༧གོང་ས་མཆོག་ནས་ལོ་སར་ལ་འཚམས་འདྲི་གནང་བ་དང་སྦྲགས་ང་ཚོའི་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་མི་ཉམས་གོང་འཕེལ་བྱ་རྒྱུ་ནི་ང་ཚོ་བཙན་བྱོལ་བ་ཚོའི་ལས་འགན་རེད་ཅེས་གསུངས།
དེ་རིང་ཕྱི་ཚེས་ ༨ ཉིན་བླ་མ་བཟོད་པ་རིན་པོ་ཆེ་དང་ཁོང་གི་ཆོས་ཚོགས་ཐེག་ཆེན་འཛིན་སྐྱོང་ཚོགས་པ་ནས་ཇི་ལྟར་གསོལ་འདེབས་ཞུས་དོན་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་དྲ་ལམ་བརྒྱུད་ལྕང་སྐྱ་རོལ་བའི་རྡོ་རྗེས་མཛད་པའི་ལྟ་མགུར་ཨ་མ་ངོས་འཛིན་གྱི་གསུང་ཆོས་སྩལ་གནང་མཛད་སོང་བ་དང་། སྐབས་དེར་མགོན་པོ་མཆོག་ནས་ལྟ་མགུར་ཟེར་བའི་ལྟ་བ་ནི་ངོས་ནས་ནམ་རྒྱུན་བཤད་བསྡད་པའི་ལྟ་བ་བརྟེན་འབྱུང་དང་སྤྱོད་པ་འཚེ་བ་མེད་དང་། ལྟ་བ་རྟེན་འབྱུང་ནི་ཚན་རིག་དང་མཐུན་གྱི་ཡོད་པ་དང་སྤྱོད་པ་འཚེ་བ་མེད་ནི་འཛམ་གླིང་གི་ཞི་བདེ་དང་འབྲེལ་བ་ཆགས་ཀྱི་ཡོད། ལྟ་མགུར་ཟེར་བའི་ལྟ་བ་ནི་ཟབ་མོ་དབུ་མའི་ལྟ་བ་བཤད་ཀྱི་ཡོད་པ་རེད། བཅོམ་ལྡན་འདས་སངས་རྒྱས་མ་ཐག ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་བརྙེས། །སུ་ལ་བསྟན་ཀྱང་གོ་བར་མི་འགྱུར་བས། །མི་སྨྲ་ནགས་འདབ་ཉིད་དུ་གནས་པར་བྱ། ། ཞེས་གསུངས་ཡོད་པ་རེད། བཅོམ་ལྡན་འདས་ཀྱིས་ཚིགས་བཅད་གཅིག་གིས་འབྱུང་འགྱུར་འཁོར་ལོ་གསུམ་ཟེར་བ་ཆ་ཚང་འདུག ཟབ་ཞི་ཟེར་བ་འདི་འཁོར་ལོ་དང་པོ་དང་དེའི་བཤད་གཞི་གཙོ་བོ་ནི་བདེན་བཞིའི་སྐོར་ལ་གསུངས་ཀྱི་ཡོད་རེད། བདེན་བཞི་སྡུག་བསྔལ། ཀུན་འབྱུང་། འགོག་བདེན་དང་ལམ་བདེན་གྱི་སྤང་བླང་ནི་སྡུག་བསྔལ་ཤེས་པར་བྱ། ཀུན་འབྱུང་སྤང་བར་བྱ། འགོག་པ་སྔོན་དུ་བྱ། ལམ་སྒོམ་པར་བྱ་ཟེར་གྱི་