༧གོང་ས་མཆོག་ནས་ཨིན་ཌོ་ནེ་ཤི་ཡའི་སློབ་མ་ཁག་ཅིག་ལ་ད་ལྟ་ང་ཚོ་ནད་ཡམས་དང་གོ་ལའི་ཚ་དྲོད་འཕར་བཞིན་པའི་དཀའ་སྡུག་གི་དུས་སྐབས་ཤིག་ཏུ་བསླེབས་ཡོད་ནའང་། སྙིང་སྟོབས་ཞུམ་པ་མེད་པར་འབད་བརྩོན་བྱས་ཏེ་དཀའ་ངལ་ལས་གྲོལ་ཐུབ་པའི་རེ་བ་བརླག་རྒྱུ་མེད་སྐོར་གསུངས།
དེ་རིང་སྔ་དྲོ་ཆུ་ཚོད་ ༩ སྟེང་བཞུགས་སྒར་རྒྱལ་བའི་ཕོ་བྲང་ནས་ཐད་གཏོང་བརྒྱུད། ཨིན་ཌོ་ནེ་ཤི་ཡའི་ནང་པའི་ཆོས་ཚོགས་བཀའ་གདམས་ཆོས་གླིང་གིས་ཇི་ལྟར་གསོལ་བ་བཏབ་པ་ལྟར། ༧གོང་ས་རྒྱལ་བ་རིན་པོ་ཆེ་མཆོག་གིས་ཨིན་ཌོ་ནེ་ཤི་ཡའི་རྒྱལ་ཡོངས་སློབ་གྲྭ་འདྲ་མིན་གྱི་སློབ་ཕྲུག་རྣམས་ལ་སངས་རྒྱས་པའི་ཆོས་ཀྱི་སྤྱི་བཤད་སྐོར་ནས་བཀའ་ཆོས་སྩལ་སྐབས། ངོས་རང་ནང་པའི་ཆོས་ཉམས་ལེན་མཁན་ཞིག་ཡིན་པའི་ངོས་ནས། ངོས་ཀྱི་དམ་བཅའ་གཅིག་ནི་འཛམ་གླིང་གི་ཆོས་ལུགས་ཚང་མའི་རྡོག་རྩ་གཅིག་ཏུ་བསྒྲིལ་རྒྱུ་དེ་ཡིན། ནང་ཆོས་དང་ཧིན་རྡུ། ཡི་ཤུ། ཁ་ཆེ། གཅེར་བུ་བའི་ཆོས་ལུགས་སོགས་ཕན་ཚུན་གཏན་ནས་མི་འདྲ་ནའང། ཚང་མས་བྱམས་དང་སྙིང་རྗེའི་བསླབ་བྱ་ཉམས་ལེན་བྱེད་ཀྱི་ཡོད། དེ་ལྟར་ཆོས་ལུགས་སོ་སོའི་བྱམས་བརྩེའི་བསླབ་བྱ་གོང་འཕེལ་དང་སྲ་བརྟན་གཏོང་ཆེད། རང་རང་གི་གཞུང་ལུགས་ཀྱི་ལྟ་གྲུབ་མང་པོ་ཞིག་སྒྲུབ་བྱེད་དུ་བཀོད་ཀྱི་ཡོད་པ་དང་། ལ་ལས་འཇིག་རྟེན་བཀོད་པ་པོ་འདོད་པ་དང་། ལ་ལས་འཇིག་རྟེན་བཀོད་པ་པོ་འདོད་ཀྱི་མེད་པ་རེད། དེ་དག་ནི་བྱམས་བརྩེ་སྤེལ་བའི་ཐབས་ལམ་ཡིན་པ་རེད། ཐབས་ལམ་དེ་དག་ལ་བརྟེན་པའི་བསྒྲུབ་བྱ་ནི་མི་གཞན་ལ་བསམ་ཤེས་དང་སྙིང་རྗེ་ཅན་ཞིག་ཆགས་དགོས་ཀྱི་ཡོད་པ་རེད། དེར་བརྟེན་ཆོས་ལུགས་མི་འདྲ་བ་སྣ་ཚོགས་པ་ཡོད་ཀྱང། ཚང་མའི་བསླབ་བྱ་གཅིག་པ་ཡིན་པ་རེད། དཔེར་ན། ཁ་ཆེས་ཨ་ལ་ཞེས་པའི་འཇིག་