བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་ཏོག་དབྱིབས་ནད་གཞི་ཕོག་པའི་མི་གྲངས་ ༡༨༢ བྱུང་ཡོད་པ་དང་། ནད་པ་ལོ་ན་ཆུང་ཤོས་ལོ་གཅིག་དང་མི་ ༣ རྐྱེན་འདས་སུ་ཕྱིན་ཡོད་འདུག
ཁ་སང་བོད་མིའི་སྒྲིག་འཛུགས་ཀྱི་ཏོག་དབྱིབས་གཉན་རིམས་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༦༩ པའི་ཐོག་ཚོགས་ཆུང་གི་ཚོགས་གཙོ་འཕྲོད་བསྟེན་དྲུང་ཆེ་དཔལ་ལྡན་དོན་འགྲུབ་ལགས་ཀྱིས། ནད་རླབས་གསུམ་པའི་ཆེད་དུ་ས་གནས་སོ་སོའི་མི་འབོར་ལ་དཔག་པའི་སྔོན་འགོག་གི་གྲ་སྒྲིག་དང་སྨན་བཅོས་ཀྱི་གྲ་སྒྲིག་གི་ཆེད་དུ་ཅ་དངོས་གང་དགོས་པ་དེའི་ཐོ་གཞུང་དང་འགྲོ་སོང་ག་ཚོད་ཕྱིན་ཡོད་པ་དེ་གཏོང་དགོས་པ་ཞུས་པ་ལྟར། ས་གནས་མང་ཆེ་བས་ཐོ་གཞུང་གནང་བ་ལྟར་ས་གནས་སོ་སོར་མཐུན་རྐྱེན་སྦྱར་ཟིན་པ་ཡིན། དེ་རིང་སླར་ཡང་ས་ཁུལ་ཡོངས་རྫོགས་ཀྱི་ས་གནས་མགོ་འཛིན་དང་སྨན་ཁང་འགན་འཛིན་ཚང་མ་ལ་ནད་རླབས་གསུམ་པ་མ་བསླེབ་གོང་དུ་ས་གནས་སོ་སོར་སྔོན་འགོག་གི་མཐུན་རྐྱེན་གང་དགོས་པ་ད་ལྟ་ནས་གཟིགས་ཏེ་ཉོ་རོགས་གནང་། ས་གནས་སོ་སོའི་ཏོག་དབྱིབས་ལས་དོན་ཚོགས་ཆུང་གིས་འགན་འཁྱེར་བའི་ཐོག་ནས་སྔོན་འགོག་འཐུས་ཚང་བ་བྱས་ནས་ནད་རླབས་གསུམ་པ་ས་གནས་ལ་མ་བསླེབས་པའི་འབད་བརྩོན་གནང་རོགས། གལ་ཏེ་ནད་རླབས་གསུམ་པ་བསླེབས་པ་ཡིན་ན་རྒྱ་ཁྱབ་ཏུ་མ་ཕྱིན་པའི་འབད་བརྩོན་གནང་རོགས་གནང་ཞེས་འབོད་སྐུལ་ཞུ་ཡི་ཡིན། ནད་རླབས་གསུམ་པ་མ་བསླེབ་གོང་དུ་བོད་མིའི་སྒྲིག་འཛུགས་ཀྱི་ངོས་ནས་སྨན་བཅོས་དང་སྔོན་འགོག་གི་མཐུན་རྐྱེན་ཆ་ཚང་བསྐྲུན་གནང་ཡོད། བོད་མིའི་སྒྲིག་འཛུགས་དང་ཏོག་དབྱིབས་གཉན་རིམས་ ༡༩ ལས་དོན་ཚོགས་ཆུང་གི་ཚོགས་གཙོའི་མིང་ཐོག་ནས་ཕྱི་རྒྱལ་དུ་བཞུགས་མཁན་བོད་རིགས་སྤུན་ཟླ་ཚང་མར་དམིགས་བསལ་གྱིས་ཐུགས་རྗེ་ཆེ་ཞུ་ཡི་ཡིན། རྣམ་པ་ཚོའི་ངོས་ནས་རྒྱ་གར་དང་བལ་ཡུལ་ནང་དཀའ་ངལ་ཆེན་པོ་བྱུང་བའི་སྐབས་སུ་ཕྱག་དངུལ་བཏང་སྟེ་ནང་མི་སོ་སོའི་དཔལ་འབྱོར་གྱི་གནས་སྟངས་ལ་དཀའ་ངལ་འཕྲད་མ་བྱུང་། གལ་ཏེ་རྣམ་པ་ཚོས་རོགས་རམ་གནང་མེད་ཚེ་བོད་མིའི་སྒྲིག་འཛུགས་ཀྱི་ངོས་ནས་ད་ལྟ་ཡོད་པའི་དངུལ་ཆ་ཚང་བཏང་རུང་གདང་གི་མེད་པའི་གནས་སྟངས་ཆགས་ཀྱི་ཡོད་པར་བརྟེན། ཛ་དྲག་གི་གནས་སྟངས་སྐབས་སུ་ཕྱི་རྒྱལ་དུ་ཡོད་པའི་བོད་རིགས་སྤུན་ཟླ་ཚོས་ཕྱག་རོགས་གནང་བར་ཐུགས་རྗེ་ཆེ་ཞུ་ཡི་ཡིན། དེ་བཞིན་ས་གནས་མགོ་འཛིན་ལས་ཁུངས་དང་སྨན་ཁང་ལ་ཐད་ཀར་རོགས་རམ་གནང་མཁན་ཚང་མར་ཐུགས་རྗེ་གནང་ཞུ་འདོད་བྱུང་། ཞེས་བརྗོད་སོང་།
དེ་ནས་སྨན་པ་མཚམས་གཅོད་ལགས་ཀྱིས། བདུན་ཕྲག་འདིའི་ནང་རྒྱ་གར་ནང་དུ་ས་གནས་གྲངས་ ༡༡ དང་བལ་ཡུལ་ནང་དུ་ས་གནས་གྲངས་ ༤ ལ་རང་ཁྱིམ་དུ་ཟུར་བཀག་ལ་བཞུགས་པའི་མི་གྲངས་ ༣༦༣ དང་ཚོགས་སྡེའི་ཟུར་བཀག་ནང་བཞུགས་པའི་མི་གྲངས་ ༣༦༤ ཆགས་ཀྱི་འདུག གསོ་རིག་ལུས་སེམས་ནུས་གསོའི་སྨན་དེ་ད་ལྟ་བར་དུ་སྟོང་ཕྲག་ ༣༨།༧༣༦ བགོ་འགྲེམས་ཞུས་འདུག ལོ་ ༤ ནས་ ༡༨ བར་གྱི་བྱིས་པ་ ༡༣༣༠ ཙམ་ལ་གསོ་རིག་ལུས་སེམས་ནུས་གསོའི་སྨན་བགོ་འགྲེམས་ཞུས་ཐུབ་པ་བྱུང་འདུག བདུན་ཕྲག་འདིའི་ནང་རྒྱ་གར་གྱི་ས་གནས་གྲངས་ ༡༡། བལ་ཡུལ་གྱི་ས་གནས་གྲངས་ ༢ ལ་མི་གྲངས་ ༧༩༢ བརྟག་དཔྱད་བྱས་འདུག བདུན་ཕྲག་འདིའི་ནང་ཏོག་དབྱིབས་གཉན་རིམས་ནད་གཞི་ཕོག་པའི་མི་གྲངས་ ༦༣ ལ་འབྲེལ་བ་བྱས་པའི་ཐོག་ནས་སེམས་ཁམས་འཕྲོད་བསྟེན་གྱི་སློབ་གསོ་གནང་ཐུབ་པ་བྱུང་འདུག རྒྱ་གར་ནང་གི་མི་གྲངས་སྟོང་ཕྲག་ ༢༨།༣༧༨ ལ་འགོག་ཁབ་དང་པོ་ཐོབ་ཡོད་པ་དང་མི་གྲངས་ ༢༠།༢༣༩ ལ་འགོག་ཁབ་གཉིས་པ་ཐོབ་འདུག བལ་ཡུལ་ནང་དུ་བརྒྱ་ཆ་ ༩།༤༤ ལ་འགོག་ཁབ་དང་པོ་ཐོབ་ཡོད་པ་དང་བརྒྱ་ཆ་ ༡༢།༩༤ ལ་འགོག་ཁབ་གཉིས་པ་ཐོབ་འདུག བདུན་ཕྲག་འདིའི་ནང་རྒྱ་གར་དང་བལ་ཡུལ་ནང་ནད་གཞི་ཕོག་པའི་མི་གྲངས་ ༡༨༢ བྱུང་ཡོད་པ་དང་། འདིའི་ནང་ནས་སྐྱེས་པ་གྲངས་ ༩༡ དང་བུད་མེད་གྲངས་ ༩༡། ལོ་ན་མཐོ་ཤོས་ ༩༡ ཡིན་པ་དང་ལོ་ན་ཆུང་ཤོས་བྱིས་པ་ལོ་གཅིག་ཆགས་ཀྱི་འདུག བདུན་ཕྲག་འདིའི་ནང་རྐྱེན་འདས་སུ་ཕྱིན་པའི་མི་གྲངས་ ༣ འདུག ཅེས་བརྗོད་སོང་།
