ཉེ་སྔོན་རྒྱ་ནག་རྒྱལ་ཁབ་འཕེལ་སྒྱུར་ལྷན་ཁང་གིས་བོད་རང་སྐྱོང་ལྗོངས་ཟེར་བའི་ནང་གནམ་ཐང་གསུམ་གསར་རྒྱག་དང་གནམ་ཐང་གཞན་གཅིག་རྒྱ་བསྐྱེད་གཏོང་བའི་ལས་གཞིར་ཆོག་མཆན་ཐོབ་ཡོད་སྐོར་བསྒྲགས་འདུག
ཟླ་འདིའི་ཕྱི་ཚེས་ ༡༠ ཉིན་བོད་ལྗོངས་ཉིན་རེའི་ཚགས་པར་ཁང་གིས་སྤེལ་བའི་གནས་ཚུལ་ནང་། རྒྱ་གར་གྱི་ས་མཚམས་སུ་ཉེ་བའི་བོད་ལྷུན་རྩེ་དང་དིང་རི། སྤུ་ཧྲེང་བཅས་ཀྱི་ནང་གནམ་ཐང་གསུམ་གསར་དུ་བསྐྲུན་རྒྱུ་ཡིན་པ་དང་། དེ་བཞིན་ལྷ་ས་གནམ་ཐང་གི་རྒྱུག་ལམ་གཉིས་པ་རྒྱ་བསྐྱེད་དང་བསྐྱར་སྐྲུན་གྱི་ལས་གཞི་མགོ་འཛུགས་བྱ་རྒྱུར་ཆོག་མཆན་ཐོབ་ཡོད་པ་དང་། གནམ་ཐང་གསར་བསྐྲུན་དང་རྒྱ་བསྐྱེད་ཀྱི་ལས་གཞི་དེར་ཁྱོན་རྒྱ་སྒོར་དུང་ཕྱུར་ ༡༣༦ གི་མ་དངུལ་ཐོབ་ཡོད་ཚུལ་དང་། དེ་བཞིན་བོད་ཁུལ་གྱི་གནམ་ཐང་གསར་རྒྱག་དང་རྒྱ་བསྐྱེད་ཀྱི་ལས་གཞི་དེ་དག་བརྒྱུད། ས་གནས་སུ་འགྲིམ་འགྲུལ་སྐྱེལ་འདྲེན་མ་ལག་འཐུས་སྒོ་ཚང་དུ་གཏོང་བ་དང་། མཐའ་མཚམས་ཁུལ་གྱི་ཕྱི་ཕྱོགས་འགྲིམ་འགྲུལ་སྐྱེལ་འདྲེན་གྱི་ཆ་རྐྱེན་ལེགས་སུ་གཏོང་བ། ས་གནས་མང་ཚོགས་ཀྱི་འགྲོ་སྐྱོད་ཀྱི་དགོས་མཁོ་སྐོང་བ། ཛ་དྲག་མྱུར་སྐྱོབ་ཀྱི་འགན་ལེན་ནུས་པ་ཆེ་རུ་གཏོང་བ། ས་ཁོངས་ཀྱི་དཔལ་འབྱོར་དང་སྤྱི་ཚོགས་འཕེལ་རྒྱས་སུ་གཏོང་བ་སོགས་ལ་ཕན་ཐོགས་ཆེན་པོ་ཡོད་སྐོར་བཤད་ཡོད་པ་རེད།
རྒྱ་ནག་གཞུང་གིས་བོད་ས་ཧྲིལ་པོར་སྟངས་འཛིན་དོ་དམ་ཤུགས་ཆེ་རུ་གཏོང་བ་དང་། བོད་དང་རྒྱ་གར་ས་མཚམས་ཁུལ་གྱི་ལྟ་སྲུང་ཤུགས་སྣོན། དེ་བཞིན་རྒྱ་ནག་ནང་ལོགས་ཀྱི་ཕྱི་མི་མང་པོ་བོད་ཡུལ་དུ་གནས་སྤོ་གཏོང་བ་སོགས་ཀྱི་ཆེད་དུ། ད་ལྟའི་ཆར་བོད་རང་སྐྱོང་ལྗོངས་ཟེར་བ་གཅིག་པུའི་ནང་གནམ་ཐང་ཆེ་ཆུང་ཁག་ལྔ་བརྒྱབ་ཟིན་ཡོད་པ་དང་། ཕྱི་ལོ་ ༢༠༡༨ ཟླ་ ༦ པ་ཙམ་ནས་བཟུང་གོང་བརྗོད་ཀྱི་གནམ་ཐང་དེ་དག་རྒྱག་འཆར་ཡོད་པའི་གནས་ཚུལ་ཐོན་ཡོད་ལ། ལྷོ་ཁ་ལྷུན་རྩེའི་གནམ་ཐང་དེ་རྒྱ་ནག་རྒྱལ་ས་གནམ་ཐང་བཟོ་ལས་ཁང་ཟེར་བ་ཞིག་གིས་འཛུགས་སྐྲུན་བྱ་རྒྱུ་དང་། ཧྲང་ཧེ་གནམ་ཐང་བཟོ་ལས་ཁང་གིས་གཞིས་ཀ་རྩེའི་གནམ་ཐང་། ནུབ་རྒྱུད་གནམ་ཐང་མཉམ་ལས་ཁང་ཟེར་བ་ཞིག་གིས་མངའ་རིས་ཀྱི་གནམ་ཐང་ལས་གཞི་འགན་ལེན་བྱས་ཡོད་འདུག
ཕྱི་ལོ་ ༢༠༡༩ ཟླ་ ༤ ནང་རྒྱ་ནག་གཞུང་འབྲེལ་ཀྲུང་དབྱང་བརྙན་འཕྲིན་ཁང་གིས་ལོ་དེར་རྒྱ་ནག་གཞུང་གིས་བོད་ཀྱི་རྒྱལ་ས་ལྷ་སའི་ས་མཚམས་ཁུལ་དུ་ཡོད་པའི་ལྷོ་ཁ་ལྷུན་རྩེ་རྫོང་དང་གཞིས་རྩེ་དིང་རི་རྫོང་། མངའ་རིས་སྤུ་ཧྲེང་རྫོང་བཅས་སུ་གནམ་ཐང་གསུམ་འཛུགས་སྐྲུན་བྱ་འཆར་ཡོད་པའི་ཇུས་འགོད་གཏན་འཁེལ་བྱུང་ཡོད་སྐོར་བསྒྲགས་ཡོད་པ་དང་། སྐབས་དེར་བོད་རང་སྐྱོང་ལྗོངས་མཁའ་འགྲུལ་ལས་ཁུངས་ཀྱི་དོ་དམ་པ་པད་སྒྲོན་ཟེར་བ་ཞིག་གིས། གནམ་ཐང་དེ་དག་རྒྱ་མཚོའི་ངོས་ལས་མཐོ་ཚད་རྨིད་ ༣༩༠༠ ལྷག་ནས་འཛུགས་སྐྲུན་བྱེད་དགོས་པ་དང་། གནམ་ཐང་འཛུགས་སྐྲུན་བྱེད་སྐབས་བདེ་འཇགས་ཀྱི་མཁའ་ལམ་ཚད་ཐིག་བརྟན་སྲུང་བྱེད་པ་དང་། འཁོར་སྐྱོད་བདེ་འཇགས་སོགས་ལ་བསམ་གཞིགས་ཞིབ་ནན་བྱས་ཏེ་ཇུས་འགོད་བྱ་རྒྱུ་ཡིན་སྐོར་བརྗོད་ཡོད་པ་རེད།
