རྒྱ་གར་གཞུང་གིས་སྤྱི་ཚོགས་དྲ་ལམ་ལ་སྟངས་འཛིན་གྱི་ཁྲིམས་གསར་ལག་བསྟར།

རྒྱ་གར་ནང་ཞིང་པའི་འོས་ལངས་འབྱུང་བཞིན་ཡོད་པ་སོགས་ལ་བརྟེན་ནས་སྤྱི་ཚོགས་བརྒྱུད་ལམ་དུ་ཁྲིམས་འགལ་གནས་ཚུལ་རིགས་ཁྱབ་སྤེལ་གཏང་ན་ནག་གསུབ་གཏོང་དགོས་པ་མ་ཟད་རྒྱ་གར་གཞུང་ལ་རྒྱབ་ལྗོངས་གནས་ཚུལ་མཁོ་སྤྲོད་དགོས་པའི་ཁྲིམས་གསར་ཞིག་ལག་བསྟར་གསལ་བསྒྲགས་གནང་འདུག

རྒྱ་གར་ཧིན་རྡུ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་སྔོན་རྒྱ་གར་ནང་ཞིང་པ་མང་ཚོགས་དང་རྒྱ་གར་གཞུང་གཉིས་བར་རྩོད་རྙོག་བྱུང་བའི་གནད་དོན་དང་འབྲེལ། རྒྱ་གར་གཞུང་གིས་ (Twitter) ལས་ཁུངས་ནས་རྒྱ་གར་གྱི་ཞིང་པའི་ངོ་རྒོལ་ལས་འགུལ་སྐོར་གྱི་གནས་ཚུལ་ཁག་ཅིག་ཕྱིར་འཐེན་དགོས་པའི་འབོད་སྐུལ་ཞུས་པར་ (Twitter) གྱིས་ངོས་ལེན་བྱས་མེད་སྟབས། ཁ་སང་ཕྱི་ཚེས་ ༢༥ ཉིན་རྒྱ་གར་གཞུང་གིས་སྤྱི་ཚོགས་བརྒྱུད་ལམ་ཁག་ལ་ལམ་སྟོན་གྱི་ཁྲིམས་གསར་པ་ཞིག་ལག་བསྟར་ཡོངས་བསྒྲགས་གནང་སྟེ། རྒྱལ་སྤྱིའི་སྤྱི་ཚོགས་བརྒྱུད་ལམ་ཆེ་གྲས་ངོ་དེབ་དང་ཊུ་ཝི་ཊར། དེ་བཞིན་ཡུ་ཊོབ་དང་WhatsApp་སོགས་ནས་ཁྲིམས་འགལ་གྱི་གནས་ཚུལ་རིགས་མཁོ་སྤྲོད་རམ་འདེགས་དགོས་པའི་སྐུལ་མ་བཏང་ཡོད་པ་རེད།

དེ་འབྲེལ་ཐད་རྒྱ་གར་གྱི་འཕྲུལ་རིགས་བློན་ཆེན་རཱ་ཝེ་ཤན་ཀར་ (Ravi Shankar Prasad) ལགས་ཀྱིས། ཕྱི་ལོ་ ༢༠༢༡ ལོའི་འཕྲུལ་རིགས་ཀྱི་གནས་ཚུལ་དང་འབྲེལ་བའི་ཁྲིམས་འདིའི་གཞི་རྩའི་དམིགས་ཡུལ་ནི། སྤྱི་ཚོགས་བརྒྱུད་ལམ་ཁག་ཏུ་གནས་ཚུལ་རྫུན་མ་དང་བུད་མེད་ཀྱི་པར་རིས་བཅོས་མ་བརྒྱུད་སྐུལ། གཞན་ལ་འཁོན་ལན་སློག་ཆེད་འཁྲིག་སྤྱོད་དང་འབྲེལ་བའི་གནས་ཚུལ་ཕྱིར་བསྒྲགས་བྱེད་བཞིན་པ་སོགས་ཀྱིི་དཀའ་ངལ་སེལ་ཐབས་སུ་དམིགས་པ་ཞིག་ཡིན། ཞེས་གསུངས་འདུག་ལ། ཁྲིམས་གསར་དེའི་ནང་། རྒྱལ་སྤྱིའི་སྤྱི་ཚོགས་བརྒྱུད་ལམ་ཁག་ནས་རྒྱ་གར་གཞུང་གི་རྟོག་ཞིབ་དང་འབྲེལ་བའི་དྲ་ལམ་གྱི་གནས་ཚུལ་རིགས་གཞུང་ལ་མཁོ་སྤྲོད་བྱེད་དགོས་ཀྱི་ཡོད་པ་མ་ཟད། རྒྱ་གར་གྱི་ཁྲིམས་གང་རུང་དང་འགལ་བའི་གནས་ཚུལ་རིགས་བཀའ་ཁྱབ་འབྱོར་རྗེས་ཆུ་ཚོད་ ༣༦ ནང་ཚུད་བཀག་འགོག་བྱས་ཏེ། ཆུ་ཚོད་ ༧༢ ནང་ཚུད་དུ་རྒྱ་གར་གཞུང་ལ་དེ་འབྲེལ་གྱི་གནས་ཚུལ་མཁོ་སྤྲོད་ཐུབ་དགོས་སྐོར་བཀོད་ཡོད་འདུག

