ཕྱི་ལོ་ ༢༠༡༩ ལོར་བོད་རང་སྐྱོང་ལྗོངས་གཅིག་པུའི་ནང་བོད་མི་གྲངས་ ༡༠༡ འཛིན་བཟུང་བྱས་ཏེ་གར་སོང་ཆ་མེད་དུ་གྱུར་ཡོད་འདུག

ཨ་རིའི་གཞུང་འབྲེལ་གྱི་ཕྱི་ལོ་ ༢༠༢༠ ལོའི་སྙན་ཐོའི་ནང་རྒྱ་ནག་གཞུང་གིས་ཕྱི་ལོ་ ༢༠༡༩ ལོའི་ལོ་མཇུག་ནས་ཕྱི་ལོ་ ༢༠༢༠ ལོ་མཇུག་བར་ཏུ་བོད་མི་ ༢༧༣ འཛིན་བཟུང་བྱས་ཡོད་པ་དང་ཚོགས་སྡེ་ཆེ་ཆུང་ཚང་མར་རྒྱ་ནག་གཞུང་གིས་ངོས་འཛིན་ངེས་པར་དགོས་པ་སོགས་ཀྱི་སྲིད་ཇུས་འོག་རང་དབང་ལ་བཀག་སྡོམ་ཤུགས་ཆེན་བྱས་ཡོད་སྐོར་བཀོད་འདུག

ཁ་སང་ཕྱི་ཚེས་ ༣༠ ཉིན་ཨ་རིའི་རྒྱལ་སྲིད་ལྷན་ཁང་གིས་འགྲོ་བ་མིའི་ཐོབ་ཐང་དང་འབྲེལ་ནས་ཕྱི་ལོ་ ༢༠༢༠ ལོའི་སྙན་ཐོ་བཏོན་པའི་ནང་། རྒྱ་ནག་གཞུང་གིས་མུ་མཐུད་མི་རིགས་རྩ་མེད་བཟོ་བའི་སྲིད་ཇུས་བཟུང་ཡོད་པ་དང་། འགྲོ་བ་མིའི་ཐོབ་ཐང་རྡོག་རོལ་གཏོང་མུས་ཡིན་པ། དེ་བཞིན་རྒྱ་ནག་གཞུང་གིས་བོད་མི་གང་བྱུང་འཛིན་བཟུང་དང་ཁྲིམས་ཐག་དྲང་བདེན་ངང་མི་གཅོད་པ། ཁྲིམས་ཀྱི་བྱ་རིམ་ཕྱི་གསལ་ནང་གསལ་མེད་པ་སོགས་ཀྱི་གནད་དོན་མང་དག་ཅིག་སྙན་ཐོའི་ནང་བཀོད་དེ་རྒྱ་ནག་གཞུང་ལ་སྐྱོན་བརྗོད་བྱས་འདུག

སྙན་ཐོ་དེའི་ནང་བོད་ནང་གང་བྱུང་འཛིན་བཟུང་དང་གར་སོང་ཆ་མེད་དུ་གྱུར་བའི་གནས་ཚུལ་གྱི་སྐོར་ལ་ཕྱི་ལོ་ ༢༠༡༩ ཟླ་ ༦ ཙམ་གྱི་ནང་སི་ཁྲོན་དང་བོད་ལྗོངས་རིག་པའི་ཚོགས་པ་Sichuan Tibet Studies Societyཟེར་བའི་དྲུང་གཞོན་ཚེ་རིང་དོན་གྲུབ་ལགས་འཛིན་བཟུང་བྱས་རྗེས། ཁོང་གར་སོང་ཆ་མེད་དུ་གྱུར་ཡོད་པ་དང་། ཕྱི་ལོ་ ༢༠༡༩ ཟླ་ ༧ ནང་ཙམ་ལ་པོ་ཏཱ་ལའི་དོ་དམ་ཁང་གི་རྒན་བསོད་ནམས་ལགས་འཛིན་བཟུང་བྱས་རྗེས་གར་སོང་ཆ་མེད་དུ་གྱུར་བ། དེ་བཞིན་ཕྱི་ལོ་ ༡༩༩༥ ལོ་ནས་༧པཎ་ཆེན་དགེ་འདུན་ཆོས་ཀྱི་ཉི་མ་མཆོག་དང་ཁོང་གི་ཡབ་ཡུམ་གཉིས་གར་སོང་ཆ་མེད་དུ་གྱུར་བ།  ཉེ་ལམ་རྒྱ་ནག་གཞུང་གིས་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡོད་སྐོར་བརྗོད་ཡོད་ནའང་ཞིབ་ཕྲའི་གནས་ཚུལ་གང་ཡང་སྤྲད་མེད་སྐོར་བཀོད་འདུག

