བྱིས་པའི་ལྷད་མེད་ཀྱི་མི་གཤིས་གསོ་སྐྱོང་བྱེད་ཐབས།

གཡག་རྒོད་རྩོམ་སྒྲིག་ཚོགས་ཆུང་།

བྱིས་པའི་ཀླད་པའི་འཕེལ་འགྱུར་ལ་ཞིབ་འཇུག་བྱེད་མཁན་གྱི་དེང་རབས་ཀྱི་ཚན་རིག་པ་ཚོས་ཞིབ་འཇུག་གི་འབྲས་བུ་ལྟར་ན། ཕྲུ་གུ་སྐྱེས་པ་ནས་ལོ་གསུམ་གྱི་བར་ལ་ཕྲུ་གུ་གཉོར་སྐྱོང་བྱེད་སའི་ཁོར་ཡུག་དང་གཉོར་སྐྱོང་བྱེད་མཁན་གྱི་མིའི་ལུས་ངག་གི་གོམས་གཤིས་ལ་བརྟེན་ཏེ་ཕྲུ་གུའི་ཀླད་པའི་བརྒྱ་ཆ་༨༠་འཕེལ་རྒྱས་སུ་འགྲོ་བཞིན་ཡོད་པ་དང་། མི་ལོ་གསུམ་གྱི་རིང་གི་ཕྲུ་གུའི་ཀླད་པའི་འཕེལ་རྒྱས་དེ་མི་ཚེ་གང་གི་མི་གཤིས་ཀྱི་རྨང་གཞི་རུ་འགྱུར་གྱི་ཡོད་པར་བཤད། བུ་ཕྲུག་ལ་མི་གཤིས་ཀྱི་རྨང་གཞི་ཡག་པོ་ཞིག་བསྐྲུན་འདོད་པའི་ཕ་མ་ཚོས་བུ་ཕྲུག་དང་མཉམ་དུ་འགྲོག་འདྲིས་ཀྱི་ལམ་ནས་བུ་ཕྲུག་གི་ཀླད་པའི་འཕེལ་རྒྱས་ལ་ཤུགས་རྐྱེན་ཡག་པོ་ཐེབས་ཀྱི་ཡོད་པར་བཤད། ཕ་མ་དང་བུ་ཕྲུག་མཉམ་དུ་འགྲོགས་པའི་ཉམས་མྱོང་བར་ནས་བུ་ཕྲུག་གི་ཀླད་པའི་རྩ་ཕྲན་རྣམས་གཅིག་ནས་གཅིག་ལ་སྦྲེལ་ཏེ་ལོ་གསུམ་ལ་ཐོན་དུས་སྡོམ་ཐག་ལྟ་བུ་ཞིག་ཏུ་གྱུར་ཡོད་པ་འགྲེལ་བརྗོད་བྱེད་ཀྱི་ཡོད། ཕ་མས་བུ་ཕྲུག་ལ་གཅེས་སྐྱོང་བྱེད་པའི་སློབ་གསོའི་བྱེད་ཐབས་བཟང་ངན་གྱིས་བུ་ཕྲུག་གི་གོམས་གཤིས་ལ་བཟང་ངན་གྱི་ཁྱད་པར་ཤོར་གྱི་ཡོད་པར་བཤད། དེ་ལྟར་ན་བུ་ཕྲུག་གི་མི་གཤིས་ཀྱི་རྨང་གཞི་བསྐྲུན་མཁན་དང་ཤུགས་རྐྱེན་ཆེན་པོ་འཇོག་མཁན་དེ་ནི་ཕ་མ་དང་ནང་མི། བྱིས་གཉོར་བ་དང་དགེ་རྒན། ཡུལ་མི་དང་ཁྱིམ་མཚེས་སོགས་ཡིན་པ་ཤེས་དགོས་སོ།།

བདག་ཅག་གི་སྟོན་པ་བཅོམ་ལྡན་འདས་ཀྱིས་སྡིག་པ་ཅི་ཡང་མི་བྱ་ཞིང་།། དགེ་བ་ཕུན་སུམ་ཚོགས་པར་སྤྱད།། རང་གི་སེམས་ནི་ཡོངས་སུ་འདུལ།། ཞེས་གསུངས་པ་དང་། འཇམ་མགོན་བླ་མ་ཙོང་ཁ་བ་ཆེན་པོའི་བྱང་ཆུང་ལམ་རིམ་ཆེན་མོའི་ནང་དུ་རང་མ་དུལ་ན་གཞན་འདུལ་བའི་གནས་མེད་དོ་ཞེས་གསུངས་ཡོད། དེས་ན་བུ་ཕྲུག་གི་རྒྱུད་ལ་གོམས་གཤིས་ཡག་པོ་ཞིག་འབྱར་དགོས་ན། ཕ་མ་རང་ཉིད་ཀྱི་གོམས་གཤིས་ངན་པ་རྣམས་ལ་བསྒྱུར་བཅོས་བཏང་སྟེ་གཤིས་རྒྱུད་དུལ་བའི་སྒོ་ནས་བུ་ཕྲུག་ལ་གོམས་གཤིས་ཡག་པོ་འཇགས་ཐབས་བྱེད་དགོས། ཕ་མས་རང་གི་ཀུན་སྤྱོད་ལ་བསྒྱུར་བཅོས་བཏང་སྟེ་བུ་ཕྲུག་གསོ་སྐྱོང་བྱས་པ་ཡིན་ན་ཧ་ཅང་སྟབས་བདེ་ཞིང་ལས་སླ་བ་ཡིན། དེ་ལས་ལྡོག་སྟེ་ཕ་མས་ངག་ནས་བུ་ཕྲུག་ལ་ཡ་རབས་སྤྱོད་བཟང་བྱེད་དགོས་ཞེས་མང་པོ་བཤད་དེ་ལག་བསྟར་མ་བྱས་པ་ཡིན་ན་བུ་ཕྲུག་ལ་སློབ་གསོ་ཡག་པོ་མི་ཐེབས། དེས་ན་ཕ་མ་གཉིས་ཁ་བཤད་དོན་ལ་གནས་པ་དང་ལག་ལེན་སྟེང་ནས་རང་དཔེ་བུ་སྟོན་བྱེད་དགོས་པ་གལ་ཆེན་པོ་ཡིན། ཕྱི་རྒྱལ་གྱི་སེམས་ཁམས་རིག་པ་བ་ཚོས་ཕ་མས་གང་བྱས་བྱིས་པའི་བག་ཆགས་ཡིན་ཟེར་བ་ལྟར། ཕ་མ་ཚད་ལྡན་ཞིག་བྱེད་འདོད་ན་བུ་ཕྲུག་གི་མིག་དཔེ་ཚད་ལྡན་ཞིག་ཏུ་འགྱུར་དགོས། གལ་སྲིད་རང་གིས་དུད་ཆང་ལོངས་སུ་སྤྱོད་དེ་བུ་ཕྲུག་ལ་དེ་བྱེད་མི་ཉན་ཟེར་བ་དང་། རང་གིས་མནའ་སྐྱེལ་རྫུན་བཤད་དེ་བུ་ཕྲུག་ལ་དེ་བྱེད་མི་ཉན་ཟེར་བ། རང་གིས་རྒྱུན་དུ་བཟའ་འཁོན་བྱས་ཏེ་བུ་ཕྲུག་ལ་དེ་བྱེད་མི་ཉན་ལ་སོགས་པའི་ལུས་ངག་གི་སྤྱོད་པ་རྒྱབ་འགལ་དུ་ཕྱིན་པའི་སློབ་གསོ་ནི་མུན་ནག་ནང་དུ་མདའ་འཕངས་པ་དང་མཚུངས་ཤིང་བུ་ཕྲུག་ལ་མི་ཕན། ཕ་མ་ནི་བུ་ཕྲུག་གི་དགེ་རྒན་ཡིན། ཕ་མའི་ཀུན་སྤྱོད་ནི་བུ་ཕྲུག་གི་སློབ་དེབ་ཡིན་ཟེར་བ་ལྟར། ཕ་མས་རང་གི་ཀུན་སྤྱོད་ལ་དུས་རྒྱུན་དུ་བདག་གཅེས་ལེགས་པོ་བྱས་ཏེ་བུ་ཕྲུག་གི་སློབ་དེབ་ཡག་པོ་ཞིག་ཏུ་བསྒྱུར་དགོས། ཕ་མ་ནི་བུ་ཕྲུག་གི་མེ་ལོང་ཡིན། བུ་ཕྲུག་ནི་ཕ་མའི་གཟུགས་བརྙན་ཡིན་ཟེར་བ་དང་། བུ་ཕྲུག་ནི་ཕ་མའི་སྐད་ཆ་ལ་ཉན་མཁན་ཞིག་མིན་ནའང་། ཕ་མ་ལ་ལད་ཟློས་བྱེད་པར་ནོར་འཁྱུག་འགྲོ་མཁན་ཞིག་མིན་ཞེས་བཤད་སྲོལ་ཡོད་པ་ལྟར། བུ་ཕྲུག་གི་གཤིས་ཀ་ལ་འགྱུར་ལྡོག་མི་ལེགས་པ་ཞིག་འགྲོ་བཞིན་ཡོད་ན། དང་པོ་ཕ་མ་རང་ཉིད་ཀྱི་ཀུན་སྤྱོད་ལ་བརྟག་ཞིབ་བྱེད་དགོས། ཕ་མ་རང་ཉིད་ལ་གཤིས་ཀ་ཡག་པོ་ཡོད་ན་བུ་ཕྲུག་ལ་བག་ཆགས་ཡག་པོ་ཐེབས་ཐུབ། རྒྱ་གར་གྱི་བདག་ཉིད་ཆེན་པོ་གན་རྡི་མཆོག་གིས་ཀྱང་རང་གི་མཐོང་ན་འདོད་པའི་སྤྱི་ཚོགས་ཀྱི་འགྱུར་བ་དེ་རང་སྟེང་ནས་འགོ་འཛུགས་བྱེད་དགོས་ཞེས་གསུངས་ཡོད།

ཞིང་བ་ཚོས་ལོ་ཏོག་འདེབས་དུས་ས་བོན་ཡག་པོ་ཡོད་པ་གཅིག་པོའི་མི་ཆོག་པར་ས་བོན་འདེབས་སའི་ཞིང་ས་བཟང་བོ་ཞིག་དགོས་པ་ལྟར། བྱིས་པ་བཟང་བོ་ཞིག་གཙོ་སྐྱོང་བྱེད་པའི་སྐབས་སུ་ཡང་ཕ་མ་གཤིས་བཟང་ཀུན་སྤྱོད་ཡག་པོ་ཡོད་མཁན་ཞིག་ཡོད་པ་གཅིག་པོའི་མི་འགྲིག་པར། བུ་ཕྲུག་འཚར་ལོངས་བྱེད་སའི་ཁོར་ཡུག་གཙང་མ་ཞིག་བསྐྲུན་དགོས་པ་དེ་ཧ་ཅང་གལ་ཆེན་པོ་ཡིན། ང་ཚོས་ཞིང་ནང་དུ་ས་བོན་བཏབ་སྟེ་ལྗང་མྱུག་འབུས་ཡོང་བའི་སྐབས་སུ། ཡུར་མ་ཡུར་ཏེ་རྩྭ་ལྡུམ་འཐུ་དགོས་པ་བཞིན། བུ་ཕྲུག་གི་འཚར་ལོངས་ཀྱི་གོ་རིམ་ཁྲོད་དུ་བྱིས་པ་གོམས་གཤིས་མི་གཙང་བ་དང་སྤྱོད་པ་ངན་པ་ཅན་རྣམས་ལ་འགྲོག་ཏུ་འཇུག་མི་ཉན། གལ་སྲིད་བུ་ཕྲུག་གིས་ཀུན་སྤྱོད་མི་ལེགས་པའི་བྱིས་པ་དང་གྲོགས་བསྒྲིགས་ཏེ་ཁོ་ཚོར་འགྲོགས་ཡུན་རིང་དྲགས་ན། བུ་ཕྲུག་གི་གོམས་གཤིས་ལ་ཤུགས་རྐྱེན་ངན་པ་ཐེབས་སྲིད་པ་དང་བུ་ཕྲུག་གི་མ་འོངས་པའི་འཚོ་བ་སྐྱེལ་སྟངས་ལ་གནོད་པ་ཆེན་པོ་སྐྱེལ་སྲིད་པས་གཟབ་དགོས། ཕྱི་གླིང་བ་ཚོས་སྤྱོད་པ་མི་ལེགས་པའི་མི་ལ་འགྲོགས་ན་མི་ཚེ་ལེགས་པོ་ཞིག་སྐྱེལ་མི་ཐུབ་ཅེས་དང་། སྤྱོད་པ་ངན་པའི་མི་ལ་ཐུག་ན་གཡོལ་ནས་འགྲོ་དགོས་པ་མ་ཟད་འབྲོ་དགོས་ཞེས་བཤད་སྲོལ་ཡོད། དེ་བཞིན་དུ་གུང་ཐང་བསྟན་པའི་སྒྲོན་མེས་སྡིག་གྲོགས་ཡིན་ཞེས་རྭ་ཅན་མི་འབྱུང་གིས།། གཅེས་ཤིང་ཕན་པའི་ཟོལ་གྱིས་འཛུམ་བསྟན་ནས།། རྩེད་རྒོད་གཡེང་བའི་གྲོགས་བྱེད་བག་མེད་ཀྱི།། ལས་