སྐུ་བཅར་རྣམ་རྒྱལ་གྲྭ་ཚང་གི་ཆོས་ཚོགས་ཀྱིས་ཨ་རིའི་གྲོང་ཁྱེར་ཨེ་ཐེ་ཀའི་ནང་འགྲོ་བ་མིའི་གཞི་རྩའི་རིན་ཐང་གོང་མཐོར་དམིགས་པའི་༧རྒྱལ་བ་རིན་པོ་ཆེའི་དཔེ་མཛོད་དང་འགྲེམས་སྟོན་ཁང་ཞིག་གསར་རྒྱག་གནང་གི་ཡོད་པ་རེད།
ཕྱི་ལོ་ ༢༠༡༦ ཡས་མས་ཙམ་ནས་ཨ་རིའི་མངའ་སྡེ་ནེའུ་ཡོག་གི་གྲོང་ཁྱེར་ཨེ་ཐེ་ཀར་རྟེན་གཞི་བྱས་པའི་སྐུ་བཅར་རྣམ་རྒྱལ་གྲྭ་ཚང་གི་ཆོས་ཚོགས་ཀྱིས། བྱམས་བརྩེ་དང་བཟོད་པ། འདོད་ཆུང་ཆོག་ཤེས་སོགས་ཡ་རབས་བཟང་སྤྱོད་ཀྱི་བརྗོད་སྙིང་གཙོ་བོར་བཟུང་སྟེ་མིའི་རིགས་ཀྱི་གཞི་རྩའི་རིན་ཐང་གོང་མཐོར་དམིགས་པའི་༧རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོ་མཆོག་གི་དཔེ་མཛོད་དང་ཤེས་ཡོན་བསྟི་གནས་ཁང་ཞིག་གསར་བསྐྲུན་གནང་རྒྱུའི་ལས་འཆར་གསལ་བསྒྲགས་བསྐྱངས་ཡོད་པ་ལྟར། ཉེ་སྔོན་ཕྱི་ཟླ་ ༧ ཚེས་ ༦ ཉིན་༧གོང་ས་མཆོག་གི་སྐུའི་འཁྲུངས་སྐར་ཉིན་དང་བསྟུན། ༧རྒྱལ་བའི་དཔེ་མཛོད་དང་ཤེས་ཡོན་བསྟི་གནས་ཁང་གི་ལས་འཆར་དེར་ཨ་སྒོར་ས་ཡ་ ༥ ཡི་གྲོན་འཆར་མཁོ་ཡི་ཡོད་པའི་གསལ་བསྒྲགས་བསྐྱངས་ཏེ། ད་ལྟའི་ཆར་ལས་འཆར་དེའི་སླད་ཞལ་འདེབས་ཁྱོན་ཨ་སྒོར་ས་ཡ་གཉིས་དང་ཕྱེད་ཀ་ཙམ་བསྡུ་རུབ་ཐུབ་ཡོད་པ་རེད།
ཁ་སང་ཨ་རིའི་ (EIN Presswire) གསར་ཁང་གིས་སྤེལ་བའི་གནས་ཚུལ་ནང་། འགྲོ་བ་མིའི་རིགས་ཀྱི་གཞི་རྩར་སྨན་པའི་རྣམ་རྒྱལ་གྲྭ་ཚང་གི་ལས་གཞི་དེ་ནི་༧གོང་ས་རྒྱལ་བ་རིན་པོ་ཆེ་མཆོག་ནས་འཛམ་གླིང་གི་ཤེས་བྱ་རིག་པའི་གནས་ལ་མཛད་རྗེས་དཔག་མེད་དུ་བསྐྱངས་ཡོད་པའི་གནས་བབ་རྒྱ་སྐྱེད་དང་། བོད་ཀྱི་རྒྱལ་རབས་ལོ་རྒྱུས་དང་མི་རིགས། སྐད་ཡིག་དང་རྩོམ་རིག སྒྱུ་རྩལ་དང་རྣམ་ཐར། དེ་བཞིན་བཟོ་བཀོད་ཀྱི་རིག་གནས་སོགས་སྲུང་སྐྱོབ་གནང་བར་དམིགས་པ་ཞིག་ཡིན་པ་མ་ཟད། དམིགས་བསལ་༧གོང་ས་སྐུ་ཕྲེང་བཞི་བ་༧རྒྱལ་དབང་བསྟན་འཛིན་རྒྱ་མཚོ་མཆོག་དང་༧གོང་ས་སྐུ་ཕྲེང་རིམ་བྱོན་གྱི་མཛད་རྣམ་ཉར་ཚགས་གནང་རྒྱུ་ཡིན་སྐོར་སོགས་བརྗོད་འདུག
