ཆབ་སྲིད་ཀྱི་འགོ་ཁྲིད་ལ་རང་གི་ལྟ་བ་དང་ལངས་ཕྱོགས་ཡོད་དགོས།

ཤར་ཕྱོགས་ཁུག་རྟ།

ག་བ་གང་ས་ནས་ཁྲོ་བ་དང། བབ་ཆགས་པ་སོགས་རྣམ་པ་ཅི་རིགས་ནས་སྤེན་པ་ཚེ་རིང་གིས་ཆབ་སྲིད་ཐད་ནོར་ལན་ཆེན་པོ་གཉིས་བརྒྱབས་འདུག ཁྱོད་ཀྱིས་དཔྱད་གཏམ་མི་སྤེལ་དོན་ཅི་ཡིན། ད་བྱས་དུས། ཁྱོད་ཀྱི་དཔྱད་གཏམ་སྤེལ་ཡུལ་སྲིད་སྐྱོང་མིན་པར་གང་ཟིག་ཅིག་སྟེ། བློ་བཟང་སེང་གེ་ཁོ་ན་རེད་འདུག་ག་ཞེས་ཚོགས་གཏམ་གཏོང་མཁན་མང་པོ་བྱུང་། དེ་ནི་གཏན་ནས་མ་རེད། སྲིད་སྐྱོང་གསར་པས་༸སྐུའི་ཡང་སྲིད་དང་ཐའེ་ཝན་ཕྱི་སྲིད་ལས་ཁུངས་ཀྱི་འཚམས་ཞུའི་ཐད་ལན་བསྐྱོན་པའི་སྐོར་ལ་ཡུན་རིང་བསམ་བློ་བཏང་པ་ཡིན། དེ་ལ་བརྟེན་ནས་ངས་རྒྱ་བོད་འབྲེལ་མོལ་དང་། ཐའེ་བོད་བར་གྱི་ཡིག་ཚགས་མང་པོར་བསྐྱར་དུའང་བལྟས་པ་ཡིན། ང་ལ་དེའི་ཐད་བསམ་ཚུལ་རྡོག་རྡོག་གཉིས་ཡོད།

༡ སྲིད་སྐྱོང་སྤེན་ཚེས་༸སྐུའི་ཡང་སྲིད་ཆེད་གྲོས་བསྡུར་ཞུ་ཆེད་༸གོང་ས་མཆོག་རྒྱ་ནག་ཏུ་གདན་འདྲེན་ཞུ་དགོས་གསུངས་ཡོད་པའི་དབང་དུ་བཏང་ནའང་། སྐད་ཆ་དེའི་དོན་རྩ་{གྲོས་བསྡུར་}ཡིན་པ་ལས་{ཐག་གཅོད་} མ་རེད། དེ་སྔ་པཎ་ཆེན་རིན་པོ་ཆེའི་ཡང་སྲིད་ཐད་ཀྱང་རང་གཞུང་གིས་རྒྱ་ནག་གཞུང་དང་མཉམ་གྲོས་བསྡུར་གནང་ཡོད། དེ་མ་ཟད། བོད་ཀྱི་དཀའ་ངལ་རྒྱ་ནག་གཞུང་དང་གྲོས་བསྡུར་མ་ཡིན་པའི་ལམ་གཞན་ནས་བསལ་ཐབས་མེད། ༸གོང་ས་མཆོག་པཎ་ཆེན་རིན་པོ་ཆེ་ལྟར་ཆོས་ཕྱོགས་ཀྱི་བླ་ཆེན་ཙམ་མིན་པར། བོད་མི་རིགས་ཀྱི་སེམས་ཀྱི་གཙོ་འཛིན་དང་བླ་སྲོག་གི་ངོ་བོར་གྲུབ་ཡོད་པས། ༸ཁོང་གི་མ་འོངས་པ་ནི་བོད་ཀྱི་མ་འོངས་པ་ཡིན་སྟབས་བོད་རྒྱའི་མ་འོངས་འགྲིག་ཆགས་ཡོང་ཐབས་ཀྱི་གྲོས་བསྡུར་ཞུ་དུས་ཤིག་དངོས་སུ་ཤར་ཚེ། ཡང་ན་{བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་} སྐོར་རྒྱ་ཕྱོགས་ནས་ལྷག་བསམ་ཟོལ་མེད་ཀྱིས་གྲོས་བསྡུར་གནང་སྟེ་དོན་སྨིན་བྱུང་ན། ༸གོང་ས་༸སྐྱབས་མགོན་ཆེན་པོའི་༸སྐུའི་ཡང་སྲིད་ཐད་ཀྱང་ཆབས་ཅིག་གྲོས་བསྡུར་མི་གནང་ཐབས་མེད་ཡིན། ༸གོང་ས་༸སྐྱབས་མགོན་ཆེན་པོའི་སྐུའི་ཡང་སྲིད་དང་བོད་ཀྱི་མ་འོངས་པ་གཉིས་སོ་སོར་བགར་ཐབས་དང་ཁ་བྲལ་བྱེད་ཐབས་གཏན་ནས་མེད་པས་གནད་འགག་ལ་གཟིགས་ཕྱོགས་མ་ནོར་བ་དགོས། བོད་ཀྱི་གནད་དོན་འགྲིག་ཆགས་འབྱུང་རྒྱུར་རྒྱ་ནག་གཞུང་དང་མཉམ་དུ་གྲོས་བསྡུར་མ་ཡིན་པའི་ཐབས་གཞན་ཞིག་གནམ་སའི་བར་དུ་བློ་མིག་ལྡན་པ་ཀུན་གྱིས་དུས་གཅིག་ཏུ་ལོ་བརྒྱར་བཙལ་ཡང་རྙེད་རྒྱུ་མེད་ལ། གྲོས་བསྡུར་བྱེད་པ་དེས། བདག་དབང་སྤྲོད་པ་དང་མགོ་འདོགས་པ་ནམ་ཡང་མཚོན་ཐུབ་མེད། དུས་རབས་ཉེར་གཅིག་པ་འདི་བཞིན་ཞི་བདེ་དང་གྲོས་མོལ་གྱི་དུས་རབས་ཤིག་ཆགས་དགོས་པ་༸གོང་ས་མཆོག་གཙོས་ཚད་ལྡན་དབུ་ཁྲིད་རྣམས་ཀྱི་དགོངས་པ་ཡིན་པས། གྲོས་མོལ་གྲོས་བསྡུར་གྱི་ཐབས་ཚུལ་ནི་གཟེངས་སུ་ཐོན་པར་མི་བརྩི་རང་བརྩི་ཡིན། གྲོས་བསྡུར་གྱི་རིམ་པ་དང་གྲོས་དོན་གཏན་འབེབས་ཀྱི་མཐའ་མའི་ཐག་གཅོད་ཀྱི་བདག་དབང་གཉིས་ནམ་ཡང་དཀྲུག་དཀྲུག་གཏོང་རྒྱུ་མེད། མཉམ་བསྲེས་གནང་རྒྱུ་མེད། མི་མང་རྣམས་དེ་ལྟའི་མགོ་ཉོག་གི་ལམ་དུ་ཁྲིད་མི་རུང་། འཁྲིད་ན་ཤེས་ཡོན་པར་ག་ལ་བརྩི་སྟེ། ཐ་ན་མི་ཚད་ལྡན་ཞིག་ལའང་བརྩི་ཐབས་མེད། གལ་ཆེ་ཤོས་ནི་ཆབ་སྲིད་དཔྱད་གཏམ་སྤེལ་དུས་རྒྱབ་ལྗོངས་སུ་ཀུན་སློང་ཅི་ཞིག་འཁྱེར་མིན་དང་། དམིགས་ཡུལ་གང་ཞིག་ལ་