བོད་རིགས་སློབ་མ་ ༤༠ ལ་དགའ་ལྡན་ཕོ་བྲང་གི་མཐོ་རིམ་སློབ་ཡོན་ཐོབ།

ཏཱ་ལའི་བླ་མའི་དགའ་ལྡན་ཕོ་བྲང་དགེ་རྩ་ཚོགས་པ་ནས་སྙན་གྲགས་ཅན་གྱི་གཙུག་ལག་སློབ་ཆེན་ཁག་ཅིག་ནང་སློབ་གཉེར་བྱེད་བཞིན་པའི་བོད་རིགས་སློབ་མ་གྲངས་ ༤༠ ལ་འདི་ལོའི་དགའ་ལྡན་ཕོ་བྲང་གི་མཐོ་རིམ་སློབ་ཡོན་གནང་འདུག

ཟླ་འདིའི་ཕྱི་ཚེས་ ༧  གྱི་ཉིན་ཏཱ་ལའི་བླ་མའི་དགེ་རྩ་ཚོགས་པ་ནས་གསལ་བསྒྲགས་གནང་བ་ལྟར་ན། འཛམ་གླིང་ནང་སྙན་གྲགས་ཆེ་བའི་གཙུག་ལག་སློབ་ཆེན་ཁག་གི་ནང་སློབ་གཉེར་བྱེད་མཁན་བོད་རིགས་སློབ་མ་ ༤༠ ལ་ཕྱི་ལོ་༢༠༢༡ ལོའི་ཏྰ་ལའི་བླ་མའི་མཐོ་རིམ་སློབ་ཡོན་ཐོབ་ཡོད་འདུག་ལ། དགའ་ལྡན་ཕོ་བྲང་གི་སློབ་ཡོན་དེ་ནི་ཆེད་སྦྱོང་གཙུག་ལག་རབ་འབྱམས་པ་དང་། འབུམ་རམས་པའི་སློབ་གཉེར་བ་རྣམས་ལ་གཅོ་བོར་དམིགས་ཏེ།  རྩིས་རིག་དང་། ཀླད་པའི་ཚན་རིག   ཆབ་སྲིད་དང་ཁྲིམས་ལུགས། ཁོར་ཡུག་སོགས་ཀྱི་ཐོག་ནས་ཆེད་ལས་སློབ་སྦྱོང་ཐོན་ཐབས་དང་། སྤྱི་ཡོངས་ནས་བོད་མིའི་ནུས་པ་གོང་འཕེལ་དུ་གཏོང་ཆེད་གནང་གི་ཡོད་འདུག

བོད་རིགས་སློབ་མ་དེ་དག་ནི་སྙན་གྲགས་ཅན་གྱི་ཧར་ཝར་ཌི་གཙུག་ལག་སློབ་ཆེན་དང་། ནེའུ་ཡོག་གཙུག་ལག་སློབ་ཆེན།  སི་ཊན་ཧྥོར་ཌི་གཙུག་ལག་སློབ་ཆེན་(Stanford University)། ཀ་ལི་ཧྥོར་ནི་ཡ་གཙུག་ལག་སློབ་ཆེན། ཀོ་ལིམ་བྷི་ཡ་གཙུག་ལག་སློབ་ཆེན། ཐའེ་ཝན་ནང་ཡོད་པའི་སིན་ཀཱ་ཞིབ་འཇུག་ཁང་ (Academia Sinca)། ཁ་ན་ཌིའི་ནང་ཡོད་པའི་མེག་གྷིལ་གཙུག་ལག་སློབ་ཆེན(McGill University)། དབྱིན་ཡུལ་གྱི་ཨོག་སི་ཧྥོར་ཌི་གཙུག་ལག་སློབ་ཆེན། ཅེག་སྤྱི་མཐུན་རྒྱལ་ཁབ་ནང་ཡོད་པའི་ལྷོ་བྷོ་ཧེ་མི་ཡ་(University of South Bohemia)བཅས་ནས་ཡིན་འདུག

དགའ་ལྡན་ཕོ་བྲང་གི་མཐོ་རིམ་སློབ་ཡོན་དེ་ནི་༧གོང་ས་སྐྱབས་མགོན་ཆེན་པོ་མཆོག་གི་བཀའ་དགོངས་བཞིན། ཕྱི་ལོ་ ༢༠༡༡ ལོར་ཏཱ་ལའི་བླ་མའི་དགའ་ལྡན་ཕོ་བྲང་གི་དགེ་རྩ་ནས་མགོ་འཛུགས་གནང་ཞིང་།  ད་ལྟ་བར་དུ་སློབ་ཚན་བྱེ་བྲག་པའི་ཐོག་གྲུབ་འབྲས་འབུར་ཐོན་དང་། སློབ་ཡོན་ཐོག་དཀའ་ངལ་ཅན་གྱི་བོད་རིགས་སློབ་མ་ ༢༠༠ ཙམ་ལ་ཉུང་མཐར་ཨ་སྒོར་ས་ཡ་ ༢.༣ ལྷག་གི་འགྲོ་གྲོན་བཏང་ཟིན་ཡོད་འདུག

སྤྱིར་ཏྰ་ལའི་བླ་མའི་དགེ་རྩ་ཚོགས་པ་ནི། ༧གོང་ས་སྐྱབས་ཆེན་པོ་མཆོག་གིས་གཞི་རྩའི་འགྲོ་བ་མིའི་རིན་ཐང་དང་། ཆོས་ལུགས་མཐུན་སྒྲིལ། ཞི་བདེ་དང་། འཚེ་མེད་ཞི་བ། ཁོར་ཡུག་སྲུང་སྐྱོབ་སོགས་ལ་གཙོ་བོར་དམིགས་ནས་བཙུགས་པ་ཞིག་ཡིན་ཞིང་། ཚོགས་པ་དེས་བོད་ཀྱི་ཆོས་རིག་ལ་སྲུང་སྐྱོབ་དང་བོད་མིར་རོགས་སྐྱོར། དེ་བཞིན་མི་རིགས་དང་ཆོས་ལུགས།  སྐྱེས་ཁུངས་སོགས་ལ་དབྱེ་བ་མེད་པར་མཁོ་ངེས་ཅན་ཚོར་རོགས་སྐྱོར་ཆེན་པོ་གནང་མུས་ཡིན་པ་རེད།

དཔལ་ལྡན།