དེ་རིང་ཕྱི་ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༠ པ་གནང་སྐབས། རྒྱ་བལ་གཉིས་ཀྱི་བོད་མིའི་སྤྱི་ཚོགས་ནང་ཏོག་དབྱིབས་གཉན་རིམས་ཀྱི་འགོས་ཁྱབ་ཤུགས་ཆེ་རུ་འགྲོ་བཞིན་ཡོད་པ་དང་བསྟུན། ནད་གཞི་ཛ་དྲག་གི་གནས་སྟངས་ལ་མ་ལྷུང་སྔོན་ནས་ཤེས་རྟོགས་ཡོང་སླད། འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ཁྲོད་བརྟག་དཔྱད་གང་མང་བྱེད་ཐུབ་པར་འབད་བརྩོན་བྱེད་ཀྱི་ཡོད་པས། ནད་རྟགས་མངོན་ཚེ་སྨན་པར་བསྟེན་གཏུག་བྱེད་པ་དང་བརྟག་དཔྱད་བྱེད་པ། སྔོན་འགོག་གི་ཐབས་ལམ་ཁག་ལ་མི་མང་ངོས་ནས་གང་ཐུབ་བསྟེན་དགོས་པའི་འབོད་སྐུལ་གནང་འདུག
འཕྲོད་བསྟེན་དྲུང་འཕར་བྱམས་པ་ཕུན་ཚོགས་ལགས་ཀྱིས། བོད་མི་མང་པོ་ཞིག་ལ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབས་ཚར་ཡོད་པ་དང་། དེ་ལ་བརྟེན་ནས་ཁ་རས་མ་གྱོན་པ་དང་། འདུ་འཛོམས་གང་བྱུང་བྱེད་པ་སོགས་ཏོག་ནད་མི་འགོས་པའི་བསམ་བློ་བཟུང་སྟེ་སྣང་མེད་བྱེད་ཀྱི་ཡོད་སྟབས། འགོག་ཁབ་བརྒྱབས་ཚར་ནའང་གཉན་རིམས་དེ་འགོས་ཀྱི་ཡོད་པ་དང་གཞན་ལ་གཉན་རིམས་བགོས་པའི་ཉེན་ཁ་མུ་མཐུད་ཡོད་པས་སྣང་མེད་མི་བྱེད་པ་དང་། ཡང་ཁག་ཅིག་ཏོག་དབྱིབས་གཉན་རིམས་བྱུང་རྗེས་དྲག་བསྐྱེད་བྱུང་ཡོད་པ་དང་། སྤྱིར་ཐེངས་གཅིག་གཉན་རིམས་དེ་ཕོག་ཚར་ནས་དྲག་བསྐྱེད་བྱུང་རྗེས་རང་བཞིན་གྱིས་ལུས་ཟུང་གི་ནུས་པ་ཆེ་རུ་སོང་སྟེ་བསྐྱར་དུ་གཉན་རིམས་དེ་ཕོག་པའི་ཉེན་ཁ་ཆུང་བ་ཡོད་པ་བརྗོད་ཀྱི་ཡོད་ནའང་། གང་ཟག་དེ་ལ་བསྐྱར་དུ་འགོས་མི་སྲིད་པ་ཞིག་རྩ་བ་ཉིད་ནས་མིན་སྟབས། ནད་གཞི་ཕོག་ཟིན་པ་ཞིག་ཡིན་ནའང་དུས་རྟག་ཏུ་སྔོན་འགོག་གི་ཐབས་ལམ་ཁག་ལ་བསྟེན་དགོས་སྐོར་དང་། ཚང་མས་ཁ་རས་གྱོན་མི་དགོས་པ་དང་། གང་འདོད་དུ་ཕེབས་ཆོག་པའི་ལམ་སྟོན་ཞིག་མ་ཡོང་བར་དུ་ཉིན་ལྟར་ཁ་རས་གྱོན་པ་དང་། ལག་པ་འཁྲུད་པ། འདུ་འཛོམས་མི་བྱེད་པ་སོགས་ཀྱི་ལམ་སྟོན་ཁག་ལག་བསྟར་ངེས་པར་བྱ་དགོས་སྐོར་བརྗོད་བྱུང་།
ཡང་ཁོང་གིས། ད་ལྟའི་དུས་སྐབས་འདིར་བོད་མི་མང་པོ་ཞིག་ལ་ཏོག་དབྱིབས་གཉན་རིམས་ཀྱི་ནད་རྟགས་ལ་སོགས་པ་བྱུང་ནའང་། སྒེར་ངོས་ནས་ཆམ་པ་ཡིན་པའི་ངོས་འཛིན་དང་འོ་ཙམ་མིན་ནམ་བསམ་སྟེ་སྨན་པར་བསྟེན་གཏུག་མི་བྱེད་པ་དང་། ཏོག་དབྱིབས་གཉན་རིམས་ཡིན་མིན་ཀྱི་བརྟག་དཔྱད་མི་བྱེད་པར་རང་ཁྱིམ་དུ་ཨུ་ཚུགས་བྱས་ཏེ་འདུག་གི་ཡོད་པས། མང་པོ་ཞིག་ཛ་དྲག་གི་གནས་སྟངས་ཆགས་སྐབས་སྨན་པར་བསྟེན་པ་དང་རྟག་དཔྱད་བྱས་ནའང་ཉེན་ཁའི་དུས་སུ་ལྷུང་ཚར་ཡོད་སྟབས། ནད་རྟགས་སོགས་བྱུང་ཚེ་སྔོན་ཚུད་ནས་རང་དོན་རང་གཅེས་གནང་སྟེ་ཐད་ཀར་སྨན་པར་བསྟེན་གཏུག་བྱེད་པ་དང་བརྟག་དཔྱད་བྱ་དགོས་སྐོར་དང་། གཉན་རིམས་དེ་བྱུང་སྟེ་ལོ་ངོ་གཅིག་ལྷག་འགོར་ཡོད་པའི་རིང་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག མི་སྒེར་དྭང་བླངས་བ་སོགས་ཀྱིས་རྒྱ་བལ་འབྲུག་གསུམ་གྱི་བོད་མིའི་སྤྱི་ཚོགས་ནང་ཞབས་ཕྱི་སྣ་མང་བསྒྲུབས་དང་སྒྲུབ་མུས་ཡིན་པ་དང་། ལྷག་པར་དུ་རྒྱ་གར་ནང་ཏོག་དབྱིབས་གཉན་རིམས་ཀྱི་འགོས་ཁྱབ་རིམ་པ་གཉིས་པ་དེ་བྱུང་སྟེ་ཛ་དྲག་གི་སྐབས་སུ་རྒྱ་བལ་འབྲུག་གསུམ་དང་ཕྱི་རྒྱལ་ཁག་གི་སྤྱི་སྒེར་གཉིས་ཀྱིས་སྔར་ལྷག་གཉན་རིམས་སྔོན་འགོག་དང་སྤྱི་ཚོགས་ཞབས་ཕྱིའི་ཐོག་ནུས་ཤུགས་བཏོན་དང་འདོན་བཞིན་པར་འཕྲོད་བསྟེན་ལས་ཁུངས་ངོས་ནས་སྙིང་ཐག་པ་ནས་བསྔགས་བརྗོད་དང་ཐུགས་རྗེ་ཆེ་ཞུ་ཡི་ཡོད་སྐོར། ནུས་པ་མཉམ་སྤུངས་བྱས་པ་ལ་བརྟེན་ནས་སྤྱི་ཚོགས་ནང་གཉན་རིམས་མེད་པར་བཟོ་པའི་ནུས་པ་ཆེ་རུ་དང་ཇེ་མགྱོགས་སུ་ཕྱིན་ཡོད་པ། བོད་མིའི་སྒྲིག་འཛུགས་དང་ཚོགས་པ་ཁག