ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པེར་གྷའེ་གྲོང་སྡེའི་སྤྱི་ཁྱབ་ཌེ་ནེག་རེ་བྷི་ལགས་ཀྱིས་བོད་དང་ཐའེ་ཝན་ལ་རྒྱབ་སྐྱོར་བྱེད་པར་ཞེད་སྣང་མེད་པ་དང་རྒྱ་ནག་གིས་ཅེག་གཞུང་ལ་འཇིགས་སྐུལ་བྱེད་བཞིན་པ་ནི་སྟོང་བསམ་ཡིན་སྐོར་བརྗོད་འདུག
རྒྱ་གར་ (Ani) གསར་ཁང་གིས་གནས་ཚུལ་སྤེལ་བ་ལྟར་ན། དེ་རིང་ཕྱི་ཚེས་ ༡༠ ཉིན་ཡུ་རོབ་ཅེག་སྤྱི་མཐུན་རྒྱལ་ཁབ་ཀྱི་རྒྱལ་ས་པེར་གྷའོ་ (Prague) གྲོང་སྡེའི་སྤྱི་ཁྱབ་ཌེ་ནེག་རེ་བྷི་ (Zdenek Hrib) ལགས་ཀྱིས། ཅེག་སྤྱི་མཐུན་རྒྱལ་ཁབ་ནས་བོད་དང་ཐའེ་ཝན་གཉིས་ལ་གདུང་སེམས་མཉམ་སྐྱེད་ཀྱི་རྒྱབ་སྐྱོར་ཞུས་པར་རྒྱ་ནག་གིས་ཅེག་སྤྱི་མཐུན་རྒྱལ་ཁབ་ཀྱི་དཔལ་འབྱོར་ལ་གནོད་སྐྱོན་གཏོང་རྒྱུ་ཡིན་པའི་འཇིགས་སྐུལ་བྱེད་བཞིན་པར་ཞེད་སྣང་མེད་པ་མ་ཟད། རྒྱ་ནག་གི་སྐད་ཆ་དེ་ནི་ཧ་ཅང་ཚོད་དཔག་ལས་བརྒལ་ཡོད་སྐོར་བརྗོད་འདུག
གྲོང་སྡེའི་སྤྱི་ཁྱབ་ཌེ་ནེག་རེ་བྷི་ལགས་ཀྱིས། རང་ཉིད་གྲོང་སྡེའི་སྤྱི་ཁྱབ་ཀྱི་མིང་ཐོག་ནས་ཐའེ་ཝན་ནང་བསྐྱོད་པ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གྲོང་ཁྱེར་པེར་གྷའོ་ཚོགས་ཁང་ (Prague City Hall) ནང་གདན་འདྲེན་ཞུས་ཏེ། ཅེག་སྤྱི་མཐུན་རྒྱལ་ཁབ་ནང་རྒྱ་ནག་ལ་དགའ་ཞེན་ཅན་ཚོར་ཁོ་ཁྲོང་སློང་བར་ཞེད་སྣང་མེད་སྐོར་སོགས་བརྗོད་འདུག
གཞན་ཡང་ཁོང་གིས། ངས་བོད་དང་ཐའེ་ཝན་ལ་རྒྱབ་སྐྱོར་བྱས་པ་བརྒྱུད་ང་རང་སྒེར་ལ་གྱོང་གུད་གང་ཡང་ཐེབས་ཀྱི་མེད་པ་དང་། རྒྱ་ནག་གིས་ཅེག་སྤྱི་མཐུན་རྒྱལ་ཁབ་ནང་མ་འཛུགས་བྱ་རྒྱུའི་དམ་བཅའ་ཤོར་ཡོད་པ་བརྟེན་ནས་རྒྱ་ནག་ནི་བློས་འགེལ་མི་ཐུབ་པའི་ཚོང་རོགས་ཤིག་ཡིན་པ་དང་། འགྲོ་བ་མིའི་ཐོབ་ཐང་རྡོག་རོལ་གཏོང་གི་ཡོད་པའི་ཐད་སྐད་ཆ་བཤད་རྒྱུ་ནི་དཔལ་འབྱོར་གྱི་ཁེ་ཕན་ལས་གལ་ཆེ་བ་ཡིན། ཞེས་བརྗོད་ཡོད་པ་དང་། འདས་ལོར་ཅེག་སྤྱི་མཐུན་རྒྱལ་ཁབ་ཀྱི་སྐུ་ཚབ་ཚོགས་ཆུང་ཞིག་ཐའེ་ཝན་ནང་སྐོར་སྐྱོད་བྱས་སྐབས། རྒྱ་ནག་གཞུང་གིས་ཅེག་སྤྱི་མཐུན་རྒྱལ་ཁབ་ལ་ཚོང་འབྲེལ་ཐོག་ནས་འཁོན་ལན་སློག་རྒྱུ་ཡིན་པའི་ཉེན་བརྡ་བཏང་ཡོད་པ་རེད།
