རྒྱ་ནག་གཞུང་གིས་ཁྲིམས་ཀྱི་ཉེས་འགེལ་གང་ཡང་འགྲེལ་བརྗོད་མ་བྱས་པར་བོད་ནང་གི་དགེ་འདུན་པ་བཞི་ལ་ལོ་ ༥ ནས་ ༢༠ བར་གྱི་བཙོན་འཇུག་ཁྲིམས་ཐག་བཅད་ཡོད་འདུག
ཁ་སང་ཨ་རིའི་གྲོང་ཁྱེར་ནེའུ་ཡོག་ཏུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས་ཤོག་ངོས་ ༦༩ ལྡན་པའི་བོད་དོན་སྐོར་གྱི་སྙན་ཐོ་ཞིག་འདོན་སྤེལ་བྱས་པའི་ནང་། ཕྱི་ལོ་ ༢༠༡༩ ལོའི་ཟླ་ ༩ ཚེས་ ༤ ཉིན་གྱི་མཚན་མོར་རྒྱ་གཞུང་ཉེན་རྟོག་པས། བོད་རང་སྐྱོང་ལྗོངས་ཟེར་བའི་གཞིས་རྩེ་གྲོང་ཁྱེར་དིང་རི་རྫོང་རྒྱལ་ནོར་བྲག་ནག་གྲོང་ཚོ་དང་བཀྲ་ཤིས་སྟེང་འགྲོ་དགོན་པ་གཉིས་ལ་གློ་བུར་དུ་མཚན་མོ་ཞིག་ལ་སྔོག་བཤེར་བྱས་ཏེ། སྐྱ་སེར་གཉིས་ལ་གང་བྱུང་བཅར་རྡུང་བྱས་ཤིང་མི་གྲངས་ཁྱོན་ ༢༠ ཙམ་འཛིན་བཟུང་བྱས་ཡོད་པའི་ཁྲོད། ཕྱི་ལོ་ ༢༠༢༠ ཟླ་ ༩ ནང་གཞིས་ཀ་རྩེ་མི་དམངས་འབྲིང་རིམ་ཁྲིམས་ཟེར་བས། གྲྭ་ཆོས་རྒྱལ་དབང་པོ་ལགས་སུ་ལོ་ ༢༠ བཙོན་འཇུག་དང་གྲྭ་བློ་བཟང་སྦྱིན་པ་ལགས་སུ་ལོ་ ༡༩། དེ་བཞིན་ནོར་བུ་དོན་འགྲུབ་ལགས་སུ་ ༡༥ བཙོན་འཇུག གྲྭ་ངག་དབང་ཡེ་ཤེས་ལགས་སུ་ལོ་ ༥ ཡི་བརྩོན་འཇུག་ཁྲིམས་ཐག་བཅད་ཡོད་པ་རེད་ལ། ད་ལྟ་ཁོང་ཚོ་གཞིས་ཀ་རྩེའི་ཉེ་འཁྲིས་ཀྱི་ཉ་རི་བཙོན་ཁང་དུ་བཙོན་འཇུག་བྱས་ཡོད་འདུག
འགྲོ་བ་མིའི་ཐོབ་ཐང་ལྟ་ཞིབ་ཁང་གི་སྙན་ཐོ་ལྟར་ན། ཕྱི་ལོ་ ༢༠༡༩ ལོར་འཛིན་བཟུང་བྱས་པའི་མི་ཕལ་ཆེ་བ་བཀྲ་ཤིས་སྟེང་འགྲོ་དགོན་པའི་དགེ་འདུན་པ་ཡིན་ཞིང་། ཁོ་ཚོ་འཛིན་བཟུང་བྱེད་དོན་ནི་བཀྲ་ཤིས་སྟེང་འགྲོ་དགོན་པས་བལ་ཡུལ་ནང་དགོན་པ་ཞིག་བཙུགས་པ་དང་། གྲྭ་ཆོས་རྒྱལ་དབང་པོ་ལགས་ནས་དགོན་པའི་མིང་ཐོག་ནས་ཕྱི་ལོ་ ༢༠༡༥ ལོར་བལ་ཡུལ་གྱི་ས་འགུལ་སྐབས་རོགས་དངུལ་བཏང་སྟེ། བལ་ཡུལ་ནང་གི་དགོན་པ་དེ་དང་བོད་མི་ཚོར་རོགས་སྐྱོར་བྱས་པས་ཡིན་པ་རེད།