བོད་ཀྱི་ཆབ་སྲིད་བཙོན་མའི་སྐོར་ལ་བོད་རིགས་ཚོའི་ཆབ་སྲིད་དང་ཆོས་ལུགས་ཀྱི་བྱེད་སྒོ་ལ་བརྟེན། ཕྱི་ལོ་ ༢༠༡༩ ལོའི་ལོ་མཇུག་ཙམ་ནས་བོད་མི་གྲངས་ ༢༧༣ འཛིན་བཟུང་བཙོན་འཇུག་བྱས་ཡོད་པའི་ཁྲོད། བོད་མི་གྲངས་ ༡༡༥ ཡི་གྱོད་དོན་གསལ་ཁ་ཡོད་པ་དང་། ཁོང་རྣམས་ཟླ་ ༡༥ ནས་ཚེ་བཙོན་གྱི་བར་ཁྲིམས་ཐག་བཅད་ཡོད་པ་དང་། འཛིན་བཟུང་བཙོན་འཇུག་གི་གྲངས་ཀ་དེ་ནི་ཉུང་ཤས་ཤིག་ལག་སོན་བྱུང་ཙམ་ཡིན་པ་ལས་བོད་ནང་བཙོན་འཇུག་གི་གྲངས་ཧ་ཅང་མང་སྐོར་བཀོད་འདུག་ལ། ཕྱི་ལོ་ ༢༠༡༩ ལོར་བོད་རང་སྐྱོང་ལྗོངས་ཟེར་བའི་ནང་༧གོང་ས་མཆོག་དང་འབྲེལ་བ་ཡོད་ཚུལ་བརྗོད་དེ་བོད་མི་གྲངས་ ༡༠༡ འཛིན་བཟུང་བྱེད་དགོས་པའི་བཀའ་ཁྱབ་བཏང་ཡོད་པ་དང་། ད་ལྟ་ཁོང་རྣམས་གར་སོང་ཆ་མེད་དུ་གྱུར་ཡོད་སྐོར་བཀོད་འདུག

དེ་བཞིན་སྙན་ཐོའི་ནང་། རྒྱ་ནག་གཞུང་གིས་བོད་མི་ཚོར་གཅར་རྡུང་མནར་གཅོད་གཏོང་བཞིན་པ་དང་། མི་སྤྱོད་ལས་འདས་པའི་ཉེས་ཆད་གཅོད་པ། གང་བྱུང་འཛིན་བཟུང་དང་བཀག་ཉར་བྱེད་པ། ཆབ་སྲིད་ཀྱི་ཀུན་སློང་ཡོད་ཚུལ་བརྗོད་དེ་འཁོན་ལན་སློག་པ་དང་། གང་བྱུང་ཁྲིམས་འགལ་སྒོས་མི་སྒེར་ལ་གནོད་འཚེ་གཏོང་བ། སྨྲ་བརྗོད་རང་དབང་དང་གསར་འགོད་རང་དབང་། དྲ་རྒྱའི་རང་དབང་སོགས་ལ་བཀག་སྡོམ་དང་སྟངས་འཛིན་ནན་མོ་བྱེད་པ། ཞི་བའི་འདུ་འཛོམས་དང་འབྲེལ་འདྲིས་རང་དབང་ལ་བཀག་སྡོམ་བྱེད་པ་དང་། ཆོས་དད་རང་དབང་ལ་སྟངས་འཛིན་དང་ཐེ་གཏོགས་བྱེད་པ། དེ་བཞིན་བོད་བརྒྱུད་ནང་བསྟན་ཆོས་ལུགས་རྒྱ་ནག་དབུས་གཞུང་གི་སྟངས་འཛིན་འོག་ཡོད་པ་དང་། བོད་མིའི་འགྲོ་འོང་རང་དབང་ལ་སྟངས་འཛིན་ནན་མོ་བྱས་ཏེ་བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་ཡོད་སྐོར་བཀོད་འདུག

