བལ་ཡུལ་གྱི་བོད་མིའི་གཞིས་ཆགས་ཤིག་ལ་རྒྱ་ནག་གིས་སྐྱོབ་གསོ་སྤྲད་འདུག

བཙན་བྱོལ་བོད་མིའི་གཞིས་ཆགས་སྔ་ཤོས་གྲས་ཡིན་པའི་བལ་ཡུལ་ཕོ་ལེ་བསམ་འཕེལ་གླིང་གཞིས་ཆགས་ལ་རྒྱ་ནག་ཕྱི་འབྲེལ་ལྷན་ཁང་གི་ས་མཚམས་དང་རྒྱ་མཚོའི་ཚན་པས་སྐྱོབ་གསོ་སྤྲད་པ་མི་ཚང་ཁག་ཅིག་གིས་བླངས་ཟིན་པ་དང་ཁག་ཅིག་གིས་ལེན་དགོས་མིན་གྱི་ཐག་མ་ཆོད་པར་ལྷག་ཡོད་པ་རེད།

དེ་རིང་ས་གནས་ཀྱི་འབྲེལ་ཡོད་མི་སྣ་ཞིག་གིས་འདི་གའི་གསར་འགོད་པར་གནས་ཚུལ་མཁོ་སྤྲོད་བྱས་པ་ལྟར་ན། ཉེ་ཆར་རྒྱ་ནག་གཞུང་གིས་བོད་དང་ས་འབྲེལ་ཡིན་པའི་བལ་ཡུལ་བྱང་ཤར་བརྒྱུད་དུ་ཆགས་པའི་ཝ་ལུང་ཁུལ་གྱི་ཕོ་ལེ་བསམ་འཕེལ་གླིང་བོད་མིའི་གཞིས་ཆགས་ནང་སྐམ་ཟས་རིགས་ཀྱི་སྐྱོབ་གསོ་སྤྲད་ཡོད་འདུག

ས་གནས་ཀྱི་བོད་མི་དེས། གཞིས་ཆགས་ཀྱི་བོད་མི་རེ་འགས་རྒྱ་ནག་གཞུང་གི་སྐྱོབ་གསོ་དེ་བླངས་ཟིན་པ་དང་། རེ་འགས་ལེན་དང་མི་ལེན་གྱི་མཚམས་སུ་ལྷག་ཡོད་སྐོར་འགྲེལ་བརྗོད་གནང་སོང་ལ། རྒྱ་ནག་གཞུང་གིས་བསྐུར་བའི་སྐྱོབ་གསོའི་ཤོག་སྒམ་སྟེང་ཝ་ལུང་ཞེས་བཀོད་འདུག་ལ། སྐྱོབ་གསོ་དེ་རྒྱ་ནག་གི་ཕྱི་འབྲེལ་ལྷན་ཁང་གི་ས་མཚམས་དང་རྒྱ་མཚོའི་ལས་དོན་ཚན་པ་ (Department of Boundary and Ocean Affairs) བརྒྱུད་སྤྲད་པ་ཞིག་ཡིན་པ་གསལ་འདུག

སྤྱིར་ཕོ་ལེ་བསམ་འཕེལ་གླིང་བོད་མིའི་གཞིས་སྒར་དེ་ཝ་ལུང་ཁུལ་གྱི་བོད་མི་གཞིས་སྒར་ལྟེ་བ་དེ་ཡིན་ཞིང་། དེ་མིན་ཝ་ལུང་ཁུལ་གྱི་ཡང་དམག་དང་། དགུན་ས། ཐུགས་དམ་སོགས་ས་གནས་བཞིའི་ནང་བོད་མི་ཁ་འཐོར་རེ་ཤས་གནས་སྡོད་བྱེད་ཀྱི་ཡོད་ཅིང་། ཝ་ལུང་ནང་གནས་སྡོད་བོད་མི་རྣམས་བལ་ཡུལ་གྱི་རྒྱལ་ས་ཀ་ཐི་མན་གྲུར་རྟེན་གཞི་བྱས་པའི་བོད་མིའི་སྒྲིག་འཛུགས་ཀྱི་ཁྱབ་ཁོངས་ཤ་ཝ་ར་གསུམ་ས་གནས་མགོ་འཛིན་ལས་ཁུངས་ཀྱི་འཛིན་སྐྱོང་འོག་ཡོད་པ་རེད།

