ཨ་རིའི་སྲིད་གཞུང་གསར་པས་ཐའེ་ཝན་དང་འབྲེལ་བའི་རྒྱ་ནག་གཞུང་ལ་ཉེན་བརྡ་དང་པོ་བཏང་།

ཁ་སང་ཕྱི་ཚེས་ ༢༨ ཉིན་རྒྱ་ནག་གི་མཐའ་སྲུང་ལྷན་ཁང་གི་ཟླ་རེའི་གསར་འགོད་གསལ་བསྒྲགས་སྐབས་གསར་འགོད་མགྲིན་ཚབ་པ་ཝུ་ཆན་(Wu Qian)ཟེར་བ་དེས་ཐའེ་ཝན་གྱིས་རང་བཙན་རྩོད་ལེན་བྱེད་པ་ནི་དམག་འཁྲུག་སློང་བ་དང་གཅིག་མཚུངས་ཡིན་ཞེས་དྲག་པོའི་བཙན་གནོན་བྱ་རྒྱུ་ཡིན་པའི་འཇིགས་སྐུལ་བྱས་འདུག

ཡང་གསར་འགོད་མགྲིན་ཚབ་པ་ཝུ་ཆན་ (Wu Qian) གྱིས། ཉེ་ལམ་ཐའེ་ཝན་མཚོ་འགག་ཏུ་རྒྱ་ནག་མི་དམངས་བཅིངས་གྲོལ་དམག་གིས་དྲག་དམག་སྦྱོང་བརྡར་བྱས་པ་ནི་ཉེ་བའི་མཚོ་འགག་བདེ་སྲུང་གི་གནས་བབ་དང་འབྲེལ་ནས་དགོས་ངེས་ཤིག་ཡིན་པ་དང་། ཕྱིའི་དབང་ཤུགས་ཀྱི་ཐེ་ཇུས་ལ་འགོག་རྒོལ་དང་། ཐའེ་ཝན་གྱི་རང་བཙན་རྩོད་ལེན་སོགས་ལ་འགོག་རྒོལ་བྱ་ཆེད་དུ་ཡིན་སྐོར་དང་། ཐའེ་ཝན་དུ་མི་རེ་ཟུང་གིས་ཐའེ་ཝན་རང་བཙན་རྩོད་ཀྱི་ཡོད་པ་དང་། ཐའེ་ཝན་རང་བཙན་རྩོད་པའི་ཤོག་ཁག་ནི་མེ་ཕུང་ལ་རྩེད་མོ་རྩེད་མཁན་ལྟ་བུ་ཞིག་ཡིན་པས་འཕྲལ་དུ་མེས་འཚིག་ངེས་ཡིན་སྐོར་སོགས་བསྒྲགས་འདུག

བསྒྲགས་གཏམ་དེ་སྤེལ་རྗེས། ཨ་རིའི་བདེ་སྲུང་ལྷན་ཁང་གི་གསར་འགོད་དྲུང་ཆེ་ཇོན་ཁིར་བྷེ་ (John Kirby) ཡིས། རྒྱ་ནག་གཞུང་གི་ཐའེ་ཝན་དང་འབྲེལ་བའི་བསྒྲགས་གཏམ་དེ་ནི་བློ་ཕམ་པའི་རང་བཞིན་ཞིག་ཡིན་པ་མ་ཟད། ཨ་རིའི་ཐའེ་ཝན་དང་འབྲེལ་བའི་ཁྲིམས་ལས་ཡོངས་སུ་བརྒལ་ཡོད་སྐོར་དང་། ཐའེ་ཝན་གྱི་དཀའ་རྙོག་དང་འབྲེལ་ནས་ཨ་རྒྱ་གཉིས་དབར་འགལ་ཟླ་བྱུང་བ་ནི་དོན་དངོས་དང་མི་མཐུན་ལ། དེ་བཞིན་ཨ་རི་གཞུང་གིས་ཐའེ་ཝན་རང་སྲུང་ཆེད་མུ་མཐུད་མཐུན་རྐྱེན་སྤྲོད་ངེས་ཡིན་སྐོར་བསྒྲགས་འདུག་ལ། དེ་ནི་ཨ་རིའི་སྲིད་གཞུང་གསར་པས་ཐའེ་ཝན་མཚོ་འགག་དང་འབྲེལ་ནས་སྤེལ་བའི་བསྒྲགས་གཏམ་ཐོག་མ་དེ་ཡིན་འདུག

འཛམ་གླིང་གི་སྟོབས་ཆེན་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་བཞིན་པའི་གནས་སྐབས་སུ། སྲིད་འཛིན་བྷའེ་ཌིན་མཆོག་གིས་སྣེ་ཁྲིད་པའི་ཨ་རིའི་གཞུང་གིས་རྒྱ་ནག་གཞུང་ལ་ཕྱོགས་ཡོངས་ནས་མཉམ་འབྲེལ་ཡར་རྒྱས་གཏོང་སྲིད་སྐོར་བརྗོད་ཀྱི་ཡོད་ཀྱང་། འགྲོ་བ་མིའི་ཐོབ་ཐང་དང་ཨ་རྒྱའི་ཚོང་འབྲེལ། ཧོང་ཀོང་དང་ཐའེ་ཝན་སོགས་ཀྱི་གནད་དོན་ཐད་རྒྱ་ནག་གཞུང་ལ་གནོན་ཤུགས་སྤྲོད་ངེས་པའི་ཚོད་དཔག་བྱེད་ཀྱི་ཡོད་པ་རེད།

འདས་པའི་བདུན་ཕྲག་གི་ནང་ཐའེ་ཝན་བདེ་སྲུང་ལྷན་ཁང་གིས་གནས་ཚུལ་སྤེལ་བ་ལྟར་ན། ལྷོ་ནུབ་ཏུ་ཡོད་པའི་ཐའེ་ཝན་མཚོ་གླིང་ཞིག་གི་ཉེ་ཁུལ་དུ་རྒྱ་ནག་གཞུང་གིས་དམག་སྤྱོད་གནམ་གྲུ་༦ བཏང་སྟེ་དམག་སྦྱོང་བྱས་ཡོད་པ་དང་། གནད་དོན་དབྱེ་ཞིབ་པས་དེ་ནི་ཨ་རིའི་སྲིད་གཞུང་གསར་པ་སླེབས་པ་དང་བསྟུན། རྒྱ་ནག་གཞུང་གིས་ཐའེ་ཝན་དང་འབྲེལ་བའི་གནད་དོན་ཐད་ཨ་རིའི་སྲིད་གཞུང་གསར་པར་ཉམས་ཚོད་ལེན་གྱི་ཡོད་པའི་དཔྱད་བརྗོད་སྤེལ་ཡོད་ལ། དྲག་དམག་སྦྱོང་བརྡར་དེ་དང་འབྲེལ་ནས་ཐའེ་ཝན་གྱི་སྲིད་འཛིན་ཚའེ་ཡེ་ཝིན་མཆོག་གིས་ཐའེ་ཝན་གྱི་རང་དབང་སྲུང་སྐྱོབ་བྱ་རྒྱུ་དང་། རྒྱ་ནག་གི་དྲག་ཤུགས་ལ་མགོ་སྒུར་རྒྱུ་མིན་སྐོར་བསྒྲགས་ཡོད་པ་རེད།

གསར་འགོད་པ། ཀླུ་མགོན་ཐར།