བོད་ཀྱི་བུད་མེད་རྐང་སྤོལ་མཐུན་ཚོགས་རྒྱལ་སྤྱིའི་རྐང་སྤོལ་རྩེད་འགྲན་ནང་ཞུགས་རྒྱུ་རེད།

འདི་ལོའི་ཕྱི་ཟླ་ ༦ པའི་ཟླ་མཇུག་ཏུ་བོད་ཀྱི་བུད་མེད་རྐང་སྤོལ་རུ་ཁག་ཀོ་ནི་ཧྥ་རྒྱལ་སྤྱིའི་རྐང་སྤོལ་མཐུན་ཚོགས་ཀྱི་རྩེད་འགྲན་ནང་ཞུགས་གཏན་འཁེལ་ཡོད་པས་རུ་མི་ཁ་གསབ་ཆེད་རྐང་སྤོལ་རྩེད་མོ་བ་གང་ཙམ་ཞིག་གསར་དུ་བསྡུ་རྒྱུ་ཡིན་འདུག བོད་རྒྱལ་ཡོངས་རྩེད་རིགས་ཚོགས་ཆུང་གིས་གནས་ཚུལ་བསྒྲགས་པ་ལྟར་ན། འདི་ལོའི་ཕྱི་ཟླ་ ༦ ཚེས་ ༢༣ ནས་ ༣༠ བར་ཡུ་རོབ་ཀྱི་རྒྱལ་ཁབ་རོ་མ་ནི་ཡའི་ (Romania) སི་ཁ་ལེར་ལན་ཌི་ (Szeklerland) ཁུལ་དུ་ཚོགས་གཏན་ཁེལ་བའི་ཀོ་ནི་ཧྥ་ (CONIFA) རྐང་སྤོལ་མཐུན་ཚོགས་ཀྱི་ཆེས་ཐོག་མའི་རྒྱལ་སྤྱིའི་བུད་མེད་རྐང་སྤོལ་རྩེད་འགྲན་ནང་བོད་ཀྱི་བུད་མེད་རུ་ཁག་ཀྱང་མཉམ་ཞུགས་བྱ་གཏན་ཁེལ་ཡོད་སྟབས། འདི་ལོའི་ཕྱི་ཟླ་ ༤ པའི་ནང་སློབ་གྲྭ་ཁག་སོགས་ནས་འགྲན་སྡུར་བྱས་པ་བརྒྱུད་རུ་མི་གདམ་རྒྱུ་ཡིན་འདུག

ད་ལྟ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཁྱབ་ཁོངས་སུ་ཡོད་པའི་བོད་རྒྱལ་ཡོངས་རྩེད་རིགས་ཚོགས་ཆུང་གི་འགན་འཛིན་བསྟན་འཛིན་རིན་ཆེན་ལགས་ཀྱིས་ཞལ་པར་བརྒྱུད་འདི་གའི་གསར་འགོད་པར། སྤྱིར་ཀོ་ནི་ཧྥ་རྒྱལ་སྤྱིའི་བུད་མེད་རྐང་སྤོལ་རྩེད་འགྲན་ནང་རྒྱལ་ཁབ་མི་ཉུང་བ་ཞིག་ཞུགས་གཏན་ཁེལ་ཡོད་ནའང་། མཐུན་ཚོགས་ཀྱིས་མཐའ་མའི་ཐག་གཅོད་ནང་རྒྱལ་ཁབ་ ༦ མ་གཏོགས་ཞུགས་མི་ཆོག་པའི་གསལ་བསྒྲགས་བྱས་པ་ལྟར། ང་ཚོས་བོད་པའི་རུ་ཁག་དེ་ངེས་པར་དུ་རྩེད་འགྲན་ནང་བཅུག་དགོས་པའི་རེ་སྐུལ་ལན་མང་ཞུས་ཏེ་ཚུད་ཐུབ་པ་བྱུང་ཡོད། ཅེས་དང་། ང་ཚོས་ད་བར་རྩེད་མོའི་བརྒྱུད་ལམ་གྱི་ཐོག་ནས་རྒྱལ་སྤྱིའི་སྡིངས་ཆའི་ཐོག་བོད་ཀྱི་ངོ་བོ་དང་རིག་གཞུང་། རྣམ་པ་བཅས་འདོན་ཐབས་བྱ་རྒྱུ་གལ་ཆེ་ཤོས་ཆགས་ཡོད་པ་རེད། གཉིས་པ་དེར་རྩེད་རིགས་སྤྱི་དང་ལྷག་པར་དུ་རྐང་སྤོལ་འདི་བུད་མེད་རྣམས་ལ་མཚོན་ན་སྤྱི་ཚོགས་ནང་ངོས་འཛིན་ཐོབ་ཐབས་དང་། རང་ཉིད་ཆེད་ལས་ཀྱི་ལམ་དུ་ཞུགས་རྒྱུ་དང་སྤྱི་ཚོགས་ནང་འབུར་དུ་འཐོན་རྒྱུའི་ལམ་ཁ་གལ་ཆེན་ཞིག་ཆགས་ཡོད་སྐོར་འགྲེལ་བརྗོད་གནང་བྱུང་།

