སྐལ་བཟང་སྦྱིན་པ། དུས་བབ།
ཟླ་འདིའི་ཕྱི་ཚེས་ ༢༠ ཉིན་རྗོ་བྷའེ་ཌན་ཨ་རིའི་སྲིད་འཛིན་ཆགས་ཏེ་ཟླ་གཅིག་ཏག་ཏག་འཁོར་ཡོད་པ་དང་། འདས་པའི་ཟླ་གཅིག་རིང་མི་མང་པོ་ཞིག་གིས་འཛམ་གླིང་གི་སྟོབས་ཤུགས་ཆེ་ཤོས་ཀྱི་རྒྱལ་ཁབ་ཨ་རི་དང་རྒྱ་ནག་བར་གནས་སྟངས་ཅི་བྱུང་ཐད་མིག་རིག་རིག་དང་རྣ་བ་ཀྲོང་ཀྲོང་གིས་ལྟ་ཉན་བྱེད་ཀྱི་ཡོད་ཀྱང་། ཉེ་བའི་ཟླ་གཅིག་ལྷག་གི་རིང་རྗོ་བྷའེ་ཌན་གྱིས་སྣེ་འཁྲིད་པའི་ཨ་རིའི་སྲིད་གཞུང་གསར་པ་དང་། ཞི་ཅིན་ཕིན་གྱི་དབང་སྒྱུར་འོག་གི་རྒྱ་ནག་བར་སྲིད་འཛིན་ཟུར་བ་ཊོམ་ཕུའི་ལོ་བཞིའི་དུས་ཡུན་ལས་ལྷག་གི་ཕྱི་འཇམ་ནང་འཁྲུག་དང་འགྱུར་ལྡོག་བྱུང་ཡོད་པ་མཁྱེན་བྱུང་ངམ།
ཟླ་འདིའི་ཕྱི་ཚེས་ ༨ ཉིན་སྲིད་འཛིན་བྷའེ་ཌན་གྱིས་ཨ་རིའི་(CBS)གསར་ཁང་གི་བཅར་འདྲི་ཞིག་གི་སྐབས། ཞི་ཅིན་ཕིན་ངེད་གཉིས་དེ་སྔོན་ཐེངས་མང་རིང་ཐུག་མྱོང་། ཁོ་མི་མཁྲེགས་པོ་དང་རྣམ་རིག་ཅན་ཞིག་ཡིན་མོད། ཁོའི་ལུས་སྟེང་དུ་དམངས་གཙོའི་རུང་རྐང་ཆུང་ཆུང་ཞིག་ཀྱང་མེད། ཅེས་ཞི་ཡི་སྲིད་དབང་སྒེར་གཅོད་ཀྱི་རང་གཤིས་ཐེར་འདོན་བྱས། འོན་ཀྱང་། རྒྱ་ནག་གཞུང་གིས་བྷའེ་ཌན་གྱི་ཟུར་ཟའི་སྐད་ཆ་ལ་དགག་བྱའི་ལན་ཚིག་གཅིག་བཏབས་མེད་པ་མ་ཟད། བྷའེ་ཌན་དང་ཞི་གཉིས་ཐུག་འཕྲད་མང་པོ་བྱས་མྱོང་བ་དང་། ཨ་རྒྱ་གཉིས་ནས་གྲོས་མོལ་གྱི་ལམ་ནས་རྒྱལ་འབྲེལ་གོང་མཐོར་གཏང་རྒྱུའི་རེ་བ་ཡོད་ལུགས་བརྗོད་དེ་སྤྲེལ་ལད་འཁྲབ་ཡོད།
རྗོ་བྷའེ་ཌན་ལ་ཨ་རིའི་སྲིད་འཛིན་གྱི་འོས་བསྡུའི་རྒྱལ་ཁ་ཐོབ་པ་དང་ཟླ་སྔོན་མའི་ཚེས་ ༢༠ ཉིན་སྲིད་འཛིན་གྱི་ལས་ཁུར་དམ་འབུལ་སྐབས། ཁོས་ཐའེ་ཝན་གྱི་སྐུ་ཚབ་རང་ཉིད་ཀྱི་དམ་འབུལ་མཛད་སྒོའི་སྐུ་མགྲོན་དུ་བོས་ཏེ། ཕྱི་ལོ་ ༡༩༧༩ རྗེས་ནས་ཨ་རིའི་སྲིད་འཛིན་ཞིག་གི་དམ་འབུལ་མཛད་སྒོར་ཐའེ་ཝན་གྱི་སྐུ་ཚབ་གཞུང་འབྲེལ་ཐོག་ནས་མགྲོན་འབོད་བྱས་པ་ཐོག་མ་ཆགས་པ་དང་། གནད་དོན་དེས་རྒྱ་ནག་གིས་ནམ་རྒྱུན་སྤོམ་ཚིག་ཆེན་པོས་ཐའེ་ཝན་གྱི་སྲིད་ལ་ཐེ་གཏོགས་བྱེད་མཁན་བྱུང་ཚེ། དམག་འཁྲུག་ཀྱང་རྒྱག་སྲིད་པའི་ཉེན་བརྡ་གཏོང་གི་ཡོད་པ་གོ་མེད་ཚོར་མེད་དུ་བཏང་བ་མ་ཟད། སྐབས་དེར། རྒྱ་ནག་གཞུང་འབྲེལ་ཞིན་ཧྭ་གསར་ཁང་གི་རྩོམ་སྒྲིག་ཚན་པས། སྲིད་འཛིན་ཊོམ་ཕུའི་འཛིན་སྐྱོང་དང་དེའི་དབྲ་ཚག་གི་ལས་ཡུན་མཇུག་བསྡུས་སོང་ཞེས་དགའ་སྣང་ཙམ་བསྟན་པ་ལས་ཐའེ་ཝན་སྐོར་གྱི་གནད་དོན་གླེང་སློང་ཙམ་ཡང་བྱས་མེད།
ཟླ་འདིའི་ཚེས་ ༦ ཉིན་སྲིད་འཛིན་བྷའེ་ཌན་གཞུང་དང་རྒྱ་ནག་བར་ཁ་པར་བརྒྱུད། ཨ་རྒྱ་གཉིས་བར་རྩོད་རྙོག་ཏུ་གྱུར་བའི་གནད་དོན་གཙོ་གྲས་འགའི་ཐོག་གྲོས་མོལ་བྱུང་བ་དང་། སྐབས་དེའི་རྒྱལ་ཁབ་གཉིས་ཀྱི་བསྒྲགས་གཏམ་ནང་ཚོང་འབྲེལ་གཙོ་བྱས་པའི་བོད་དོན་དང་ཡུ་གུར། ཧོང་ཀོང་། དེ་བཞིན་ཐའེ་ཝན་སོགས་ཀྱི་ཐད་ཕྱོགས་གཉིས་དབར་འགལ་ཟླ་ཤུགས་ཆེན་ཡོད་པ་བསྟན་པ་མ་ཟད། ཨ་རིའི་རྒྱལ་སྲིད་དྲུང་ཆེ་ཨན་ཊོ་ནེ་ (Antony Blinken) ཡིས། ཨ་རིས་མཐུན་གྲོགས་རྒྱལ་ཁབ་ཁག་དང་མཉམ་འབྲེལ་གྱིས། རྒྱ་ནག་གིས་ཐའེ་ཝན་མཚོ་གླིང་ཚུད་པའི་ཞི་བདེ་རྒྱ་མཚོའི་ཁུལ་གྱི་བརྟན་བརླིང་ལ་འཇིགས་སྐུལ་གཏོང་བཞིན་པར་འགན་ལེན་བྱེད་དུ་འཇུག་གི་ཡིན། ཨ་རིས་མུ་མཐུད་བོད་དང་ཤིན་ཅང་། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་དང་དམངས་གཙོའི་རིན་ཐང་ལ་རྒྱབ་སྐྱོར་བྱ་རྒྱུ་ཡིན། ཞེས་བཤད་ཡོད།