མཐར་སྨན་པ་བསྟན་འཛིན་བརྩོན་འགྲུས་ལགས་ཀྱིས། ད་ལྟའི་ཆར་རྒྱ་གར་ནང་དུ་འདས་པའི་ཆུ་ཚོད་ ༢༤ ནང་ཏོག་དབྱིབས་ནད་གཞི་གསར་པ་ཕོག་པའི་མི་གྲངས་སྟོང་ཕྲག་ ༤༡།༣༨༣ ཆགས་ཀྱི་འདུག དེར་བརྟེན་རྣམ་པ་ཚོས་མུ་མཐུད་གཟབ་གཟབ་གནང་རོགས་གནང་ཞེས་འབོད་སྐུལ་ཞུ་ཡི་ཡིན། ད་ལྟའི་ཆར་འགོག་ཁབ་གཉིས་ཀ་བརྒྱབ་ཚར་ཡིན་ཟེར་ནསཕྱི་ལོགས་ལ་འགྲོ་བའི་སྐབས་སུ་ཁ་རས་མ་གྱོན་པ་དང་བར་ཐག་མ་བཞག་པའི་དཀའ་ངལ་འཕྲད་དེ་སྣང་མེད་བཏང་སྟེ་འཐུས་ཤོར་ཕྱིན་གྱི་ཡོད་རེད་བསམ་གྱི་འདུག དེ་བཞིན་ང་ཚོའི་འཚོ་བའི་གནས་སྟངས་ལ་བརྟེན་ནས་ཕྱི་ལ་འགྲིམ་འགྲུལ་བྱེད་དགོས་པའི་གནས་སྟངས་ཆགས་ཀྱི་ཡོད་པ་རེད། འདིའི་རྐྱེན་གྱིས་ཕྱི་ནས་གཞིས་ཆགས་ལ་ལོག་གི་ཡོད་ན་ཉིན་ལྔ་ཟུར་བཀག་ལ་བཞུགས་ནས་བརྟག་དཔྱད་བྱ་དགོས་རྒྱུ་དེ་གལ་ཆེན་པོ་རེད་འདུག ནད་རྟགས་ཡོད་པའི་སྐབས་སུ་ཆམ་པ་རེད་བསམ་ནས་སྣང་མེད་བཏང་བ་ཡིན་ན་འདིས་སྤྱི་ཚོགས་ལ་དཀའ་ངལ་ཆེན་པོ་བཟོ་ཡི་འདུག དེར་བརྟེན་རྣམ་པ་ཚོས་རང་ངོས་ནས་སྔོན་ནས་བརྟག་དཔྱད་བྱས་ན་གཞིས་ཆགས་དང་མང་ཚོགས་ལ་མ་ཁྱབ་པའི་དགེ་མཚན་འདུག གལ་ཏེ་རང་ཉིད་ལ་ནད་རྟགས་ཡོད་ན་ཆང་ས་ལ་གདན་འདྲེན་ཞུ་བའི་སྐབས་སུ་མ་ཕེབས་རོགས་གནང་། འགོག་ཁབ་གཉིས་བརྒྱབ་ཚར་རུང་སྔོན་འགོག་ཐབས་ལམ་རྣམས་མུ་མཐུད་ལག་བསྟར་གནང་རོགས་གནང་། ད་ལྟ་བར་དུ་གནས་སྟངས་བཟང་པོ་ཆགས་ཡོད་རུང་སོ་སོའི་ངོས་ནས་འཐུས་ཤོར་མ་ཕྱིན་པའི་འབད་བརྩོན་གནང་རོགས་གནང་ཞེས་འབོད་སྐུལ་ཞུ་ཡི་ཡིན། ཞེས་ལམ་སྟོན་གནང་འདུག
རྒྱ་གར་དང་བལ་ཡུལ་ནང་བོད་མི་ཏོག་ནད་ཅན་ ༥༥༣༨ དང་དྲག་སྐྱེད་སོང་བའི་མི་གྲངས་ ༥༠༢༢། རྐྱེན་འདས་སུ་ཕྱིན་པའི་མི་གྲངས་ ༡༣༥། ནད་མནར་བཞིན་པ་ ༣༨༡ འདུག ཕྱི་རྒྱལ་དུ་བོད་མི་ཏོག་ནད་ཅན་ ༢༡༣ དང་དྲག་སྐྱེད་སོང་བའི་མི་གྲངས་ ༡༦༥། རྐྱེན་འདས་སུ་ཕྱིན་པའི་མི་གྲངས་ ༩ ། ནད་མནར་བཞིན་པ་ ༣༩ བྱུང་འདུག
གསར་འགོད་པ། བསྟན་འཛིན་ཕུར་བུ།
ས་གནས་དང་དེར་ནད་པའི་ཁ་གྲངས་ཀ་སོགས་གསལ་ཆ་མེད་པར་ཆར་ཅན་དེ་འདྲ་བཤད་སྡད་པ་ནི་སུན་སྣང་སྐྱེ་རོགས་མ་རེད་བ།