བོད་ཀྱི་གློག་བརྙན་འཁྲབ་འཁྲིད་པ་པདྨ་ཚེ་བརྟན་གྱི་བརྩམས་ཆོས་གསར་བ་ཕྱི་མི་ཞེས་པར་རྒྱ་ནག་གཞུང་གིས་ཆོག་མཆན་ཐོབ་ཡོད་སྟབས། ཕྱི་མི་ཞེས་པའི་གློག་བརྙན་ཕབ་བསྐྲུན་བྱ་འཆར་ཡོད་འདུག
དེ་རིང་རྒྱལ་སྤྱིའི་བརྒྱུད་ལམ་ཁག་ཅིག་གིས་སྤེལ་བའི་གནས་ཚུལ་ལྟར་ན། རྒྱ་ནག་གཞུང་གི་ཞིབ་དཔྱོད་ལས་ཁུངས་ཟེར་བས། བོད་ཀྱི་གློག་བརྙན་འཁྲབ་གཞུང་རྩོམ་པ་པོ་དང་འཁྲབ་འཁྲིད་པ་གྲགས་ཅན་པདྨ་ཚེ་བརྟན་ལགས་ཀྱི་ཕྱི་མི་ (Stranger) ཞེས་པའི་གློག་བརྙན་གསར་པ་ཞིག་འཁྲབ་འཁྲིད་བྱས་ཆོག་པའི་ཆོག་མཆན་སྤྲད་ཡོད་པ་དང་། གློག་བརྙན་དེ་ནི་ཕྱི་ལོ་ ༢༠༡༣ ཙམ་ནས་པདྨ་ཚེ་བརྟན་གྱིས་ཕབ་བསྐྲུན་བྱེད་པར་རེ་སྒུག་བྱས་པ་ཞིག་ཡིན་པ་རེད།
དེ་འབྲེལ་གནས་ཚུལ་ནང་། རྒྱ་ནག་གི་གློག་བརྙན་ཞིབ་དཔྱོད་གཞུང་ལས་ཁང་ཟེར་བས་པདྨ་ཚེ་བརྟན་གྱི་ཕྱི་མི་ཞེས་པའི་གློག་བརྙན་གྱི་འཁྲབ་གཞུང་བརྩམས་ཆོས་ལ་ཞིབ་བཤེར་བྱས་རྗེས། གློག་བརྙན་ཕབ་བསྐྲུན་ཆོག་པའི་ཆོག་མཆན་སྤྲད་ཡོད་སྐོར་བརྗོད་འདུག་པ་དང་། ཕྱི་མི་ཞེས་པའི་གློག་བརྙན་དེའི་བརྗོད་དོན་གཙོ་བོ་ནི། མི་ཞིག་གིས་འཛམ་གླིང་ནང་སྐད་གྲགས་ཆེ་བའི་ཧར་ལེ་ (Harley) བཟོ་ཚོང་ཁང་གི་འཕྲུལ་རྟ་ཞིག་ཞོན་ཏེ། ནང་པའི་ཆོས་གཞུང་གི་སྒྲོལ་མ་ཉེར་གཅིག་གི་ཕ་ས་སྟེ། བོད་པའི་གྲོང་གསེབ་ཆུང་ཆུང་ཞིག་ནས་སྒྲོལ་མ་ཟེར་བའི་བུ་མོ་ཞིག་འཚོལ་གྱི་ཡོད་མོད། ཁོ་བོ་སྒྲོལ་མ་ཟེར་བའི་བུ་མོ་མང་པོར་ཐུག་ཀྱང་། རང་ཉིད་ཀྱིས་འཚོལ་བཞིན་པའི་སྒྲོལ་མ་ཟེར་བའི་བུ་མོ་ཞིག་ལ་ཐུག་མ་ཐུབ་པའི་སྐོར་ཞིག་ཡིན་པ་རེད་ལ། ད་ལྟ་གློག་བརྙན་དེ་ག་དུས་ནས་ཕབ་བསྐྲུན་བྱ་རྒྱུ་ཡིན་པ་དང་ག་དུས་ཤིག་ལ་རྒྱ་ཆེ་མང་ཚོགས་ཀྱི་མིག་སྔར་སྟོན་ཐུབ་མིན་ཁ་གསལ་གང་ཡང་མེད་པ་རེད།
ད་རེས་ནི་པདྨ་ཚེ་བརྟན་ལགས་ཀྱི་གློག་བརྙན་ཕབ་བསྐྲུན་ལ་ཆོག་མཆན་ཐོབ་མིན་སྐོར་གྱི་གནས་ཚུལ་ཐོག་མ་ལྟ་བུ་ཆགས་ཀྱི་ཡོད་ཅིང་། པདྨ་ཚེ་བརྟན་བོད་སྐད་གློག་བརྙན་འཁྲབ་འཁྲིད་པ་ཞིག་ནས་རྒྱ་སྐད་ལ་མ་བརྟེན་ཐབས་མེད་ཀྱི་འཁྲབ་འཁྲིད་པ་ཞིག་ཏུ་གྱུར་ཏེ། ད་བར་ཁོ་བོའི་གློག་བརྙན་བརྩམས་ཆོས་ཁག་གི་བརྗོད་དོན་དང་འཕེལ་འགྲིལ། འགྱུར་ལྡོག་བཅས་ཀྱི་ཐད་རྒྱལ་སྤྱིའི་སྤྱི་ཚོགས་ཀྱིས་དོ་དབྱིངས་དང་བཅར་འདྲི་རིམ་པ་བྱས་ཡོད་ལ། ཕྱི་ལོ་ ༢༠༡༩ ལོའི་ཨ་རིའི་ནེའུ་ཡོག་དུས་བབ་སྟེང་བཀོད་པའི་རྩོམ་ཞིག་གི་ནང་། ལོ་དེའི་ཕྱི་ཟླ་ ༥ ཡས་མས་སུ་བཅར་འདྲི་ཞིག་གི་སྟེང་པདྨ་ཚེ་བརྟན་གྱིས། ངས་བརྩམས་པའི་འཁྲབ་གཞུང་དག་མི་གཞན་ཞིག་གིས་བོད་སྐད་དུ་བསྒྱུར་དགོས་ཀྱི་ཡོད་དུས་པ་མཐོང་དུས། ངའི་སེམས་ནས་བདེ་མོ་ཞིག་མ་རེད། ཅེས་རང་གི་བོད་ཡིག་གི་ཆུ་ཚད་ཞན་པོ་ཡོད་པར་གྱོད་སེམས་བསྟན་ཡོད་པ་རེད།
ཡང་ཕྱི་ལོ་ ༢༠༡༦ ལོར་པདྨ་ཚེ་བརྟན་ལགས་རྒྱ་ནག་གི་རྒྱལ་ས་པེ་ཅིན་ནས་ཟི་ལིང་གྲོང་ཁྱེར་གྱི་གནམ་གྲུ་འབབ་ཚིགས་སུ་འབྱོར་རྗེས། གནམ་གྲུ་འབབ་ཚིགས་ནས་དྲུད་སྒམ་ལྷག་སྟེ་ཕྱིར་ལེན་དུ་འགྲོ་སྐབས། གནམ་ཐང་གི་སྒྲིག་ལམ་ལ་གཏོར་བརླག་བཏང་བའི་ཉེས་མིང་འོག གནམ་ཐང་ཉེན་རྟོག་པས་ཁོང་འཛིན་བཟུང་བྱས་ཏེ་གནམ་ཐང་མངག་གཏོང་ཁང་དུ་བཙན་འཁྲིད་བྱས་ཡོད་པ་མ་ཟད། ཟི་ལིང་གི་བཀག་ཉར་ཁང་ཞིག་ཏུ་བཅུག་སྟེ་འདྲི་རྩད་གཅར་རྡུང་བཏང་བར་བརྟེན། ཁོང་མགོ་ཡོམ་འཁོར་བ་དང་བྲང་གཟེར་བ། ཡན་ལག་སྦྲིད་པ་སོགས་བྱས་ནས་གཟུགས་པོའི་གནས་སྟངས་ཛ་དྲག་ཆགས་པ་དང་། སྨན་བཅོས་བྱས་རྗེས་ལུས་སྟེང་དུ་སྔོག་ཐིག་མང་པོ་ཡོད་པ་མ་ཟད། རྨ་ཤུལ་ཚབས་ཆེན་བཟོས་ཡོད་འདུག
ཉེ་བའི་ལོ་རིམ་པའི་ནང་པདྨ་ཚེ་བརྟན་རྒྱལ་སྤྱིའི་སྡིངས་ཆའི་སྟེང་ཐོན་ཞིང་བོད་ཀྱི་སྤྱི་ཚོགས་གནས་བབ་མཚོན་པའི་བརྩམས་ཆོས་དྲི་མ་ཡལ་བ་ཁག་ཅིག་ཁྱབ་སྤེལ་བྱས་ཡོད་པ་དང་། ཕྱི་ལོ་ ༢༠༢༠ ལོར་རྒྱ་ནག་གི་གྲོང་ཁྱེར་ཧྥོ་ཧྲན་ནང་ཕྱི་ལོ་ ༢༠༢༠ ལོའི་ལྷོ་ཕྱོགས་རྩོམ་རིག་བྱ་དགའ་ཆེན་མོ་སྤྲོད་པའི་མཛད་སྒོའི་ཐོག་པདྨ་ཚེ་བརྟན་ལགས་ཀྱི་རྒྱ་ཡིག་གི་སྒྲུང་གཏམ་ཧྲགས་བསྡུས་ཨོ་རྒྱན་གྱི་སོ་ཞེས་པར་ལོ་འཁོར་གྱི་བརྩམས་སྒྲུང་པ་ཞེས་པའི་བྱ་དགའ་ཐོབ་ཡོད་ལ། དེ་ནི་ད་ནས་རྩིས་པའི་པདྨ་ཚེ་བརྟན་ཕྱི་གསལ་ནང་གསལ་སྡིངས་ཆ་ཞིག་གི་སྟེང་ཐོན་པ་གསར་ཤོས་དེ་ཡིན་པ་རེད།
པདྨ་ཚེ་བརྟན་གྱི་བརྩམས་ཆོས་ལས་བྱུང་བའི་གློག་བརྙན་ཐར་ལོ་དང་ཁྱི་རྒན། ལག་དམར། དེ་བཞིན། དབུགས་ལྒང་བཅས་ལ་རྒྱལ་སྤྱིའི་ཝཱ་ནེ་སི་(Venice) དང་། ཨ་རིའི་བྷིར་ཀི་ལིན་(Brooklyn) གློག་བརྙན་དུས་སྟོན། དེ་བཞིན་ཐའེ་ཝན་དང་རྒྱ་ནག་གི་གློག་བརྙན་དུས་སྟོན་སོགས་ཀྱི་ཐོག་ཁྱབ་ཁོངས་འདྲ་མིན་གྱི་གཟེངས་རྟགས་བྱ་དགའ་ཐོབ་སྟེ། རྒྱལ་སྤྱིའི་སྟེང་པདྨ་ཚེ་བརྟན་ནི་བོད་མི་གློག་བརྙན་འཁྲབ་འཁྲིད་པ་ཞིག་ཡིན་པ་གསལ་སྟོན་བྱས་ཡོད།
གསར་འགོད་པ། སྐལ་བཟང་སྦྱིན་པ།