ཁ་གཏད་དེ་གླེང་སློང་ཞུ་མིན་ནི་གང་ཟག་མི་རེ་ངོ་རེར་རག་ལས་པས། ཚང་མར་བསམ་ཚུལ་གཅིག་མཐུན་ཡོང་དགོས་དོན་མེད་ལ། ཡོང་གིའང་མ་རེད། འོན་ཀྱང་རྩ་དོན་ནི་ནམ་ཡང་སྤྱི་པ་བློས་མི་གཏོང་ཞིང་དབུས་སུ་འཇོག་པ་དེ་རེད། དེའི་ཆ་ནས། བཀའ་ལན་འདི་ལ་རྒྱབ་སྐྱོར་ཡོད་མེད་ཀྱི་བསམ་ཚུལ་གཞན་གྱི་བསླུ་བྲིད་མ་ཐེབས་པ་ཚང་མར་གུས་བརྩི་ཡོད། ཡང་གཅིག་བྱས་ན། ༸གོང་ས་༸སྐྱབས་མགོན་ཆེན་པོ་མཆོག་དང་ལྷན་༸སྐུའི་ཡང་སྲིད་ཐད། ད་ལྟའི་གནས་སྟངས་དང་འཚམ་པའི་བྱེད་ཕྱོགས་སྐོར། སྲིད་སྐྱོང་གསར་པར་བཀའ་མོལ་བྱུང་མེད་ཅེས་ང་དང་ང་ལྟ་བུས་ཁ་མཚོན་གཅོད་དཀའ། དེའི་རྐྱེན། དཔྱད་ཞིབ་ཚད་ཐུབ་བསྟེན་རྒྱུ་ལས་གནམ་རྡིབ་སེམས་ཁྲལ་མ་གནང་ན་ཡག

བོད་རྒྱ་འབྲེལ་མོལ་ཐད། ཏིན་ཞའོ་ཕེན་གྱི་དུས་སྐབས་བཟང་པོ་ཤོར་བཅུག་པའི་གྱོང་གུད་ནི་བསབ་ཐབས་མེད་པ་ཞིག་རེད་ཅེས་གུས་ནས་རྟག་ཏུ་དྲན་ཅིང་བཤད་ཀྱི་ཡོད། ཏིན་གྱིས་རྒྱ་ནག་ཁྱོན་ཡོངས་ལ་དེང་རབས་ཅན་དང་མཐུན་པའི་བསྒྱུར་བཅོས་དང། ཕྱི་ཕྱོགས་སྒོ་འབྱེད་བྱས་པ། དམིགས་བསལ་ས་ཁུལ་ཁག་ཅིག་ལ་མའོ་ཙེ་ཏུང་དང་མར་ལེའི་དགོངས་པ་བཞིན་ཕྱིན་ན་མི་མང་གི་འཚོ་བ་ཡར་རྒྱས་ཡོང་དཀའ་བར་གདོང་འཕྲད་སྐབས་སྲིད་བྱུས་གསར་བཟོའི་ལམ་ནས་དངོས་ཐོག་བདེན་འཚོལ་ལ་གཞི་བཅོལ་ཏེ་ལས་དོན་ཐབས་ཚུལ་རྣམས་ཚ་ཚ་འུར་འུར། མགྱོགས་ལ་ཆོད་སེམས་བརྟན་པོས་རྒྱ་ནག་དག་སྒྲིག་བྱས་པའི་ལས་རིམ་ནང་བོད་དོན་ཚུལ་བཞིན་མ་ཚུད་པ་ནི་འགྱོད་པའི་གཞིར་ཟད། རྒྱ་བོད་ཕྱོགས་གཉིས་ཀྱི་འབྲེལ་མོལ་བརྒྱུད་དུས་གཅིག་ལ་ལས་དོན་ཐམས་ཅད་འགྲུབ་དཀའ་པས། འབྲེལ་མོལ་རིམ་བསྟུད་དུ་གནང་དགོས་ལ། འཚམས་འདྲི་དང་