བོད་ཀྱི་ཆབ་སྲིད་བཙོན་པ་དང་ཡུལ་སྐོར་སྣེ་ཤན་པ་དཀོན་མཆོག་སྦྱིན་པ་ལགས་རྒྱའི་བཙོན་ཁང་དུ་རྡུང་རྡེག་མནར་གཅོད་ཚད་མེད་བཏང་རྐྱེན་འོག་འདས་གྲོངས་སུ་ཕྱིན་ཡོད་འདུག
ཁ་སང་རྒྱལ་སྤྱིའི་འགྲོ་བ་མིའི་ཐོབ་ཐང་གིས་སྤེལ་བའི་གནས་ཚུལ་ལྟར་ན། ཕྱི་ལོ་ ༢༠༡༣ ལོར་འཛིན་བཟུང་བྱས་པའི་བོད་ཀྱི་ཆབ་སྲིད་བཙོན་པ་དཀོན་མཆོག་སྦྱིན་པ་ལགས་ལ་རྒྱའི་བཙོན་ཁང་དུ་མནར་གཅོད་རྡུང་རྡེག་ཚད་མེད་བཏང་རྐྱེན། འདས་ལོའི་ཕྱི་ཟླ་ ༡༡ ནང་རྒྱ་ནག་གིས་དཀོན་མཆོག་སྦྱིན་པ་ལགས་ཀྱི་ནང་མིར་ཤེས་རྟོགས་གང་ཡང་མེད་པའི་ཐོག་ནས་ལྷ་ས་གྲོང་ཁྱེར་གྱི་སྨན་ཁང་ཞིག་ཏུ་བསྐྱལ་ཡོད་ནའང་། ཁོང་གི་ཀླད་ཁྲག་འདྲེས་པ་དང་ལུས་ཧྲིལ་བོ་འགུལ་སྐྱོད་མ་ཐུབ་པར་ཟླ་འདིའི་ཕྱི་ཚེས་ ༦ ཉིན་སྨན་ཁང་དུ་འདས་གྲོངས་སུ་ཕྱིན་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གི་རྒྱ་ནག་སྡེ་ཚན་གྱི་འགན་འཛིན་སའོ་ཧྥེ་རའེ་ཆ་ཌི་ལགས་ཀྱིས། དཀོན་མཆོག་སྦྱིན་པ་ལགས་ཀྱི་གྲོངས་རྐྱེན་ནི་ཉེས་མེད་བཙོན་འཇུག་འོག་བཙོན་ཁང་དུ་རྡུང་རྡེག་ཚད་མེད་ཐེབས་ཏེ་འདས་གྲོངས་སུ་འགྲོ་དང་འགྲོ་མུས་ཡིན་པའི་བོད་མིའི་ཁྲོད་ཀྱི་གནས་སྟངས་ཤིག་ཆགས་ཀྱི་ཡོད། ཅེས་དང་། རྒྱ་ནག་ནང་མི་གང་བྱུང་འཛིན་བཟུང་གིས་རྡུང་རྡེག་དང་མནར་གཅོད་མྱངས་བཅུག་སྟེ། འདས་གྲོངས་སུ་འགྲོ་ཡི་ཡོད་པ་སོགས་ཀྱི་འགན་ཚང་མ་རྒྱ་ནག་གི་མགོ་ཁྲིད་ཚོས་འཁུར་དགོས་ཀྱི་ཡོད། ཅེས་བརྗོད་འདུག
སྤྱིར་བཏང་ཕྱི་ལོ་ ༢༠༡༣ ཟླ་ ༡༡ ཚེས་ ༨ ཉིན་དཀོན་མཆོག་ལགས་འཛིན་བཟུང་བྱས་པ་ནས་ད་བར་ཁོང་གི་སྐོར་གྱི་ཞི་ཕྲའི་གནས་ཚུལ་རྒྱས་པ་ཤེས་རྟོགས་བྱུང་མེད་པ་དང་། འགྲོ་བ་མིའི་ཐོབ་ཐང་གི་གནས་ཚུལ་ནང་། རྒྱ་ནག་གིས་དཀོན་མཆོག་ལགས་འཛིན་བཟུང་བྱས་རྗེས་ནང་མིར་ཁོང་གར་ཡོད་སོགས་ཀྱི་གནས་ཚུལ་གང་ཡང་མཁོ་སྤྲོད་བྱས་མེད་པ་མ་ཟད། ཕྱིས་སུ་ཕྱིའི་གསར་འགྱུར་བརྒྱུད་ལམ་ཁག་ལ་གནས་ཚུལ་མཁོ་སྤྲོད་བྱས་ཏེ། རྒྱལ་ཁབ་ཀྱི་གསང་བ་ཕྱིར་གྱར་བའི་ཉེས་འཛུགས་འོག ཁོང་ལ་ལོ་ངོ་ ༢༡ རིང་བཙོན་འཇུག་ཁྲིམས་ཐག་བཅད་ཡོད་པ་དང་། ཟླ་སྔོན་མའི་ཚེས་ ༢༩ ཉིན་ནང་མི་ཚོས་གཞི་ནས་དཀོན་མཆོག་ལགས་ཀྱི་འཕྲོད་བསྟེན་གནས་སྟངས་ཛ་དྲག་ཡིན་པ་ཤེས་རྟོགས་ཐུབ་སྟེ། ནང་མི་སྤུན་མཆེད་ཁག་ཅིག་སྨན་ཁང་དུ་དཀོན་མཆོག་ལགས་སུ་ཁྲག་སྦྱིན་པར་ཕྱིན་ཡོད་ནའང་ཕན་ཐོགས་མ་ཐུབ་པར་སྨན་ཁང་ནང་ནས་འདས་གྲོངས་སུ་ཕྱིན་ཡོད་སྐོར་སོགས་བརྗོད་འདུག
