པདྨ་རིག་འཛིན།
༄༅། །དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གི་ཚན་རིག་དང་ནང་པའི་ལྟ་གྲུབ་བར་བགྲོ་གླེང་ཐེངས་སུམ་ཅུ་ཙམ་གནང་བའི་མཛད་ཆེན་འདིའི་དམིགས་ཡུལ་ནི། ནང་པའི་གཞུང་ནས་བཤད་པའི་གཞི་དངོས་པོའི་རྣམ་གཞག་སྤྱི་དང། རྟེན་འབྲེལ་གྱི་ལྟ་གྲུབ། ཁྱད་པར་ནང་པའི་སེམས་ཁམས་རིག་པ་ལ་བརྟེན་ནས་རྙེད་དོན་ཟབ་མོ་གང་ཡོད་པ་རྣམས་དེང་རབས་ཀྱི་ཚན་རིག་པ་དག་དང་ཕན་ཚུན་བགྲོ་གླེང་ཚུལ་བཞིན་བྱེད་ཐུབ་ཚེ། མཉམ་སྦྲེལ་གྱི་ནུས་པའི་ཐོག་ནས་ཤེས་བྱ་ཡར་རྒྱས་འགྲོ་བ་དང་། དེ་ལ་བརྟེན་ནས་འགྲོ་བ་སྤྱིའི་བདེ་དོན་ལ་སྨན་པའི་ཞབས་འདེགས་རླབས་ཆེན་པོའང་སྒྲུབ་ཐུབ། དེ་བཞིན་ནང་ཆོས་ཀྱི་རྣམ་གཞག་ནས་སེམས་ཀྱི་བདེ་སྐྱིད་ཀྱི་བསླབ་བྱ་ཕར་ལེན་ཐབས་དང། དེང་སྐབས་ཚན་རིག་གི་གྲུབ་དོན་ལས་ལེགས་ཆ་མང་པོ་ཞིག་ཚུར་ལེན་ཐུབ་པའང་འོང་བ་བཅས་ཀྱི་དམིགས་ཡུལ་གཙོ་བོ་གཉིས་སུ་གནས་པར་མཐོང་ཞིང་། རྒྱུ་མཚན་དེ་དག་ལ་བརྟེན་ནས་བློ་གཟུར་བོར་གནས་པའི་ཚན་རིག་མཁས་པ་མང་པོ་ཞིག་ནང་ཆོས་ཀྱི་གནད་འགག་ཤེས་ཐབས་སུ་དོ་སྣང་ཤུགས་ཆེན་བྱེད་ཀྱི་འདུག
ཕྱིའི་ལུས་ལ་བརྟེན་པའི་སྡུག་བསྔལ་སེལ་བར་ཚན་རིག་གིས་ད་བར་ཕན་ཐོགས་ཆེན་པོ་བྱེད་བཞིན་ཡོད་ཀྱང། ནང་སེམས་ཀྱི་དཀའ་སྡུག་བསམ་བློ་གཏོང་སྟངས་ཁོ་ནར་བརྟེན་ནས་གདོང་ལེན་བྱེད་དགོས་སྟབས། མིའི་བྱམས་བརྩེ་སོགས་གོང་མཐོར་གཏོང་རྒྱུ་ནི་མིའི་སྤྱི་ཚོགས་ནང་བདེ་སྐྱིད་ཀྱི་རྩ་་བ་མེད་དུ་མི་རུང་བ་ཞིག་ཡིན། དེ་ལྟར་ཚན་རིག་པས་ནང་པའི་སེམས་ཁམས་རིག་པ་ལ་རྟོག་ཞིབ་དང་། ལྷག་པར་དུ་ཡ་རབས་བཟང་སྤྱོད་ལ་དོ་སྣང་བྱེད་བཞིན་ཡོད། དེ་བཞིན་དུ་སྙིང་རྗེའི་བསམ་པ་སྦྱོང་ཚུལ་སོགས་ལ་དོ་སྣང་བྱེད་པ་ཙམ་དུ་མ་ཟད། ནང་པས་བཤད་པ་དེ་དག་ལ་བློ་སྐྱེད་བླངས་ཏེ། སོ་སོའི་ཚན་རིག་སྡེ་ཚན་གྱི་ཞིབ་འཇུག་སྟེང་དུ་ཁྱེར་བ་སོགས་ཀྱི་སྲོལ་རིམ་ལག་ལེན་དུ་བསྟར་བཞིན་པ་དངོས་མཐོང་ལྟར་ཡིན།