རྟེན་བཀོད་པ་པོ་ཞིག་འདོད་ཀྱི་ཡོད་རེད། འོ་ན་ཨ་ལ་གང་འདྲ་ཞིག་རེད་ཅེས་དྲིས་ཚེ། ཨ་ལ་ནི་བྱམས་བརྩེའི་ཐར་བའི་བདག་ཉིད་ཅན་གྱི་སྐྱབས་གནས་ཤིག་ལ་ངོས་འཛིན་བྱེད་ཀྱི་ཡོད། དེ་བཞིན་ཡེ་ཤུའི་སྟོན་པ་ཡིན་ན་ཡང་བྱམས་བརྩེའི་བདག་ཉིད་མཐར་ཐུག་ཅིག་ཡིན་པ་ངོས་འཛིན་བྱེད་ཀྱི་ཡོད་པ་རེད། ཨ་ལ་དང་ཡེ་ཤུའི་སྟོན་པ་ལ་འཇིག་རྟེན་བཀོད་པ་པོར་འདོད་མཁན་ཚོས་དམིགས་བསལ་གྱི་དད་པ་ཞིག་སྐྱེ་ཡི་ཡོད་པ་རེད། ནང་པ་དང་ལས་འབྲས་འདོད་མཁན་གྱི་ཆོས་ལུགས་ཚོས་ལས་ཀྱི་དབང་གིས་བྱུང་བར་འདོད་ཀྱི་ཡོད། དེ་དག་ལ་མི་འདྲ་བ་ཇི་ཙམ་ཡོད་ནའང་བསྒྲུབ་བྱ་གཙོ་བོ་ནི་བྱམས་དང་སྙིང་རྗེའི་ཉམས་ལེན་ཆགས་ཀྱི་ཡོད་པ་རེད། དེར་བརྟེན་ཆོས་ལུགས་ཕན་ཚུན་བར་གུ་ཡངས་ཀྱི་བསམ་པ་དང་ཕན་ཚུན་བསམ་ཤེས་གོང་མཐོར་གཏོང་རྒྱུ་ནི་ངོས་ཀྱི་དམ་བཅའ་ཡིན་པ་རེད། ཅེས་གསུངས་སོང་།
ཡང་མགོན་པོ་གང་ཉིད་མཆོག་གིས། ངོས་རང་ད་ལྟ་བར་དུ་རྒྱ་གར་ནང་དུ་མི་ལོ་མང་པོ་ཞིག་གི་རིང་གནས་སྡོད་བྱས་པ་རེད། རྒྱ་གར་ནི་མི་འབོར་ཆེས་མང་ཤོས་ཀྱི་རྒྱལ་ཁབ་ཅིག་ཡིན་ཡང་། གནའ་སྔ་མོ་ནས་ཆོས་ལུགས་མང་པོ་ཞིག་མཉམ་དུ་མཐུན་སྒྲིལ་གྱི་ཐོག་ནས་འཚོ་སྡོད་བྱེད་མུས་ཡིན་པ་རེད། དེར་བརྟེན་རྒྱ་གར་ནང་གི་ཆོས་ལུགས་མཐུན་སྒྲིལ་དཔེ་མཚོན་དུ་བླངས་ནས། འཛམ་གླིང་ས་ཕྱོགས་གང་སར་ཆོས་ལུགས་མཐུན་སྒྲིལ་གཏོང་ཐུབ་པའི་ནུས་པ་ཞིག་མཐོང་གི་འདུག་པས། ངོས་ཀྱི་དམ་བཅའ་གཅིག་ནི་ཆོས་མཐུན་སྒྲིལ་གྱི་ནུས་པ་གོང་མཐོར་གཏོང་རྒྱུ་དེ་ཡིན། དེ་རིང་ཨོན་ཌོ་ནེ་ཤི་ཡའི་ཆོས་གྲོགས་མང་པོ་ཞིག་མཇལ་བར་ངོས་རང་དགའ་བོ་བྱུང་། ཨིན་ཌོ་ནེ་ཤི་ཡར་མཚོན་ན་ཁ་ཆེ་ཡི་ཆོས་ཉམས་ལེན་བྱེད་མཁན་མང་པོ་ཞིག་ཡོད་པ་རེད། སྤྱིར་བཏང་ཆོས་ཉམས་ལེན་བྱེད་མ་བྱེད་ནི་མི་སྒེར་སོ་སོའི་འདོད་མོས་ཡིན་པ་རེད། འོན་ཀྱང་། ང་ཚོ་འགྲོ་བ་མི་ཞིག་ཡིན་པས་སྐྱེས་མ་ཐག་ནས་ཨ་མའི་བྱམས་བརྩེས་འཚོ་སྐྱོང་བྱས་ཡོད། མ་ཡི་བྱམས་བརྩེས་སྐྱོང་མེད་ཚེ་ཕལ་ཆེར་གསོན་པོ་གནས་ཐུབ་ཀྱི་མེད་པ་རེད། དེ་བཞིན་མ་ལས་བཙས་པའི་སེམས་ཅན་སུ་ཡིན་ནའང་མ་ཡི་བྱམས་བརྩེས་མ་བསྐྱངས་ན་ཚེ་སྲོག་གནས་ཐབས་བྲལ་བ་ཡིན། དེར་བརྟེན་བྱམས་བརྩེ་ནི་མིའི་རིགས་ཀྱི་འཚོ་གནས་ཀྱི་སྙིང་བཅུད་ལྟ་བུ་ཞིག་ཆགས་ཡོད་པ་རེད། འདས་པའི་ལོ་རྒྱུས་ཁྲོད་དང་ད་ལྟའང་རྙོག་འཛིང་ཅན་གྱི་གནས་ཚུལ་མང་པོ་ཞིག་བྱུང་ཡོད། དེ་དག་གི་འབྱུང་རྐྱེན་ནི་མིའི་རིགས་ལ་བྱམས་བརྩེས་འཕོངས་པ་དང་། ཕན་ཚུན་གཅེན་གཅུང་གི་འདུ་ཤེས་ཀྱིས་འཕོངས་པས་ཡིན། ཞེས་གསུངས་སོང་།
ངོས་ཀྱིས་བསམ་ན་ཨིན་ཌོ་ནི་ཤ་ཡའི་ནང་པ་རྣམས་ལ་གོ་སྐབས་དམིགས་བསལ་ཞིག་ཡོད་པ་རེད། དང་པོ་དེར་ཁྱེད་ཚོས་བྱམས་སྙིང་རྗེ་ལྟ་བུའི་བསླབ་བྱ་རྣམས་གཞན་ལ་བརྒྱུད་སྤྲོད་བྱེད་ཐུབ། བསླབ་བྱ་དེ་དག་ཁ་ཆེའི་གྲོགས་པོ་ཚོས་ཀྱང་ཉམས་ལེན་བྱ་རྒྱུ་ཧ་ཅང་གལ་ཆེན་པོ་རེད། སྤྱིར་ཆོས་ལུགས་ཚང་མས་བྱམས་སྙིང་རྗེའི་བསླབ་བྱ་བཤད་ཀྱི་ཡོད་ནའང་། ནང་པ་ཚོས་རང་གི་ཁ་ཆེ་གྲོགས་པོ་རྣམས་ལ་བྱམས་བརྩེ་བྱེད་ཐུབ་ཚེ། དེས་རང་བཞིན་གྱིས་ཆོས་ལུགས་ཕན་ཚུན་དབར་མཐུན་འབྲེལ་ཡོང་རྒྱུ་ཡིན་སྐོར་དང་། བྱང་ཆུབ་ཀྱི་སེམས་ཞེས་པ་དེ་ཞེ་དྲགས་རྩ་ཆེན་པོ་རེད་འདུག རང་གཞན་དོན་ནི་རབ་སྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །ཞེས་པ་དེ་དཔེ་གལ་ཆེན་པོ་རེད་འདུག རང་དོན་སྒྲུབ་ན་བྱང་ཆུབ་སེམས་བསྒོམ། གཞན་དོན་སྒྲུབ་ནའང་བྱང་ཆུབ་སེམས་བསྒོམ། སྡིག་གྲིབ་སྦྱོང་བ་ལ་བྱང་ཆུབ་སེམས་བསྒོམ། ཚོགས་གསོག་པ་ལའང་བྱང་ཆུབ་སེམས་བསྒོམ་པ་བཅས་ཞེ་དྲགས་རེད་འདུག ཆོས་པ་ཡིན་མིན་དང་ནང་པ་ཡིན་མིན་གྱི་སྐད་ཆ་ཡོད་པ་མ་རེད། ཞེ་དྲགས་ཡག་པོ་རེད། ཅེས་གསུངས་སོང་།
