ད་ནི་བསྙེན་བཀུར་སྤངས།

གཙང་པ་དུར་ཁུང་།

ད་ནས་ཡར་བརྩིས་པའི་ལོ་ངོ་བཅུ་ཕྲག་གཅིག་གི་གོང་སྟེ། ཕྱི་ལོ་ ༢༠༡༡ ལོར་༸གོང་ས་མཆོག་གི་སྲིད་ཕྱོགས་ཀྱི་མཛད་འགན་བཤོལ་ནས་སྐུ་དབང་མང་གཙོའི་ཀ་བ་གསུམ་ལ་ཆ་བགོས་གནང་བ་དང་། སྔར་དང་མི་འདྲ་བར་འཛིན་སྐྱོང་བཀའ་ཤག་གི་སྣེ་ཁྲིད་ཆ་ཚང་བྱེད་དགོས་པའི་བཀའ་ཁྲི་མི་མང་གིས་ཐད་ཀར་འོས་འདེམས་ཞུས་པ་བཅས་མ་འོངས་ཕུགས་རྒྱང་རིང་བའི་དགོངས་གཞི་ལ་དགའ་དད་སྤྲོ་གསུམ་གྱི་ངང་ནས་བཀའ་དྲིན་རྗེས་དྲན་ཞུ།

འོན་ཀྱང་སྐབས་དེ་ནས་བཟུང་། བཀྲ་ཤིས་སྣ་ནག་མ་དང་ལྷན་ཅིག་ཅེས་པའི་དཔེ་ལྟར། ང་ཚོ་བཙན་བྱོལ་སྤྱི་ཚོགས་འདི་ཡོ་ལང་གི་འཁྲུག་ཆ་ཧ་ཅང་དོད། མཇུག་འབྲས་ངན་པ་རྣམས་མུ་མཐུད་ཐོན་མུས་མཆིས། འདས་པའི་མི་ལེགས་པའི་གནས་ཚུལ་ངོས་འཛིན་ཐོག་ནས་རང་རང་སོ་སོས་ལག་ལེན་བསྟར་ནས་ལེགས་བཅོས་རེ་འོང་ཨེ་ཐུབ་བལྟ། དེ་ནི་ཁ་བཤད་ཆུ་ཡི་ལྦུ་བ། ལག་ལེན་གསེར་གྱི་ཐིགས་པ། ཞེས་པ་ལྟར་རེད། ངས་འདས་པའི་ལོ་ངོ་དེ་དག་ནང་ཧ་ཅང་ཐལ་ཆ་ཆེ་བའི་མི་ལེགས་པའི་གནས་ཚུལ་ཁག་གསུམ་མཐོང་། དེ་ནི་ན་གཞོན་རྣམས་ཀྱི་བསམ་བློ་གཏོང་ཕྱོགས་དང་། བཅའ་ཁྲིམས་ལ་བརྩི་བཀུར་བྲལ་བ། ཆོལ་ཁའི་ཕྱོགས་ལྷུང་བཅས་ཡིན།

གོང་གི་གནས་དོན་གསུམ་པོ་དེར་ཞིབ་ཏུ་བསམས་ན། བོད་སྡེ་པ་གཞུང་གི་བརྒྱུད་འཛིན་བཙན་བྱོལ་སྒྲིག་འཛུགས་འདི་གཏོར་བཤིག་གཏོང་མི་ཐུབ་ཀྱང་། སྤྱི་ལོ་ ༡༩༦༠ ཟླ་ ༢ ཚེས་ ༣ ཉིན་གནས་མཆོག་རྡོ་རྗེ་གདན་དུ་བཞག་པའི་ཆོལ་ཁ་གསུམ་ཆིག་སྒྲིལ་བྱེད་རྒྱུའི་མནའ་གན་མཐུ་མོ་ཆེ་ཐལ་བའི་རྡུལ་དུ་བརླག་པའི་སྟ་གོན་ལ་གཞོལ་ཞིང་འདུག

དེར་ཡིད་མ་ཆེས་ན་ཁྱིམ་མཚེས་བལ་ཡུལ་རྒྱལ་ཁབ་ནས་རྒྱ་གར་དང་། ཐའེ་ཝན། ཨོ་སི་ཀྲོ་ལི་ཡ། ཡོ་རོབ། ཁེ་ན་ཊ། ཨ་རི་བཅས་ཀྱི་རང་རིགས་ལ་ཁྲ་ཆུང་སྤྱན་གྱིས་གཟིགས་དང་། སྤྱན་གྱིས་མ་བསྙབ་ན། དར་ལུང་རྣ་བས་རིང་པོ་ནས་གསོན། ཆོལ་ཁ་མི་མཐུན་ཚེ་སེམས་ཐག་ཉེ་བའི་སྐད་ཆ་མི་ཤོད་ལ། ལྷག་པར་བོད་དོན་ཆབ་སྲིད་ཐོག་དེ་བས་ཀྱང་བགྲོ་གླེང་དང་བསམ་ཚུལ་བརྗེ་རེས་ཀྱི་གོ་སྐབས་ཚང་མ་འགག་འདུག  སྤྱི་པའི་ཆབ་སྲིད་དང་འབྲེལ་བའི་ལས་འགུལ་སྤེལ་སྟངས་རེར་རྩོད་རྙོག་གི་འདམ་རྫབ་ནང་ཐེངས་རེ་མཆོངས་འགྲོ།  ༸གོང་ས་མཆོག་དང་བོད་མིའི་སྒྲིག་འཛུགས་ཀྱིས་དགྲ་བོ་རྒྱ་དམར་ལ་ཡང་མེར་ཚིག་མེར་གཏུག་གྲོས་མོལ་ཐོག་ནས་ཞི་འགྲིག་ཐུབ་པའི་ཐུགས་རེ་རྩེ་གཅིག་བཅངས་ཡོད་ཀྱང་། ང་ཚོའི་ཁ་ཐབས་ནི་ནང་ཁུལ་གཅིག་གིས་གཅིག་ལ་འཛེམས་གཟོན་བྱས་ཏེ། སྐྱིད་ཀྱི་རྟ་ཕོ་མཉམ་བཞོན་མི་བྱེད་ལ། སྡུག་གི་འཁུར་པོ་ཡང་མཉམ་འཁུར་མི་བྱེད།

གནས་སྟངས་དེ་ལྟ་བུར་གྱར་བ་ནི། དགྲ་བོས་ཆེད་དུ་དཀྲུགས་མི་དགོས་པར་འདས་པའི་ལོ་ངོ་བཅུ་ཕྲག་ནང་ང་ཚོའི་དབུ་ཁྲིད་ཚོས་བསྟན་པ་འགོ་ནས་བཤིགས་ཤིང་། དེའི་གཤམ་དུ་རང་ཉིད་མཁས་དབང་དང་བསམ་བློ་བར་རློམས་པའི་དང་བླང་གི་དྲ་དཔོན་འགའ་དང་། ཁྱི་འཁྱམས་བཞིན་ཉིན་མཚན་ལྟོས་མེད་འདུར་རྒྱུག་གིས་དཀྲོག་གཏམ་སྤེལ་བའི་ཀླད་སྟོང་ལས་མེད་འགའ་ཞིག་བཅས་ལ་འགན་ཡོད། སྐབས་དེ་ཤེད་ནས་ད་བར་འགྲོ་བ་སེམས་ཅན་ཐམས་ཅད་ཀྱི་དོན་བྱེད་པར་ཁས་བླངས་པའི་དགེ་འདུན་པས་རང་ཉིད་ཀྱི་སེམས་བསྐྱེད་བཞིན། ཆར་པ་ཆུ་གྲོགས་དང་ཉི་མ་མེ་གྲོགས་སུ་འགྱུར་བ་མཛད་ནས་རབ་བྱུང་གི་མཚན་དོན་མཚུངས་པའི་ཞི་དུལ་བག་ཡོད་ངང་སྣུམ་བགས་ཅན་གྱི་མཛད་པ་ཞིག་བསྐྱངས་དགོས་ཀྱང་། ལས་མ་དག་པ་ངའི་ཆུ་ལྦུར་མིག་ལ་སྣང་བ་ནི། དགེ་འདུན་པ་མང་པོ་ཞིག་སྲིད་སྤྱིའི་འོས་ལ་ཆོལ་ཁའི་ཞེན་ཁོག་དབང་དུ་ཐེ་ཚོམ་དང་ནེམ་ནུར་སྤུ་ཙམ་མེད་པ་ཐལ་ཚུབ་འཁྱིལ་ལེར་ཕེབས་རྐྱང་གནང་སྟེ། སྤྱི་ཚོགས་དུམ་བུ་ནས་དུམ་བུར་འགྲོ་བའི་ལམ་དུ་དངོས་ཤུགས་བརྒྱུད་གསུམ་ནས་ནན་གྱིས་ཞུགས་སོང་། ད་དུང་མཛད་པ་འགའ་ཞིག་འཇིག་རྟེན་ཁྱིམ་པའི་སྐྱེ་བོ་ལས་ཧ་ཅང་ཐབས་རྡུགས།

གྲོས་ཚོགས་ར་བའི་ནང་ཆོས་ལུགས་སྤྱི་མཐུས་རྣམས་ཀྱི་བྱ་སྤྱོད་ལ་གཟིགས་དང་། གྲོས་ཚོགས་འཐུས་མི་བཞི་བཅུ་ཞེ་ལྔ་ནས་ཁོ་ཚོ་ལས་མ་རབས་དང་། རང་ཤེད། ཆོལ་ཞེན་ཆེ་བ་སུ་ཞིག་འདུག གནས་དུས་གང་དུ་ཡང་སྤྱི་དོན་དཀྲུགས་ཤིང་། རྒྱལ་བའི་དགོངས་པ་དང་མི་མཐུན་པའི་ཕྱོགས་ཁོ་ནར་གཞོལ། གལ་ཏེ་གྲོས་ཚོགས་ནང་ཁ་མ་གཤིན་པར་གྱུར་ཡོད་ཚེ། དེའི་མི་མཐུན་པའི་ཕྱོགས་སམ་ལམ་ནོར་དུ་ཁྲིད་མཁན་གཏེ་དཔོན་ཆོས་བརྒྱུད་སྤྱི་མཐུས་ཡིན་པ་གཏན་ཁེལ། མི་སྡེ་ཡར་རྒྱས་གཏོང་བའི་ཆབ་སྲིད་ལ་སོགས་ཀྱི་བསམ་ཚུལ་འདོན་པའི་སློབ་སྦྱོང་མེད་པར་བརྟེན། ཅང་མི་སྨྲ་བར་སྡོད་མ་ཚུགས་པར་འཁྲུག་སློང་གི་སྣེ་ཞིག་བྱུང་མ་ཐག་གོ་སྐབས་བླ་མེད་དུ་བསམས་ཏེ། ཤི་འཐམ་རོ་འཐམ་བྱེད་པ་ཆོས་ལུགས་སྤྱི་མཐུས་རྣམས་ལ་ཡུན་རིང་ནས་འཇགས་པའི་ངན་གཤིས་ཤིག་རེད། ད་སྐབས་ཀྱི་གནས་ཚུལ་ལ་གཞལ་སྐབས་ཀྱང་། ཐོག་མ་ཁྲིམས་ཞིབ་པ་གསུམ་འཕོ་འགྱུར་གྱི་གྲོས་ཆོད་ལ་རྒྱབ་སྐྱོར་བྱེད་མཁན་ཆོལ་ཁ་གསུམ་གའི་སྤྱི་འཐུས་ཡོད་ཀྱང་། རྗེས་སུ་བཅའ་ཁྲིམས་ཟིན་བྲིས་ཚོགས་ཆུང་གི་ཚོགས་མི་ཁྲི་ཟུར་ཟམ་གདོང་བློ་བཟང་བསྟན་འཛིན་མཆོག་ལ་བཅར་འདྲི་ཞུས་པ་དང་། ཁྲིམས་ཞིབ་པ་ཟུར་པ་རྣམ་པ་ལ་སོགས་ཀྱིས་ལམ་ནོར་ཟློག་ཤེས་དགོས་པའི་ལམ་སྟོན་མཛད་པར་བརྟེན།  དབུས་གཙང་གི་ཕོ་རོག་དཀར་པོ་ལྷ་རྒྱ་རི་རྣམ་རྒྱལ་སྒྲོལ་དཀར་དང་ཨ་རིའི་བསྟན་འཛིན་འཇིགས་མེད་མ་གཏོགས་སྤྱི་འཐུས་གཞན་རྣམས་ཀྱིས་ནོར་བ་ནོར་བར་ངོས་བཟུང་སྟེ་བཅའ་ཁྲིམས་དགོངས་དོན་བཞིན་ཤར་བསྐྱོད་བགྱིས་ཀྱང་། འདེམས་ཐོན་ཆོས་བརྒྱུད་སྤྱི་འཐུས་རྣམས་སྡིག་པ་མིག་བཙུམ་གྱིས་འདེམས་ཐོན་མདོ་སྟོད་སྤྱི་འཐུས་དང་ལྷན་དུ་ཁ་མཆུ་བོགས་མར་བཞེས་དགོས་པ་ཡ་ཆའོ།

