས་གནང་གི་ཡོད་མེད་ཐད་སྐད་ཆ་འདྲི་ཡི་ཡོད། འོན་ཀྱང་། ང་ཚོས་བདེ་འཇགས་དང་འབྲེལ་བའི་གནད་དོན་ཡོངས་ལ་ཞིབ་འཇུག་བྱས་ཏེ། གཏན་འཁེལ་བྱུང་རྗེས་མ་གཏོགས་ཚོགས་ཞུགས་མི་སྣ་གཏན་འཁེལ་བྱེད་ཀྱི་མེད། ཅེས་བརྗོད་ཡོད་པ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་ཁག་མང་པོ་ཞིག་གིས་རྒྱལ་ཚོགས་ཀྱི་བྱེད་སྟངས་དེར་སྐྱོན་བརྗོད་བྱེད་ཀྱི་ཡོད་འདུག
ཡང་ཨེ་མཱ་ལགས་ཀྱི་ཞིབ་འཇུག་ནང་། ཕྱི་ལོ་ ༢༠༡༣ ལོར་རྒྱ་ནག་གཞུང་གིས་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་བཅར་མཁན་གྱི་མིང་ཐོ་མཁོ་སྤྲོད་དགོས་པའི་འཕྲིན་ཡིག་བཏང་བ་ལྟར་རྒྱལ་ཚོགས་ཀྱིས་མིང་ཐོ་རྩིས་སྤྲོད་བྱས་ཡོད་པ་མ་ཟད། རྒྱལ་ཚོགས་ཀྱི་འབྲེལ་ཡོད་ལས་བྱེད་ཚོར་རྒྱ་ནག་གཞུང་གིས་ཉིན་གུང་གསོལ་ཚིགས་ཤིག་ལ་མགྲོན་འབོད་བྱས་ཡོད་སྐོར་དང་། རྒྱལ་ཚོགས་ཀྱིས་བོད་དང་ཡུ་གུར། ཧོང་ཀོང་གི་ལས་འགུལ་བ་སོགས་རྒྱལ་སྤྱིའི་འགྲོ་བ་མིའི་ཐོབ་ཐང་གི་ལྷན་ཚོགས་ཐོག་མཉམ་ཞུགས་གནང་མཁན་གྱི་མིང་གཞུང་ད་དུང་ཡང་རྒྱ་ནག་ལ་རྩིས་སྤྲོད་བྱེད་ཀྱི་ཡོད་སྐོར་སོགས་བརྗོད་འདུག
དེ་འབྲེལ་ཐད། ཁ་སང་ཨ་རིའི་ནང་རྟེན་གཞི་བྱས་པའི་རྒྱ་རིགས་འགྲོ་བ་མིའི་ཐོབ་ཐང་བརྩོན་ལེན་པ་ཡཱང་ཇིན་ལི་ (Yang Jianli) ལགས་དང་། འཛམ་གླིང་ཡུ་གུར་མཐུན་ཚོགས་ཀྱི་ཚོགས་གཙོ་ཌོལ་ཀུན་སཱ་གཉིས་ནས། ཕྱི་ལོ་ ༢༠༡༢ དང་ ༢༠༡༣ བསྟུད་མར་རྒྱལ་ཚོགས་ཀྱིས་རྒྱ་ནག་ལ་རྩིས་སྤྲོད་བྱས་པའི་མིང་གཞུང་ཁྲོད་ཁོ་གཉིས་ཡོད་སྐོར་བརྗོད་ཡོད་པ་དང་། ཡཱང་ཇིན་ལི་ནི་ཕྱི་ལོ་ ༢༠༠༢ ལོར་རྒྱ་ནག་གིས་འཛིན་བཟུང་བྱས་ཏེ། ལོ་ ༥ རིང་བཙོན་འཇུག་བྱས་པའི་མཐར་ཕྱི་ལོ་ ༢༠༠༧ ལོར་བཙོན་གྲོལ་ཐོབ་པ་དང་། ད་ལྟ་ཨ་རིའི་ནང་འགྲོ་བ་མིའི་ཐོབ་ཐང་དང་འབྲེལ་བའི་རྩོམ་དང་ཞུ་གཏུགས་སོགས་ཀྱི་ལས་ཀ་བྱེད་ཀྱི་ཡོད་པ་རེད།
སྤྱིར་བཏང་རྒྱལ་ཚོགས་ཀྱིས་རྒྱ་ནག་གཞུང་གི་ཁ་གཏད་དུ་གྱུར་བའི་ལས་འགུལ་བ་དང་འགྲོ་བ་མིའི་ཐོབ་ཐང་བརྩོན་ལེན་པའི་མིང་གཞུང་ཕྱི་ལོ་ ༢༠༠༦ ཙམ་ནས་རྩིས་སྤྲོད་བྱེད་མགོ་བརྩམས་ཡོད་པ་དང་། ཕྱི་ལོ་ ༢༠༡༧ ལོར་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལས་ཁུངས་ནས་གསར་འགོད་ལྷན་ཚོགས་བརྒྱུད་མིང་གཞུང་རྩིས་སྤྲོད་དགོས་པའི་གནད་དོན་ཞིག་ཡོད་པ་ཁས་ལེན་དང་། ཕྱི་ལོ་ ༢༠༡༩ ལོར་ཁྲིམས་ཁང་དུའང་ཁས་ལེན་ཞུས་ཡོད་འདུག
གསར་འགོད་པ། སྐལ་བཟང་སྦྱིན་པ།
