དེ་རིང་ཕྱི་ཚེས་ ༥ ཉིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ཏོག་དབྱིབས་གཉན་རིམས་དང་འབྲེལ་བའི་ཐད་གཏོང་གསར་འགོད་གསལ་བསྒྲགས་ཐོག་བཀའ་བློན་ཆོས་སྐྱོང་དབང་ཕྱུག་མཆོག་གིས་འདི་ལོར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་ཀྱིས་འཛམ་གླིང་ཁྱོན་ཡོངས་ནང་མི་གྲངས་ས་ཡ་ ༢ ལྷག་དང་བོད་མི་གྲངས་ ༤༡ རྐྱེན་འདས་སུ་ཕྱིན་ཡོད་པས་ཆོས་ཕྱོགས་ཀྱི་བྱ་བ་དང་ནད་ཡམས་སྔོན་འགོག་གི་ཐད་འབད་བརྩོན་བྱེད་དགོས་སྐོར་གསུངས་སོང་།
གསལ་བསྒྲགས་སྐབས་བཀའ་བློན་མཆོག་གིས། བོད་མིའི་སྒྲིག་འཛུགས་ནས་ཛ་དྲག་རོགས་སྐྱོར་འོག་སློབ་མ་དང་ཉམ་ཐག་སོགས་ཀྱི་ལས་དོན་ཆེད་ཕྱི་ལོ་ ༢༠༢༠ ཟླ་ ༣ ནས་ཟླ་ ༡༢ བར་དུ་ནད་ཡམས་སྔོན་འགོག་དང་སྔོན་འགོག་གི་ལས་དོན་ཁག་གི་ཆེད། རྒྱ་གར་ནང་ཧིན་སྒོར་ས་ཡ་ ༥༦ དང་འབུམ་ ༤ ལྷག་དང་། བལ་ཡུལ་ནང་ཧིན་སྒོར་ས་ཡ་ ༨ དང་འབུམ་ ༥ འགྲོ་གྲོན་བཏང་ཡོད་སྐོར་དང་། དེ་བཞིན་གསོ་རིག་གི་ལུས་ཟུངས་གསོ་སྨན་རྒྱལ་བལ་གཉིས་ཀྱི་ནང་ཧིན་སྒོར་ས་ཡ་ ༥ དང་འབུམ་ ༨ ལྷག་དང་ཕྱི་རྒྱལ་ཡུལ་གྲུ་ཁག་ཏུ་ཧིན་སྐོར་ས་ཡ་ ༡ དང་འབུམ་ ༧ ལྷག་གི་འགྲོ་གྲོན་བཏང་ཡོད་པ་དང་། དེའི་ནང་སྨན་གུན་ཐོབ་པའི་མི་གྲངས་ ༢༥༠༠༠ མ་ཟིན་ཙམ་བྱུང་ཡོད་སྐོར། དེ་བཞིན་དམིགས་བསལ་དགོས་ངེས་ཅན་དང་ཆབ་སྲིད་བཙོན་ཟུར་སོགས་མི་གྲངས་ ༢༧༥ ཙམ་ལ་ཛ་དྲག་ངལ་སེལ་གྱི་དངུལ་ཧིན་སྒོར་ ༩༠༠༠ རེ་དང་གཙང་འཕྲོད་ཀྱི་ཡོ་ཆས་ཆེད་ཧིན་སྒོར་ ༤༠༠༠ རེ་ཡི་མཐུན་རྐྱེན་སྦྱར་ཡོད་པ་སོགས་ལ་བརྟེན། རང་བཙན་ཡོད་པའི་རྒྱལ་ཁབ་ལྟ་བུ་ཞིག་གི་གནས་སྟངས་སམ་དེ་ལས་ལྷག་པ་ཞིག་བོད་མིའི་སྒྲིག་འཛུགས་ཀྱི་ངོས་ནས་གནང་ཐུབ་ཡོད་སྐོར་གསུངས་སོང་།
ཡང་བཀའ་བློན་མཆོག་གིས། དབུས་འཕྲོད་བསྟེན་ལས་ཁུངས་དང་ནང་སྲིད་ལས་ཁུངས་ཀྱིས་ས་གནས་ལ་ཡང་ཡང་ལམ་སྟོན་གནང་སྟེ། ས་གནས་ཀྱི་འཕྲོད་ལས་པ་ཚོར་རྫོང་སྨན་ཁང་ལ་འབྲེལ་བ་བཟང་པོ་འཇོག་དགོས་པ་ལམ་སྟོན་གནང་བ་བཞིན། དེ་དག་ལ་འབྲེལ་བ་བྱུང་བའི་གྲུབ་འབྲས་བཟང་པོ་ལ་བརྟེན། ཏོག་དབྱིབས་གཉན་རིམས་ཕོག་ཡོད་མེད་བརྟག་དཔྱད་དེ་ས་གནས་ཀྱི་འཕྲོད་བསྟེན་སྨན་ཁང་གིས་བྱེད་ཀྱི་ཡོད་པ་དང་། ད་ལྟ་བར་དུ་བོད་མི་ ༢༦༥༠༠ ཙམ་ལ་བརྟག་དཔྱད་གནང་ཐུབ་ཡོད་པ་དང་། དེ་བཞིན་རྒྱ་གར་རྒྱལ་ཡོངས་སུ་སྔོན་འགོག་སྨན་ཁབ་རྒྱག་མགོ་བརྩམས་པ་ནས་བཟུང་དེ་རིང་དང་སང་ཉིན་གཉིས་བརྩིས་ན་སྨན་པ་དང་འཕྲོས་ལས་པ་སོགས་ཁྱོན་མི་གྲངས་ ༢༤༧ ལ་སྔོན་འགོག་སྨན་ཁབ་རྒྱག་ཐུབ་པ་བྱུང་ཡོད་ལ། དེ་ནི་ས་གནས་ཀྱི་ལས་མིས་འགན་འཁུར་བ་དང་དབུས་ནས་ལམ་སྟོན་གནང་བ་སོགས་ཀྱི་གྲུབ་འབྲས་ལ་བརྟེན་ནས་བྱུང་བ་ཡིན་སྐོར་གསུངས་སོང་།
ཏོག་དབྱིབས་གཉན་རིམས་ལ་མུ་མཐུད་གཟབ་ནན་བྱེད་དགོས་སྐོར་ལ་བཀའ་བློན་མཆོག་གིས། ད་ལྟ་བར་དུ་གནས་སྟངས་ཛ་དྲག་པོ་མེད་པ་ཞིག་གི་ཐོག་ནས་འགྲོ་བཞིན་ཡོད་ནའང་། ལྷོད་གཡེང་དང་རྣམ་གཡེང་གི་ཐོག་ནས་ནད་ཡམས་བསྐྱར་དུ་སྤྱི་ཚོགས་ནང་ཁྱབ་གདལ་དུ་འགྲོ་མི་སྲིད་པ་མིན་པ་དང་། ལྷག་པར་དུ་བོད་ཀྱི་ལོ་སར་གྱི་སྐབས་སུ་གནང་སྒོ་གནང་གི་ཡོད་ནའང་། སྒེར་གྱི་ངོས་ནས་བསམ་བློ་ཞིག་བཏང་བ་ཡིན་ན། འདི་ལོའི་ལོ་སར་དེ་དགའ་དགའ་འཛོམས་འཛོམས་བྱེད་པའི་གནས་སྟངས་ཤིག་ལ་མཐོང་གི་མེད་པའི་ཚོར་བ་ཞིག་ཡོང་གི་ཡོད་པ་ནི་ད་བར་ནད་ཡམས་དེ་ལ་བརྟེན་ནས་ཁྱོན་མི་གྲངས་ས་ཡ་ ༢ ལྷག་དང་། རྒྱ་གར་ནང་བོད་མི་གྲངས་ ༤༡ རྐྱེན་འདས་སུ་ཕྱིན་པ་སོགས་ལ་བརྟེན། ཆོས་ཕྱོགས་ཀྱི་བྱ་བ་དང་ནད་ཡམས་སྔོན་འགོག་གི་ཐད་འབད་བརྩོན་བྱེད་དགོས་སྐོར་དང་། དེ་བཞིན་ས་གནས་མགོ་འཛིན་ཁག་ནས་ས་གནས་སུ་མཚན་ཚོགས་དང་འདུ་འཛོམས་ཆེན་པོའི་རིགས་མི་གནང་བ་སོགས་ཀྱི་བཀག་རྒྱ་གནང་ཡོད་པ་སོགས་ལ་བསྔགས་བརྗོད་གནང་སོང་།
རྒྱ་གར་གཞུང་གི་ཏོག་དབྱིབས་གཉན་རིམས་ལས་དོན་དང་འབྲེལ་ནས། གནས་ཚང་རྒྱ་གར་གྱིས་འདི་ལོར་སྔ་ལས་ལྷག་པ་བརྒྱ་ཆའི་བརྒྱ་དང་སུམ་ཅུ་སོ་བདུན་ཙམ་གྱིས་མང་བ་འཕྲོད་བསྟེན་ཐོག་འཆར་རྩིས་བཀོད་ཡོད་པ་དང་། རྒྱ་གར་དབུས་གཞུང་ནས་ཏོག་དབྱིབས་གཉན་རིམས་སྔོན་འགོག་སྨན་ཁབ་ཁོ་ནའི་ཆེད་དུ་ཧིན་སྒོར་བྱེ་བ་སྟོང་ ༣༥ ཙམ་གཏན་འབེབ་བྱས་ཡོད་པ་ནི་རྒྱ་གར་གཞུང་ནས་ནུས་པ་ཅི་ཡོད་སྤུངས་བའི་ཀུན་སློང་ཡོད་པ་གསལ་པོ་ཞེ་དྲགས་ཡིན་སྟབས། བོད་མིའི་སྒྲིག་འཛུགས་ཀྱི་ངོས་ནས་དབུས་གཞུང་ལ་ཐུགས་རྗེ་ཆེ་ཞུ་ཡི་ཡོད་སྐོར་དང་། ནད་ཡམས་སྔོན་འགོག་གི་ལས་དོན་ལ་མཉམ་ཞུགས་དང་རྒྱབ་སྐྱོར་བྱ་རྒྱུ་ནི་ཧ་ཅང་གལ་ཆེན་ཡིན་པ་ལས། སྤྱི་ཚོགས་དྲ་ལམ་དུ་འགན་མེད་པའི་ཐོག་ནས་དཀྲོག་གཏམ་དང་འཆལ་གཏམ་གྱི་རིགས་ལ་ཐུགས་སྣང་མི་བྱེད་པའི་རེ་སྐུལ་གནང་སོང་།
གསར་འགོད་པ། ཀླུ་མགོན་ཐར།
