དབང་ལྡན་སྐྱབས།
ཡོད་ན་བརྒྱ་སྟོན་སྟོང་སྟོན། མེད་ན་ཇ་སྟོན་ཆུ་སྟོན། གང་ན་སུ་མཆིས་པའི་བོད་མི་ཚོ་ཡོད་ན་ཡོད་པའི་ཚོད་དང་མེད་ན་མེད་པའི་ཚོད་ཀྱིས་ལོ་གསར་ལ་ལྷན་འཛོམས་དང་བྲེལ་ཟིང་། སྤྲོ་སྣང་གིས་འདེགས་ཀྱིན་པའི་སྐབས་འདིར། ངའི་གྲོགས་པོ་གསུམ་སྟེ། མགོ་དཀྲིས་དམར་པོ་ཅན་དང་མགོ་དཀྲིས་ནག་པོ་ཅན། ཐེ་ཝན་བཀྲ་ཤིས་ཚེ་རིང་རྣམ་པ་གསུམ་གྱིས་རྒྱ་གར་དང་ཨོ་གླིང་། ཐེ་ཝན་སོ་སོ་ནས་རང་ཉིད་ཀྱི་སྤྲོ་གསེང་ལ་ཅི་མི་སྙམ་པར་རིང་དུ་དོར་ཏེ་ཤ་ཁྲག་རུས་གསུམ་གྱི་དུང་ཞེན་ལས་འཁྲུངས་པའི་བོད་པ་ཚང་གི་བདེན་དོན་དང་རང་དབང་གི་སླད་དུ་འདི་ལྟར་ཕྱོགས་སོ་སོ་ནས་རང་འཁྲིས་ཀྱི་བོད་དོན་ལས་འགུལ་རེ་རེ་ཕྲག་སྟེང་དུ་བླངས་པར་གྲོགས་ཀྱི་གྲལ་མཐའ་བ་ངས་སྙིང་ནས་ཡི་རངས་དང་བཀའ་དྲིན་ཞུ།
མགོ་དཀྲིས་དམར་པོ། རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ནི་བཙན་བྱོལ་བ་མི་ཐོག་དང་པོའི་གྲས་ཀྱི་ཕ་མ་གཉིས་ངལ་དུབ་ཀྱི་ལམ་བཟོ་ལ་རྒྱུག་གིན་པའི་མུར། ས་རྡོ་འདམ་ལས་ཀྱི་རྔུལ་ཆུའི་ཁྲོད་ནས་སྐྱབས་བཅོལ་བའི་མིང་བྱང་འཁུར་བའི་ཁོང་། ཆེས་ཐོག་མའི་ངུ་སྐད་དེ་དང་ལྷན་ལམ་ཟུར་གྱི་ཆུ་ཡུར་ཞིག་གི་ཁ་རུ་འཇིག་རྟེན་མི་ཡུལ་འདིར་སྐྱེས་པར་ཐོས། ཁོང་གིས། རང་ཉིད་ནར་སོན་བཞིན་པའི་ལོ་ཟླའི་མཁའ་དབུགས་དེ་ནི་ཕ་མས་རང་གི་ཕ་ཡུལ་ལ་བཟུང་བའི་འཁྲེང་ཞེན་དང་རེ་སྒུག མི་རབས་རྒན་པ་ཚོ་བོད་ལ་སང་ལོག་གནངས་ལོག་གི་རེ་ལྟོས། ད་དུང་བོད་ཕྲུག་ཚོ་ནི་རྒྱལ་ཁབ་སླར་གསོའི་ཐད། ལ་ལ་འགྲོ་བའི་ལག་རྟེན་དང་ཐུར་ལ་འགྲོ་བའི་རྐང་རྟེན་དུ་འགྱུར་དགོས་པའི་དགེ་རྒན་དག་གི་སློབ་གསོ་སོགས་ཡིན་ཞིང་། འཚར་ལོངས་ཀྱི་དབུགས་རྒྱུན་དེ་ནས། རང་གིས་གང་རྩོད་ཀྱིན་པའི་དེ་རིང་གི་ཕུགས་འདུན་འདི་ངང་གིས་རྙེད་པར་གླེང་།