སྲིད་འཛིན་བྷའེ་ཌན་གྱིས་ཞི་ཅིན་ཕིན་ལ་དམངས་གཙོའི་རུས་རྐང་མེད་སྐོར་བརྗོད་པ་དང་འབྲེལ། ཨ་རི་དང་རྒྱ་ནག་དམག་འཁྲུག་རྒྱག་དགོས་ཀྱི་མེད་ནའང་ཕྱོགས་གཉིས་བར་འགྲན་རྩོད་ཧ་ཅང་ཤུགས་ཆེན་ཡོང་རྒྱུ་ཡིན་པ་དང་། ཨ་རིའི་གཞུང་གསར་པ་ཊོམ་ཕུའི་ལམ་དུ་མ་ཞུགས་པར་རྒྱལ་སྤྱིའི་སྒྲིག་ཁྲིམས་ཀྱི་ལམ་སྲོལ་ཁག་ལ་དོ་དབྱིངས་ཤུགས་ཆེན་བྱ་རྒྱུ་ཡིན་པར་བཤད་ལ། ཉེ་སྔོན་ཚེས་ ༢༠ ཉིན་གྱི་དམ་འབུལ་སྐབས་བྷའེ་ཌན་གྱིས་བཀའ་ཁྱབ་བཅོ་ལྔ་ལ་མཚན་རྟགས་བསྐྱོན་ཏེ། ཨ་རི་སླར་ཡང་འཛམ་གླིང་འཕྲོད་བསྟེན་སྒྲིག་འཛུགས་དང་། གོ་ལའི་གནམ་གཤིས་ཚ་དྲོད་སྲུང་སྐྱོབ་ཀྱི་གྲོས་ཁོངས་སུ་ཞུགས་ཏེ། ཁོས་མུ་མཐུད་ཨ་རིས་འཛམ་གླིང་གི་སྣེ་འཁྲིད་པར་འབད་བརྩོན་བྱ་རྒྱུའི་ཕུགས་བསམ་བཅངས་ཡོད།
ཊོམ་ཕུ་སྲིད་འཛིན་ཡིན་སྐབས། ཁོས་མི་རིགས་དཀར་པོའི་ཁེངས་དྲེགས་དང་འབྱོར་ལྡན་གྲལ་རིམ་སོགས་གཙིགས་སུ་བཟུང་སྟེ། ཚོང་ལས་གཙོ་བྱས་པའི་ཐོག་ནས་ཕྱི་སྲིད་ལས་དོན་དང་འབྲེལ་ནས་རྒྱ་ནག་གི་ཁ་གཏད་གཅོག་ཐབས་བྱས་ཡོད་མོད། ཨ་རིའི་དཔལ་འབྱོར་དཔྱད་བརྗོད་པ་དང་གསར་འགོད་པ་ལའོ་ཕུ་རྫེ་(LINETTE LOPEZ) ལགས་ཀྱིས། ཊོམ་ཕུས་དོན་དངོས་ཐོག་རྒྱ་ནག་གིས་ཧོང་ཀོང་ནང་དྲག་གནོན་བྱས་པ་དང་། ལྷོ་རྒྱ་ནག་རྒྱ་མཚོའི་ཁུལ་གྱི་དམག་ཤུགས་རྒྱ་བསྐྱེད་བཏང་བ། དེ་བཞིན། ཨ་རིའི་མཐུན་གྲོགས་ཡུ་རོབ་དང་རྒྱ་ནག་བར་ཚོང་འབྲེལ་གསར་པ་བཙུགས་པ་སོགས་བཀག་འགོག་བྱེད་ཐུབ་མེད། ཅེས་བརྗོད་ཡོད་ལ། ཊོམ་ཕུའི་ལས་ཡུན་སྐབས་ཁོས་ཨ་རིའི་ཕྱི་སྲིད་ལས་དོན་དང་འབྲེལ་བའི་མཐུན་གྲོགས་རྒྱལ་ཁབ་མང་པོ་ཞིག་ཨ་རི་དང་ཁ་ཐག་རྒྱང་རིང་དུ་བཏང་ཡོད་པ་དོན་དངོས་ཡིན།