དཔེ་མཚོན་གཅིག་ཞུས་ན། རྩ་བ་ཤེས་རབ་ཀྱི་ཚིག་སྦྱོར་དང། དབུ་མའི་ལྟ་བར་སྦྱང་མ་མྱོང་བ་ཨ་རི་བའི་ཚན་རིག་སྤོ་བོ་རང་ལོ་བརྒྱད་ཅུ་གྱ་ལྔར་སླེབས་པ་དེ། ཁོང་གིས་བསམ་བློ་བཏང་ནས་བརྟག་དཔྱད་བྱས་པ་ན། ང་ཚོར་ཆགས་སྡང་གི་བློ་སྐྱེ་བའི་ཚེ་ཡུལ་དེ་ལ་བཟང་ངན་དུ་རྟོག་པ་ན། བརྒྱ་ཆ་དགུ་བཅུ་ཐམ་པ་ནོར་ཡོད་པ་དེ། ཚུལ་མིན་ཡིད་བྱེད་ཀྱི་རྣམ་རྟོག་གིས་སྒྲོག་བཏགས་པ་རེད་འདུག་ཅེས་ཧ་ཅང་གསལ་པོ་ཞིག་བཤད་སོང། ཆགས་སྡང་གི་བློ་སྐྱེ་ན་དོན་གྱི་ངོ་ནས་གྲུབ་པ་ལྟར་འཛིན་གྱི་ཡོད་པ་རེད། དེ་ཡང་ནང་པའི་ཚན་རིག་པ་འཕགས་པ་ཀླུྲ་སྒྲུབ་དགོངས་པ་དང་མཐུན་པ་དེ་ཡང་དབུ་མ་རྩ་ཤེས་ལས། །ལས་དང་ཉོན་མོངས་རྣམ་རྟོག་ལས། །དེ་དག་སྤྲོས་ལས་སྤྲོས་པ་ནི། །སྟོང་པ་ཉིད་ཀྱིས་འགག་པར་འགྱུར། །དེ་ལྟར་ཆོས་རྣམས་རྟོག་པའི་དབང་གིས་བཞག་པར་གསུངས་པ་བཞིན་སྐབས་འདིར་ཚན་རིག་པས་ཀྱང་རྣམ་རྟོག་ལས་ཆགས་སྡང་སྐྱེ་བ་ཁས་ལེན་པ་དང། ཆགས་སྡང་གི་གཉེན་པོ་སྟོང་ཉིད་ཁས་ལེན་མེད་ཅིང། གང་ལྟར་ཚིག་རྐང་འདི་གསུམ་གྱིས་སྟོང་ཉིད་སྟོན་པའི་དགོས་པ་བསྟན་པ་ཡིན།
ལྷག་པར་དེང་དུས་འཛམ་གླིང་མི་འབོར་དུང་ཕྱུར་བདུན་ཅུའི་ནང་ནས་ཚན་རིག་པ་ཤེས་ཡོན་ཅན་དང། ཆབ་སྲིད་པ། རྒྱལ་སྤྱིའི་མཐོ་སློབ་ཁག་དང། གཞན་ཡང་ཚོགས་པ་ཁག་གིས་༸གོང་ས་མཆོག་ལ་ཛ་དྲག་གི་སྐབས་འདིར་ནང་པའི་སེམས་ཁམས་རིག་པས་འགྲོ་བ་ཡོངས་ལ་སེམས་ཀྱི་བདེ་སྐྱིད་སྤེལ་ཐབས་ཀྱི་སློབ་སྟོན་བཀའ་སློབ་དང་བཅར་འདྲི་སྣ་ཚོགས་ཤིག་དྲྭ་བརྙན་བརྒྱུད་ནས་ཞབས་འདེགས་ཇེ་སྙེད་ཅིག་གནང་དང་གནང་མུས་བཞིན། ༸གོང་ས་མཆོག་གི་མཁས་བཙུན་བཟང་གསུམ་དང། མཁྱེན་བརྩེ་ནུས་གསུམ་གྱི་སྐུ་ཡོན་རྣམས་རྒྱལ་སྤྱིའི་སྡིངས་ཆའི་སྟེང་གཟེངས་སུ་ཐོན་པ་ཡོངས་སུ་གྲགས་པ་དངོས་མཐོང་ལྟར་རེད།
ཆེད་བརྗོད་འདི་མཁས་པ་ཡིན་པའི་དབང་དུ་བྱས་ནས་བྲིས་པའང་མ་ཡིན། དེ་བཞིན་སྡེབ་སྦྱོར་ལེགས་པའང་བདག་ལ་མེད། གང་ལ་ཞེ་ན་རྒྱལ་སྤྱིའི་ནང་ནང་ཆོས་ལ་དོ་སྣང་བྱས་ནས་བོད་མིའི་མངོན་འདོད་ལ་རྒྱབ་སྐྱོར་དཔུང་གྲོགས་བགྱིས་པ་དེ་ལ་དགའ་ཚོར་བརྟས་ནས་བྲིས་པ་ཞིག་ཡིན།
ཆེད་གཏད་དབུ་ཚད་རིགས་པའི་གཞུང་ལུགས་སོགས།།
ཆེས་ཟབ་ནང་པའི་ལྟ་གྲུབ་ཚན་རིག་མཉམ།།
རིགས་པའི་སྲང་ལ་བསྐྱོན་ནས་བགྲོ་གླེང་གིས།།
རྒྱལ་སྤྱིའི་རིགས་པའི་སྡིངས་སྟེང་མཉམ་ལྕོགས་མཛད།།
གཟུར་གནས་མཁས་མཛངས་ཡོངས་ཀྱིས་ངོ་མཚར་བརྟས།།
བཀའ་དྲིན་ཆེའོ་བསྟན་འཛིན་རྒྱ་མཚོ་ལ།།
སྒོ་གསུམ་གུས་པའི་ཡིད་ཀྱིས་ཕྱག་འཚལ་ལོ།། །།