བོད་མིའི་ཐོག་དམ་དྲག་ཤུགས་ཆེན་བྱེད་བཞིན་པའི་ཐད། རྒྱ་ནག་གཞུང་གིས་རྟོག་ཞིབ་བརྙན་མིག་ས་ཡ་མང་པོ་བཙུགས་ཏེ། བརྙན་མིག་ལ་བརྟེན་ནས་མི་མང་གི་འགྲོ་འོང་ལ་སྟངས་འཛིན་བྱེད་པ་ཤུགས་ཆེ་རུ་ཕྱིན་ཡོད་པ་དང་།  འདུ་འཛོམས་ཆེན་པོ་ཁག་གི་ནང་བོད་མིའི་ཆབ་སྲིད་དང་ཆོས་ལུགས་ཀྱི་མགོ་ཁྲིད་དག་གི་གདོང་རིས་དང་འགྲོ་སྟངས་ངོས་འཛིན་ཐུབ་པའི་བརྙན་མིག་ནས་ལྟ་རྟོག་ནན་མོ་བྱེད་ཀྱི་ཡོད་པ། འདས་ལོའི་ཕྱི་ཟླ་ ༡༢ ཙམ་གྱི་ནང་རྒྱ་ནག་གི་བརྙན་མིག་བཟོ་ལས་ཁང་ཁག་ཅིག་གིས་བོད་སོགས་གྲངས་ཉུང་མི་རིགས་ཁག་གི་གདོང་རིས་དབྱེ་བ་འབྱེད་ཐུབ་པ་ཞིག་གསར་བཟོ་བྱས་ཡོད་སྐོར་དང་། བོད་ཁུལ་གྱི་དགོན་སྡེ་ཁག་གི་ནང་རྒྱ་ནག་གཞུང་གིས་རྟོག་ཞིབ་བརྙན་མིག་བཙུགས་ཡོད་པ་དང་། ཁྲིམས་ཀྱི་ཐོག་ནས་བདེ་སྲུང་དང་འབྲེལ་བའི་དོན་རྐྱེན་སྐབས་ས་གནས་ཀྱི་བདེ་སྲུང་ལས་ཁུངས་ཁག་གིས་བོད་ཁུལ་གྱི་འབྲེལ་མཐུད་དྲ་རྒྱ་ཁག་བཅད་ཆོག་པའི་ཆོག་མཆན་སྤྲད་དེ་བོད་ཁུལ་དུ་དམ་དྲག་ཆེན་པོ་བྱེད་ཀྱི་ཡོད་སྐོར་བཀོད་འདུག

ཡང་སྙན་ཐོའི་ནང་། རྒྱ་ནག་གི་རྩ་ཁྲིམས་ནང་ཚོགས་པ་ཁག་ལ་རང་དབང་ཡོད་པ་གསལ་ཡོད་ནའང་། རྒྱ་ནག་གཞུང་གིས་རང་དབང་ཁག་ཚོད་འཛིན་བྱས་ཏེ་ཚོགས་སྡེ་ཆེ་ཆུང་ཚང་མར་རྒྱ་ནག་གཞུང་གིས་ངོས་འཛིན་དགོས་པ་དང་། ངོས་འཛིན་གྱི་སྒྲིག་གཞི་དེ་དག་གིས་ཆབ་སྲིད་དང་ཆོས་ལུགས། འགྲོ་བ་མིའི་ཐོབ་ཐང་དང་ངལ་རྩོལ་སོགས་ཀྱི་ཚོགས་པ་ལ་རང་བཞིན་གྱིས་བཀག་འགོག་བྱས་ཡོད་པ་མ་ཟད། རྒྱ་ནག་གཞུང་གིས་བོད་ཁུལ་གྱི་གཞུང་འབྲེལ་མ་ཡིན་པའི་ཚོགས་པ་ཁག་ལ་ཕྱིའི་རྒྱལ་ཁབ་ཁག་གི་རོགས་དངུལ་ལེན་པར་མུ་མཐུད་དམ་དྲག་དང་རྩ་མེད་བཟོ་ཐབས་བྱེད་བཞིན་ཡོད་པ་དང་། བཙན་དབང་གིས་གཞུང་འབྲེལ་མིན་པའི་ཚོགས་པ་ཁག་ལ་འགྲུལ་བསྐྱོད་ཀྱི་བཀག་བསྡོམས་བྱེད་པ་དང་། ལས་བྱེད་ལ་སྡིགས་ར་སྐུལ་བ། དེ་ལ་བརྟེན་ནས་ས་གནས་ཀྱི་ལས་གཞི་ཁག་བསྐྱར་གསོ་བྱེད་མ་ཐུབ་པ་སོགས་ཀྱི་དཀའ་ངལ་འཕྲད་བཞིན་ཡོད་སྐོར་བཀོད་འདུག

གསར་འགོད་པ། ཀླུ་མགོན་ཐར།