ཊོམ་ཕུས་རང་ཉིད་ཀྱི་ལས་ཡུན་ལོ་བཞིའི་རིང་ཨ་རི་དང་པོ་ཞེས་པའི་སྲིད་ཇུས་གཙོ་བོར་བཟུང་སྟེ། ཨ་རི་པེ་རེ་སིའི་གོ་ལའི་ཚ་དྲོད་དང་འཛམ་གླིང་འཕྲོད་བསྟེན་སྒྲིག་ཁུངས་སོགས་ནས་ཕྱིར་འཐེན་བྱས་པ་མ་ཟད། ཨ་རིས་ལོ་རེར་རྒྱལ་ཚོགས་ཀྱི་འགྲོ་གྲོན་བརྒྱ་ཆ་ ༢༢ གཏོང་གི་ཡོད་པ་མར་གཅོག་རྒྱུ་དང་། ཨ་རི་ནུབ་གླིང་རྒྱ་མཚོ་བྱང་མའི་དམག་དོན་སྒྲིག་འཛུགས་ (NATO) ཁོངས་ནས་ཕྱིར་འཐེན་བྱ་རྒྱུ་ཡིན་པ་སོགས་ཀྱི་ཉེན་བརྡ་བཏང་། འོན་ཀྱང་། ཊོམ་ཕུ་ལས་ལྡོག་སྟེ་བྷའེ་ཌན་གྱིས། ཨ་རིས་རྒྱལ་སྤྱིའི་ཚོགས་སྡེ་ཁག་གི་སྒྲིག་ཁྲིམས་ལ་གོང་བཀུར་དང་རྒྱབ་སྐྱོར་གྱིས། ཨ་རིས་མུ་མཐུད་འཛམ་གླིང་གི་སྣེ་འཁྲིད་བྱེད་པར་ཤུགས་རྒྱག་རྒྱུ་ཡིན་པ་དང་། བྷའེ་ཌན་གྱི་སྐད་ཆ་གསར་ཤོས་ཤིག་ནི། ཨ་རིས་རང་གི་སྟོབས་ཤུགས་མིག་དཔེར་བསྟན་ཏེ་འཛམ་གླིང་གི་སྣེ་འཁྲིད་རྒྱུ་མིན། འོན་ཀྱང་། ཨ་རིའི་མིག་དཔེ་ཡི་སྟོབས་ཤུགས་བརྒྱུད་འཛམ་གླིང་གི་སྣེ་འཁྲིད་རྒྱུ་ཡིན་པར་བཤད།
གང་ལྟར། བྷའེ་ཌན་སྲིད་འཛིན་ཆགས་ནས་ཟླ་གཅིག་ཙམ་མ་གཏོགས་ཕྱིན་མེད་ནའང་། ཁོས་རྒྱལ་སྤྱིའི་སྟེང་བརླག་ཉེན་ཆེ་བའི་ཨ་རིའི་སྣང་བརྙན་སླར་གསོ་བྱས་དང་བྱེད་མུས་ཡིན་ཁར། རྒྱ་ནག་གིས་ཡུ་གུར་མི་རིགས་རྩ་གཏོར་གཏོང་གི་ཡོད་པར་གཞུང་འབྲེལ་ངོས་འཛིན་བྱས་པ་དང་། བོད་དང་ཧོང་ཀོང་། ཝའེ་ཝན་སོགས་ཀྱི་གནད་དོན་རྒྱ་ནག་གཞུང་དང་ལྷན་དུ་གླེང་སློང་བྱས་ཡོད་ཅིང་། ཡུ་རོབ་གཙོ་བྱས་པའི་ཨེ་ཤ་ཡའི་ཨ་རིའི་མཐུན་གྲོགས་རྒྱལ་ཁབ་ཁག་མཉམ་འབྲེལ་གྱིས། རྒྱ་ནག་ལ་ཁ་གཏད་གཅོག་ཐབས་ཀྱི་སྲིད་ཇུས་འཛིན་དགོས་པའི་སྐུལ་འདེད་ཀྱང་བཏང་ཡོད་ལ། ཉམས་ཞིབ་པ་མང་པོས་ཀྱང་བྷའེ་ཌན་གཞུང་གིས་རྒྱ་ནག་ཐོག་ཊོམ་ཕུའི་འཛིན་སྐྱོང་ལས་ལྷག་གིས་སྲིད་ཇུས་མཁྲེགས་པོ་བཟུང་དང་འཛིན་གྱི་ཡོད་པའི་ཚོད་དཔག་བྱེད་ཀྱི་འདུག