དེ་རྗེས་སློབ་མ་ཞིག་གིས་ནད་ཡམས་ཀྱི་དུས་སྐབས་འདིར་ང་ཚོས་ཕན་གྲོགས་ཇི་ལྟར་བྱ་ཐུབ་མིན་སྐོར་བཀའ་འདྲི་ཞུས་པར་༧གོང་ས་མཆོག་གིས། ད་ལྟའི་དུས་སྐབས་འདིར་ནད་ཡམས་དང་། གོ་ལའི་ཚ་དྲོད་འཕར་བཞིན་པའི་རྐྱེན་གྱིས་གནམ་གཤིས་འགྱུར་ལྡོག་དང་ས་ཆ་གང་སར་མེ་སྐྱོན་ཆེན་པོ་ཤོར་གྱི་ཡོད་པ་རེད། ད་ལྟ་ང་ཚོ་མིའི་རིགས་འདི་གཉན་འཕྲང་ཅན་གྱི་དུས་སྐབས་ནང་སླེབས་ཡོད་པ་རེད་དེ། ང་ཚོར་དཀའ་ངལ་དེ་དག་སེལ་རྒྱུའི་ཐབས་ལམ་ཡོད་པ་རེད། དེར་བརྟེན་ང་ཚོས་ཆོད་སེམས་བརྟན་པོའི་ཐོག་ནས་དཀའ་ངལ་དེ་དག་ཉུང་དུ་གཏོང་དགོས། ད་ལྟ་སྨན་པ་དང་སྨན་ཞབས་པ་རྣམས་ཀྱིས་ནད་པ་མང་པོར་རོགས་འདེགས་བྱེད་ཀྱི་ཡོད་པ་དེར་ཡི་རངས་ཞུ་ཡི་ཡོད། གང་ལྟར་ནད་གཞི་འདི་རང་བཞིན་གྱིས་བརླག་འགྲོ་རྒྱུ་ཞིག་ཡིན་སྟབས་ང་ཚོའི་སྙིང་སྟོབས་ཞུམ་རྒྱུ་མེད། དེ་བས་ང་ཚོས་འབད་བརྩོན་བྱས་ཏེ་དཀའ་ངལ་དེ་ལས་གྲོལ་རྒྱུའི་རེ་བ་འཆང་དགོས། གལ་ཏེ་ང་ཚོའི་རེ་བ་བརླག་ཚེ། དེ་ནི་ཕམ་ཁ་ངོ་མ་དེ་ཡིན། དཀའ་སྡུག་ཆེ་ས་དེར་ཆོད་སེམས་བརྟན་པ་ཡོད་སྟབས། དཀའ་ངལ་ལས་གྲོལ་རྒྱུའི་གོ་སྐབས་ཆེ་བ་ཡོད། ང་རང་ཉིད་ཀྱི་མི་ཚེའི་ནང་ལའང་དཀའ་ངལ་མང་པོ་ཕྲད་མྱོང་ཡང་། ད་བར་རེ་བ་དོར་མ་མྱོང་། ངས་རྟག་ཏུ་ཐབས་ཤེས་བྱས་ཏེ་རེ་བ་དང་ཞི་བདེ་རྒྱུན་གནས་ཡོང་ཐབས་བྱས་ཡིན། ཞེས་བཀའ་ལན་བསྩལ་གནང་སོང་།