བལ་ཡུལ་གྱི་ཞིང་ཆེན་དང་པོའི་ཏབ་ལེ་ཇུང་ (Taplejung) རྫོང་ཁོངས་སུ་གཏོགས་པའི་ཝ་ལུང་ཞེས་པ་དེ་ནི་བལ་ཡུལ་གྱི་ཆེས་མཐའ་འཁོབ་ས་ཁུལ་ཀྱི་གྲས་ཤིག་ཡིན་ཞིང་། དེའི་བྱང་ཕྱོགས་ནི་བོད་ཀྱི་གཏིང་སྐྱེས་རྫོང་ལ་ཐུག་ཡོད་ཅིང་། ཤར་ཕྱོགས་དེ་འབྲས་ལྗོངས་དང་ས་འབྲེལ་ཆགས་ཡོད། ད་ལྟའི་ཆར་ཝ་ལུང་བར་ལ་རླངས་འཁོར་གྱི་ལམ་ཁ་མེད་པར་བརྟེན། ཏབ་ལེ་ཇུང་རྫོང་ཐོག་ནས་ཉིན་གྲངས་ ༣ ནས་ ༤ བར་རྐང་ཐང་དུ་འགྲོ་དགོས་ཀྱི་ཡོད་པ་རེད། དེ་བཞིན་ཝ་ལུང་དེ་བོད་དང་ས་འབྲེལ་ཡིན་པའི་ཆ་ནས་བཟའ་འབྲུ་ལ་སོགས་པའི་དགོས་ངེས་ཅན་གྱི་དངོས་རིགས་ཕལ་ཆེ་བ་བོད་ནས་འབྱོར་གྱི་ཡོད་འདུག

བོད་མིའི་སྒྲིག་འཛུགས་ཀྱི་དྲ་བའི་སྟེང་བཀོད་པའི་གནས་ཚུལ་ལྟར་ན། ཕོ་ལེ་བསམ་འཕེལ་གླིང་བོད་མིའི་གཞིས་སྒར་དེ་ཉིད་ཕྱི་ལོ་ ༡༩༦༧ ལོར་གསར་འཛུགས་བྱས་པ་ཞིག་དང་། དེ་སྔ་གཞིས་ཆགས་ནང་བོད་པའི་སློབ་གྲྭ་ཞིག་ཡོད་ནའང་ལོ་ཤས་གོང་སློབ་གྲྭ་དེ་སྒོ་བརྒྱབ་ཟིན་པར་བརྟེན། བོད་ཕྲུག་རྣམས་རྒྱ་གར་དང་བལ་ཡུལ་དུ་ཡོད་པའི་བོད་པའི་སློབ་གྲྭ་ཁག་ཏུ་གཏོང་གི་ཡོད་འདུག འཚོ་ཐབས་ཀྱི་ཕྱོགས་ནས་སྐྱེས་པ་ཚོ་དབྱར་ཁ་བོད་ནང་ཚོང་རྒྱག་པར་འགྲོ་བ་དང་རི་འཛེག་པ་ཚོའི་ཅ་ལག་དབོར་འདྲེན་བྱེད་པ་སོགས་ཀྱི་ཚོང་ལས་ཙག་ཙིག་གཉེར་ནས་སྡོད་ཀྱི་ཡོད་འདུག

འདི་འབྲེལ་གྱི་གསལ་བཤད་ལ་གཟིགས་རོགས། https://tibettimes.net/2021/08/03/214245/

གསར་འགོད་པ། པ་སངས་ཚེ་རིང་།