༸གོང་ས་མཆོག་གིས་མང་གཙོ་གསོལ་སྩལ་སྐབས་ཆོལ་ཁ་དང་ཆོས་ལུགས་ཀྱི་སྤྱི་འཐུས་སྲོལ་གཏོད་པ་དང་བཅའ་ཁྲིམས་ནང་དུ་ཡང་གཏན་འབེབས་མཛད། དེ་ལྟར་གཏན་འབེབས་གནང་བར་དགོངས་གཞི་དགོས་པ་མང་པོ་ཞིག་ནས་གཅིག་ནི། གལ་ཏེ་ཆོལ་ཁ་གསུམ་པོའི་སྤྱི་འཐུས་བར་ལྗིད་སྙོམ་སྟངས་འཛིན་མ་ཐུབ་ཚེ། ཆོས་ལུགས་སྤྱི་འཐུས་ཀྱིས་ལྗིད་སྙོམ་སྟངས་འཛིན་ལ་ནུས་པ་འདོན་པའི་ཐུགས་རེ་གནང་ཡོད་ཚོད། ད་ནི་སྐབས་དེ་དུས་ཀྱི་དགོས་མཁོ་ལྟར་མེད་ཅིང་། དེ་ལས་ལྡོག་སྟེ་ཆོས་བརྒྱུད་སྤྱི་འཐུས་ཀྱི་མིང་འཁུར་ནས་སྐྱབས་ཡུལ་དགེ་འདུན་པའི་སྡེ་ལ་བཀུར་འདེབས་ཞུ་བའི་གཞི་ལ་བརྟེན། ཆོས་འཇིག་རྟེན་གཉིས་བྲལ་གྱི་ཆོས་བརྒྱུད་སྤྱི་འཐུས་ཀྱི་ལམ་ལུགས་མཇུག་བསྒྲིལ་དགོས། ཆབ་སྲིད་ནི་འགྱུར་བའི་རང་བཞིན་ཞིག་ཡིན་པར་བརྟེན་དེ་ནི་ང་ཚོའི་ལོ་ངོ་དྲུག་ཅུའི་རིང་གི་བསྒྱུར་བཅོས་གཅིག་ལ་བརྩི་འོས།

སྤྱིར་རབ་བྱུང་པ་ཆབ་སྲིད་ཀྱི་ལས་དོན་ལ་དང་དུ་གཞོལ་བ་ནི།  སྟོན་པ་བཅོམ་ལྡན་འདས་ཀྱི་དགོངས་པ་དང་འགལ་ཞིང་། ལྷག་པར་དེང་དུས་ང་ཚོའི་དགེ་འདུན་པའི་ཆབ་སྲིད་ཀྱི་བྱེད་ཕྱོགས་མི་ལེགས་པ་དེས་རང་ཉིད་ཁྱིམ་པ་སུན་འབྱིན་གྱི་ལས་ཚབས་པོ་ཆེ་བསགས་ཤིང་ད་བར་སྤྱི་དོན་ཐོག་ཕན་ལས་གནོད་ཆེ། འཇིག་རྟེན་སྲིད་ལུགས་སྐྱོང་བའི་ཆབ་སྲིད་དང་། དངུལ་རྩིས། ཕྱི་འབྲེལ་སོགས་ཀྱི་ཤེས་ཡོན་ཏིལ་འབྲུ་ཙམ་མེད་ཀྱང་ཧམ་ཤེད་ཁོ་ནས་ད་དུང་ཤེས་འཇོན་གཉིས་ལྡན་གྱི་མི་བུའི་དཔའ་མཛངས་བློ་གྲོས་ལ་འགལ་རྐྱེན་བཟོས་ཏེ། སྐབས་རེ་ལྟས་ངན་དེ་དག་གི་དབང་བསྒྱུར་འོག་འགྲོ་དགོས་པ་དང་། མི་མང་གིས་དང་བླངས་དཔྱ་དངུལ་དང་ཞལ་འདེབས་ཕུལ་ནས་བརླང་སྤྱོད་ཅན་དེ་དག་གསོ་དགོས་པ་དངོས་གནས་ལས་མ་དག་པ་རེད།

