བོད་ཕྱི་ནང་གཉིས་སུ་སྙན་གྲགས་ཡོད་པའི་བོད་ནང་གི་རྩོམ་པ་པོ་སྒོ་ཤེས་རབ་རྒྱ་མཚོའམ་སྒོ་ཤེར་ལགས་འདས་ལོར་ཁྲིན་ཏུའུ་གྲོང་ཁྱེར་ནས་རྒྱ་ནག་གཞུང་གིས་འཛིན་བཟུང་བྱས་ཏེ་ད་ལྟའང་གནས་སྟངས་གསལ་པོ་ཤེས་རྟོགས་ཐུབ་ཀྱི་མེད་པ་རེད།
ཕྱི་ལོ་ ༢༠༢༠ ཟླ་ ༡༠ ཚེས་ ༢༦ ཙམ་ལ། རྩོམ་པ་པོ་སྒོ་ཤེར་ལགས་རྒྱུ་རྐྱེན་གང་ཡིན་གསལ་ཆ་མེད་པར་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་ནས་གློ་བུར་དུ་འཛིན་བཟུང་བྱས་ཡོད་པ་དང་། ད་བར་དུ་ཁོང་གི་ཁྱིམ་མི་དང་བོད་ཕྱི་ནང་གཉིས་སུ་ཡོད་པའི་འབྲེལ་ཡོད་ཚོས་ཐར་ལམ་ཞིག་ལ་རེ་སྒུག་བྱས་ཏེ་གསང་བ་བྱས་ཡོད་ནའང་། ཟླ་ ༥ ལྷག་འགྲོ་བཞིན་ཡོད་ཀྱང་ད་དུང་ཁོང་གི་གནས་སྟངས་གསལ་པོ་ཤེས་རྟོགས་ཐུབ་ཀྱི་མེད་པར་ལྷག་ཡོད་འདུག
སྒོ་ཤེར་ལགས་ཀྱི་གྲོགས་པོ་སྐྱེས་སར་ཀླུ་སྒྲུབ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། ད་ལན་སྒོ་ཤེར་ལགས་འཛིན་བཟུང་བྱེད་མཁན་དེ་ལྷ་སའི་གསང་བའི་ལས་ཁུངས་ཡིན་པའི་སྐད་ཆ་གོ་རྒྱུ་འདུག་ལ། ཁོང་འཛིན་བཟུང་བྱས་པའི་གནས་ཚུལ་ཐོན་རྗེས། བོད་ཕྱི་ནང་གི་དགའ་ཉེ་བློ་དཀར་ཚང་མས། གནས་སྐབས་རིང་གསང་བ་བྱས་ན་མི་རིང་བར་ཐར་ཐབས་རེ་རྙེད་ཨེ་མི་ཡོང་ཞེས་རེ་སྒུག་བྱས་ཡོད་ཀྱང་། ད་བར་དུ་གནས་ཚུལ་ལ་བཟང་ངོ་ཅི་ཡང་མ་ཤར་སྟབས། ད་ཆ་བོད་གཞིས་བྱེས་གཉིས་ཀས་གསོན་པོའི་མྱི་བདག་དང་། ཤི་བོའི་རོ་བདག་ཟེར་བ་ལྟར་ཐབས་བརྒྱ་ཇུས་སྟོང་ལ་འབད་དགོས་པའི་དུས་སུ་སླེབས་ཡོད་པར་མཐོང་ནས་གནས་ཚུལ་མཁོ་སྤྲོད་གནང་བ་ཡིན་སྐོར་བརྗོད་བྱུང་།
ང་ཚོའི་གནས་ཚུལ་ཡོང་ཁུངས་གཞན་ལྟར་ན། ཕྱི་ལོ་ ༢༠༢༠ ལོའི་ལོ་མཇུག་ནས་བཟུང་སྙན་ངག་པ་གྲགས་ཅན་རོང་བོ་དགེ་འདུན་ལྷུན་འགྲུབ་ལགས་དང་སྒོ་ཤེར་ལགས་གཉིས་གཙོ་བོར་གྱུར་བའི་མདོ་སྨད་ཕྱོགས་ཀྱི་རྩོམ་པ་པོ་དང་ཉམས་ཞིབ་པ་སོགས་བོད་སྐད་བོད་ཡིག་དོན་གཉེར་བ་ཉུང་མཐར་བཅུ་གྲངས་ཤིག་འཛིན་བཟུང་བྱས་ཡོད་ཀྱང་། ཁོང་ཚོའི་ཁྱིམ་མི་འབྲེལ་ཡོད་སོགས་ནས་གསང་བ་བྱས་ཏེ་བཤད་ཕོད་ཀྱི་མེད་སྐོར་བརྗོད་བྱུང་།