དེ་བཞིན་མི་སྒེར་སུ་དང་སུས་ག་རེ་བྱེད་ཀྱི་ཡོད་མེད་ལ་མི་བལྟ་བར་སྒེར་ངོས་ནས་ད་ལྟའི་ཛ་དྲག་གི་དུས་སྐབས་འདིར་ནུས་པ་མཉམ་སྤུངས་ག་རེ་བྱེད་ཐུབ་མིན་གྱི་ཐོག་ལ་བལྟ་དགོས་སྐོར་བརྗོད་བྱུང་།
ནད་པའི་གནས་སྟངས་སྐོར་ལ་ཏོག་དབྱིབས་ཛ་དྲག་ལས་དོན་ཚོགས་ཆུང་གི་འབྲེལ་མཐུད་པ་སྨན་པ་ཚེ་རིང་མཚམས་གཅོད་ལགས་ཀྱིས། ད་ལྟ་རྒྱ་གར་གྱི་ས་གནས་གྲངས་ ༢༥ དང་བལ་ཡུལ་གྱི་ས་གནས་གྲངས་ ༧ གྱི་ནང་། རང་ཁྱིམ་དུ་ཟུར་བཀག་བྱེད་པའི་གྲངས་ ༧༩༣ དང་ཚོགས་སྡེ་ཁག་གི་ནང་གྲངས་ ༧༤༠ བཅས་ཁྱོན་ཟུར་བཀག་ལ་ཡོད་མཁན་བོད་མི་གྲངས་ ༡༥༣༣ ཡོད་པ་དང་། འདས་པའི་བདུན་ཕྲག་གཅིག་གི་རིང་མདུན་དུ་འཐོན་ནས་ཞབས་ཕྱི་བྱེད་མཁན་གྲངས་ ༡༣༣༠ དང་བླ་གཉན་གྱི་ནད་གཞི་ཡོད་པ་གྲངས་ ༡༩༥༤ དང་། ལོ་ན་ ༦༠ ཡན་གྱི་མི་གྲངས་ ༦༧༠༤ དང་། ལོ་ན་ ༤༥ ཡན་གྱི་མི་གྲངས་ ༥༣༨༨ དང་། ལོ་ན་ ༡༨ ཡན་གྱི་མི་གྲངས་ ༣༠༤ བཅས་ཁྱོན་མི་གྲངས་ ༡༦༦༩༩ ལ་འགོག་ཁབ་བརྒྱབས་ཡོད་པ་དང་། འདས་པའི་བདུན་ཕྲག་གཅིག་གི་རིང་བོད་མི་ཏོག་དབྱིབས་གཉན་རིམས་ཀྱི་ནད་པ་ ༦༣༦ བྱུང་ཡོད་པའི་ཁྲོད་བགྲེས་ཤོས་ལོ་ན་ ༩༨ དང་ཆུ་ཤོས་ལོ་ན་ ༡ ཡིན་པ་དང་། བོད་མི་གྲངས་ ༡༨ འདས་གྲོངས་སུ་ཕྱིན་ཡོད་པ་དང་། ད་ལྟའི་ཆར་ནད་མནར་འོག་ཡོད་པ་གྲངས་ ༡༥༢༤ ཡོད་སྐོར་དང་། དེ་བཞིན་ནུས་གསོའི་སྨན་གྲངས་ ༣༤༥༦༩ ལ་རིན་མེད་ཐོག་འགྲེམས་སྤེལ་ཞུས་ཡོད་པ། དེ་བཞིན་རྒྱ་གར་ནང་ས་གནས་ ༢༡ ནང་མི་གྲངས་ ༢༤༤༡ དང་བལ་ཡུལ་ནང་ས་གནས་ ༣ གྱི་ནང་མི་གྲངས་ ༡༢ བཅས་སུ་ཁྱོན་མི་གྲངས་ ༢༤༥༣ ལ་བརྟག་དཔྱད་བྱས་ཡོད་སྐོར་བརྗོད་འདུག