ཡང་བུད་མེད་སློབ་མ་ཞིག་གིས་༧རྒྱལ་བ་རིན་པོ་ཆེ་མཆོག་ཨིན་ཌོ་ནི་ཤི་ཡར་ཆིབས་བསྒྱུར་ནམ་བསྐྱང་རྒྱུ་ཡིན་མིན་དང་། ཨིན་ཌོ་ནི་ཤི་ཡའི་ནང་ཡོད་པའི་འཛམ་གླིང་གི་ནང་པའི་དགོན་པ་ཆེ་ཤོས་བྷོ་རོ་བྷུ་དྷར་ (Borobudur) དགོན་པ་དེ་ཉིད་ཉར་ཚགས་དང་སྲུང་སྐྱོབ་ཇི་ལྟར་བྱེད་དགོས་པའི་སྐོར་བཀའ་འདྲི་ཞུས་སྐབས། ངོས་རང་ཐེངས་གཅིག་བྷོ་རོ་བྷུ་དྷར་དགོན་པར་མཇལ་བའི་གོ་སྐབས་བྱུང་། སྤྱིར་དགོན་པ་དེ་གལ་ཆེན་པོ་རེད་དེ། གཙོ་བོ་དེ་ནང་སེམས་ཀྱི་དགོན་པ་དེ་གལ་ཆེ་བ་རེད། ཞལ་འདོན་ཙམ་མིན་པར་བྱམས་བརྩེ་དང་རྣམ་དཔྱོད་གཉིས་ཟུང་སྦྲེལ་བྱས་ཏེ་འཛམ་གླིང་འདི་བདེ་སྐྱིད་ལྡན་པ་ཞིག་ཏུ་སྒྱུར་ཐབས་བྱེད་དགོས་པ་རེད། བྷོ་རོ་བྷུ་དྷར་དགོན་པོ་དེ་ཁྱད་དུ་འཕགས་པ་ཞིག་རེད། ང་རང་ཐེངས་གཅིག་དེར་མཇལ་རྒྱུ་བྱུང་བ་རེད། མ་འོངས་པར་མཇལ་ཐུབ་མིན་ངས་ཤེས་ཀྱི་མེད་ཀྱང་། གལ་ཏེ་གོ་སྐབས་བྱུང་ཚེ་ངེས་པར་དུ་མཇལ་རྒྱུ་ཡིན། འོན་ཀྱང་བྷོ་རོ་བྷུ་དྷར་ངོ་མ་ནི་ང་ཚོའི་རྒྱུད་ལ་ཡོད་པ་རེད། དེ་ནི་རྣམ་དཔྱོད་དང་ཟུང་དུ་འབྲེལ་བའི་བྱམས་བརྩེ་དེ་ཉིད་རེད། དགོན་པ་སྟོང་པ་ཙམ་ཞིག་ལ་དོན་སྙིང་གང་ཡང་ཡོད་པ་མ་རེད། དགོན་པ་ངོ་མ་དེ་ང་ཚོའི་རྒྱུད་ལ་ཡོད་པ་རེད། ཅེས་བཀའ་ལན་བསྩལ་གནང་སོང་།
གསར་འགོད་པ། དཔལ་ལྡན། པ་སངས་ཚེ་རིང་།
Wonderful!: བྱམས་བརྩེ་དང་རྣམ་དཔྱོད་གཉིས་ཟུང་སྦྲེལ་བྱས་ཏེ་འཛམ་གླིང་འདི་བདེ་སྐྱིད་ལྡན་པ་ཞིག་ཏུ་སྒྱུར་ཐབས་བྱེད་དགོས་པ་རེད། བྷོ་རོ་བྷུ་དྷར་དགོན་པོ་དེ་ཁྱད་དུ་འཕགས་པ་ཞིག་རེད། ང་རང་ཐེངས་གཅིག་དེར་མཇལ་རྒྱུ་བྱུང་བ་རེད། མ་འོངས་པར་མཇལ་ཐུབ་མིན་ངས་ཤེས་ཀྱི་མེད་ཀྱང་། གལ་ཏེ་གོ་སྐབས་བྱུང་ཚེ་ངེས་པར་དུ་མཇལ་རྒྱུ་ཡིན། འོན་ཀྱང་བྷོ་རོ་བྷུ་དྷར་ངོ་མ་ནི་ང་ཚོའི་རྒྱུད་ལ་ཡོད་པ་རེད། དེ་ནི་རྣམ་དཔྱོད་དང་ཟུང་དུ་འབྲེལ་བའི་བྱམས་བརྩེ་དེ་ཉིད་རེད། དགོན་པ་སྟོང་པ་ཙམ་ཞིག་ལ་དོན་སྙིང་གང་ཡང་ཡོད་པ་མ་རེད། དགོན་པ་ངོ་མ་དེ་ང་ཚོའི་རྒྱུད་ལ་ཡོད་པ་རེད།