བོད་ཀྱི་བུད་མེད་རྐང་སྤོལ་རུ་ཁག་གི་ད་ལྟའི་གནས་སྟངས་སྐོར་ནས་རུ་ཁག་གི་སློབ་སྟོན་པ་ (coach) མགོན་པོ་རྡོ་རྗེ་ལགས་ཀྱིས་འདི་གའི་གསར་འགོད་པར། སྤྱིར་བཏང་བུད་མེད་རུ་ཁག་ཡོད་ནའང་། རུ་ཁག་ནང་གི་བུ་མོ་འགའ་ཤས་མར་ཐོན་ཚར་བ་དང་། དེ་སྔ་ནས་བོད་ཀྱི་བུད་མེད་རྐང་སྤོལ་རུ་ཁག་ནང་བུད་མེད་ ༡༨ ལྷག་ཡོད་ནའང་། ད་ལྟའི་རྩེད་འགྲན་ནང་ཁྱོན་བུད་མེད་རྩེད་འགྲན་པ་ ༢༣ ལྷག་དགོས་ཀྱི་ཡོད་སྟབས། ཀོ་ནི་ཧྥ་རྩེད་འགྲན་མ་ཚུགས་སྔོན་གྱི་ཟླ་བ་གཅིག་དང་ཕྱེད་ཀའི་ནང་བུད་མེད་རྩེད་འགྲན་པ་གསར་པ་གདམ་གཏན་ཁེལ་ཡོད་པ་དང་། ད་ལྟའི་ཆར་རྒྱལ་སྤྱིའི་རྩེད་འགྲན་དེའི་ཆེད་དུ་བོད་ཀྱི་བུད་མེད་རྩེད་འགྲན་པ་རྣམས་ལ་ཟླ་བ་ ༡ དང་ཕྱེད་ཀ་ལྷག་སྦྱོང་བརྡར་སྤྲོད་རྒྱུའི་རེ་བ་བྱེད་ཀྱི་ཡོད་ནའང་། རྩེད་འགྲན་པ་མང་པོ་ཞིག་སྨན་ཞབས་པའི་ལས་ཀ་སོགས་ནང་ཞུགས་ཡོད་སྟབས། ལྷན་འཛོམས་ཡོང་རྒྱུར་ཅུང་དཀའ་ངལ་ཡོད་སྐོར་འགྲེལ་བརྗོད་གནང་བྱུང་། དེ་བཞིན་བོད་ཀྱི་བུད་མེད་རྐང་སྤོལ་རུ་ཁག་འདི་དེ་སྔ་ཁེ་ན་ཌའི་རྒྱལ་སྤྱིའི་རྩེད་འགྲན་ནང་ཞུགས་སྐབས་གྲུབ་འབྲས་གང་ལེགས་ཐོན་ཡོད་པས་ད་ཐེངས་རེ་བ་གང་འཚམ་ཞུ་ཡི་ཡོད་སྐོར་ཡང་བརྗོད་བྱུང་།

ཀོ་ནི་ཧྥ་རྐང་སྤོལ་མཐུན་ཚོགས་ (Confederation of Independent Football Associations) འདི་ཐོག་མར་ཕྱི་ལོ་ ༢༠༡༣ ཟླ་ ༦ ཚེས་ ༧ ཉིན། ཧྥི་ཧྥ་རྒྱལ་སྤྱིའི་རྐང་སྤོལ་མཐུན་ཚོགས་ཀྱི་ངོས་འཛིན་མེད་པའི་རྒྱལ་ཁབ་དང་ས་ཁུལ་གྱི་རྐང་སྤོལ་རུ་ཁག་རྣམས་ལ་དམིགས་ཏེ་མགོ་བརྩམས་པ་ཞིག་ཡིན་པ་དང་། ཆེས་ཐོག་མའི་རྒྱལ་སྤྱིའི་རྐང་སྤོལ་འགྲན་བསྡུར་དེ་ཕྱི་ལོ་ ༢༠༡༤ ལོར་སི་ཝེ་ཌན་དུ་ཚོགས་ཡོད་པ་དང་། ཕྱི་ལོ་ ༢༠༡༨ ལོར་བོད་རྒྱལ་ཡོངས་སྐྱེས་པའི་རྐང་སྤོལ་རུ་ཁག་མཐུན་ཚོགས་དེས་གོ་སྒྲིག་བྱས་པའི་རྐང་སྤོལ་རྩེད་འགྲན་ནང་ཞུགས་མྱོང་ཡོད། ད་ཐེངས་ཀྱི་རྒྱལ་སྤྱིའི་བུད་མེད་རྐང་སྤོལ་རྩེད་འགྲན་ནང་ཁྱོན་རྒྱལ་ཁབ་དང་ས་ཁུལ་མི་འདྲ་བ་ ༦ གི་རུ་ཁག་མཉམ་ཞུགས་བྱ་འཆར་ཡོད་པ་དང་། བོད་ཀྱི་བུད་མེད་རུ་ཁག་དེ་སི་ཁ་ལེར་ལན་ཌི་(Szeklerland)དང་ཁ་མེ་རི་ཡ་ (Chameria) ཡི་རུ་ཁག་དང་འགྲན་རྒྱུ་ཡིན་འདུག

གསར་འགོད་པ། པ་སངས་ཚེ་རིང་།