ཡོད་རེད། དེ་ཡང་བདེན་བཞི་གསུངས་པ་ནི་སྡུག་བསྔལ་ངོ་འཕྲོད་པ་བྱ་རྒྱུ་དང་སྡུག་བསྔལ་ལས་ཐར་འདོད་ཀྱི་བློ་ཡོང་བར་སྡུག་བསྔལ་ཤེས་པར་བྱ་དགོས། སྡུག་བསྔལ་ཤེས་པར་བརྟེན་སྲོག་ཆགས་འབུ་སྲིན་ཡིན་རུང་སྡུག་བསྔལ་མི་འདོད་པ་ཤ་སྟག་ཡིན་པས། སྡུག་བསྔལ་གྱི་རྒྱུ་རྩད་གཅོད་བྱས་ནས་སྡུག་བསྔལ་མི་འདོད་པ་ཡིན་དུས་སྡུག་བསྔལ་གྱི་རྒྱུ་ཀུན་འབྱུང་སྤངས་དགོས་ཀྱི་རེད། ཅེས་གསུངས།
ཡང་གསུང་ཆོས་དང་འབྲེལ་༧གོང་ས་མཆོག་ནས་ལོ་སར་བར་འཚམས་འདྲི་ཞུས་གྲུབ་མཚམས། ངོས་ནས་ལོ་སར་ལ་བཀྲ་ཤིས་བདེ་ལེགས་ཞུས་པ་དང་ང་ཚོ་བོད་ནང་གི་གཞུས་ལུས་རྒྱ་ཆེ་མི་མང་དང་བོད་ཆོལ་ཁ་གསུམ་གྱི་བོད་མི་ཚང་མས་འཕགས་པ་སྤྱན་རས་གཟིགས་ལ་ཧ་ལས་པའི་དད་པ་དང་རྩེ་གཅིག་ཏུ་མོས་པ་ཤུགས་ཆེན་པོ་འདུག དེའི་ཐོག་ནས་སེམས་ལ་ཞི་བདེ་དང་བག་འཕེལ་པོ། རང་བཞིན་གྱིས་མི་སེམས་པ་བཟང་པོ་ཞིག་ཡོང་གི་ཡོད། དེར་བརྟེན། བོད་ནང་གི་གཞིས་ལུས་རྒྱ་ཆེ་མི་མང་ལ་ལོ་གསར་བར་འཚམས་འདྲི་བཀྲ་ཤིས་བདེ་ལེགས་ཞུས་པ་དང་ཆབས་ཅིག་ཏུ། སྔོན་མ་ཆོས་རྒྱལ་སྲོང་བཙན་སྒམ་པོས་བོད་ཡིག་ཟུར་དུ་བཟོས། དེ་ནས་ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་ནས་བཀའ་འགྱུར་བསྟན་འགྱུར་བསྒྱུར་བ་སོགས། སྔོན་གྱི་ཆོས་རྒྱལ་མེས་དཔོན་རྣམ་གསུམ་གྱིས་དངོས་གནས་དྲང་གནས་ཕུགས་རྒྱང་རིང་པོའི་དགོངས་པ་བཞེས་འདུག ད་ལྟ་ང་ཚོ་དེའི་རྗེས་འབྲང་ཆགས་བསྡད་ཡོད་པ་རེད། བོད་པའི་ནང་ཆོས་དེ་ནང་པའི་སངས་རྒྱས་པའི་ཆོས་བརྒྱུད་ཁྲོད་རིག་པའི་ལམ་ནས་གཞི་ལམ་འབྲས་གསུམ་གྱི་རྣམ་གཞག་གཏན་ལ་ཕབ་ནས་བཤད་རྒྱུ་ཡོད་བསྡད་པ་ཞིག་དང་དཔལ་ན་ལནྜའི་ཆོས་བརྒྱུད་དྲི་མ་མེད་པ་ཞིག་ཡིན། དེར་བརྟེན། ང་ཚོ་བོད་རིགས་སྤྱི་དང་ལྷག་པར་དུ་གཞིས་ལུས་རྒྱ་ཆེ་མི་མང་ཚང་མས་སེམས་ལ་སྤོབས་པ་སྐྱེས་ཏེ། ན་ལནྜའི་ཆོས་བརྒྱུད་དྲི་མ་མེད་པ་ཞིག་ལ་སོ་སོས་ཐོས་བསམ་སྒོམ་གསུམ་གྱི་ཉམས་ལེན་བྱ་རྒྱུའི་གོ་སྐབས་བྱུང་བ་རེད་ལ། བོད་པའི་རིག་གཞུང་ཆོས་འདིས་བཟུང་བསྡད་ཡོད།
ན་ལནྜའི་ཆོས་བརྒྱུད་སློབ་སྦྱོང་བྱ་བར་བོད་སྐད་དགོས་ཀྱི་ཡོད་པར་བརྟེན། བོད་པའི་སྐད་དང་རིག་གཞུང་ལ་རང་བཞིན་གྱི་མཐོང་ཡོང་གི་ཡོད། སྔོན་མ་ཡིན་ན་བོད་པ་དང་སོག་པོ། ཧི་མ་ལ་ཡའི་རི་རྒྱུད་ཀྱི་ཡུལ་ལུང་ཙམ་རེད། དེ་རིང་ཁ་སང་ཚན་རིག་པའི་ནང་ནས་ཀྱང་དོ་སྣང་གསར་པ་ཡོང་གི་ཡོད། དེར་བརྟེན། ང་ཚོ་བོད་མི་རིགས་ཀྱི་དུས་རབས་བདུན་པ་བརྒྱད་པ་ནས་བཟུང་བའི་བོད་པའི་རིག་གཞུང་ཐུན་མོང་མ་ཡིན་པ་བཟོས་བཞག་པར་ང་ཚོས་བདག་པོ་བརྒྱབ་རྒྱུ་གལ་ཆེན་པོ་རེད། ང་ཚོ་བཙན་བྱོལ་ཆགས་ནས་ལས་འགན་དང་པོ་ང་རང་ཚོ་བོད་པའི་སྐད་ཡིག ཆོས་དང་རིག་གཞུང་སོགས་སྲུང་སྐྱོབ་བྱ་རྒྱུ་གཙོ་བོར་རྩིས་ནས། ང་ཚོའི་སློབ་གྲྭའི་ནང་བོད་སྐད་དང་བོད་ཡིག་བསླབ་དགོས་ཀྱི་ཡོད་པ་ངོས་ནས་ནེ་རུ་ (Nehru) ལ་སྙན་སེང་ཞུས་པ་དང་། ནེ་རུ་ཡིས་དེ་ག་རང་འགྲིག་གི་ཡོད་པའི་བཀའ་གནང་བར་བརྟེན་ནས་ང་ཚོར་སློབ་གྲྭ་ཟུར་དུ་བཙུགས་པ་དང་སློབ་གྲྭའི་ནང་བོད་ཡིག་བསླབ་རྒྱུ་བྱུང་བ་རེད། བར་སྐབས་ནས་ང་ཚོའི་སློབ་གྲྭའི་ནང་བློ་རིག་དང་རྟགས་རིགས་འཁྲིད་པ་དེ་ངོས་ནས་གསར་གཏོད་བྱས་པ་ཞིག་ཡིན། དེར་བརྟེན་རྒྱ་གར་ལྷོ་ཕྱོགས་ལ་སེར་འབྲས་དགའ་གསུམ་གཙོ་བོར་གྱུར་བའི་བཤད་གྲྭ་ཁག་ལ་གཞུང་ཆེན་བཀའ་པོད་ལྔ་ལ་སློབ་གཉེར་བྱས་ནས་དགེ་བཤེས་མཁས་པ་སྟོང་ཕྲག་ཐོན་ཡོང་གི་ཡོད་པ་དང་མུ་མཐུད་ནས་དཔེ་ཆ་ལྟ་ཡི་ཡོད་པ་རེད། དེ་ལྟར་ང་ཚོའི་བོད་ཀྱི་ཆོས་དང་རིག་གཞུང་ཉམས་པ་སོར་བཅུད་མི་ཉམས་གོང་འཕེལ་བྱ་རྒྱུ་ནི་ང་ཚོ་བཙན་བྱོལ་བ་ཚོའི་ལས་འགན་རེད། ཅེས་གསུངས།
