རྒྱ་ནག་གཞུང་གིས་འབྲུག་གཞུང་གི་ས་ཁོངས་ཀྱི་བརྒྱ་ཆ་ ༡༢ ཙམ་རྒྱ་ནག་གི་ཡིན་སྐོར་རྗོད་ཀྱི་ཡོད་འདུག
ཕྱི་འབྲེལ་སྲིད་ཇུས་དུས་དེབ་(Journal foreign policy) ཀྱིས་གནས་ཚུལ་སྤེལ་བ་ལྟར་ན། རྒྱ་ནག་གིས་འབྲུག་གི་མངའ་ཁོངས་ས་སྟོང་ (Sakteng wildlife reserve) ཞེས་པར་བཙན་འཛུལ་བྱེད་བཞིན་ཡོད་པ་དང་། ས་སྟོང་དེར་སྔོན་ཆད་རྒྱ་ནག་གིས་ཐེ་གཏོགས་བྱེད་མྱོང་མེད་ལ། རྒྱ་གར་གྱི་བྱང་ཤར་ས་མཚམས་སུ་ཁེལ་བ་ཞིག་ཡིན་སྟབས། གནད་དོན་དབྱེ་ཞིབ་པ་ཚོས་རྒྱ་ནག་གི་དམིགས་ཡུལ་གཙོ་བོ་ནི་འབྲུག་ཙམ་མིན་པར་རྒྱ་གར་གྱི་མངའ་ཁོངས་སུ་ཕྱོགས་ཡོངས་ནས་བཙན་འཛུལ་བྱེད་པའི་ཐབས་ཇུས་ཤིག་ཡིན་སྐོར་རྗོད་ཀྱི་འདུག
དེ་ཡང་འབྲུག་གི་ས་མཚམས་གྲོང་རྡལ་དགེ་ལེགས་ཕུ་(Gyalaphug) ཞེས་པའི་ས་ཁོངས་སུ་རྒྱ་ནག་གིས་གྲོང་སྡེ་འཛུགས་སྐྲུན་བྱེད་ཀྱི་ཡོད་པ་མ་ཟད། འཛིན་སྐྱོང་ཁང་པའི་སྒོ་བྱང་དུ་ཞི་ཅིན་ཕིང་གིས་བློ་རྩ་བརྟན་པོས་སྲོལ་རྒྱུན་འཛིན་པ་ཞེས་བྲིས་ཡོད་འདུག་ལ། གྲོང་སྡེ་དེར་ལས་མི་དང་ཉེན་རྟོག་པ། དམག་མི་སོགས་ཇེ་མང་དུ་འགྲོ་བཞིན་ཡོད་པ་དང་། མ་འོངས་པར་མི་མང་བརྒྱ་ལྷག་དང་གཡག་མང་པོ་གནས་ཐུབ་པའི་ཚོད་དཔག་བྱེད་ཀྱི་འདུག དགེ་ལེགས་ཕུ་ཞེས་པའི་ས་ཆ་དེ་རྒྱ་ནག་གི་གཞུང་འབྲེལ་ས་ཁྲའི་ནང་དུའང་འབྲུག་གི་ཁོངས་སུ་ཡོད་པ་ཞིག་ཡིན་འདུག
ཕྱི་འབྲེལ་སྲིད་ཇུས་དུས་དེབ་ཀྱི་གནས་ཚུལ་ལྟར་ན། རྩོད་རྙོག་ཅན་གྱི་མཐའ་མཚམས་ཁག་ཏུ་རྒྱ་ནག་གིས་ཧམ་བཟུང་བཙན་འཛུལ་བྱེད་བཞིན་ཡོད་པ་ལྟར། ཕྱི་ལོ་ ༡༩༩༨ ལོའི་འབྲུག་རྒྱའི་གྲོས་ཆོད་ལ་རྩིས་མེད་རྡོག་རོལ་བཏང་སྟེ་འབྲུག་གི་མངའ་ཁོངས་ཀྱི་སྤྱི་ལེ་ ༨ ཙམ་གྱི་ནང་རྒྱ་ནག་གཞུང་གིས་གཞུང་ལམ་དང་གྲོང་རྡལ་གསར་འཛུགས། དེ་བཞིན་དམག་སྡེ་དང་ཉེན་རྟོག་ཁང་། ཚོང་ཁང་སོགས་འཛུགས་སྐྲུན་བྱེད་བཞིན་ཡོད་འདུག་ལ། ས་ཆ་དེ་ཚོ་རྒྱལ་སྤྱིའི་ཐོག་ནས་རྩོད་རྙོག་ཅན་གྱི་རྒྱལ་ཁོངས་གཞན་དུ་ངོས་འཛིན་བྱེད་བཞིན་ཡོད་འདུག
འདི་ལོའི་ཕྱི་ཟླ་ ༤ པའི་ནང་རྒྱ་ནག་གཞུང་གིས་ཁུན་མིན་ (Kunming) གྱི་རྒྱལ་ས་ཡུན་ནན་ (Yunnan) ནང་། རྒྱལ་སྤྱིའི་ལྟ་སྐོར་བའི་སྐུ་ཚབ་ཚོགས་ཆུང་ཞིག་ལ་སྣེ་ལེན་བྱས་ཏེ། རྒྱ་ནག་གི་མངའ་ཁོངས་སུ་བཅུག་པའི་ལྷོ་ཕྱོགས་མཐའ་མཚམས་སྐོར་གླེང་སློང་བྱས་ཏེ། ལྷོ་ཕྱོགས་སུ་མངའ་ཁོངས་རྒྱ་སྐྱེད་པའི་ངན་ཇུས་གསལ་བར་བསྟན་ཡོད་འདུག་ལ། རྒྱ་ནག་དང་འབྲུག་བར་གྱི་ས་ཁྱོན་སྤྱི་ལེ་ ༤༧༠ དེ་རྩོད་རྙོག་གསར་པ་ཞིག་མིན་ཡང་། རྒྱ་ནག་གཞུང་གིས་འབྲུག་གཞུང་གི་ས་ཁོངས་ཀྱི་བརྒྱ་ཆ་ ༡༢ ཙམ་རྒྱ་ནག་གི་ཡིན་ཚུལ་རྗོད་བཞིན་ཡོད་པ་རེད།
མི་འབོར་འབུམ་ ༨ ཙམ་ལས་མེད་པའི་ནང་པའི་རྒྱལ་ཁབ་ཆུང་ཆུང་འབྲུག་ནི་རྒྱ་ནག་དང་རྒྱ་གར་གཉིས་ལ་མཐའ་འབྲེལ་ཆགས་ཡོད་ཀྱང་། ཕྱི་འབྲེལ་དང་དཔལ་འབྱོར་གྱི་ཐོན་ནས་རྒྱ་གར་ལ་མཛའ་འབྲེལ་ཤུགས་ཆེ་བ་ཡོད་པ་མ་ཟད། འདས་པའི་ལོ་ཤས་ནས་བཟུང་རྒྱ་ནག་ལ་ཕྱི་ནང་གི་འབྲེལ་བ་ཇེ་སྡུག་ཏུ་འགྲོ་བཞིན་ཡོད་ལ། ད་ལྟ་ད་དུང་ཡང་འབྲུག་ཡུལ་དུ་རྒྱ་ནག་གི་གཞུང་ཚབ་ཁང་ཡང་འཛུགས་ཐུབ་མེད་པ་རེད།
གསར་འགོད་པ། བསྟན་འཛིན་ཕུར་བུ།