ཡང་སྨན་པ་མཚམས་གཅོད་ལགས་ཀྱིས། བོད་མིའི་སྤྱི་ཚོགས་ནང་ཏོག་དབྱིབས་གཉན་རིམས་ཀྱི་འགོས་ཁྱབ་ཤུགས་ཆེ་རུ་འགྲོ་བཞིན་ཡོད་པ་དང་བསྟུན། ནད་གཞི་ཛ་དྲག་གི་གནས་སྟངས་ལ་མ་ལྷུང་སྔོན་ནས་ཤེས་རྟོགས་ཡོང་སླད། འཕྲོད་བསྟེན་ལས་ཁུངས་ནས་བོད་མིའི་སྤྱི་ཚོགས་ཁྲོད་བརྟག་དཔྱད་གང་མང་བྱེད་ཐུབ་པར་འབད་བརྩོན་བྱེད་ཀྱི་ཡོད་པས། ནད་རྟགས་མངོན་ཚེ་སྨན་པར་བསྟེན་གཏུག་བྱེད་པ་དང་བརྟག་དཔྱད་བྱེད་པ། སྔོན་འགོག་གི་ཐབས་ལམ་ཁག་ལ་མི་མང་ངོས་ནས་གང་ཐུབ་བསྟེན་དགོས་པའི་འབོད་སྐུལ་དང་། བོད་མི་མང་པོ་ཞིག་གིས་རྒྱ་སྨན་ཁོ་ན་ལས་བསྟེན་གྱི་མིན་སྐོར་དང་། ཡང་ཁག་ཅིག་གིས་ཕྱི་ལུགས་ཀྱི་སྨན་ཁོ་ན་ལས་བོད་སྨན་ལ་བསྟེན་གྱི་མིན་པ་བརྗོད་མཁན་འདུག་སྟབས། འདས་པའི་ཉམས་མྱོང་ལ་གཞིར་བཞག་ན་ཐེངས་འདིའི་གཉན་རིམས་ལ་བོད་སྨན་དང་ཕྱི་ལུགས་ཀྱི་སྨན་གཉིས་ཟུང་འབྲེལ་བྱས་ཏེ་བསྟེན་གཏུག་བྱས་ན་ཕན་ཐོགས་ཆེན་པོ་ཡོད་པ་གསལ་པོ་བྱུང་ཡོད་སྟབས། འཕྲོད་བསྟེན་ཡན་ལག་སྨན་ཁང་ཁག་དང་སྨན་པའི་ལམ་སྟོན་བཞིན་སྨན་བཅོས་དུས་འགྱང་མི་བྱེད་པའི་ཐོག་ནས་བོད་ལུགས་དང་ཕྱི་ལུགས་གཉིས་ཀྱི་སྨན་བཅོས་ལ་བསྟེན་དགོས་རྒྱུ་ནི་གལ་ཆེན་ཡིན་པ་དང་། ནད་མནར་སྐབས་ཟས་སྤྱོད་བསྟེན་ཕྱོགས་ཀྱང་གལ་ཆེན་ཡིན་སྐོར་གྱི་ལམ་སྟོན་གནང་འདུག
འགོག་ཁབ་དང་འབྲེལ་ནས་བདེ་ལེགས་སྨན་ཁང་གི་ཕྱི་ལུགས་སྨན་པ་རྣམ་གྲོལ་ལགས་ཀྱིས། ཉེ་ལམ་རྒྱ་གར་གཞུང་གི་འགོག་ཁབ་དང་འབྲེལ་ནས་ལམ་སྟོན་ཞིག་གནང་ཡོད་པའི་ནང་། ཏོག་དབྱིབས་གཉན་རིམ་ཕོག་མཁན་ཞིག་དྲག་བསྐྱེད་བྱུང་རྗེས་ཀྱི་ཟླ་གསུམ་གྱི་རིང་འགོག་ཁབ་མི་བརྒྱག་པ་དང་