རྒྱ་གར་ཧིན་རྡུ་གསར་ཁང་གི་གནས་ཚུལ་ནང་། ཁྲིམས་དེས་དྲ་རྒྱའི་རང་དབང་ལ་ཁྱད་གསོད་དང་མི་སྒེར་གྱི་གསང་བ་དང་སྨྲ་བརྗོད་རང་དབང་། དམིགས་བསལ་དྲ་ལམ་གནས་ཚུལ་སྲུང་སྐྱོབ་ཀྱི་ཁྲིམས་ལ་རྡོག་རོལ་གཏོང་གི་ཡོད་པ། རྒྱ་གར་གྱི་འཕྲུལ་རིགས་རྩ་ཁྲིམས་དོན་ཚན་ ༧༩ དགོངས་དོན་འོག་གི་སྤྱི་ཚོགས་བརྒྱུད་ལམ་ཁག་གི་རང་དབང་རྩ་མེད་གཏོང་གི་ཡོད་སྐོར་བརྗོད་འདུག་པ་དང་། ཉམས་ཞིབ་པའི་ཁྲོད་ནས་རྒྱ་གར་གཞུང་གི་ཐག་གཅོད་དེར་དགའ་བསུ་དང་སྦྲགས། ཁྲིམས་འཆར་གསར་པ་དེས་སྤྱི་ཚོགས་བརྒྱུད་ལམ་ཁག་ནས་རང་འགན་རང་འཁྲི་ཡོང་བར་སྐུལ་འདེད་གཏོང་གི་ཡོད་སྐོར་བརྗོད་ཡོད་པ་རེད།

ཡང་རྒྱ་གར་འཕྲུལ་རིགས་བློན་ཆེན་རཱ་ཝི་ལགས་ཀྱིས། སྤྱི་ཚོགས་བརྒྱུད་ལམ་ཁག་ནས་རྒྱ་གར་ནང་ཚོང་ལས་གཉེར་རྒྱུར་དགའ་བསུ་ཞུ་བཞིན་ཡོད་ལ། ཁོ་ཚོས་ཚོང་ལས་གཉེར་བ་བརྒྱུད་རྒྱ་གར་གྱི་མི་སེར་དཀྱུས་མ་ཚོར་དམིགས་རྒྱ་བསྐྱེད་ཡོད། འོན་ཀྱང་། བརྒྱུད་ལམ་ཁག་གིས་སྤྱི་ཚོགས་དྲ་ལམ་བེད་སྤྱོད་གཏོང་མཁན་མི་གྲངས་ས་ཡ་མང་པོར་བརྙས་བཅོས་ཐེབས་ཀྱི་ཡོད་པ་དང་དྲ་རྒྱའི་སྟེགས་བུ་ལོག་སྤྱོད་བྱེད་བཞིན་པར་འགན་འཁུར་རྒྱུ་གལ་ཆེན་པོ་ཡིན། ཞེས་གསུངས་ཡོད་པ་དང་། ཁྲིམས་འཆར་དེ་ནི་ཕྱི་ལོ་ ༢༠༡༨ ལོར་བཏོན་པའི་གྲོས་འཆར་ཞིག་ཡིན་ཞིང་། ད་རེས་རྒྱ་གར་དང་ཊུ་ཝི་ཊར་ལས་ཁུངས་བར་རྒྱ་གར་ནང་ཞིང་ལས་ཀྱི་ཁྲིམས་གཏན་འབེབ་བྱས་ཏེ་རྩོད་རྙོག་འགྲོ་བཞིན་པའི་སྐབས་ལག་བསྟར་ཡོངས་བསྒྲགས་གནང་བ་ཞིག་ཆགས་ཀྱི་ཡོད་འདུག