ཟས་ངན་ངོན་དང་གོས་ཧྲལ་ཧྲུལ་རེ་ལ་གོམས་པར་གྱུར་བའི་མི་བུ་ཁོང་། དེ་ལྟར་ཁ་བ་གངས་ཅན་པའི་མིང་བྱང་ལ་ལུས་དང་གྲིབ་མ་བཞིན་འགྲོགས་ཏེ་མི་ལོ་བཅུ་ཕྲག་འགའི་རིང་རྒྱ་གར་གཙོས་འཛམ་གླིང་ཡུལ་གྲུ་གང་སར། སང་ཉིན་གྱི་བོད་རྒྱལ་ཁབ་ཅིག་གི་ཕུགས་འདུན་སྒོམ་བཞིན་སེམས་ཚེགས་དང་ལུས་ངག་གི་ངལ་བ་ཀློད་མ་མྱོང་ལ། བོད་ཀྱི་གཏམ་དཔེར་གཉན་འཁོར་དུ་སྐྱེས་ན་ཉིན་རེར་ལྕགས་ལྷམ་རེ་ཐེད་འགྲོ་བའི་བཤད་རྒྱུན་ཞིག་ཡོད་པ་ཇི་བཞིན། བཙན་བྱོལ་དུ་ལྕགས་ལྷམ་གོན་དགོས་མཁན་ཞིག་ཡོད་ན་དེ་ནི་ཁོང་ཡིན་ངེས། ཐེངས་འདིར་ཡང་། ལོ་གསར་ཚེ་གཅིག་ཉིན་རྡ་ས་ནས་ཐོན་ཏེ་བོད་རང་བཙན་གོམ་བགྲོད་ཀྱི་དར་ཆ་འདེགས་ཀྱིན་ལྡི་ལི་བར་གྱི་ཟླ་གཅིག་རིང་གི་བོད་དོན་གོམ་བགྲོད་དུ་དཔའ་སྤོབས་ཀྱིས་ཁེངས་བཞིན་ཆས་སོང་། བཀའ་དྲིན་ཆེ། ང་ཚོ་རེ་རེ་བཞིན་ཚེ་སྲོག་གི་རྒྱུ་བ་མ་ཆད་བར་དུ་དང་ཡང་ན་ཁ་བ་གངས་ཅན་པའི་རང་དབང་གི་རྔ་སྒྲ་ས་སྟེང་དུ་མ་བསྒྲགས་བར་འཐབ་རྩོད་ཀྱི་དར་ཆ་སྒྲེང་བཞིན་ཆས་དགོས།
མགོ་དཀྲིས་ནག་པོ། གྲོགས་བསྟན་པ་དར་རྒྱས། ཁོང་ནི་གཞིས་ལུས་ཀྱི་བོད་མི་སྤྱི་མཚུངས་ལྟར། དར་དམར་གྱི་རི་ལུང་གཡོག་ཅིང་། བཙན་འཛུལ་བའི་ཕར་སྤྱང་རྒོད་པའི་ཕ་གཞིས་ཏེ། དགྲ་བོའི་མི་སེར་སྤེལ་ཡུལ་དུ་གྱུར་པའི་བོད་མདོ་སྨད་ཕྱོགས་ཀྱི་འབྲོག་ཁྱིམ་དཀྱུས་མ་ཞིག་ཏུ་སྐྱེས་པ་ནི། ཁོང་འཇིན་རྟེན་དུ་འཐབ་རྩོད་པ་ཞིག་གི་ལས་དབང་ལ་བཏུམས་པའི་ལེའུ་ཞིག་གི་དབུ་ཁྱུད་ཐོག་མར་བྲིས་པ་རེད་ཅེས་བཤད་ན་ལས་ཆོག ལར་ཞེན་གྱི་ཟུང་ཁྲག་རུས་རྐང་ན་རྒྱུ་བའི་ཁོང་། གདོང་དམར་བོད་པ་ཚང་གི་ཕུགས་བསམ་ལ་སྙེག་པའི་ལོ་ཟླའི་ཁྲོད་ནས་ཐེངས་གཉིས་ཙམ་དགྲ་བོ་རྒྱ་དམར་གྱི་བཙོན་རའི་ལྕགས་མཁར་འགྲིམས་ཤིང་། ཕུགས་བསམ་གསོན་པོ་དེ་ཐོགས་བཞིན་ནམ་ཡང་འཚོལ་སྙེག་གི་གོམ་སྟབས་ལྷོད་མ་མྱོང་།
