༧གོང་ས་མཆོག་དང་འབྲེལ་བའི་གློག་བརྙན་གཉིས་བཟོ་སྐྲུན་གནང་འདུག

འདི་ལོའི་༧གོང་ས་རྒྱལ་བ་རིན་པོ་ཆེ་མཆོག་གི༧སྐུའི་འཁྲུངས་སྐར་གྱི་ཉིན་མོ་དང་བསྟུན་སེམས་ཀྱི་འཕེལ་འགྱུར་ཞེས་པའི་གློག་བརྙན་ཞིག་སེམས་དང་སྲོག་ལྟེ་གནས་ཁང་གི་དྲ་རྒྱ་ www.mindandlife.org ནས་རིན་མེད་ཐོག་གཟིགས་འབུལ་གནང་རྒྱུ་ཡིན་འདུག

སེམས་དང་སྲོག་གི་ལྟེ་གནང་ཁང་གིས་འདི་ལོའི་༧གོང་ས་རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་སྲུང་གཙིའི་ཆེད། ཕྱི་ལོ་ ༢༠༡༩ ལོར་བཞུགས་སྒར་དྷ་སའི་རྒྱལ་བའི་ཕོ་བྲང་ནང་༧གོང་ས་མཆོག་དང་འཕེལ་འགྱུར་སྨྲ་བའི་ཚན་རིག་པ་སྐོར་ཞིག་དབར་གླེང་མོལ་ཞུས་པའི་ལས་རིམ་དེ་ཉིད། སྐར་མ་ ༣༥ ཅན་གྱི་དངོས་བཤུས་གློག་བརྙན་སེམས་ཀྱི་འཕེལ་འགྱུར་ (Evolution of the Heart) ཞེས་པ་ཞིག་ཏུ་ཕབ་སྐྲུན་བྱས་ཏེ། སྐུའི་འཁྲུངས་སྐར་ཉིན་ནས་བཟུང་སེམས་དང་སྲོག་ལྟེ་གནས་ཁང་གི་དྲ་རྒྱ་ www.mindandlife.org ཞེས་པ་ནས་རིན་མེད་ཐོག་གཟིགས་ཐུབ་ཀྱི་ཡོད་འདུག

དངོས་བཤུས་གློག་བརྙན་དེ་ནི་ཕྱི་ལོ་ ༢༠༡༩ ལོའི་ཟླ་ ༡༠ ཚེས་ ༣༠ ཉིན་ཨ་རིའི་སེམས་དང་སྲོག་གི་གོ་སྒྲིག་འོག་༧གོང་ས་མཆོག་དང་། འཕེལ་འགྱུར་སྐྱེ་དངོས་རིག་པ་སྨྲ་བ་སྐུ་ཞབས་ཌེ་ཝིཌ་སི་ལོན་ཝིལ་སོན་ (David Sloan Wilson)ལགས་དང་། སྤྱི་ཚོགས་ཚན་རིག་སྨྲ་བ་པུམ་ལ་གྷོ་བྷོ་ཌོ་མཱ་ཌི་ཀི་ཛེ་ལ་(Pumla Gobodo-Madikizela)ལགས་བཅས་ཀྱི་དབར་བྱམས་བརྩེ་དང་། ཕན་ཚུན་འབྲེལ་བ། འགྱུར་ལྡོག་ཅེས་པའི་བརྗོད་གཞིའི་སྟེང་གླེང་མོལ་གནང་བ་ཞིག་ཡིན་པ་དང་། གླེང་མོལ་གྱི་ལས་རིམ་དེའི་ནང་། ༧གོང་ས་མཆོག་གི་འཛམ་གླིང་སྤྱི་སྨན་གྱི་བཟང་སྤྱོད་ཅེས་པའི་ཐུགས་དགོངས་གཞིར་བཞག་ཐོག མིའི་རིགས་འདི་སྔར་བས་བྱམས་བརྩེ་དང་སྙིང་རྗེ་ལྡན་པ་ཞིག་ཏུ་འཕེལ་འགྱུར་འགྲོ་ཐུབ་མིན་དང་། འཕེལ་འགྱུར་རིག་པའི་ནང་བྱམས་སྙིང་རྗེ་དང་གཞན་ཕན་གྱི་གནད་དོན་ཐོག་དོ་སྣང་ཤུགས་ཆེར་སླེབས་བཞིན་པ་སོགས་ཀྱི་སྐོར་ནས་གླེང་མོལ་ཞུས་ཡོད་པ་རེད།