དེ་རྗེས་ཅེག་ངོས་ནས་ཐའེ་ཝན་དང་འབྲེལ་ལམ་ཤུགས་ཆེར་བཏང་སྟེ། རྒྱལ་ཁབ་གཉིས་ཀྱི་མཉམ་འབྲེལ་ལ་གྲུབ་འབྲས་ཡག་པོ་བྱུང་ཡོད་པ་དང་། ཕྱི་ལོ་ ༢༠༡༩ ལོར་ཅེག་གཞུང་ནས་ཞིབ་འཇུག་བྱས་པ་བརྒྱུད་ཅེག་སྤྱི་མཐུན་གྱི་ཕྱུག་བདག་ཞིག་ལ་རྒྱ་ནག་གིས་མ་དངུལ་བཏང་སྟེ་ཚོང་སྒྱུར་བྱེད་ཀྱི་ཡོད་པ་ཤེས་རྟོགས་བྱུང་ཡོད་པ་རེད་ལ། སྤྱི་ཁྱབ་ཌེ་ནེག་རེ་བྷི་ལགས་ཀྱིས། དོན་རྐྱེན་འདིས་མི་ཉུང་ཤས་ཤིག་གིས་ཅེག་སྤྱི་མཐུན་རྒྱལ་ཁབ་ཀྱི་དམངས་གཙོ་དང་འགྲོ་བ་མིའི་ཐོབ་ཐང་གི་རིན་ཐང་སོགས་ཚོང་གི་ཁེ་ཕན་ཆེད་འཚོང་གི་ཡོད་པ་བསྟན་ཡོད། ཅེས་བརྗོད་ཡོད་པ་རེད།
ཡང་ཕྱི་ལོ་ ༢༠༡༩ ཟླ་ ༣ ཚེས་ ༦ ཉིན་གྲོང་ཁྱེར་པེར་གྷའོ་སྤྱི་ཁྱབ་ ཌེ་ནེག་རེ་བྷི་ལགས་ཀྱིས། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གྲོང་ཁྱེར་དེའི་ཚོགས་ཁང་དུ་སྣེ་ལེན་ཞུས་ཏེ། བོད་མིའི་སུམ་བཅུའི་དུས་དྲན་ལ་གདུང་སེམས་མཉམ་སྐྱེད་མཚོན་སླད་གྲོང་ཁྱེར་གྱི་ཚོགས་ཁང་ཐོག་བོད་ཀྱི་རྒྱལ་དར་སྒྲེང་འཛུགས་དང་། སྲིད་སྐྱོང་མཆོག་ལ་ཡིད་ཆེས་དང་གྲོགས་པོའི་མཛའ་བརྩེ་མཚོན་པའི་གཟེངས་རྟགས་ཤིག་ཀྱང་ཕུལ་ཡོད་པ་རེད།
ཕྱི་ལོ་ ༢༠༡༦ ལོར་གྲོང་ཁྱེར་པེར་གྷའོ་དང་རྒྱ་ནག་བར་གཅུང་མོའི་འབྲེལ་འདྲིས་གྲོས་མཐུན་བཞག་ཡོད་པ་དང་། གྲོས་མཐུན་ནང་ཆབ་སྲིད་དང་དཔལ་འབྱོར་སོགས་གང་ཐད་ནས་ཅེག་སྤྱི་མཐུན་རྒྱལ་ཁབ་ལ་བརྩི་མཐོང་དང་འདྲ་མཉམ་མེད་སྟབས། ཕྱི་ལོ་ ༢༠༡༩ ལོར་ ཌེ་ནེག་རེ་བྷི་ལགས་ཀྱིས་ཅེག་དང་རྒྱ་ནག་བར་གྱི་གཅུང་མོའི་གྲོས་མཐུན་ཕྱིར་འཐེན་བྱས་ཡོད་པ་རེད།
གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།