ང་རང་འབྲོག་ཕྲུག་ཁོང་ལ་ཐོག་མར་རྒྱུས་མངའ་བྱུང་པ་ནི་༢༠༡༢ རེད། དུས་དེར་རང་ཉིད་དུས་བབ་ཀྱི་གསར་འགོད་པ་ཡིན་ལ། ཁོང་རོགས་པ་གཉིས་དང་བཅས་ཏེ་བོད་ཀྱི་ལོ་གསར་སྐབས་ལྡི་ལི་ནས་རྡ་ས་བར་བོད་དོན་རྐང་འཁོར་སྐོར་བསྐྱོད་ཀྱི་ལས་འགུལ་ཅིག་སྤེལ། མཐར་སོག་སྒར་སློབ་གྲྭའི་འཛིན་སྐྱོང་གིས་ཁོང་ཚོ་གསུམ་གུང་སེང་གི་དུས་བཀག་ནང་ཚུད་དུས་ལྟར་སློབ་གྲྭར་མ་སླེབས་པ་རྒྱུ་མཚན་དུ་བྱས་ཏེ་ཕྱིར་ཕུད་བཏང་པའི་བརྒྱུད་རིམ་ལ་རྒྱུས་ལོན་དང་ཁོང་ལ་བཅར་འདྲི་ཡང་བྱས་མྱོང་། རྒྱུས་ལོན་བྱས་པའི་བརྒྱུད་རིམ་ནས་ཁོང་ནི་བོད་ཅེས་པའི་མིང་བྱང་འདིའི་འོག་ནས་ཚེ་སྲོག་ཀྱང་བློས་གཏོང་ཕོད་པའི་མི་བུ་སྙིང་སྟོབས་ཅན་ཞིག་ཡིན་པའི་བག་ཆགས་བཞག་བྱུང་།
༢༠༡༤ ལོར་རྡ་ས་ནས་ཁོང་གིས་བོད་གཞིས་བྱིས་ལྷན་འཛོམས་མ་ཡོང་བར་ངས་ལོ་མི་སར་ཞེས་པའི་དམ་བཅའ་ཞིག་རུམ་ལ་བཅུག་སྟེ། དུས་དེ་ནས་ཤ་མར་ཐུད་གསུམ་སོགས་ཟས་རིགས་སྣ་ཚོགས་ཀྱིས་སྡེར་ཁ་བཀང་ཞིང་། ཇ་འདྲེན་ཆང་འདྲེན་གྱི་འདུ་འཛི་རྒོད་པའི་བོད་ཀྱི་ལོ་གསར་སྐབས། ཁོང་གིས་འཆི་གསོན་གྱི་སོ་ཁ་ན་གནས་པའི་མི་རིགས་ཤིག་གི་ལས་དབང་ལ་འཁྲེང་ཞེན་གྱི་ཨམ་ཚུགས་སྡམ་བཞིན་ཟས་བཅད་ངོ་རྒོལ་ལ་སྙེག་མུས་ལྟར། ཟས་བཅད་ངོ་རྒོལ་ཐེངས་བརྒྱད་པ་དེ་བཞིན་འདི་ལོར་ཨོ་གླིང་ནུབ་མའི་གྲོང་ཁྱེར་པཱེར་ཐི་རུ་སྤེལ་བཞིན་པ་དང་། གདོང་དམར་ཚང་གི་ཁྱིམ་རྒྱུད་འདིའི་ཚེ་སྲོག་དང་རང་དབང་གི་སླད་འདི་ལྟར་བཟའ་བཏུང་བཅད་དེ་འཐབ་རྩོད་ཀྱི་གོམ་པ་རེ་རེ་བཞིན་ལྗིད་ཏིག་ཏིག་ངང་མདུན་ནས་མདུན་དུ་སྤོ་བཞིན་པ་ནི་ཁྱེད་ཀྱིས་རང་རིགས་ལ་བཟུང་པའི་ལར་ཞེན་དང་ཆོད་སེམས་གསོན་པོ་ལས་གཞན་ཅི། བཀའ་དྲིན་ཆེ། ཁ་བའི་མི་རྒྱུད་གཏན་དུ་ས་གཞི་ཆེན་པོ་འདིའི་སྟེང་དུ་འཚོ་ཕྱིར་ང་ཚོ་ལྷན་དུ་ལངས་ཡོང་།
ཁོང་གིས་ནམ་རྒྱུན། བོད་འདི་འཆི་གསོན་གྱི་བར་ན་གནས་པས། རྒྱའི་དབང་སྒྱུར་ལས་ཐར་རྒྱུ་ནི་བོད་འདི་གསོན་ཐུབ་པའི་ལམ་བུ་ཉག་ཅིག་དེ་ཡིན་པ་དང་། རྒྱའི་བཙོན་ར་ནས་རྒྱལ་གཅེས་ཆབ་སྲིད་བཙོན་པ་ཚོ་དང་ལག་ཐོག་ལ་ལག་པ་བཞག་པའི་གཏམ་རྒྱུད་དང་། ཁོང་ཚོའི་མངག་བཅོལ་སོགས་རང་ཉིད་ཇི་སྲིད་གནས་པ་དེ་སྲིད་དུ་བོད་རང་བཙན་འཐབ་རྩོད་ཀྱི་དར་ཆ་འདེགས་ཀྱིན། དགྲ་བོའི་དུར་སྒམ་ལ་ས་འདེད་རྒྱུར་ལྟ་གོན་བྱེད་བཞིན་པ་རྒྱུ་མཚན་དུ་གླེང་།
འཇིག་རྟེན་དུ་སྐྱེས་པ་ནི་ཁྱེད་ཀྱི་གདམ་ཀ་ལས་བྱུང་བ་མིན་ཡང་། འཇིག་རྟེན་དུ་ཇི་ལྟར་འཚོ་རྒྱུ་ནི་ཁྱེད་ལ་ཡོད་པའི་བདག་དབང་ཡིན། བཀྲ་ཤིས་ཚེ་རིང་ཁོང་སྐྱབས་བཅོལ་བའི་གཞིས་ཆགས་ཨོ་རི་སར་སྐྱེས་ཤིང་། འཚར་ལོངས་ཀྱི་རིམ་པ་དེ་ནས། རང་གི་མི་རིགས་དང་རྒྱལ་ཁབ་ནི་རང་ཉིད་འཇིག་རྟེན་དུ་གསོན་དགོས་པའི་གནས་ལུགས་སུ་བཤད། ཡོངས་གྲགས་སུ་ཁོང་ལ་ཐེ་ཝན་བཀྲིས་ཚེ་རིང་ཞེས་འབོད། ངས་ཁོང་ངོ་ཤེས་ནས་རྒྱུས་ཡོད་དང་། རྒྱུས་ཡོད་ནས་འཐབ་གྲོགས་སུ་གྱུར་བའི་ལོ་ཟླ་དེ་དག་གི་ཁྲོད་ནས་རྙེད་པའི་ཁོང་། བདེན་ལུགས་རྩོད་པའི་རྒྱལ་ཁམས་པ་ཞིག་དང་། མེས་པོའི་བང་སོ་སྲུང་བའི་གྲི་ཐོགས་པ་ཞིག ཐེ་ཝན་གླིང་ཕྲན་ན་ཡོད་པའི་བོད་པའི་ངོ་གདོང་ཅིག ནམ་ཡང་བོད་ཅེས་པའི་ཡིག་འབྲི་འདི་ཁུར་ནས་རྒྱུག་རྒྱུག་འདུར་འདུར་ལ་བྲེལ་བའི་དེ་རིང་གི་བོད་དོན་འཐབ་རྩོད་པ་ཁོང་། ཐེ་ཝན་གླིང་ཕྲན་གྱི་ཆབ་སྲིད་མི་སྣ་དང་ཤེས་ཡོན་པའི་སྡེ་ཁག ལྷག་པར་དུ་དམངས་ཁྲོད་ལ་འཛུལ་ཞིང་བོད་ཀྱི་དར་ཆ་སྒྲེང་མཁན་གྱི་དབུས་ཕྲུག་བཙན་པོའི་རྟ་དམག་གི་རྒྱུད་པ་གསོན་པོ་ཞིག་ཡིན།
ཡིག་འབྲི་འདི་དག་འབྲི་བཞིན་འབྲི་བཞིན་ངའི་ཡིད་ངོགས་སུ་གློག་བརྙན་ཇི་བཞིན་འཆར་ཡོང་པ་ནི། ༢༠༠༨ ལོར་ཉི་ཧོང་ནང་རྒྱ་ནག་ཏུ་འཚོག་ལ་ཉེ་བའི་ཨོ་རྩལ་འགྲན་ཚོགས་ཀྱི་དཔལ་འབར་སྐོར་སྐྱོད་སྐབས། བཀྲིས་ཚེ་རིང་གིས་བོད་ཀྱི་རྒྱལ་དར་སྒྲེང་བཞིན་བདེ་སྲུང་དམག་མི་སྟོང་ཕྲག་གི་འགོག་སྲུང་ཁྲོད་རྒྱུག་སྟེ། བོད་རང་བཙན་གྱི་འབོད་སྒྲ་སྒྲོག་གིན་ཨོ་རྩལ་རྒྱ་ནག་ཏུ་འཚོག་རྒྱུར་ངོ་རྒོལ་བྱས་པའི་སྣང་བརྙན་དེ་རེད།