ནང་པ་ཡིན་མིན་ལ་མ་ལྟོས་པར་འཆི་ལ་ཉེ་བའི་མི་དང་ནད་པ་ཚོར་ཕན་ཐོགས་ཡོང་བར་གང་བཤད་དགོས་པ་དང་ག་རེ་བྱ་དགོས་སྐོར་དྲིས་པར་༧གོང་ས་མཆོག་གིས། ནང་པ་ཡིན་མིན་ལ་མ་ལྟོས་པ། ཆོས་པ་ཡིན་མིན་དབྱེ་བ་མེད་པར་བྱས་ནས་ལུས་ལ་ནད་གཞི་ཕོག་སྟེ་འཆི་ལ་ཉེ་བ་ཡིན་ནའང་། སེམས་ལྷོད་ལྷོད་དང་སེམས་ཞི་བདེ་ཡོད་དགོས་པ་ཞིག་རེད་འདུག དམིགས་བསལ་འཆི་ལ་ཉེ་བའི་མི་ཚོའི་ངོ་ཤེས་པ་དང་སྨན་པ། ནད་གཡོག་རྣམས་ཀྱི་སེམས་ལྷོད་ལྷོད་བྱ་དགོས་ཀྱི་འདུག ཆོས་ཁས་བླངས་ན་སོ་སོའི་ཆོས་ལུགས་གང་ཡིན་པའི་སྐྱབས་དྲན་པ་བྱ་རྒྱུ་དང་། ཆོས་ཁས་མི་བླངས་མཁན་ཞིག་ཡིན་ནའང་སེམས་ལྷོད་ལྷོད་བྱས་ནས་སྡོད་རྒྱུའི་སློབ་གསོ་བྱ་རྒྱུ་ནི་གལ་ཆེན་པོ་རེད་འདུག དོན་དངོས་ཐོག་སྐྱེ་བའི་མཐའ་མ་འཆི་བ་རེད། འཆི་བ་ནི་ཡོང་གི་ཡོད་པས་སེམས་ལྷོད་ལྷོད་བྱས་ནས་བསྡད་དགོས་པ་དང་། སྐྱེ་བ་སྔ་ཕྱི་བསམ་བློ་གཏོང་མཁན་ཞིག་ཡིན་ན་ཚེ་འཆི་ཡི་མ་རེད། ཚེ་རབས་ནས་ཚེ་རབས་བསམ་བློ་གཏང་རྒྱུ་ཡོད་པ་རེད། དེས་ན་འཆི་ལ་ཉེ་བའི་སེམས་འདི་འཁྲུག་པ་ཡིན་ན་སེམས་སྐྱིད་པོ་ཡོང་གི་མེད། སྐྱེ་བ་སྔ་ཕྱི་བཤད་པ་ཡིན་ན་འཆི་ལ་ཉེ་བའི་སེམས་འདི་ལྷོད་ལྷོད་མ་འབྱུང་བར་འཁྲུག་བསྡད་ན་འདིས་སྐྱེ་བ་རྗེས་མ་ལའང་ཤུགས་རྐྱེན་ཐེབས་ཀྱི་ཡོད་པ་རེད། མདོར་ན་འཆི་ལ་ཉེ་བའི་མི་དེ་ལ་བྱམས་བརྩེ་བྱ་རྒྱུ་ནི་གལ་ཆེན་པོ་རེད་འདུག ཅེས་བཀའ་ལན་གནང་སོང་།
གསར་འགོད་པ། བསྟན་འཛིན་ཕུར་བུ།