དཀོན་མཆོག་ལགས་འཛིན་བཟུང་བྱེད་དོན་གཙོ་བོ་ནི། ཕྱི་ལོ་ ༢༠༡༣ ལོར་འབྲི་རུ་རྫོང་གི་གནས་རི་ནགས་ལྷ་ཛམ་བྷ་ལར་གཏེར་ཁ་སྔོག་འདོན་དང་འབྲེལ་བའི་གནས་ཚུལ་ཕྱིའི་གསར་འགྱུར་བརྒྱུད་ལམ་ཁག་ལ་མཁོ་སྤྲོད་བྱས་པའི་ཡིན་པ་དང་། ལོ་དེའི་ཟླ་ ༤ ནང་ཁོང་གིས་རང་ཉིད་ཀྱི་སྐད་འཕྲིན་རྒྱབ་ཏུ། ང་ད་ལྟ་ཆུ་འགྲམ་དུ་ཡོད། མི་མང་པོས་ངའི་རྒྱབ་ལ་ལྟ་ཞིབ་བྱེད་ཀྱི་འདུག ང་འཛིན་བཟུང་བྱ་རྒྱུ་ཡིན་པ་གཏན་འཁེལ་རེད། གལ་ཏེ་ང་འཛིན་བཟུང་བྱས་པ་ཡིན་ནའང་ཞེད་སྣང་མེད་ལ། མཐའ་ན་ཁོ་ཚོས་ང་བསད་པ་ཡིན་ནའང་གྱོད་པ་མི་སྐྱེས། འོན་ཀྱང་། ད་ལྟ་ནས་ངས་གནས་ཚུལ་མཁོ་སྤྲོད་བྱེད་ཐུབ་མ་སོང་ལ། གལ་སྲིད་ང་ལ་གྲགས་འགུལ་རིགས་མེད་ཚེ། དེ་ནི་ང་འཛིན་བཟུང་བྱས་ཟིན་པ་ཡིན། ཞེས་བརྗོད་ཡོད་པ་དང་། ལོ་དེར་ནགས་ལྷ་ཛམ་བྷ་ལར་གཏེར་ཁ་སྔོན་འདོན་དང་འབྲེལ་འབྲི་རུའི་མི་མང་འབོར་ཆེན་གྱིས་རྒྱ་གཞུང་ལ་ངོ་རྒོལ་ལས་འགུལ་སྤེལ་བ་དང་། སྐབས་དེར་རྒྱ་ནག་གིས་འབྲི་རུའི་མི་མང་ ༡༣༢༥ འཛིན་བཟུང་བྱས་པའི་ཁྲོད་མི་གྲངས་ ༦༧༠ ཡས་མས་ལ་བཙོན་འཇུག་ཁྲིམས་ཐག་བཅད་ཡོད་པ་རེད།
ཆབ་སྲིད་བཙོན་ཟུར་དཀོན་མཆོག་སྦྱིན་པ་ལགས་ནི་ཕྱི་ལོ་ ༡༩༨༩ ལོར་བོད་ནས་བལ་ཡུལ་བརྒྱུད་རྒྱ་གར་ནང་འབྱོར་ཞིང་། བོད་ནང་ཡོད་དུས་གྲྭ་བ་ཡིན་སྟབས་རྒྱ་གར་ནང་འབྱོར་མ་ཐག་རྡེ་ར་ལྡུན་བྱང་ཆུབ་གླིང་གི་ཆོས་སྒོར་ཞུགས། ཕྱི་ལོ་ ༡༩༩༡ ནས་ ༡༩༩༦ བར་སུ་ཇཱ་བོད་ཁྱིམ་སློབ་གྲྭ་དང་ཝར་ན་མཐོ་སློབ་སོགས་སུ་སློབ་གཉེར་གྱིས་དབྱིན་ཡིག་དང་ཧིན་རྡུ། རྒྱ་སྐད་བཅས་ལ་རང་རྐྱ་འཕེལ་རྗེས། ཕྱི་ལོ་ ༡༩༩༨ ལོར་ཕྱིར་བོད་ནང་ལོག་སྟེ། སྣེ་ཤན་པའི་ལས་ཀ་བྱེད་ཤོར་ཉེ་འཁོར་ས་གནས་མང་ཚོགས་ཀྱི་དཔལ་འབྱོར་དང་སློབ་གསོའི་ཐོག་ཤུགས་སྣོན་བརྒྱབས། དཀོན་མཆོག་ལགས་ད་ལྟ་རང་ལོ་ ༥༡ ཡིན་པ་དང་ཕ་ཡུལ་འབྲི་རུ་རྫོང་ཆགས་རྩེ་ཤང་གྲོང་ཚོ་ལྔ་བ་ནས་ཡིན་ཞིང་། ཕའི་མཚན་ལ་བསོད་ནམས་དབང་ལྡན་དང་མའི་མཚན་ལ་དཔལ་ལྷ་ཞུ་ཡི་ཡོད་འདུག
གསར་འགོད་པ། སྐལ་བཟང་སྦྱིན་པ།
