ནང་པའི་དགེ་འདུན་པ་རྣམས་ཐུགས་དམ་ལ་བཞུགས་ཀྱི་ཡོད་པའི་དངོས་ཡོད་གནས་སྟངས་འོག ཨུ་རུ་སུའི་ཚན་རིག་པས་ཐུགས་དམ་གྱི་བྱེད་བབ་དང་ཚན་རྩལ་ཟུང་འབྲེལ་ཐོག་ནས་གཟའ་སྐར་མིག་དམར་ཐོག་དངོས་སུ་མི་གཏོང་རྒྱུའི་འཆར་གཞི་སྒྲིག་གི་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ད་སྔ་བར་འཛམ་གླིང་རྒྱལ་ཁབ་མི་ཉུང་བ་ཞིག་གིས་འཕྲུལ་རིགས་ཚན་རྩལ་ལ་བརྟེན་ནས། ཉི་མའི་ཁྱིམ་རྒྱུད་ཀྱི་རེས་གཟའ་མིག་དམར་འཚོལ་ཞིབ་ཀྱི་ལས་གཞི་སྤེལ་མུས་ཡིན་པ་དང་། ཉེ་བའི་ལོ་ཤས་གོང་ནས་ཚན་རིག་པས་གཟའ་སྐར་མིག་དམར་ཐོག་མི་དངོས་སུ་བསྐྱོད་ཐབས་ཀྱི་ལམ་ཁ་འཚོལ་གྱི་ཡོད་ནའང་ད་བར་མི་གཅིག་ཀྱང་བསྐྱོད་ཐུབ་མེད་པའི་སྐབས་འདིར། ཨུ་རུ་སུའི་རྒྱལ་ས་མའོ་སི་ཁའོ་གཙུག་ལག་སློབ་གྲྭ་ཆེན་མོའི་ཚན་རིག་པ་སྐོར་ཞིག་གིས། ནང་པའི་ཐུགས་དམ་སྐབས་ཀྱི་ཕུང་པོ་དང་ཀླད་པའི་ནུས་ཤུགས་ཀྱི་བྱེད་བབ་སོགས་ལ་བརྟེན་ནས་གཟའ་སྐར་མིག་དམར་སྟེང་དངོས་སུ་མི་བསྐྱོད་ཐུབ་པར་འབད་བརྩོན་བྱེད་ཀྱི་ཡོད་པ་དང་། ད་ལྟ་ཨུ་རུ་སུའི་ཚན་རིག་པས་ནད་ཡམས་ཀྱི་དཀའ་ངལ་འོག་ཞིབ་འཇུག་མཚམས་འཇོག་བྱས་ཡོད་ནའང་། མི་འགྱང་བར་ནད་ཡམས་མཚམས་ཆད་པ་དང་ཞིབ་འཇུག་རྒྱུན་སྐྱོང་དང་ལག་བསྟར་ཡོང་བར་རེ་བ་རྒྱག་གི་ཡོད་པ་རེད།
ནང་པའི་ཐུགས་དམ་ལ་བརྟེན་ནས་གཟའ་མིག་དམར་ཐོག་བསྐྱོད་རྒྱུའི་མཁའ་དབྱིངས་སྐོར་ཞིབ་ཀྱི་ལས་གཞི་དེ་ཕྱི་ལོ་ ༢༠༡༧ ཙམ་ནས་མགོ་འཛུགས་ཀྱིས། བོད་པའི་དགེ་འདུན་པ་མང་པོ་ཞིག་དང་ལྷན་དུ་ཞིབ་འཇུག་བྱེད་མུས་ཡིན་ཞིང་། ཨུ་རུ་སུའི་ཚན་རིག་སྡེ་ཚན་དེས་བོད་པའི་དགེ་འདུན་པ་རྣམས་སྨན་ཁང་ངོས་ནས་འདས་གྲོངས་སུ་ཕྱིན་པའི་དཔྱད་འབྲས་སྒྲོག་ཟིན་ནའང་། སྐུ་ཕུང་ཐད་ཀར་བཞུགས་ཐུབ་པ་དང་ཕུང་པོ་རུལ་བའམ་དྲི་ངན་གྱི་མ་འཇུས་པར་ཐུགས་དམ་ཞེས་སྒོམ་གྱི་སྒྲུབ་པར་ཞུགས་ཀྱི་ཡོད་སྟབས། དགེ་འདུན་པ་དེ་དག་གི་ཀླད་པའི་བྱེད་ལས་ལ་ཞིབ་འཇུག་བྱས་ཏེ། ཐུགས་དམ་གྱི་ངང་ཚུལ་ནས་གཟའ་མིག་དམར་སྟེང་བསྐྱོད་ཐུབ་པའི་ནུས་པ་མཐོང་གི་ཡོད་སྐོར་སོགས་བརྗོད་འདུག