དེ་ཡང་། ཕྱི་ལོ་ ༢༠༡༩ ལོར་གྲྭ་ཆོས་རྒྱལ་དབང་པོ་ལགས་ལྷ་སར་ཕྱིན་སྐབས། རང་ཉིད་ཀྱི་ལག་ཐོགས་ཁ་པར་ཚུགས་ཇ་ཁང་ཞིག་ནས་ལྷག་པ་དང་། ཇ་ཁང་གི་སྦྱིན་བདག་གིས་ཁ་པར་ཉེན་རྟོག་པར་རྩིས་སྤྲད་པར་བརྟེན། ལྷ་ས་ཉེན་རྟོག་པས་གྲྭ་ཆོས་རྒྱལ་དབང་པོ་ལགས་ཀྱི་ཁ་པར་ལ་ཞིབ་བཤེར་བྱས་སྐབས། གྲྭ་དབང་པོ་ལགས་ནས་བལ་ཡུལ་དུ་གནས་སྡོད་དིང་རི་ཕྱོགས་ཀྱི་བོད་མི་ཁག་ཅིག་ལྷན་དུ་འབྲེལ་འདྲིས་བྱུང་བའི་འཕྲིན་ཐུང་དང་༧གོང་ས་མཆོག་གི་སྐུ་པར་རམ་ཡང་ན་བཀའ་སློབ་སོགས་ཡོད་པ་ཤེས་པས། གྲྭ་དབང་པོ་ལགས་དེ་མ་ཐག་འཛིན་བཟུང་བྱས་ཤིང་། ཉེན་རྟོག་རུ་ཁག་ཅིག་རྩ་འཛུགས་ཀྱིས། དིང་རི་ཕྱོགས་སུ་བསྐྱོད་དེ་མཚན་གཅིག་ལ་བཀྲ་ཤིས་སྟེང་འགྲོ་དགོན་པ་དང་བྲག་ནག་གྲོང་ཚོ་གཉིས་ལ་ཧོབ་འཛུལ་གྱིས། དགོན་གྲོང་གཉིས་ཀྱི་མི་མང་ལ་གང་བྱུང་བཅར་རྡུང་དང་མི་གྲངས་ཉི་ཤུ་ཙམ་འཛིན་བཟུང་བྱས་ཡོད་པ་རེད།
ཡང་སྙན་ཐོའི་ནང་། གང་བྱུང་རྡུང་རྡེག་དང་འཛིན་བཟུང་གི་རྗེས་ནས། རྒྱ་ནག་གིས་བཀྲ་ཤིས་སྟེང་འགྲོ་དགོན་པ་དང་བྲག་ནག་གྲོང་ཚོའི་སེར་སྐྱ་གཉིས་ལ་ཆབ་སྲིད་སློབ་གསོ་ཟེར་བའི་འོག ཕྱོགས་ཡོངས་ནས་ས་ཁུལ་དེའི་མི་མང་གི་ཉིན་རེའི་འཚོ་གནས་རང་དབང་སོགས་བཀག་སྡོམ་དྲག་པོ་བྱས་པར་བརྟེན། རྒྱ་ནག་གིས་དགོན་གྲོང་གཉིས་ལ་ཧོབ་འཛུལ་བྱས་པའི་ཉིན་གསུམ་པར་བཀྲ་ཤིས་སྟེང་འགྲོ་དགོན་པའི་གྲྭ་བློ་བཟང་བཟོད་པ་ལགས་ནས་རང་སྲོག་བཅད་དེ་རྒྱ་ནག་ལ་ངོ་རྒོལ་བྱས་ཡོད་ཅིང་། རྒྱ་ནག་གིས་དེ་མ་བྲག་ནག་གྲོང་ཚོའི་དྲ་ལམ་ཡོངས་བཀག་སྡོམ་བྱས་ཡོད་སྐོར་སོགས་བཀོད་འདུག
