ད་ལྟ་འཛམ་གླིང་གི་ཡུལ་ལུང་ཁག་ཅིག་དང་དམིགས་བསལ་རྒྱ་གར་གྱི་མངའ་སྡེ་ཁག་ཅིག་ཏུ་ཏོག་དབྱིབས་ནད་པའི་གྲངས་འབོར་འཕར་གྱི་ཡོད་སྟབས། བོད་མི་ཚོས་ནད་ཡམས་སྔོན་འགོག་གི་ལས་དོན་ལྷོད་མེད་ཐོག་འཕྲོད་བསྟེན་དང་བདེ་ཐང་སྲུང་རྒྱུ་གལ་ཆེན་ཡིན་པའི་ལམ་སྟོན་གནང་གི་འདུག
དེ་རིང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཝུ་ཧན་ཏོག་དབྱིབས་ཛ་དྲག་ལས་དོན་ཚོགས་ཆུང་གི་གསར་འགོད་གསལ་བསྒྲགས་ཐེངས་ ༧༢ སྟེང་། ཛ་དྲག་ལས་དོན་ཚོགས་ཆུང་གི་ཚོགས་མི་ཕྱི་ལུགས་སྨན་པ་བསྟན་འཛིན་རྣམ་གྲོལ་ལགས་དང་སྨན་པ་མཚམས་གཅོད་སྒྲོལ་མ་ལགས་གཉིས་ནས། འདས་པའི་བདུན་ཕྲག་གཅིག་རིང་གི་རྒྱལ་སྤྱིའི་ཏོག་དབྱིབས་གཉན་རིམས་འགོས་ཁྱབ་ཀྱི་གནས་སྟངས་སྤྱི་དང་དམིགས་བསལ་བཙན་བྱོལ་བོད་མིའི་སྤྱི་ཚོགས་ནང་ཏོག་དབྱིབས་འགོས་ཁྱབ་ཀྱི་གནས་སྟངས་སྐོར་གསལ་བསྒྲགས་གནང་སྐབས། འདས་པའི་བདུན་ཕྲག་གཅིག་རིང་རྒྱ་གར་དང་བལ་ཡུལ་ནང་ཏོག་དབྱིབས་གཉན་རིམས་གསར་པ་འགོས་ཁྱབ་བྱུང་བའི་མི་གྲངས་ ༡༣༢ དང་རྐྱེན་འདས་སུ་ཕྱིན་པའི་མི་གྲངས་ ༤ བྱུང་ཡོད་སྐོར་བསྒྲགས་གནང་སོང་།
གསར་འགོད་གསལ་བསྒྲགས་སྟེང་སྨན་པ་མཚམས་གཅོད་སྒྲོལ་མ་ལགས་ཀྱིས། ད་རེས་འདས་པའི་བདུན་ཕྲག་གཅིག་རིང་རྒྱ་གར་དང་བལ་ཡུལ་ནང་ཏོག་དབྱིབས་གཉན་རིམས་ནད་གསར་པ་ཕོག་མཁན་མི་གྲངས་ ༡༣༢ བྱུང་ཡོད་པའི་ཁྲོད། སྐྱེས་པ་ ༦༣ དང་བུད་མེད་ ༦༩། ལོ་ན་མཐོ་ཤོས་དགུང་ལོ་ ༩༥ དང་ཆུང་ཤོས་ཟླ་གཅིག་ཅན་གྱི་བྱིས་པ་ཞིག་ཡིན་པ་དང་། སྟབས་མ་ལེགས་པ་ཞིག་ལ་མི་ ༤ འདས་གྲོངས་སུ་ཕྱིན་ཡོད་པ་རེད། ད་ལྟའི་ཆར་རྒྱ་བལ་གཉིས་ནང་ཏོག་དབྱིབས་ན་མནར་བཞིན་པའི་མི་ ༣༠༥ ཡོད། ཅེས་བརྗོད་སོང་།
སྨན་པ་མཚམས་གཅོད་སྒྲོལ་མ་ལགས་ཀྱིས་གསུངས་པ་ལྟར་ན། ད་ལྟའི་ཆར་རྒྱ་གར་གྱི་ས་གནས་ ༡༥ དང་བལ་ཡུལ་གྱི་ས་གནས་ ༥ ཡི་ནང་རང་ཁྱིམ་དུ་འགོག་དབྱེ་ཟུར་བཀག་ཏུ་བཞུགས་མཁན་མི་གྲངས་ ༨༨༦ དང་ཚོགས་སྡེའི་ཟུར་བཀག་ཁང་དུ་བཞུགས་མཁན་མི་གྲངས་ ༣༦༧ བཅས་ཁྱོན་བསྡོམས་མི་གྲངས་ ༡༢༥༣ ཟུར་བཀག་འོག་བཞུགས་ཡོད་པ་དང་། ད་བར་བོད་ཀྱི་སྨན་རྩིས་ཁང་ནས་རིན་མེད་ཐོག་གསོ་རིག་ལུས་སེམས་ནད་གསོའི་སྨན་ ༤༢༨༡༩ བགོ་འགྲེམས་དང་། དམིགས་བསལ་བྱིས་པ་རྣམས་ལ་ལུས་སེམས་ནད་གསོའི་སྨན་ ༤༢༨༢ བགོ་འགྲེམས་བྱུང་ཡོད་ཅིང་། འདས་པའི་བདུན་ཕྲག་གཅིག་རིང་མི་གྲངས་ ༩༧ ལ་སེམས་ཁམས་འཕྲོད་བསྟེན་ལམ་སྟོན་གནང་ཡོད་པ་དང་། དེ་བཞིན། རྒྱ་གར་གྱི་ས་གནས་ ༡༧ ནང་གི་མི་གྲངས་ ༢༥༣༩ དང་བལ་ཡུལ་གྱི་ས་གནས་ ༣ གྱི་མི་གྲངས་ ༢༠ བཅས་ལ་ཏོག་དབྱིབས་བརྟག་དཔྱད་གནང་ཡོད་པ་རེད།
