འཛམ་གླིང་གི་ཡར་རྒྱས་འགྲོ་བཞིན་པའི་རྒྱལ་ཁབ་ (G-77) གཙོས་པའི་ཨ་རི་དང། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་དང་སྲིད་གཞུང་བཅས་ལ་འབོད་སྐུལ་དོན་ཚན་ ༣༡ ཞུས་པའི་ནང་རྒྱ་ནག་གཞུང་གིས་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ནང་ཡར་རྒྱས་འཛུགས་སྐྲུན་གྱི་ཐོབ་ཐང་ངོས་འཛིན་བྱེད་ཕྱོགས་དང་ཡར་རྒྱས་གྱི་འགྲེལ་བརྗོད་ཁྱབ་སྤེལ་བྱེད་བཞིན་པར་ངོས་ལེན་བྱེད་རྒྱུ་མེད་སྐོར་བཀོད་འདུག
དེ་རིང་ཕྱི་དྲོའི་ཆུ་ཚོད་ ༣།༣༠ ཐོག་དྷ་སར་ཡོད་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས། མགོ་མཇུག་འཆོལ་བའི་ཡར་རྒྱས་འཛུགས་སྐྲུན་ཏེ། བོད་ནང་དུ་རྒྱ་གཞུང་གིས་ཡར་རྒྱས་འཛུགས་སྐྲུན་གྱི་ཐོབ་ཐང་དང་ལག་བསྟར་བྱེད་ཕྱོགས་གླེང་སློང་ཞེས་པའི་སྙན་ཐོ་ཞིག་འདོན་སྤེལ་བྱས་པའི་ནང་། རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་གཞུང་གི་ཡར་རྒྱས་འཛུགས་སྐྲུན་ཟེར་བ་དེ་འགྲོ་བ་མིའི་ཐོབ་ཐང་གི་གལ་ཆེའི་ངོ་བོར་འུད་སྒྲོག་བྱེད་བཞིན་པར་ཡིད་གཟབ་བྱ་སྐོར་བཀོད་འདུག
གསར་འགོད་གསལ་བསྒྲགས་སྟེང་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས། ཕྱི་ལོ་ ༡༩༨༦ ལོར་མཉམ་འབྲེལ་རྒྱལ་ཚོགས་ཀྱིས་སྤེལ་བའི་ཡར་རྒྱས་འཛུགས་སྐྲུན་གྱི་ཡོངས་ཁྱབ་གསལ་བསྒྲགས་ནང་། རྒྱལ་ཁབ་ཅིག་གིས་དཔལ་འབྱོར་གྱི་འཛུགས་སྐྲུན་བྱེད་སྐབས་ངེས་པར་དུ་ཆབ་སྲིད་དང་སྤྱི་དམངས་ཀྱི་ཐོབ་ཐང་རྣམས་བརྩི་སྲུང་དགོས་སྐོར་འཁོད་ཡོད་ནའང་། རྒྱ་ནག་གཞུང་གིས་བོད་ནང་རྒྱ་ལམ་སོགས་འཛུགས་སྐྲུན་བྱེད་སྐབས་ས་གནས་མི་མང་གི་མངོན་འདོད་ལ་ལྟོས་ཀྱི་མེད་པ་མ་ཟད། འཛུགས་སྐྲུན་གྱི་ཆེད་དུ་གཏོར་བཅོམ་བཏང་བའི་ཁང་ཁྱིམ་སོགས་ལའང་གུན་གསབ་སྤྲོད་ཀྱི་མེད་སྐོར་བརྗོད་བྱུང་།
སྙན་ཐོ་འདོན་སྤེལ་གྱི་བསྒྲགས་གཏམ་ནང་། རྒྱ་གཞུང་གི་ཡར་རྒྱས་འཛུགས་སྐྲུན་ཟེར་བ་དེ་ནི། མི་དམངས་ཀྱི་འཚོ་གནས་དངོས་ལ་བསམ་བློ་མ་བཏང་བར་མགོ་མཇུག་འཆོལ་བའི་ལས་འཆར་རྣམ་གྲངས་མང་པོ་ལག་བསྟར་བྱས་པའི་རྐྱེན་གྱིས། ཟུར་ཕུད་དང་ནུས་མེད་བཟོས་པའི་མི་རིགས་ཁག་སྤྱིའི་ཐོབ་ཐང་བརྡལ་བཤིག་ཐེབས་ཡོད་སྐོར་དང་། པེ་ཅིན་གཞུང་གིས་སྒྲིག་བཟོ་བྱས་པའི་རྒྱ་ནག་གི་ཡར་རྒྱས་འཛུགས་སྐྲུན་གྱི་ལས་འཆར་ཟེར་བ་ནི། དམར་ཤོག་སྲིད་གཞུང་གི་ཁེ་ཕན་དང་ཆབ་སྲིད་ལས་དོན་གཙོ་བོར་བཟུང་ནས། བོད་མིའི་འཚོ་གནས་ཡར་རྒྱས་གཏོང་རྒྱུ་ལས་ལྡོག་སྟེ་མི་རིགས་རྒྱ་སྒྱུར་བྱེད་ཐབས་ཤིག་ཡིན་སྐོར་དང་། རྒྱ་གཞུང་གིས་བོད་བེད་སྤྱད་ནས་རྒྱལ་སྤྱིའི་སྟེང་རྒྱ་ནག་གི་ཡར་རྒྱས་འཛུགས་སྐྲུན་གྱི་