གཟིགས་སྐོར། རིག་གཞུང་བརྗེ་རེས་སོགས་གཞིས་བྱེས་འབྲེལ་བ་ཇེ་ལྷུག་ཏུ་གཏོང་རྒྱུ་དུས་ཀྱི་དགོས་མཁོར་གྱུར་ཡོད་ལ། སྔ་འཕྲོས་གཉིས་སྨན་གྲོས་མོལ་ཞིག་མ་བྱུང་ནའང་། ༸གོང་ས་༸སྐྱབས་མགོན་ཆེན་པོ་མཆོག་རི་བོ་རྩེ་ལྔར་གནས་གཟིགས་དང་། རྒྱ་རིགས་དད་ལྡན་མི་མང་ལ་གསུང་ཆོས་སྩོལ་རྒྱུ། གཞིས་ལུས་རྒྱ་ཆེ་མི་མང་ལ་ཆོས་འབྲེལ་མཇལ་ཁ་སྩོལ་རྒྱུ་སོགས་ཀྱི་ཆེད་ངེས་པར་རྒྱ་ནག་དང་བོད་དུ་སང་ཉིན་ལས་དེ་རིང་ཆིབས་བསྒྱུར་གནང་ཐུབ་རྒྱུར་བོད་མི་ཚོས་ནུས་ཤུགས་བཏོན་ཏེ། སྨོན་ལམ་སྐུ་རིམ་ཚུན་རྟག་ཏུ་བསྒྲུབ་དགོས་པ་ཡིན་ལ། ནམ་ཡང་གནད་དོན་གང་རུང་ལ་ཁག་དཀྲིས་ཏེ་རྒྱ་ནག་ཏུ་ཆིབས་བསྒྱུར་གནང་རྒྱུར་བར་ཆད་བྱས་པ་ཡིན་ན། དེ་ལས་ལྷག་པའི་འཐུས་ཤོར་དང་གྱོང་གུད་མེད་པ། འདས་པའི་ལོ་རྒྱུས་ཀྱི་ཉམས་མྱོང་བླངས་ཏེ་ཡིད་གཟབ་དགོས་པ་ཡིན། བོད་ལ་ངེས་དོན་ཤ་ཚས་རྒྱབ་སྐྱོར་གནང་མཁན་གཞུང་དང་གཞུང་འབྲེལ་མིན་པའི་ཚོགས་སྡེ་མི་སྒེར་སོགས་ཅི་རིགས་ཀྱིས་ཀྱང་གནད་འདི་ལ་རྒྱབ་སྐྱོར་གནང་པ་ཡིན་ན། དེ་ལས་ལྷག་པའི་བོད་མི་རིགས་ལ་རྒྱབ་སྐྱོར་ཁ་ཚ་དགོས་གཏུག་ཅིག་མེད་ལ། འཕྲལ་ཕུགས་གང་སར་དགེ་བའི་རྒྱབ་སྐྱོར་གཉིས་པ་མེད་པའང་དེ་ཡིན་པས། ད་ལྟ་བཀའ་ཤག་གསར་པས་ངེས་པར་༸དགོངས་བསྟུན་གྱིས་བཟང་ཐག་ངན་ཐག་ཆོད་པ་ཞིག་གནང་དགོས་པའི་དུས་ལ་བབས་ཡོད་སྙམ།

༢ སྲིད་སྐྱོང་སྤེན་ཚེས་ཐའེ་ཝན་ཕྱི་སྲིད་ཀྱི་འཚམས་འཕྲིན་ལ་གཞུང་འབྲེལ་གྱི་ལན་ཕུལ་མེད་ཅེས་གསུངས་པ་དེ། གཅིག་བྱས་ན་བཅའ་ཁྲིམས་དོན་ཚན་ ༢༠ དགོངས་དོན་འོག