མཚོ་ལྷོ་ཁུལ་བྲག་དཀར་རྫོང་གི་རྫོང་དཔོན་འབྲུག་འབུམ་རྒྱལ་གྱིས་རྫོང་ཁོངས་སུ་བོད་མི་རྣམས་ཆོས་ཕྱོགས་ཀྱི་བྱེད་སྒོར་ཞུགས་པར་དམ་དྲག་གི་སྲིད་ཇུས་ལག་བསྟར་མ་བྱས་སྟབས་རྫོང་དཔོན་གྱི་ལས་གནས་ནས་ཕུད་འདུག
ཉེ་ལམ་རྒྱ་ནག་གཞུང་གིས་བོད་མཚོ་ལྷོ་ཁུལ་གསེར་ཆེན་རྫོང་དང་། ཁྲི་ཀ་རྫོང་། བྲག་དཀར་རྫོང་། མང་ར་རྫོང་། འབའ་རྫོང་བཅས་རྫོང་ཁག་ལྔའི་ནང་མང་ཚོགས་རྣམས་སྨྱུང་གནས་ལ་སྡོད་མི་ཆོག་པ་དང་། ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་བྱ་དགོས་པའི་སྲིད་ཇུས་ལག་བསྟར་དགོས་པའི་བཀའ་བསྒྲགས་ཀྱང་། མཚོ་ལྷོ་ཁུལ་བྲག་དཀར་རྫོང་གི་རྫོང་དཔོན་འབྲུག་འབུམ་རྒྱལ་གྱིས། རྫོང་དེའི་ནང་རླུང་རྟ་དང་དར་ལྕོག་སོགས་གཏོར་བཤིག་དང་སྨྱུང་གནས་སྡོད་མི་ཆོག་པའི་སྲིད་ཇུས་ལམ་སེང་ལག་བསྟར་མ་བྱས་སྟབས། རྒྱ་ནག་གཞུང་གིས་ཁོང་གི་རྫོང་དཔོན་གྱི་གོ་གནས་ནས་ཕུད་དེ་ལས་གནས་ཕལ་བ་ཞིག་གཉེར་དུ་བཅུག་ཡོད་ཀྱང་། བོད་ནང་གི་གཞི་རིམ་མང་ཚོགས་ཀྱིས་ཁོང་ཉིད་ལ་དགའ་བསུ་དང་བསྔགས་བརྗོད་བྱེད་ཀྱིན་ཡོད་འདུག
ཁུངས་ལྡན་བོད་ནང་གི་གནས་ཚུལ་མཁོ་སྤྲོད་པ་ཞིག་གིས། མཚོ་ལྷོ་ཁུལ་གྱི་རྫོང་ཁག་དེ་དག་ཁྲོད་ཆོས་ཕྱོགས་དང་འབྲེལ་བའི་བྱེད་སྒོ་ཁག་ལ་བཀག་སྡོམ་དང་། རླུང་རྟ། དར་ལྕོག་སོགས་སྒྲེང་འཛུགས་བྱས་པར་དམ་དྲག དེ་བཞིན་ཁྱིམ་ཚང་སོ་སོའི་རྒྱལ་སྒོར་རྒྱ་ནག་གི་རྒྱལ་དར་སྒྲེང་འཛུགས་དགོས་ལུགས་ཀྱི་བཀའ་ཕབ་ཀྱང་། བྲག་དཀར་རྫོང་གི་དམར་ཤོག་དྲུང་ཆེ་དང་རྫོང་དཔོན་གཅིག་ལྕོགས་འབྲུག་འབུམ་རྒྱལ་ལགས་ཀྱིས། ང་ཚོའི་རྫོང་ནང་སྲིད་ཇུས་དེ་ལམ་སེང་ལག་ལེན་བྱས་ན་མང་ཚོགས་ཁྲོད་ཅི་འབྱུང་མི་ཤེས་པས། རྗེས་ནས་ག་ལེར་ལག་ལེན་བྱེད་ཀྱི་ཡིན་ཞེས་བརྗོད་ནས་སྲིད་ཇུས་དེ་ལག་བསྟར་མ་བྱས་པར་བརྟེན། གོང་རིམ་ནས་དེ་མ་ཐག་ཁོང་གི་གོ་གནས་བླངས་ཏེ། མཚོ་ལྷོ་ཁུལ་དམངས་ཆེན་གྱི་ལས་གནས་ཕལ་བ་ཞིག་ཏུ་ལས་གནས་བརྗེ་བོ་བརྒྱབ་སོང་། ཞེས་བརྗོད་བྱུང་།
ཡང་འབྲེལ་ཡོད་ཀྱིས། ས་གནས་ཀྱི་ཡུལ་མི་དང་བོད་མི་རྣམས་ཀྱིས། འབྲུག་འབུམ་རྒྱལ། བུ་ངར་བ་རེད། བྱ་བ་ཡག་པོ་བསྒྲུབས་སོང་། ཞེས་བསྔགས་བརྗོད་བྱེད་མཁན་མང་པོ་ཞིག་ཡོད་པ་མ་ཟད། ཉེ་ལམ་མཚོ་ལྷོ་ཁུལ་དུ་ཆོས་ཕྱོགས་ཀྱི་བྱེད་སྒོར་ཞུགས་པར་དམ་དྲག་དང་། བདུན་རེའི་རེས་གཟའ་ཟླ་བའི་ཞོགས་པར་རྒྱུན་ལྡན་སྡེ་བ་རེ་རེའི་སྡེ་དམངས་ཨུ་ཡོན་ལྷན་ཁང་གི་ཚོགས་ཁང་དུ། ཁྱིམ་ཚང་རེ་ནས་ཉུང་མཐར་ནང་མི་གཅིག་རེ་རྒྱ་ནག་གི་དར་དམར་སྒྲེང་འཛུགས་ཀྱི་ལས་འགུལ་ཁྲོད་ཞུགས་འཇུག་གི་འདུག ཅེས་བརྗོད་བྱུང་།