དེ་འབྲེལ་གནས་ཚུལ་ནང་། གྲོང་ཁྱེར་ཨི་ཐེ་ཀའི་རྣམ་རྒྱལ་གྲྭ་ཚང་གི་ཆོས་ཚོགས་ཀྱི་འགན་འཛིན་བསྟན་འཛིན་ཆོས་བཟང་ལགས་ཀྱིས། ང་ཚོས་འགྲོ་བ་མིའི་བདེ་རྩར་སྨན་པའི་༧རྒྱལ་མཆོག་སྐུ་ཕྲེང་བཅུ་བཞི་བ་ཆེན་པོ་མཆོག་གི་དཔེ་མཛོད་དང་ཤེས་ཡོན་བསྟི་གནས་ཁང་གསར་རྒྱག་སླད་རྒྱབ་སྐྱོར་སློང་གི་ཡོད། ཅེས་བརྗོད་ཡོད་པ་དང་། ༧རྒྱལ་བའི་ཤེས་ཡོན་བསྟི་གནས་ཁང་དེས། རིགས་རིས་ལ་ཁྱད་མེད་ཀྱིས་འགྲོ་བ་མིའི་གཞི་རྩའི་རིན་ཐང་གོང་མཐོར་སྨིན་སླད་བྱམས་སྙིང་རྗེ་དང་ཞི་བདེ་སྙིང་བོར་བཟུང་བའི་དྲ་ཐོག་དང་ཡུལ་དངོས་ནས་སྒོམ་སྒྲུབ་དང་ཟབ་སྦྱོང་། འཆད་འཁྲིད་སོགས་ཀྱི་ལས་རིམ་སྒྲིག་སྟེ་འཛམ་གླིང་མི་མང་ཡོངས་ལ་ཕན་བདེ་བསྐྲུན་ཐབས་བྱ་རྒྱུ་ཡིན་པ་དང་། དམིགས་བསལ་༧གོང་ས་མཆོག་ནས་ནམ་རྒྱུན་ང་ཚོ་འགྲོ་བ་མི་ཐེར་འབུམ་བདུན་གཅིག་ལ་གཅིག་བརྟེན་ཡིན་པའི་ངེས་ཤེས་རྙེད་པའི་ཐོག་ནས་འཛམ་གླིང་གི་དཀའ་ངལ་སེལ་དགོས་གསུངས་པའི་བཀའ་སློབ་ཀྱི་དགོངས་པ་རྒྱ་སྐྱེད་གཏོང་འཆར་ཡོད་འདུག
དཔེ་མཛོད་དང་འགྲེམས་སྟོན་ཁང་གསར་རྒྱག་གི་ལས་གཞི་དེར་༧སྐུ་སྒེར་ཡིག་ཚང་ནས་ཨ་སྒོར་ས་ཡ་ ༡།༣ ཞལ་འདེབས་གནང་ཡོད་པ་དང་། ད་སྔ་བར་མི་མང་སྟོང་ཕོད་ཅན་མང་དག་ཅིག་གིས་ཁྱོན་ཨ་སྒོར་ས་ཡ་ ༡།༢ ཀྱི་ཞལ་འདེབས་ཕུལ་ཡོད་འདུག་ལ། ལས་གཞི་དེར་སྤྱི་ཡོངས་ནས་ཨ་སྒོར་ས་ཡ ༡༣ གྱི་འགྲོ་གྲོན་གཏོང་འཆར་ཡོད་པ་དང་། ལས་གཞིའི་ཆེད་ཨ་སྒོར་ ༡༠༠༠༠ དང་ཡང་ན་དེ་ལས་བརྒལ་བའི་ཞལ་འདེབས་གནང་མཁན་བྱུང་ཚེ། ལས་གཞི་གྲུབ་རྗེས་ཚེ་གང་རིན་མེད་ཀྱིས་ནང་འཛུལ་དང་དེ་མིན་གྱི་དགོས་མཁོའི་མཐུན་རྐྱེན་ཡང་གནང་འཆར་ཡོད་པ་དང་། ད་རེས་ཀྱི་ཞལ་འདེབས་བསྡུ་སློང་དེ་ནི་དཔེ་མཛོད་དང་ཤེས་ཡོན་བསྟི་གནས་ཁང་ཁོ་ནའི་གྲོན་འཆར་ཡིན་པ་དང་། འགྲེམས་སྟོན་ཁང་གི་འགྲོ་གྲོན་སླད་ཁྱོན་ཨ་སྒོར་ས་ཡ་ ༡༠ ཙམ་གནས་ཀྱི་ཡོད་འདུག
ལས་གཞི་དེ་ནི་དྷ་སར་ཡོད་པའི་སྐུ་བཅར་རྣམ་རྒྱལ་གྲྭ་ཚང་མ་དགོན་དང་ཨི་ཐི་ཀ་ཆོས་ཚོགས་གཉིས་བར་གྲོས་བསྡུར་གནང་བ་དང་། ༧གོང་ས་རྒྱལ་བ་རིན་པོ་ཆེ་མཆོག་ལ་སྙན་སེང་ཞུས་པ་བརྒྱུད་གསར་རྒྱག་གི་ལས་འཆར་སྒྲིག་རྗེས། ཕྱི་ལོ་༢༠༡༦ ཟླ་༤ ཚེས་༢༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ཤེས་ཡོན་ལྟེ་གནས་ཁང་གསར་པ་དེར་ཏཱ་ལའི་བླ་མའི་དཔེ་མཛོད་དང་འགྲེམས་སྟོན་ཁང་ཞེས་མཚན་གསོལ་གནང་ཡོད་འདུག
གཞན་ཡང་སྐུ་བཅར་རྣམ་རྒྱལ་གྲྭ་ཚང་གི་ཨི་ཐི་ཀའི་དུས་འཁོར་ཆོས་གླིང་ནི། ཕྱི་ལོ་ ༡༩༩༢ ལོར་༧གོང་ས་རྒྱལ་བ་རིན་པོ་ཆེ་མཆོག་དང་རྒྱ་གར་ནང་རྟེན་གཞི་བྱས་པའི་མ་དགོན་རྣམ་རྒྱལ་གྲྭ་ཚང་གཉིས་ཀྱི་སློབ་སྟོན་འོག རྒྱ་གར་ནང་གསུང་ཆོས་ཞུ་བར་བཅར་མི་ཐུབ་པའི་ནུབ་ཕྱོགས་པའི་དད་ལྡན་སྐྱེ་བོ་རྣམས་ཀྱི་ཆེད་དུ་དམིགས་ནས་བཙུགས་ཡོད་ཅིང་། ཡུལ་དེའི་དད་ལྡན་དོན་གཉེར་ཅན་རྣམས་ཀྱི་ཆེད་དུ་རྣམ་རྒྱལ་གྲྭ་ཚང་གི་མདོ་སྔགས་སློབ་མཐར་ཕྱིན་པའི་དགེ་འདུན་པ་བཞི་ཆེད་གཏོང་གིས་སློབ་འཁྲིད་གནང་བཞིན་ཡོད་འདུག་ལ། ཕྱི་ལོ་ ༢༠༠༤ དང་ ༢༠༠༦ བསྟུད་མར་དུས་འཁོར་ཆོས་གླིང་རྒྱ་སྐྱེད་ཀྱིས། ཐོག་མའི་དམིགས་འདུན་བཞིན་བོད་ཀྱི་གནའ་བོའི་བཟོ་བཀོད་ལྡན་པའི་ཆོས་སྒར་ཞིག་ཏུ་བསྒྱུར་ཐུབ་ཡོད་འདུག
གསར་འགོད་པ། སྐལ་བཟང་སྦྱིན་པ།
ཏཱ་ལའི་བླ་མའི་དཔེ་མཛོད་དང་འགྲེམས་སྟོན་ཁང་། Wonderful!!! Thanks.:)