ལ་སྦྱོར་དེ་སྡིག་པའི་གྲོགས་ཡིན་པས། འགོ་བའི་ནད་བཞིན་རིང་དུ་སྤོངས་ཤིག་ཨང་ཞེས་གསུངས་ཡོད། དེ་ལྟར་ན་ཕ་མས་བུ་ཕྲུག་འགྲོ་སའི་སློབ་གྲྭའི་ཁོར་ཡུག་དང་དགེ་རྒན་ཀྱི་ཀུན་སྤྱོད་བཟང་ངན་སོགས་ལ་ཞིབ་འཇུག་གནང་སྟེ་བུ་ཕྲུག་གི་གཤིས་སྤྱོད་ལ་ཤུགས་རྐྱེན་ངན་པ་ཐེབས་སུ་འཇུག་མི་ཉན། གལ་སྲིད་རང་དབང་མེད་པའི་ཕྱིའི་ཁོར་ཡུག་དང་ལམ་ལུགས་སོགས་ཀྱིས་བུ་ཕྲུག་གི་གོམས་གཤིས་ལ་ཤུགས་རྐྱེན་ངན་པ་ཐེབས་ཀྱི་ཡོད་ན། བུ་ཕྲུག་གི་འཚར་ལོངས་ཀྱི་ཆེད་དུ་ཁོར་ཡུག་ཡག་པོ་ཞིག་ཏུ་གནས་སྤར་དགོས། ཡང་ཕྱི་གླིང་བ་ཚོས་ལེགས་ཚོགས་ཐམས་ཅད་མི་གཤིས་ལེགས་པའི་རྗེས་སུ་འབྲིང་ཞེས་བཤད་སྲོལ་ཡོད་པ་ལྟར་བུ་ཕྲུག་གི་མ་འོངས་པའི་བྱ་བཞག་ཐམས་ཅད་ལེགས་འགྲུབ་ཡོང་བ་དང་མི་ཚེ་དོན་སྙིང་དང་ལྡན་པ་ཞིག་སྐྱེལ་ཐུབ་པའི་ཆེད་དུ་ལྷད་མེད་པའི་བུ་ཕྲུག་གི་རང་གཤིས་སྐྱོང་བཟང་བོ་ལ་ཤན་ཤུགས་ངན་པ་ཐེབས་སུ་མི་འཇུག་པར་སྲུང་སྐྱོབ་བྱེད་དགོས་པར་སེམས་སོ།།

སློབ་གསོ་དར་ཁྱབ་ཏུ་སོང་བའི་རྒྱལ་ཁབ་ཀྱི་མི་ཚོས་སློབ་གསོ་ནི་བུ་ཕྲུག་གི་མ་འོངས་པའི་འཚོ་བའི་ཁྲོད་དུ་ཆེས་མཁོ་གལ་ཆེ་བའི་ཁྱད་ནོར་དེ་ཡིན་པར་ཤེས་རྟོགས་བྱུང་སྟེ་བུ་ཕྲུག་འཚར་ལོངས་བྱེད་སའི་ཁོར་ཡུག་གི་བཟང་ངན་ལ་ཧ་ཅང་ནན་ཏན་བྱེད་པའི་ལུགས་སྲོལ་ཡོད། དཔེར་ཁ་ན་ཊའི་གྲོང་ཁྱེར་ཀྲོ་རན་ཊོར་ལྟ་བུར་མཚོན་ནའང་། མི་མང་སྡོད་གནས་བྱེད་སའི་ས་ཁུལ་མི་འདྲ་བའི་བར་དུ་སློབ་གསོར་མཐོང་ཆེན་བྱེད་སྟངས་ཀྱི་ཐད་ནས་ཁྱད་པར་ཆེན་པོ་ཡོད། སློབ་གསོ་མཐོང་ཆེན་བྱེད་མཁན་དང་མི་བྱེད་མཁན་རྣམས་ཀྱི་ཁྱིམ་ཚང་ཚོའི་འཚོ་བའི་གནས་སྟངས་ལ་བཟང་ངན་གྱི་ཁྱད་པར་ཆེན་པོ་ཡོད། སློབ་གསོ་མཐོང་ཆེན་བྱེད་མཁན་ཀྱི་ཁྱིམ་ཚང་ཚོ་གནས་སྡོད་བྱེད་པའི་ས་ཁུལ་གྱི་སློབ་གྲྭའི་མཐུན་རྐྱེན་བཟང་ཞིང་དགེ་རྒན་གྱི་སྤུས་ཀ་ཡག དེར་བརྟེན་བུ་ཕྲུག་གི་མདུན་ལམ་ལ་གཙིགས་ཆེན་བྱེད་མཁན་གྱི་ཕ་མ་ཚོས་སློབ་གསོར་མཐོང་ཆེན་བྱེད་མཁན་ཚོ་སྡོད་སའི་ས་ཁུལ་དུ་ཁང་བ་ཆུང་ཆུང་རེ་ཉོས་ཏེ་གནས་སྡོད་བྱེད་ཐབས་བྱེད་ཀྱི་ཡོད། སློབ་གསོ་མཐོང་ཆེན་བྱེད་སའི་ས་གནས་སུ་ཁང་བའི་རིན་གོང་ཧ་ཅང་ཆེན་པོ་ཡིན། ཡིན་ནའང་ཕ་མ་ཚོས་སློབ་གསོ་གཙོ་བོར་འཛིན་པ་དང་སློབ་གསོར་དགའ་བའི་མི་ཚོའི་ཤུགས་རྐྱེན་བུ་ཕྲུག་གི་རྒྱུད་ལ་ཐེབས་སུ་འཇུག་ཐབས་བྱེད་ཀྱི་ཡོད། དེ་ལྟར་ན་ང་ཚོ་བོད་པའི་ཕ་མ་རྣམས་ཀྱིས་ཀྱང་བུ་ཕྲུག་གི་མ་འོངས་པའི་མདུན་ལམ་དེ་ཨང་དང་པོར་བཞག་སྟེ་ཐབས་ཤེས་གང་ཡོད་ཀྱི་ལམ་ནས་བུ་ཕྲུག་ལ་སློབ་གསོ་ཡག་པོ་ཞིག་ཐེབས་སུ་འཇུག་དགོས།

མདོར་དེད་ན་རང་ཉིད་ཀྱི་ཀུན་སྤྱོད་དང་བུ་ཕྲུག་གིས་འགྲོགས་འདྲིས་བྱེད་སའི་བྱིས་པའི་ཀུན་སྤྱོད། བུ་ཕྲུག་འཚར་ལོངས་བྱེད་སའི་ཁོར་ཡུག་གི་མིའི་ཀུན་སྤྱོད་སོགས་ཀྱིས་བུ་ཕྲུག་གི་ལུས་ངག་ཡིད་གསུམ་ལ་བག་ཆགས་འཇོག་གི་ཡོད་པར་བརྟེན། དེ་དག་ལ་བརྟག་ཞིབ་བྱས་ཏེ་བུ་ཕྲུག་གི་རྒྱུད་ལ་ཤན་ཤུགས་ངན་པ་ཐེབས་སུ་འཇུག་མི་ཉན། ཚོམས་ལས་སེམས་དུལ་བ་ནི་ལེགས་པ་དེ།། སེམས་དུལ་བ་ཡིས་བདེ་བ་འདྲེན།། ཞེས་སེམས་དུལ་བ་ལ་བརྟེན་ནས་བདེ་བ་འདྲེན་གྱི་ཡོད་པ་གསུངས་པ་བཞིན། ཕ་མས་རང་སེམས་དུལ་བའི་སྒོ་ནས་བུ་ཕྲུག་ལ་བག་ཆགས་ཡག་པོ་བཞག་སྟེ་གསོ་སྐྱོང་བྱེད་དགོས། དེ་བཞིན་དུ་ཕྱི་གླིང་གི་བྱིས་པའི་སེམས་ཁམས་རིག་པ་བ་ཚོས་ཕ་མས་རང་ཉིད་ལ་ཚོད་འཛིན་བྱེད་པ་ནས་འགོ་བཙུགས་ཏེ་བུ་ཕྲུག་ལ་ཚོད་འཛིན་བྱེད་མཚམས་འཇོག་ཉིན་དེར་བྱིས་སྐྱོང་སློབ་གསོ་ལེགས་ལམ་དུ་འགྲོ་བའི་འགོ་བཙུགས་པ་ཡིན་ཞེས་གསུངས་ཡོད། དེས་ན་ཕ་མས་བུ་ཕྲུག་གི་ལྷན་སྐྱེས་ཀྱི་སེམས་ཁམས་གཙང་མ་དེ་བྱེད་ཐབས་སྣ་ཚོགས་ལ་བརྟེན་ནས་བདག་གཅེས་དང་སྲུང་སྐྱོབ་ཡག་པོ་བྱས་ཏེ་བུ་ཕྲུག་ལ་མི་གཤིས་ཀྱི་རྨང་གཞི་ཡག་པོ་འཇོག་རྒྱུ་གལ་ཆེའོ།།