ཡང་པད་སྒྲོན་གྱིས་ལྷུན་རྩེའི་གནམ་ཐང་དང་སྤུ་ཧྲེང་གནམ་ཐང་གཉིས་བོད་རང་སྐྱོང་ལྗོངས་ནང་ཁུལ་ལ་འཕུར་སྐྱོད་དང་། དིང་རིའི་གནམ་ཐང་ནས་བོད་རང་སྐྱོང་ལྗོངས་ནང་ཁུལ་དང་། གཞན་ཁྲིན་ཏུའུ་དང་། ཁུན་མིང་། ཞི་ཨན་བཅས་རྒྱ་ནག་ནང་ལོགས་ལ་འཕུར་སྐྱོད་བྱ་རྒྱུ་དང་། གནམ་ཐང་དེ་དག་ལ་བོད་ལྗོངས་ཀྱི་ས་ཁོངས་ཁྱད་ཆོས་མངོན་གསལ་དོད་དུ་གཏོང་བ་དང་། བོད་ལྗོངས་མང་ཚོགས་ཀྱིས་ཁས་ལེན་པ་དང་། བོད་ལ་ཡུལ་སྐོར་དུ་ཡོང་མཁན་བློ་ཡིད་ཚིམས་པའི་གནམ་ཐང་གསར་པ་ཞིག་འཛུགས་སྐྲུན་ཐུབ་པ་བྱ་རྒྱུ་ཡིན་སྐོར་བརྗོད་ཡོད་ནའང་། གནམ་ཐང་རྒྱག་ཆེད་ས་གནས་མི་མང་གི་ས་ཆ་བཙན་འཕྲོག་བྱས་པ་དང་ཁོར་ཡུག་ལ་གཏོར་སྐྱོན། རྒྱུག་ཆུ་དང་གཙང་པོ་ཁ་སྒྱུར་འབག་བཙོག་བཟོས་པའི་གནད་དོན་ཧ་ཅང་ཚབས་ཆེན་པོ་ཆགས་ཏེ། ས་གནས་མི་མང་ལ་ཕན་ལས་འཕྲལ་ཕུགས་གཉིས་ཀྱི་གནོད་སྐྱོན་ཆེ་བ་ཡོང་གི་ཡོད་པའི་གནས་ཚུལ་རིམ་པར་ཐོན་ཡོད་ལ། ཞིབ་འཇུག་སྙན་ཐོ་ཁག་གི་ནང་དུའང་ཐོན་ཡོད་པ་རེད།
བོད་རང་སྐྱོང་ལྗོངས་ནང་བརྒྱབ་ཟིན་པའི་གནམ་ཐང་ཁག་ནི། ལྷ་སའི་གོང་དཀར་གནམ་ཐང་དང་། ཉིང་ཁྲིའི་སྨན་ལིང་གནམ་ཐང། ཆབ་མདོའི་པན་ཌ་གནམ་ཐང་། མངའ་རིས་གནམ་ཐང་། གཞིས་ཀ་རྩེའི་ཞི་བདེ་གནམ་ཐང་བཅས་ཡིན་པ་དང་། གནམ་ཐང་ཁག་ཚང་མ་མཐའ་མཚམས་ཁུལ་དུ་འཛུགས་སྐྲུན་བྱས་པ་དེས། རྒྱ་གར་གཙོའི་ཁྱིམ་མཚེས་རྒྱལ་ཁབ་ཚོས་དྲག་དམག་གི་རྟེན་གཞིར་དམིགས་ཏེ་འཛུགས་སྐྲུན་བྱེད་བཞིན་ཡོད་པ་ཞིག་ཏུ་ཡོངས་གྲགས་ཐོག་ངོས་འཛིན་བྱེད་ཀྱི་ཡོད་པ་ལྟར། དཔུང་དམག་དབོར་འདྲེན་སོགས་ལ་བེད་སྤྱོད་གཏོང་བཞིན་ཡོད་པའི་གནས་ཚུལ་བསྟུན་མར་ཡོང་གི་ཡོད་པ་རེད།
འབྲེལ་ཡོད་གནས་ཚུལ། བོད་ནང་གནམ་ཐང་གསུམ་གསར་དུ་རྒྱག་རྒྱུ་རེད།
གསར་འགོད་པ། ཀླུ་མགོན་ཐར།