སྤྱིར་རྒྱ་ནག་གཞུང་གིས་འདི་ལོའི་ཕྱི་ཟླ ༤ ནང་ཞོང་ཡོན་ལི་ (xiong yuan lai ) ཟེར་བའི་རྒྱ་མི་ཞིག་མཚོ་ལྷོ་བོད་རིགས་རང་སྐྱོང་ཁུལ་གྱི་རྒྱ་ནག་དམར་ཤོག་ཚོགས་པའི་དྲུང་ཆེར་བསྐོས་རྗེས། མཚོ་ལྷོ་བོད་རིགས་རང་སྐྱོང་ཁུལ་གྱི་རྫོང་རིམ་པ་དང་། གྲོང་བརྡལ་རིམ་པ་བྱས་ནས་མ་ཎི་རྡོ་འབུམ་བཤིག་པ། སྒོ་དར་དང་དར་ལྕོག་མེར་བསྲེགས་པ། རྒྱ་ནག་གི་རྒྱལ་དར་སྒྲེང་འཛུགས་བྱས་བཅུག་པ། དེ་བཞིན་བོད་རིགས་ལས་བྱེད་མང་དྲགས་ཡོད་ལུགས་བཤད་ནས་ཕྱིར་ཕུད་བཏང་བ་མ་ཟད། ཕྱོགས་ཡོངས་ནས་དམ་དྲག་ཤུགས་ཆེན་བྱས་སྟབས་བོད་མི་རྣམས་ཀྱི་ལུས་སེམས་གཉིས་ལ་དཀའ་ངལ་ཕྲད་ཡོད།
གཞན་ཡང་རྒྱ་ནག་གཞུང་གིས་ཕྱི་ལོ་ ༢༠༡༢ ཙམ་ནས་རྒྱ་ནག་གི་མགོ་ཁྲིད་ཞི་ཅིན་ཕིན་གྱིས་རྒྱ་ནག་དམར་ཤོག་གི་ལངས་ཕྱོགས་དང་མི་མཐུན་པའི་ལྟ་སྤྱོད་ཅན་དང་། བཙན་བཟུང་འོག་ཡོད་པའི་གྲངས་ཉུང་མི་རིགས་ཁག་གི་དཔོན་རིགས་ཚོར་སྟག་དང་སྦྲང་མ་ལེབ་རྡུང་གི་སྲིད་ཇུས་འོག་ནས། ཞིབ་བཤེར་དང་བཙོན་འཇུག་ཁྲིམས་ཐག་གཅོད་ཀྱིན་ཡོད་པ་མ་ཟད། དབུས་གཞུང་གི་གཏན་འབེབས་དོན་ཚན་བརྒྱད་དང་འགལ་བ། རྒྱལ་ཁབ་ལ་བློ་མི་དཀར་བ། དྲིན་ལན་ལོག་འཇལ། དད་སེམས་ཉམས་པ། ཕུགས་འདུན་བརླག་པ་སོགས་ཀྱི་ཉེས་མིང་བཙུགས་པ། ལྐོག་རྔན་བླངས་བ་དང་ལྐོག་ཟ་རུལ་སུངས་བྱས་པ། སྤྱི་ཚོགས་བརྟན་ལྷིངས་ལ་གནོད་སྐྱོན་བཟོས་པ་དང་རྒྱལ་ཁབ་ཁ་བྲལ་གཏོང་ཐབས་བྱས་པ་ཟེར་བའི་ཉེས་མིང་དེ་དག་དམར་ཤོག་གི་ལྟ་བར་འདོད་མོས་མེད་མཁན་གྱི་ཤེས་ཡོན་པའི་སྡེ་དང་ཁོར་ཡུག་སྲུང་སྐྱོབ་པ། འགྲོ་བ་མིའི་ཐོབ་ཐང་འཐབ་རྩོད་པ་སོགས་ལ་ཉེས་མིང་གཡོགས་ཏེ་ཚར་གཅོད་བྱས་དང་བྱེད་མུས་ཡིན།
འབྲུག་འབུམ་རྒྱལ་ལགས་ནི་ཕྱི་ལོ་ ༡༩༧༣ ལོར་མང་ར་རྫོང་ཐར་ཤུལ་ནས་སྐྱེས་ཤིང་། ཕྱི་ལོ་ ༡༩༩༣ ལོར་མཚོ་སྔོན་སློབ་ཆེན་མཐར་ཕྱིན་པ་ནས་གཞུང་གི་ལས་བྱེད་ནང་ཞུགས་ཏེ། མང་ར་རྫོང་དམངས་ཆེན་གྱི་ལས་བྱེད་དང་རྫོང་སྲིད་གཞུང་གི་ལས་བྱེད། མགོ་མང་གྲོང་བརྡལ་གྱི་མགོ་གཙོ་སོགས་བྱས། ཕྱི་ལོ་ ༢༠༠༩ ལོར་འབའ་རྫོང་གི་རྫོང་དཔོན་གཞོན་པ་དང་། དེའི་རྗེས་བྲག་དཀར་རྫོང་གི་དམར་ཤོག་དྲུང་ཆེ་གཞོན་པ་དང་རྫོང་དཔོན་གཞོན་པ། དེ་ནས་རིམ་པའི་རྫོང་དེའི་དམར་ཤོག་དྲུང་ཆེ་དང་རྫོང་དཔོན་དུ་གྱུར།
གསར་འགོད་པ། དཔལ་ལྡན།