དེ་འབྲེལ་རྒྱ་གར་གྱི་ (News 18) གནས་ཚུལ་ནང་། ཨུ་རུ་སུའི་ཚན་རིག་པས་ནང་པའི་ཐུགས་དམ་གྱི་བྱེད་ཐབས་དང་ཐབས་ལམ་གཞན་ཟུང་འབྲེལ་གྱིས། མཁའ་དབྱིངས་སྐོར་བསྐྱོད་ཀྱི་ལས་གཞིར་གཡུར་དུ་སྨིན་པའི་གྲུབ་འབྲས་ཐོབ་པ་དང་། དམིགས་བསལ་ཐུགས་དམ་གྱི་ཐབས་ལམ་ལ་བརྟེན་ནས། མཁའ་དབྱིངས་སྐོར་སྐྱོད་བྱེད་སྐབས་ཚན་རྩལ་གྱི་རྒྱུ་ཆ་ཉུང་ཞིང་ཆོས་ཉིད་ཀྱི་སྒུལ་ཤུགས་ལ་འགོག་རྒོལ་ཆེ་ཆེར་ཐུབ་པ་མ་ཟད། མཁའ་དབྱིངས་ཕུར་སྐྱོད་ཀྱི་གྲུ་གཟིངས་ལ་ཆག་སྐྱོན་དང་མིར་གནོད་སྐྱོན་སོགས་ཀྱི་ཉེན་ཁ་ཧ་ཅང་ཆུང་ཆུང་ཡིན་སྐོར་སོགས་བརྗོད་འདུག
ཨུ་རུ་སུའི་ཚན་རིག་སྡེ་ཁག་དེའི་སྣེ་འཁྲིད་པ་སྐུ་ཞབས་ཡོ་རེ་(Yury Bubeyev) ལགས་ཀྱིས། ང་ཚོས་མཁའ་དབྱིབས་སྐོར་སྐྱོད་ཀྱི་ལས་གཞི་ལེགས་འགྲུབ་ཡོང་བའི་ཐབས་ལམ་ཞིག་འཚོལ་གྱི་ཡོད། ནང་པའི་དགེ་འདུན་པ་ཚོ་དྲན་པ་མ་ཉམས་པར་ཡུན་རིང་བཞུགས་ཐུབ་པ་འདི་ཐབས་ལམ་གཅིག་ཡིན། ཞེས་དང་། དེ་རྗེས་ང་ཚོས་༧གོང་ས་མཆོག་ལ་སྒོམ་སྒྲུབ་ཀྱི་རྟོགས་པ་མཐོ་བའི་བོད་པའི་དགེ་འདུན་པ་རྣམས་ཀྱི་ཀླད་པར་ཞིབ་འཇུག་བྱེད་པའི་གོ་སྐབས་ཤིག་གནང་རོགས་ཞུས་པར། ༧གོང་ས་མཆོག་ནས་ང་ཚོར་ཐུགས་དམ་སྐོར་ལ་ཞིབ་འཇུག་གནང་དགོས་པའི་བཀའ་སློབ་ལམ་སྟོན་གནང་སོང་། ཞེས་བརྗོད་ཡོད་པ་རེད།
ད་སྔ་བར་ཚན་རྩལ་རིག་པའི་ལོ་རྒྱུས་ནང་གཟའ་ཆེན་མིག་དམར་སྟེང་མི་དངོས་སུ་བསྐྱོད་པའི་ཟི་ཐོ་བཀོད་མྱོང་མེད་ཅིང་། འཕྲུག་རིགས་ཀྱི་བྱེད་ཐབས་ལ་བརྟེན་ནས་འཛམ་གླིང་རྒྱལ་ཁབ་ཁག་ཅིག་གཟའ་མིག་དམར་སྟེང་བསྐྱོད་ཡོད་པ་ལྟར། ཕྱི་ལོ་ ༡༩༧༡ ལོར་ཨུ་རུ་སུའི་འཕྲུལ་སྐར་མིག་དམར་གསུམ་པ་ (Mars 3) ཞེས་པ་ཐོག་མར་གཟའ་མིག་དམར་སྟེང་འབབ་ཐུབ་ཡོད་པ་དང་། ཕྱི་ལོ་ ༡༩༧༥ ཨ་རིའི་འཕྲུལ་སྐར་(Viking 1, Viking 2) གཉིས་མཐུད་མར་གཟའ་མིག་དམར་སྟེང་འབབ་ཐུབ། དེ་བཞིན། རྒྱ་གར་དང་རྒྱ་ནག ཉི་ཧོང་དང་ཡུ་རོབ་མཐུན་ཚོགས་སོགས་ནས་གཟའ་མིག་དམར་གྱི་མཐའ་ལ་སྐོར་བསྐྱོད་ཀྱི་ལས་གཞི་མུ་མཐུད་སྤེལ་མུས་ཡིན་པ་རེད་འདུག
གསར་འགོད་པ། སྐལ་བཟང་སྦྱིན་པ།