རྒྱ་གར་གྱིས་སྤྱི་ཚོགས་བརྒྱུད་ལམ་ཁག་དང་འབྲེལ་བའི་ལམ་སྟོན་བཀའ་ཁྱབ་བསྒྲགས་རྗེས་ངོ་དེབ་ཀྱི་མགྲིན་ཚབ་པས། ང་ཚོས་ཁྲིམས་དེ་གལ་གནད་དུ་རྩིས་ཏེ་ནང་དོན་རྒྱས་པར་སློབ་སྦྱོང་བྱ་རྒྱུ་ཡིན་པ་དང་། ངོ་དེབ་ནི་རྒྱ་གར་གྱི་མཐུན་གྲོགས་ཤིག་ཡིན་པས། ང་ཚོས་ངོ་དེབ་བེད་སྤྱོད་གཏོང་མཁན་གྱི་བདེ་འཇགས་དང་དྲ་རྒྱའི་བདེ་འཇགས་ནི་གནད་འགག་ཅིག་ཏུ་བརྩི་ཡི་ཡོད། ཅེས་བརྗོད་འདུག་ལ། རྒྱ་གར་འཕྲུལ་རིགས་ལྷན་ཁང་ལྟར་ན། ད་ལྟ་WhatsApp་བེད་སྤྱོད་གཏོང་མཁན་མི་གྲངས་ས་ཡ་ ༥༣༠ དང་། ཡུ་ཊོབ་ལ་ས་ཡ་ ༤༤།༨། དེ་བཞིན་ངོ་དེབ་ལ་ས་ཡ་ ༤༡ དང་ཨིག་སི་ཊར་ས་ཡ་ ༢༡། ཊུ་ཝི་ཊར་ལ་ས་ཡ་གཅིག་དང་ཕྱེད་ཀ་ལྷག་གིས་ཐོ་འགོད་བྱས་ཏེ་བེད་སྤྱོད་གཏོང་བཞིན་ཡོད་འདུག

འདས་ལོའི་ཕྱི་ཟླ་ ༩ ཚེས་ ༢༠ ཉིན་རྒྱ་གར་གྱི་གྲོས་ཚོགས་གོང་མས་ཞིང་ལས་ཁྲིམས་འཆར་ ༣ ལ་རྒྱབ་སྐྱོར་དང་སྲིད་འཛིན་གྱིས་མཚན་རྟགས་བསྐྱོན་ཏེ་དངོས་སུ་ལག་བསྟར་བྱས་ཡོད་ཅིང་། སྐབས་དེར་གཞུང་འཛིན་ཁ་གཏད་ཚོགས་པ་ཁག་གི་ཁྲིམས་ལུགས་གཏན་འབེབ་ཀྱི་འགྲོ་ལུགས་ལ་རྩིས་མེད་དང་། ཁྲིམས་འཆར་དེ་དག་ལ་གྲོས་ཚོགས་ཀྱི་ཚོགས་ཆུང་གིས་བསྐྱར་ཞིབ་དགོས་སྐོར་བསྐྱོན་བརྗོད་དྲག་པོ་བྱས་ཡོད་ལ། ཁྲིམས་འཆར་ཐོག་བགྲོ་གླེང་བྱེད་སྐབས་ཁ་གཏད་ཚོགས་པའི་ཚོགས་མི་ ༨ ཀྱིས་གྲོས་ཚོགས་ཀྱི་མདུན་དུ་ངོ་རྒོལ་བྱས་པ་དང་། རྒྱ་གར་རྒྱལ་ཡོངས་ཞིང་ལས་མཐུན་ཚོགས་ཀྱིས་ཁྲིམས་འཆར་དེ་ནི་ཞིང་པར་ངོ་ལོག་དང་སྲོག་ཁྲིམས་ཤིག་ཡིན་སྐོར་བརྗོད་ཡོད་པ་རེད། འདས་ལོའི་ཕྱི་ཟླ་ ༡༡ ཚེས་ ༢༦ ཉིན་ཞིང་ལས་ཐོན་ཁུངས་ཆེ་བའི་པཱན་ཇབ་ (Punjab) དང་ཧར་ཡ་ན་ (Haryana) མངའ་སྡེ་གཙོས་པའི་མངའ་སྡེ་གཞན་གྱི་ཞིང་པ་རྣམས་རྒྱལ་ས་ལྡི་ལིའི་ས་མཚམས་སིང་གྷུ་ (Singhu Border) སུ་འཛོམས་ཏེ་ད་བར་ངོ་རྒོལ་སྐད་འབོད་བྱེད་མུས་ཡིན་པ་དང་། ངོ་རྒོལ་ལས་འགུལ་ཁྲོད་ཞིང་པ་ ༤ ཡིས་རང་སྲོག་ཀྱང་བཅད་ཡོད་པ་རེད། དེ་བཞིན་ད་བར་ཞིང་པའི་མཐུན་ཚོགས་ཀྱི་སྐུ་ཚབ་དང་དབུས་གཞུང་བར་ལ་གྲོས་མོལ་ཐེངས་ ༨ བྱས་ཡོད་ནའང་གྲུབ་འབྲས་ཐོན་མེད་པ་རེད་འདུག

འབྲེལ་ཡོད་གནས་ཚུལ། རྒྱ་གར་གྱི་ཞིང་ལས་ཁྲིམས་སྒྲིག་གསུམ་ལ་བསྐྱར་ཞིབ་བྱ་རྒྱུ་ཡིན་འདུག

གསར་འགོད་པ། བསྟན་འཛིན་ཕུར་བུ། སྐལ་བཟང་སྦྱིན་པ།