འགྲོ་བ་མིའི་ཐོབ་ཐང་ལྟ་ཞིབ་ཁང་གི་སྙན་ཐོ་ལྟར་ན། རྒྱ་ནག་གིས་བོད་མི་གྲངས་ ༢༠ ཙམ་འཛིན་བཟུང་བྱས་པའི་ཁྲོད་རང་ལོ་ ༥༠ ཡིན་པའི་གྲྭ་ངག་དབང་བསམ་གཏན་དང་ལོ་ ༣༦ ཡིན་པའི་གྲྭ་བློ་བཟང་། དེ་བཞིན་རང་ལོ་ ༤༣ ཡིན་པའི་གྲྭ་ཉི་མ་བསྟན་འཛིན་བཅས་མི་གསུམ་དིང་རི་གྲོང་ཚོའི་ཉེ་འགྲམ་ཞིག་ཏུ་ཟླ་འགའི་རིང་ཁྲིམས་ཞིབ་མ་བྱས་པར་བཀའ་ཉར་འོག་བཞག་ཡོད་པ་དང་། ཕྱིས་སུ་ཁོ་ཚོས་རྒྱ་ནག་གི་ཆབ་སྲིད་འགལ་རིགས་ཟེར་བ་གཏན་ནས་མི་བྱེད་པའི་ཁས་བླངས་རྗེས་ཀློད་གྲོལ་བཏང་ཡོད་ཀྱང་། ཕྱིར་བཀྲ་ཤིས་སྟེང་འགྲོ་དགོན་པར་ཞུགས་མི་ཆོག་པར་བཟོས་ཡོད་འདུག
རྒྱལ་སྤྱིའི་འགྲོ་བ་མིའི་ཐོབ་ཐང་ལྟ་ཞིབ་ཁང་གིས། ད་རེས་བཀྲ་ཤིས་སྟེང་འགྲོ་དགོན་པའི་གྲྭ་བ་གསུམ་ལ་ནག་ཉེས་སོགས་ཀྱི་རྒྱུ་མཚན་འགྲེལ་བརྗོད་གང་ཡང་མེད་པར་དུས་ཡུན་ལོ་མང་རིང་བཙོན་འཇུག་ཁྲིམས་ཐག་བཅད་པ་དེ་ནི་ཁྲིམས་འགལ་ཡིན་པ་དང་ད་སྔ་བར་བྱུང་མ་མྱོང་བ་ཞིག་ཡིན་པར་ངོས་འཛིན་བྱེད་ཀྱི་འདུག་ལ། འགྲོ་བ་མིའི་ཐོབ་ཐང་ལྟ་ཞིབ་ཁང་གི་རྒྱ་ནག་ཚན་པའི་འགན་འཛིན་སའོ་ཧྥེ་རེ་ཆཱ་ཌི་ལགས་ཀྱིས། རྒྱ་ནག་གཞུང་གིས་བོད་ཀྱི་དགེ་འདུན་པ་དང་བཙུན་མ་རྣམས་ནི་སྲིད་གཞུང་མགོ་རྟིང་སློག་པ་དང་ས་མཚམས་བདེ་འཇགས་སོགས་ལ་ཉེན་ཁ་བསྐྲུན་མཁན་ཡིན་པར་ངོས་འཛིན་གྱིས། དྲ་ལམ་གྱི་འབྲེལ་ལམ་དང་ཆོས་ཀྱི་སྦྱིན་པ་གཏོང་མི་ཆོག་པ་སོགས་བློ་ཡུལ་ལ་མི་ཤོང་བའི་འགལ་འཛོལ་གྱི་ཁྲིམས་ཤིག་སྐྱེད་བསྲིང་གཏོང་གི་ཡོད། ཅེས་བརྗོད་ཡོད་པ་རེད།
གསར་འགོད་པ། སྐལ་བཟང་སྦྱིན་པ།