དཔེ་མཚོན་ངོམ་སོ་བྱེད་ཀྱི་ཡོད་པ་དང༌། བོད་ཡུལ་ནི་རྒྱ་གཞུང་གི་ཡར་རྒྱས་འཛུགས་སྐྲུན་ལས་གཞིའི་ཚོད་ལྟ་ཁང་ལྟ་བུ་ཞིག་དང༌། དེ་ག་ནང་བཞིན་ཕྱིའི་སྔོན་ཐོན་རྒྱལ་ཁབ་ཁག་གི་སྐུ་ཚབ་ཚོར་རྒྱ་གཞུང་གི་ཡར་རྒྱས་འཛུགས་སྐྲུན་མངོན་འགྱུར་བྱུང་ལུགས་ཀྱི་རྣམ་པ་སྟོན་སའི་འགྲེམ་སྟོན་ཁང་ལྟ་བུ་ཆགས་ཡོད་སྐོར་འགྲེལ་བརྗོད་བྱས་འདུག
གཞན་ཡང་། རྒྱལ་སྤྱིའི་སྟེང་རྒྱ་གཞུང་གི་ཡར་རྒྱས་འཛུགས་སྐྲུན་གྱི་ཤན་ཤུགས་མུ་མཐུད་དུ་འཕེལ་བཞིན་ཡོད་དང༌། དེ་བཞིན་འཛམ་གླིང་རྒྱལ་ཁབ་མང་བོ་ཞིག་གིས་རྒྱ་གཞུང་གི་ཡར་རྒྱས་འཛུགས་སྐྲུན་ཐོབ་ཐང་འུད་སྒྲོག་བྱེད་བཞིན་པ་ཁས་ལེན་བྱ་སྲིད་པ་རེད། གལ་ཏེ་རྒྱ་གཞུང་གིས་རྒྱལ་སྤྱིའི་ཡར་རྒྱས་འཛུགས་སྐྲུན་ལ་སྣེ་ཁྲིད་བའི་དབང་དུ་བཏང་ན། ཡར་རྒྱས་འཛུགས་སྐྲུན་གྱི་ཐོབ་ཐང་བརྩོན་ལེན་གནང་མཁན་རྒྱལ་སྤྱིའི་སྤྱི་ཚོགས་ཀྱི་ངོས་ནས་རྒྱ་གཞུང་གི་དཔེ་མཚོན་རང་བཞིན་གྱི་ཡར་རྒྱས་འཛུགས་སྐྲུན་གྱི་ལེགས་ཉེས་གསལ་བོར་ཤེས་རྟོགས་གནང་རྒྱུ་གལ་ཆེན་པོ་རེད། ཅེས་བཀོད་འདུག
ད་ཐེངས་ཀྱི་སྙན་ཐོའི་མཇུག་ཏུ་འཛམ་གླིང་གི་ཡར་རྒྱས་འགྲོ་བཞིན་པའི་རྒྱལ་ཁབ་ (G-77) གཙོས་པའི་ཨ་རི་དང། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་སྡེ་དང་སྲིད་གཞུང་བཅས་ལ་འབོད་སྐུལ་དོན་ཚན་ ༣༡ ཞུས་པའི་ནང་། རྒྱ་ནག་གཞུང་གིས་ཆབ་སྲིད་དང་སྤྱི་དམངས་ཀྱི་ཐོབ་ཐང་ལས་དཔལ་འབྱོར་ཐོབ་ཐང་དེ་ཉིད་གཙིགས་ཆེར་འཛིན་བཞིན་པར་རྒྱལ་སྤྱིའི་སྤྱི་ཚོགས་ཀྱིས་དགག་བྱ་འདོན་དགོས་པ་དང་། རྒྱལ་སྤྱིའི་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་གི་ཚོགས་པ་ཁག་གིས་ཡར་རྒྱས་འཛུགས་སྐྲུན་གྱི་ཐོབ་ཐང་ལ་ཐོབ་ཐང་གཞན་ལྟར་གལ་གནད་དུ་བརྩི་དགོས་ཀྱི་ཡོད་པ། དེ་བཞིན། རྒྱ་ནག་གཞུང་གིས་རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ནང་རང་གི་ཡར་རྒྱས་འཛུགས་སྐྲུན་གྱི་ཐོབ་ཐང་ངོས་འཛིན་བྱེད་ཕྱོགས་དང་ཡར་རྒྱས་གྱི་འགྲེལ་བརྗོད་ཁྱབ་སྤེལ་བྱེད་བཞིན་པར་ངོས་ལེན་བྱེད་རྒྱུ་མེད་སྐོར་བཀོད་འདུག
དེ་བཞིན་རྒྱ་ནག་གཞུང་གིས་བོད་ནང་ཡར་རྒྱས་འཛུགས་སྐྲུན་གྱི་སྲིད་ཇུས་ག་འདྲ་ཞིག་སྤེལ་རུང་། བོད་མི་མང་གི་མངོན་འདོད་དང་ཡུལ་སྲོལ་གོམས་གཤིས་གཞིར་བཟུང་། མིང་དོན་མཚུངས་པའི་བོད་མིའི་འཚོ་གནས་ཡར་རྒྱས་གཏོང་དགོས་པ་དང་། བོད་ནང་བཙན་དབང་གིས་གནས་སྤོས་དང་བོད་མི་རྣམས་གྲོང་ཁྱེར་ཅན་དུ་བསྒྱུར་རྒྱུ་མཚམས་འཇོག་དགོས། དེ་བཞིན། བོད་ཀྱི་རང་བྱུང་གཏེར་ཁ་སྔོན་འདོན་སོགས་མཚམས་འཇོག་དགོས་པའི་འབོད་སྐུལ་བྱས་འདུག
གསར་འགོད་པ། པ་སངས་ཚེ་རིང་།