ད་བར་རྒྱ་གར་ནང་ཏོག་དབྱིབས་འགོག་ཁབ་ཚར་གཉི་ག་བརྒྱབ་ཟིན་པའི་མི་གྲངས་ ༢༡༠༨༧ དང་ཐེངས་དང་པོ་བརྒྱབ་ཟིན་པའི་གྲངས་འབོར་ཁྱོན་ ༢༨༦༨༩ ཆགས་ཡོད་པ་དང་། བལ་ཡུལ་ནང་འགོག་ཁབ་གཉི་ག་བརྒྱབ་ཟིན་པ་མི་ ༢༦༣༠ དང་ཁབ་ཚར་དང་པོ་ཐོབ་མཁན་མི་གྲངས་ ༨༣༦ ཆགས་ཡོད་འདུག་ལ། ད་བར་རྒྱ་བལ་གཉིས་ནང་ཏོག་དབྱིབས་གཉན་རིམས་ཕོག་པའི་གྲངས་འབོར་ནི་ ༦༠༨༠ ཡིན་པའི་ཁྲོད། མི་གྲངས་ ༥༦༣༡ དྲག་སྐྱེད་བྱུང་ཡོད་པ་དང་། རྐྱེན་འདས་སུ་ཕྱིན་པའི་མི་གྲངས་ཁྱོན་ ༡༤༤ བྱུང་ཡོད་འདུག
དེ་རྗེས་བདེ་ལེགས་སྨན་ཁང་གི་སྨན་པ་བསྟན་འཛིན་རྣམ་གྲོལ་ལགས་ཀྱིས། ཉེ་ལམ་ནས་འཛམ་གླིང་ཡུལ་གྲུ་གང་སར་སྤྱི་ཚོགས་ཀྱི་གནས་བབ་རྒྱུན་ལྡན་རིང་བཞིན་དུ་གྱུར་ཏེ། ལྷོད་ཡངས་ཞེ་དྲགས་ཕྱིན་པ་ལ་བརྟེན་ནས། ད་ལྟའི་ཆར་རྒྱ་ནག་དང་ཨ་རི། ཨིན་ཌོ་ནེ་ཤི་ཡ། ཧྥ་རན་སི་སོགས་ཀྱི་ནང་ཏོག་དབྱིབས་ནད་པའི་གྲངས་འབོར་འཕར་གྱི་ཡོད་པའི་གནས་སྟངས་འགྲེལ་བརྗོད་གནང་བ་དང་བསྟུན། རྒྱ་གར་ནང་ཉིན་རེར་ནད་པ་གསར་བ་ཁྲི་བཞི་ཡས་མས་འབྱུང་གི་ཡོད་པ་དང་། རྒྱ་གར་གྱི་མངའ་སྡེ་ཀེ་རེ་ལཱ་དང་ཁར་ན་ཊ་ཀ ཏ་མུལ་ན་ཌོ ཨན་ཌི་ར། ཨོ་རེ་ཟ་སོགས་ཀྱི་ནང་ཏོག་དབྱིབས་ནད་པའི་གྲངས་འབོར་རིམ་བཞིན་འཕར་གྱི་ཡོད་སྟབས། བོད་མི་ཚོས་རང་ངོས་ནས་སྔོན་འགོག་གི་ཐབས་ལམ་བསྟེན་རྒྱུ་གལ་ཆེན་པོ་ཡིན། ཞེས་དང་། ད་ལྟ་འཛམ་གླིང་ཡོངས་གྲགས་སུ་སྔོན་འགོག་གི་ཐབས་ལམ་ཡག་ཤོས་ནི་ཏོག་དབྱིབས་འགོག་ཁབ་རྒྱག་རྒྱུ་དེ་ཡིན་པ་ལྟར། བཞུགས་སྒར་ཁུལ་གྱི་མི་མང་ལ་བདེ་ལེགས་སྨན་ཁང་ངོས་ནས་རིན་མེད་ཐོག་བདུན་ཕྲག་གཅིག་ནང་འགོག་ཁབ་ཐེངས་ ༢ རིང་རྒྱག་གི་ཡོད་སྟབས། འགོག་ཁབ་བསྐྱོན་རྒྱུ་གལ་ཆེན་པོ་ཞེ་དྲགས་ཡིན་སྐོར་དང་། གཞན་ཡང་ནམ་རྒྱུན་ལྟར་ཁ་རས་གྱོན་པ་དང་ལག་པ་ཡང་སེ་ཁྲུས་པ། དེ་བཞིན། རྒྱང་ཐག་འཇོག་རྒྱུ་སོགས་གལ་ཆེན་པོ་ཡིན་པའི་ལམ་སྟོན་བཅས་གནང་སོང་།
གསར་འགོད་པ། སྐལ་བཟང་སྦྱིན་པ།
ཏོག་དབྱིབས་ཛ་དྲག་ཚོགས་ཆུང་ལ་ཐུགས་རྗེ་ཆེ་ཞུ།