མི་ལོ་ཉི་ཤུ་ལྷག་གི་རིང་བོད་ཀྱི་རྒྱལ་དར་ནི་ཁོང་གི་འགྲོ་རོགས་དང་ཉལ་རོགས་སུ་གྱུར་བའི་གཏམ་རྒྱུད་ལས། གླེང་འོས་པའི་ལེའུ་གཅིག་ནི་༢༠༡༡ ནས་མཚམས་བཞག་མྱོང་མེད་པའི་ལོ་རེའི་བོད་རང་དབང་གི་ཆེད་དུ་རྐང་འཁོར་སྐོར་བསྐྱོད་དེ་རེད། འདི་ལོར་མི་ཚང་མ་དགུ་ཐུག་ལ་བྲེལ་བཞིན་པའི་ཉིན་དེར། བཀྲིས་ཀྱིས་མེས་པོའི་བང་སོ་སྲུང་བའི་འགན་འཁྲི་དེར་ཟུང་ཤུགས་འཕར་མ་རེ་དྲངས་ཏེ། ཐེ་ཝན་གླིང་ཕྲན་གྱི་གྲོང་ཁྱེར་དང་གྲོང་རྡལ་བརྒྱུད་ཟླ་གཅིག་རིང་གི་རྐང་འཁོར་སྐོར་བསྐྱོད་ལ་ཆས་སོང་། བཀའ་དྲིན་ཆེ། ངའི་མེས་པོའི་བང་སོ་སྲུང་བའི་གྲི་ཐོགས་པ། སྐྱེས་པ་ནི་གཞན་དབང་དུ་སོང་ཡང་། རང་དབང་གི་སླད་དུ་ང་ཚོ་གསོན་ཞིང་འདི་ལྟར་མུ་མཐུད་ནས་བཙན་པོའི་རལ་གྲི་ཐོགས་ཀྱིན་ཆས་ཆོག
ཁོང་གིས། བོད་རང་བཙན་ནི་ཕ་མའི་རྨི་ལམ་ཡིན་པས། རང་ཉིད་རྨི་ལམ་དེ་མངོན་འགྱུར་བྱ་བའི་ལམ་དུ་ཞུགས་པ་ཡིན་ཟེར།
བསོད་ནམས་རྒྱལ་མཚན་མ་རེད་སོལ་ནམ་རྒྱ་མཚན་རེད་འདུག །
? ? ? ? ? ཁོང་གསུམ་ ཉིན་མོ་སྐར་མ་མཐོང་བ་མ་རེད་པ་ ? ཆུའི་ནང་གི་ཟླ་བ་ལེན་དུ་འགྲོ་ཡ་མ་རེད་པ་ ? ཡིན་ནས་ཁོང་གསུམ་ཡག་པོ་རེད། གཟུགས་པོས་འཕྲོད་བསྟེན་ གུ་ཡངས་དང་ ཁྲག་ཤེད། གཅིན་སྙི། ལྗིད་ཚད་སོགས་ ཆག་ཡ་བཅས་ཡག་པོབྱུང་ཡོད། འཕྲོད་བསྟེན་ཡག་པོ་གནང་ན་ཚེ་རིང་པོ་སྡོད་ཐུབ།
ཐོད་རས་དམར་པོ་དཀྲིས་མཁན་་་ སྣང་བ་སྐྱིད་སྐྱིད་ དེལ་ལི་བར་ འཆམ་འཆམ་གོམ་འགྲོས། བོད་ཀྱི་གཞོན་ནུ་སྣང་བ་སྐྱིད་སྐྱིད་ བག་བག་ཊཱུར། བོད་རང་བཙན་སློབ་ཕྲུག་ སྣང་བ་སྐྱིད་སྐྱིད་ Ice Hockey ད་དུང་བོད་རང་བཙན། ད་ག་འདྲ་པོ་ཧམ་པ། ? ? ? ?