གཞན་ཡང་། ད་ལྟའི་ཆར་རྒྱལ་སྤྱིའི་ཁྲོམ་རའི་ནང་༧གོང་ས་མཆོག་བཙན་བྱོལ་དུ་ཆིབས་བསྒྱུར་བསྐྱངས་པའི་སྐོར་གྱི་དངོས་བཤུས་གློག་བརྙན་གསར་པ་བོད་ནམ་ཡང་མ་བརྗེད་ (Never Forget Tibet) ཞེས་པ་ཞིག་ཐོན་ཡོད་ཅིང་། ཕྱི་རྒྱལ་གྱི་གློག་བརྙན་སྐོར་གྱི་གནས་ཚུལ་འགོད་སྤེལ་བྱེད་སའི་དྲ་རྒྱ་ www.deadline.com ཞེས་པའི་ནང་གནས་ཚུལ་ཐོན་པ་ལྟར་ན། གློག་བརྙན་དེ་ནི་རྒྱ་གར་གྱི་གསར་འགོད་པ་ལྕམ་རཱ་ནི་སིངྒ་(Rani Singh)ལགས་ཀྱིས་བྲིས་པའི་དཔོན་རིགས་ཤིག་དང་༧གོང་ས་མཆོག་ (An Officer and His Holiness) ཅེས་པའི་དཔེ་དེབ་གཞི་ལ་བཞག་སྟེ། ཕྱི་ལོ་ ༡༩༥༩ ལོར་རྒྱ་ནག་དམར་ཤོག་གཞུང་གིས་བོད་ལ་བཙན་འཛུལ་བྱས་རྐྱེན་༧གོང་ས་མཆོག་རྒྱ་གར་དུ་བཙན་བྱོལ་དུ་ཆིབས་བསྒྱུར་བསྐྱངས་པ་དང་། སྐབས་དེར་རྒྱ་གར་གྱི་དཔོན་རིགས་སྐུ་ཞབས་ཧར་མན་དྷིར་སིངྒ་ (Har Mander Singh) གཙོས་པའི་རྒྱ་གར་གྱི་དམག་མིའི་རུ་ཁག་ཅིག་གིས་༧གོང་ས་མཆོག་རྒྱ་གར་གྱི་ས་མཚམས་སུ་བསུ་མར་སྐྱོད་པའི་སྐོར་གྱི་ལོ་རྒྱུས་དྲན་ཐོ་རང་བཞིན་གྱི་གློག་བརྙན་ཞིག་ཡིན་པ་མ་ཟད། མགོན་པ་ཁོང་ཉིད་ཀྱིས་ཆིབས་བསྒྱུར་དེའི་སྐོར་གློག་བརྙན་ནང་གསུངས་པ་ཐོག་དང་པོ་ཡིན་སྐོར་ཡང་བཀོད་ཡོད་འདུག

དབྱིན་ཇིའི་གློག་བརྙན་འཁྲབ་ཁྲིད་པ་སྐུ་ཞབས་ཇི་ཡན་པཱོལ་མར་ཊི་ནེ་ཛི་(Jean-Paul Mertinez)ལགས་ཀྱིས་ཕབ་སྐྲུན་བྱས་པའི་དངོས་བཤུས་གློག་བརྙན་དེའི་ནང་། ཕྱི་ལོ་ ༡༩༤༦ ལོར་བོད་ཀྱི་རྒྱལ་ས་ལྷ་སར་འབྱོར་བའི་ཨོ་སི་ཊི་རི་ཡ་ (Austria) རྒྱལ་ཁབ་ཀྱི་རི་འཛེག་པ་དང་། བོད་ནང་ལོ་བདུན་ཞེས་པའི་དཔེ་དེབ་ཀྱི་རྩོམ་པ་པོ་སྐུ་ཞབས་ཧེན་རིག་ཧེ་རར་ (Heinrich Harrer) ལགས་ཀྱིས་བརྒྱབ་པའི་པར་རྙིང་དཀོན་གྲས་དང་། ༧གོང་ས་མཆོག་རྒྱ་གར་དུ་བཙན་བྱོལ་དུ་ཕེབས་རིང་མགོན་པོ་ཁོང་ཉིད་དང་སྐབས་དེའི་རྒྱ་གར་གྱི་སྲིད་བློན་ནེ་རུ་མཆོག་དང་། དབྱིན་ཇིའི་སྲིད་བློན་མེག་མི་ལན་ (Macmillan) དབར་བསྐུར་བའི་གསང་བའི་འཕྲིན་ཡིག་དག་ཀྱང་བཅུག་ཡོད་འདུག

དངོས་བཤུས་གློག་བརྙན་འདི་ཉིད་གཞི་འཛིན་སའི་དཔེ་དེབ་དཔོན་རིགས་ཤིག་དང་༧གོང་ས་མཆོག་ཅེས་པ་དེའི་ནང་། ཕྱི་ལོ་ ༡༩༥༩ ལོར་རྒྱ་གར་གྱི་དཔོན་རིགས་ཧར་མན་དྷིར་སིངྒ་ལགས་ཀྱིས་རྒྱ་ནག་གི་བཙན་འཛུལ་ལ་ཉེན་ཡོལ་ཆེད་རྒྱ་གར་ལ་བཙན་བྱོལ་དུ་ཕེབས་བཞིན་པའི་༧གོང་ས་མཆོག་རྒྱ་གར་གྱི་ས་མཚམས་ནས་ཚད་མཐོའི་བདེ་འཇགས་ཀྱི་ཐོག་ནས་བསུ་མ་བྱས་པའི་སྐོར་གྱི་ལོ་རྒྱུས་དོན་རྐྱེན་གཙོར་འདོན་བྱས་ཡོད་ཅིང་། རྩོམ་པ་པོས་ལོ་རྒྱུས་ཀྱི་དོན་རྐྱེན་དེ་དག་སྐུ་ཞབས་ཧར་མན་དྷིར་སིངྒ་གི་ཉིན་ཐོ་གཞིར་བཟུང་སྟེ། གོང་ས་མཆོག་ལ་དངོས་སུ་བཅར་འདྲི་སོགས་བྱས་ཏེ་བྲིས་པ་ཞིག་ཡིན་འདུག དེབ་འདིའི་རྩོམ་པ་པོ་རཱ་ནི་སིངྒ་ནི་སྐུ་ཞབས་ཧར་མན་དྷིར་སིངྒ་གི་ཚ་མོ་ཡིན་འདུག་ལ། ཁོང་མོའི་དེབ་དེ་ཕྱི་ལོ་ ༢༠༡༩ ལོར་པེན་གྷོན་པར་སྐྲུན་ཁང་ (Penguin Random House) གིས་པར་སྐྲུན་འགྲེམ་སྤེལ་བྱས་ཡོད་འདུག

གསར་འགོད་པ། པ་སངས་ཚེ་རིང་།