ཕྱི་ལོ་ ༡༩༧༦ ཟླ་ ༩ ཚེས་ ༩ ཉིན་ཁོང་རྔ་བ་རྫོང་ཁ་ཤི་སྡེ་བའི་ཕ་སྒོ་བརྩོན་དང་མ་སྒྲོལ་དཀར་གཉིས་ཀྱི་བུ་རུ་སྐྱེས་ཤིང་། ཆུང་དུས་ནས་ཀིརྟི་དགོན་གྱི་ཆོས་སྒོར་ཞུགས་ཏེ་སློབ་གཉེར་གནང་ཡོད་པ་དང་། ཕྱི་ལོ་ ༡༩༩༠ ཡས་མས་སུ་ཁོང་རྒྱ་གར་དུ་ནང་ཡོང་སྟེ་ཕྱིས་སུ་ཕྱིར་ལོག་ནས་མུ་མཐུད་གཞུང་ཆེན་ཁག་ལ་སློབ་གཉེར་གནང་ཡོད་འདུག ཁོང་གི་ཕ་འདས་པོ་སྒོ་བརྩོན་ལགས་ནི་རྔ་བ་རྨེའུ་རྒྱལ་བོའི་བློན་པོ་ཞིག་ཡིན་ཁར། དེ་སྔོན་རྒྱ་གར་དང་བལ་ཡུལ་སོགས་སུ་ཚོང་ལས་གཉེར་ཏེ་ས་སྒོ་འདྲ་མིན་འགྲིམས་པ་སོགས་རྒྱུ་རྐྱེན་སྣ་ཚོགས་པའི་ཤུགས་རྐྱེན་འོག སྒོ་ཤེར་ལགས་རྒྱལ་ཕྱི་ནང་གི་གནས་ཚུལ་ལ་རྒྱུས་མངའ་བཟང་ཞིང་། གཞུང་ཆེན་ཁག་ལ་སློབ་གཉེར་དང་། དོན་གཉེར་ཅན་མང་པོར་འཆད་ཁྲིད་ཀྱི་ཞོར་དུ། རྩོམ་འབྲིའི་ལས་ལ་ཞུགས་ཏེ་སྔ་གཞུག་ཏུ་<<ང་ཚོ་སད་རན་དང>>། <<སྐྱེས་ཆེན་ཞིག་གི་བཞུད་ལམ>>། <<རང་ལམ་རང་འཚོལ>>། <<གསེར་ཐང་འཆད་ཁྲིད>>། <<བསམ་གཞིགས་པའི་སེམས་སྒྲ>>་ཞེས་པ་སོགས་དེབ་ ༨ ཙམ་པར་སྐྲུན་གནང་སྟེ་བོད་ཕྱི་ནང་གཉིས་སུ་སྙན་གྲགས་རྒྱས་ཡོད་པ་རེད།
ཕྱི་ལོ་ ༡༩༩༨ ཡས་མས་སུ་རྒྱ་ནག་གཞུང་གིས་བོད་ས་ཁྱོན་ཡོངས་སུ་རྒྱལ་གཅེས་ཆོས་གཅེས་ཟེར་བའི་ལས་འགུལ་རབ་དང་རིམ་པ་སྤེལ་སྟབས། སྒོ་ཤེས་རབ་རྒྱ་མཚོས་རྔ་བ་ཀིརྟི་དགོན་པ་ནས་ལས་འགུལ་དེ་རིགས་ཀྱི་རིམ་པ་སོ་སོར་ཐབས་བརྒྱ་ཇུས་སྟོང་གིས་གདོང་ལེན་བྱས། སྐབས་དེའི་ལས་འགུལ་ཁྲོད་༧གོང་ས་མཆོག་ལ་མཚན་སྨོད་ཞུ་དགོས་པ་དེ་སློབ་གསོའི་རྩ་དོན་ཡིན་སྟབས། དེ་རིགས་ལ་གདོང་ལེན་གང་ལེགས་བྱས་ཤིང་། དགའ་ལྡན་ལྔ་མཆོད་ཅིག་གི་སྐབས། ༧གོང་ས་མཆོག་གི་སྐུ་པར་གཟི་བརྗིད་ཅན་ཞིག་གློག་མཆོད་ཀྱི་དཀྱིལ་དུ་སྒྲིག་གཤོམ་བྱས་པ་སོགས་སྔ་ཕྱིའི་གནས་ཚུལ་འདྲ་མིན་ལ་ཁག་བཞག་སྟེ་འཛིན་བཟུང་བྱས་ནས་ལོ་བཞིའི་རིང་བཙོན་འཇུག་བྱས། བཙོན་ཁང་ནང་ནས་རྒྱའི་སྐད་ཡིག་ལ་ལེགས་པར་སྦྱངས། བཙོན་གྲོལ་ཐོབ་རྗེས་ཁོང་གིས་མུ་མཐུད་གཞུང་ཆེན་ཁག་ལ་སློབ་གཉེར་གནང་ཡོད་འདུག
ཕྱི་ལོ་ ༢༠༠༨ ལོར་ཁོང་གིས་ལྷ་ས་རུ་སློབ་གཉེར་གནང་སྐབས། ཁོང་དང་གྲྭ་པ་གཞན་མང་པོ་ཞིག་ཧ་ལམ་ལོ་གཅིག་ཙམ་རིང་ཟུར་དུ་བཀག་ཉར་བྱས། བཀག་ཉར་ནས་ཀློད་རྗེས་ཁོང་གིས་བོད་ཡུལ་གྱི་དགོན་སྡེ་མང་པོའི་ནང་ཆོས་དང་རིག་གནས་ཅི་རིགས་འཆད་ཁྲིད་གནང་ཡོད་འདུག