། འགོག་ཁབ་དང་པོ་བརྒྱབས་ནའང་གཉིས་པ་མ་བརྒྱབས་སྔོན་ནས་ཏོག་དབྱིབས་གཉན་རིམས་ཕོག་ཚེ། འགོག་ཁབ་གཉིས་པ་དེ་ནད་གཞི་དེ་དྲག་བསྐྱེད་བྱུང་ནས་ཟླ་གསུམ་གྱི་རྗེས་སུ་བརྒྱག་དགོས་པ། དེ་བཞིན་ནད་གཞི་ཕོག་ཟིན་པ་ཞིག་གི་ plasma ནད་པ་གཞན་ཞིག་སྤྲད་དེ་དྲག་བསྐྱེད་བྱུང་བའི་ནད་པ་དེ་ཚོས་ཀྱང་ཟླ་གསུམ་གྱི་རྗེས་སུ་འགོག་ཁབ་བརྒྱག་དགོས་པའི་ལམ་སྟོན་གནང་ཡོད་སྐོར་དང་། དེ་ལྟ་བུའི་ལམ་སྟོན་གནང་དགོས་པའི་རྒྱུ་མཚན་ནི་ཏོག་དབྱིབས་གཉན་རིམས་ཕོག་སྟེ་དྲག་བསྐྱེད་བྱུང་རྗེས་གང་ཟག་དེའི་ལུས་ཟུང་གིས་ནད་འབུ་དེར་གདོང་ལེན་བྱེད་པའི་ནུས་པ་གོང་མཐོར་ཕྱིན་ཡོད་པ་དང་། དེའི་ནུས་པ་ཟླ་གསུམ་ཙམ་གྱི་རིང་གནས་ཀྱི་ཡོད་སྐོར་དང་། ཡང་གལ་སྲིད་མི་སུ་ཞིག་ནད་གཞི་གང་རུང་ཞིག་གི་འོག་ནས་ཛ་དྲག་གི་གནས་སྟངས་འོག་ལྷུང་བ་ཡིན་ཚེ། ནད་གཞི་དེ་ལས་དྲག་བསྐྱེད་བྱུང་རྗེས་ཀྱི་ཟླ་གཅིག་དང་གཉིས་ཀྱི་རྗེས་ནས་འགོག་ཁབ་བརྒྱག་དགོས་སྐོར། ལྷག་པར་དུ་འགོག་ཁབ་གཉིས་ཀ་བརྒྱབས་ཚར་རྗེས་ཀྱི་བདུན་ཕྲག་གཉིས་ཀྱི་རྗེས་སུ་མ་གཏོགས་མི་གཞན་ལ་ཁྲག་གི་སྤྱིན་གཏོང་མི་བྱེད་པ་དང་། དེ་བཞིན་མཆིན་ནད་དང་ཆམ་རིམས་ཀྱི་འགོག་ཁབ་སོགས་བརྒྱག་དགོས་བྱུང་ཚེ་ངེས་པར་དུ་ཏོག་དབྱིབས་གཉན་རིམས་ཀྱི་འགོག་ཁབ་བརྒྱབས་རྗེས་ཀྱི་བདུན་ཕྲག་གཉིས་ཀྱི་རྗེས་སུ་བརྒྱག་དགོས་སྐོར་གྱི་ལམ་སྟོན་གནང་ཡོད་སྐོར་འགྲལ་བརྗོད་གནང་འདུག
བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་མཆོག་ལ་ འཛམ་གླིང་རྒྱལ་ཁབ་གཞན་མས་ བློན་ཆེན་དཔོན་རིགས་ཚོ་ལ་ Bullet Proof Jacket རེད། བློ་བཟང་སེང་གེ་ལ་དམིགས་བསལ་གྱི་ Corona Proof Jacket ? ཡོད་ས་རེད་པས་ ?