ལོ་རྒྱུས་ཐོག་ཆོས་སྦག་གྱོན་པའི་སྡིག་ཏོ་ཅན་གྱིས་བརྒྱུད་སྐུལ་ཏེ་༸གོང་ས་སྐུ་ཕྲེང་བཅུ་གསུམ་པ་དང་མི་བུ་རྣམ་དཔྱོད་ཅན་འགའ་ཞིག་གི་གཟིགས་རྒྱང་རིང་བའི་གསར་གཏོད་ཀྱི་ལམ་བུ་བཙན་གྱིས་བཤིགས་ཏེ་ང་ཚོ་ཆབ་སྲིད་ཐོག་ད་ལྟའི་གནས་སྟངས་འདི་མུར་གྱར་བར་གཞོགས་འདེགས་ཚད་མེད་བྱས།

དེ་དག་ལ་ཞིབ་ཏུ་བསམས་སྐབས་གཞུང་ས་དགའ་ལྡན་ཕོ་བྲང་པའི་བཀའ་བཀོད་འོག་ང་ཚོའི་མེས་པོ་ཚོས་ཚེ་འདི་ཕྱི་གཉིས་ཀྱི་མགོན་སྐྱབས་སུ་རེ་ནས་ཁྲག་དང་རྔུལ་ཆུས་བསགས་པའི་ཞིང་འབྲོག་གི་ཐོན་སྐྱེད་མི་རབས་ནས་མི་རབས་འཇལ་ཏེ། ཆོས་བརྒྱུད་བཞི་དང་གཡུ་དྲུང་བོན་དང་བཅས་པའི་བརྒྱུད་འཛིན་པ་གསོས་པ་མང་པོ་ཞིག་རང་མགོ་ཆུ་འདྲེན་དུ་སོང་ཡོད་པ་གསལ་བཤད་བྱས་ཡོད། གོང་གི་གནས་ཚུལ་དེ་དག་ལ་བརྟེན། ཆོས་སར་ཆོས་དང་གཞས་སར་གཞས། ཞེས་པའི་དཔེ་ལྟར། འཛམ་གླིང་རྒྱལ་ཁབ་ཀུན་དང་མཐུན་པར་ཆོས་སྲིད་གཉིས་ལོགས་སུ་དབྱེ་འབྱེད་གསལ་པོ་དགོས་ལ་ཆོལ་ཁའི་ཞེན་འཁོགས་དབང་གིས་ཆབ་སྲིད་ཀྱི་ལམ་དུ་ནན་གྱིས་ཞུགས་པའི་དགེ་འདུན་པར་ད་ནས་བཟུང་གུས་པས་བསྙེན་བཀུར་སྤངས་པ་ཡིན།

རྒྱུ་མཚན་གང་ལགས་ཤེ་ན། བློ་གྲོས་ལྡན་པའི་མི་བུ་སུ་ཞིག་ཡིན་རུང་རང་མགོ་རྡུང་བའི་ཐོ་བ་བཟོ་སྐྲུན་མི་བྱེད། གལ་ཏེ་ང་ལ་ཤི་གསོན་གཉིས་ཀྱི་སྐྱབས་ཞུའི་ཆེད་དབུལ་བྱའི་དད་རྫས་ཁ་གང་སྐར་མ་ལས་མེད་ཀྱང་དགོན་པ་དང་དགོན་པ། གྲྭ་ཚང་དང་གྲྭ་ཚང་། ཁང་ཚན་དང་ཁང་ཚན། གྲྭ་པ་དང་གྲྭ་པ་དབྱེ་བ་ཕྱེ་སྟེ་དོན་དམ་པའི་དགོན་པ་དང་། དོན་དམ་པའི་ཁང་ཚན།  དོན་དམ་པའི་དགེ་འདུན་པ་རྣམས་ལ་བསྙེན་བཀུར་ཞུ་རྒྱུ་ཡིན།།     ཤཀྱྰའི་དགེ་འདུན་རྣམ་དག་རྒྱལ་གྱུར་ཅིག

མཆན། གོང་བཀོད་རྩོམ་ཡིག་དེ་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་དགོངས་ཚུལ་ཡིན་པས་མ་ཁྱབ།