ཆབ་སྲིད་དབུ་ཁྲིད་བཀའ་ཤག་ལྷན་འཛོམས་འབྱུང་རྒྱུར་སྒུག་ཡོད་སྲིད། གལ་སྲིད་དེ་ལྟར་མིན་ནའང་། ཐའེ་ཝན་ཕྱི་སྲིད་ལྷན་ཁང་དང་ཐའེ་ཝན་གཞུང་ཞེས་མཚན་འབོད་གནང་པ་ཙམ་གྱིས་རྒྱ་ནག་གཞུང་ལ་ངོ་སྲུང་བྱས་མེད་པ་སྒྲུབ་ཐུབ། གནད་དོན་འདི་ལྟ་བུར་སྲིད་སྐྱོང་ལ་ཆབ་སྲིད་ཀྱི་གཏིང་ཟབ་པའི་རང་གི་ལངས་ཕྱོགས་དང་ཐག་གཅོད་ཡོད་དགོས་ལ། ཡོད་དབང་མི་མང་གིས་ཀྱང་ཕུལ་ཡོད། མི་མང་གི་དགོངས་ཚུལ་རྣམས་རྣམ་པ་ཐམས་ཅད་དུ་བདེན་མིན་ཡོང་བཞིན་པས། འགོ་ཁྲིད་ནི་ཇི་གསུང་བཀའ་སྒྲུབ་ཞུ་མཁན་ལས། སྒྲུབ་ཐུབ་མིན་གྱི་གནད་འགག་མི་མང་ནང་གསལ་དཀྲོལ་གནང་ཐུབ་མཁན་ཞིག་བྱུང་ན་གདེང་རྙེད། ཕུགས་འཁྱོལ་བ་ཞིག་ཡོང་ངེས། མ་གཞི་ནས་ཐའེ་ཝན་མང་གཙོ་ཚོགས་པར་གཞུང་འཛིན་ལ་ཐེངས་ ༢ རྒྱལ་ཁ་ཐོབ་ཟིན། སྲིད་འཛིན་ལྕམ་སྐུ་ཚཱན་ཡེས་ཝུན་མཆོག་དེ་སྔ་སྲིད་འཛིན་མ་གནང་སྔོན་ ༸གོང་ས་མཆོག་ལ་མཇལ་ཟིན། བོད་ཀྱི་སྐོར་རྒྱུས་མངའ་ཆེ་ཡང་། སྲིད་འཛིན་གནང་ནས་ལོ་འདི་དག་གི་རིང་༸གོང་ས་མཆོག་གདན་ཞུའི་སྐད་ཆ་མང་པོ་བྱུང་ཡང་དོན་ཐོག་ཏུ་འཁྱོལ་མེད་ལ། ཐའེ་ཝན་གྱི་བླ་མ་སོགས་མི་སྣ་སྒེར་པས་ཀྱང་༸གོང་ས་མཆོག་ཐའེ་ཝན་དུ་གདན་འདྲེན་ཞུ་རྒྱུར་གཞུང་ནས་རྒྱབ་སྐྱོར་བྱས་མེད། དེ་ལ་བོད་མི་སུ་ཡིན་ཡང་བློ་ཕམ་མེད་པ་ག་ལ་སྲིད། གུས་ནས་དེ་སྔ་ཐའེ་ཝན་ཤེས་རིག་བློན་ཆེན་གཞོན་པ་དང་སྲིད་བློན་ལས་ཁུངས་ཀྱི་མགྲིན་ཚབ་པར་ཐུག་འཕྲད་སྐབས་དེའི་ཐད་ཁ་ཡོད་ལག་ཡོད་ཀྱི་རྒྱབ་སྐྱོར་གནང་དགོས་པའི་རེ་བ་བཏོན་མྱོང་། ལྕམ་ཚཱན་ལགས་སྲིད་འཛིན་ཆགས་ནས་ད་བར་དྲྭ་རྒྱའི་བརྒྱུད་ལམ་ཙམ་ནས་ཀྱང་༸གོང་ས་མཆོག་ལ་མཇལ་ཁ་ཞུས་མེད། མཇལ་འཕྲད་ལ་ཆབ་སྲིད་ཀྱི་ནང་དོན་ངེས་པར་ཡོད་ག་ལ་དགོས། ༸གོང་ས་མཆོག་ནི་རྒྱལ་སྤྱིའི་ནང་མཚན་མཐོང་དང་མཁས་མཛངས་བླ་རུ་འབར་པ་ཞིག་ཡིན་པ་མ་མཁྱེན་པའང་ག་ལ་སྲིད། གནད་དེ་དག་ལ་བསམས་ཚེ། སྲིད་སྐྱོང་གསར་པའི་བཀའ་ལན་དེར་རྒྱབ་ལྗོངས་མེད་པ་དང་ནང་དོན་མེད་པ་ཡིན་མི་སྲིད། དེ་མ་ཟད། མང་གཙོ་ཚོགས་པའི་སྤྱི་ཁྱབ་དྲུང་ཆེ་རྡ་སར་བཅར་སྐབས་གུས་སོགས་མི་སྣ་ཁག་མཇལ་འཛོམས་བྱུང་སྐབས་ད་ལྟའི་སྲིད་སྐྱོང་གསར་པའང་ཡོད་ལ། སྐབས་དེར་ད་ལྟའི་སྲིད་སྐྱོང་དང་ཚོགས་པའི་དྲུང་ཆེ་བར་བཀའ་མོལ་ལྷུག་པོ་བྱུང་ཡོད། དེ་ཉིན་བཀའ་མོལ་ལས་སྲིད་སྐྱོང་གསར་པ་ཐའེ་བོད་འབྲེལ་བའི་བྱུང་རབས་ལ་རྒྱུས་མངའ་གཏིང་ཟབ་ཡོད་པའང་ཚོར་བྱུང་།

རྒྱུ་མཚན་དེ་དག་ལ་བསམས་ཚེ་ཐའེ་ཝན་གཞུང་ལ་གཞུང་འབྲེལ་ལན་འདེབས་ཅི་ལྟར་ཞུ་མིན། མི་མང་གིས་བདམས་པའི་སྲིད་སྐྱོང་གིས་ཐག་གིས་ཆོད་དགོས་པ་རེད་ལ། གཅོད་ཀྱང་དགོས་པ་རེད། དེ་ནི་ཚང་མའི་བསམ་འདུན་དང་མཐུན་པ་ཞིག་ཡོང་དཀའ་སྙམ།

ངའི་རྩོམ་ཡིག་འདི་སྲིད་སྐྱོང་གསར་པའི་གོང་གསལ་ཆབ་སྲིད་ཀྱི་གནད་དོན་གཉིས་དང་འབྲེལ་བའི་བཀའ་ལན་ཐད་དགག་རྒྱག་ཞུ་མཁན་ཚོར་ལན་འདེབས་བྱས་པ་མིན་ལ། མཁྱེན་ལྡན་གཟུར་གནས་ཚོར་གཏམ་གསར་ཞུས་པའང་མིན། སྙིང་དོན་མི་མང་ནང་འུར་འདྲོགས་ལངས་ཚེ་གང་དུ་འགྲོ་དགོས་པ་མ་མཁྱེན་པ་ཚོར་བསམ་གཞིའི་ཆེད་དུ་ཕུལ་བ་ཡིན། དེའི་འབྲས་བུར་ཆབ་སྲིད་དང་འབྲེལ་བའི་གནད་འགག་འདི་རིགས་ལ་ཅལ་འདྲོགས་དང་ཤོག་ཁག་གི་བསམ་ཚུལ་གྱིས་ཚོས་གཞི་མི་བྱུགས་མཁན་ཚོའི་གཡོ་གཏམ་ལས་ཐར་ཆེད་ཡིན། བོད་རྒྱལ་ལོ།།

མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།

                                              ༢༠༢༡ ཟླ་ ༦ ཚེས་ ༢༧ ཉིན།།