རྒྱ་གར་གྱི་འབྲས་ལྗོངས་གཞུང་ནས་སྲིད་བློན་མོ་དྷི་མཆོག་ལ་རེ་སྐུལ་ཞུས་ཡོད་པ་ལྟར་གང་མགྱོགས་༧རྒྱལ་དབང་ཀརྨ་པ་མཆོག་རྒྱ་གར་ནང་ཆིབས་བསྒྱུར་བསྐྱང་ཆོག་པའི་བཟང་ཕྱོགས་ཀྱི་བཀའ་ལན་གནང་ཡོད་སྐོར་བསྒྲགས་འདུག
ཟླ་འདིིའི་ཕྱི་ཚེས་ ༡༤ ཉིན་རྒྱ་གར་གྱི་ཧིན་རྡུ་གསར་ཁང་ (The Hindu)གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡༹༤ ཉིན་འབྲས་ལྗོངས་ཀྱི་གསར་འགོད་གསལ་བསྒྲགས་ཤིག་གི་ཐོག སྤྱི་ཁྱབ་བློན་ཆེན་པུ་རིམ་སིང་རྟ་མང་(Prem Singh Tamag) ལགས་ཀྱིས། གང་མགྱོགས་རྒྱལ་དབང་ཀརྨ་པ་མཆོག་རྒྱ་གར་ནང་ཆིབས་བསྒྱུར་བསྐྱང་ཐུབ་སྲིད་ཡོད་སྐོར་གསུངས་ཡོད་པ་ལྟར། དེ་རིང་འདི་གའི་གསར་འགོད་པས་ཁ་པར་བརྒྱུད་མཚུལ་ཕུ་བླ་བྲང་གི་དབུ་འཛིན་སྐལ་བཟང་བསོད་ནམས་ལགས་སུ། རྒྱ་གར་གཞུང་ནས་བཟང་ཕྱོགས་ཀྱི་བཀའ་ལན་གནང་བའི་གནས་ཚུལ་དེ་བླ་བྲང་ནས་མཁྱེན་རྟོགས་བྱུང་ཡོད་མེད་སྐོར་དྲིས་པར་ཁོང་གིས། འབྲས་ལྗོངས་བློན་ཆེན་གྱིས་གསར་འགོད་གསལ་བསྒྲགས་སྤེལ་ནས་༧རྒྱལ་དབང་ཀརྨ་པ་མཆོག་གདན་ཞུའི་སྐོར་དབུས་གཞུང་ལ་བཀའ་མོལ་གནང་ཡོད་པ་དང་། རྒྱ་གར་དབུས་གཞུང་གིས་བཟང་ཕྱོགས་ཀྱི་བཀའ་ལན་གནང་བའི་གསལ་བསྒྲགས་སྤེལ་བ་དེ་གསར་འགྱུར་བརྒྱུད་ལམ་ནས་གནས་ཚུལ་ཤེས་རྟོགས་བྱུང་བ་མ་གཏོགས། དོན་དངོས་སུ་འདིའི་སྐོར་གནས་ཚུལ་གང་ཡང་མ་བྱུང་། ཞེས་བཀའ་ལན་གནང་བྱུང་།
ཡང་༧རྒྱལ་དབང་ཀརྨ་པ་མཆོག་ནས་མགྱོགས་མྱུར་རྒྱ་གར་ནང་ཕེབས་ཐུབ་པར་ཐུགས་རེ་ག་འདྲ་གནང་གི་ཡོད་དྲིས་པར་ཁོང་གིས། ༧རྒྱལ་དབང་ཀརྨ་པ་མཆོག་བོད་ནས་རྒྱ་གར་དུ་ཕེབས་དགོས་དོན་གཙོ་བོ་ནི། ༧གོང་ས་མཆོག་རྒྱ་གར་ལ་བཞུགས་ཡོད་པ་དང་། རྒྱ་གར་ནི་སངས་རྒྱས་ཀྱི་འཕགས་པའི་ཡུལ་ཡིན་པ། སྐུ་གོང་མའི་གདན་ས་ལ་སོགས་པ་གཙོ་བོ་འབྲས་ལྗོངས་དང་རྒྱ་གར་ནང་ཆགས་ཀྱི་ཡོད་པའི་དགོས་དམིགས་ཐོག་ནས་རྒྱ་གར་དུ་ཕེབས་པ་དང་བཞུགས་པ་རེད། ཁོང་རྒྱ་གར་དུ་མ་ཕེབས་པའི་རྣམ་པ་རྩ་བ་ཉིད་ནས་ཡོད་མ་རེད་ལ། མུ་མཐུད་རྒྱ་གར་དུ་ཕེབས་རྒྱུ་དང་ཐུགས་འདོད། རེ་བ། འདོད་མོས་དེ་ག་རང་གནང་གི་ཡོད་པ་རེད། ཅེས་བརྗོད་བྱུང་།
གསར་འགོད་གསལ་བསྒྲགས་ཐོག་འབྲས་ལྗོངས་སྤྱི་ཁྱབ་བློན་ཆེན་མཆོག་གིས། ང་ཚོས་རེ་སྐུལ་ཞུས་པ་ལྟར་༧རྒྱལ་དབང་ཀརྨ་པ་མཆོག་གང་མགྱོགས་འབྲས་ལྗོངས་སུ་ཕེབས་པར་བཟང་ཕྱོགས་ཀྱི་བཀའ་ལན་གནང་བྱུང་། ཞེས་དང་།མངའ་སྡེ་གཞུང་ནས་ཁོང་གི་དྲུང་དུ་སྐུ་ཚབ་མི་སྣ་ཆེད་མངགས་ཀྱིས། གནད་དོན་དེ་དང་འབྲེལ་བའི་ཐོག་ལ་བཀའ་མོལ་ཞུ་རྒྱུ་ཡིན། ཞེས་གསུངས་འདུག
ཧིན་རྡུ་གསར་ཁང་གི་གསར་འགྱུར་ནང་། འབྲས་ལྗོངས་སྤྱི་ཁྱབ་བློན་ཆེན་མཆོག་གིས་སྲིད་འཛིན་མོ་དྷི་མཆོག་ལ་ཐུག་འཕྲད་གནང་ཚར་ཏེ་ཉིན་གཅིག་གི་རྗེས་སུ། འབྲས་ལྗོངས་གཞུང་ནས་ཆོས་རིག་བློན་ཆེན་བསོད་ནམས་བླ་མ་ལགས་ཕྱི་རྒྱལ་དུ་༧རྒྱལ་དབང་ཀརྨ་པ་ལ་དེ་འབྲེལ་བཀའ་མོལ་ཞུ་བར་ཆེད་དུ་གཏོང་བའི་ཐག་གཅོད་གནང་ཡོད་སྐོར་བཀོད་འདུག་ལ། ༧རྒྱལ་དབང་ཀརྨ་པ་མཆོག་འབྲས་ལྗོངས་ཀྱི་གདན་ས་རུམ་ཐེག་དགོན་དུ་ཆིབས་བསྒྱུར་བསྐྱང་ཐུབ་རྒྱུར་དད་ལྡན་སེར་སྐྱ་མི་མང་གིས་རེ་བ་ཆེན་པོ་ཞུ་ཡི་ཡོད་འདུག
༧རྒྱལ་དབང་ཀརྨ་པ་མཆོག་བོད་ཆབ་མདོ་ལྷ་ཐོག་གི་འབྲོག་ཁྱིམ་ཞིག་ཏུ་སྐུ་འཁྲུངས་ཡོད་པ་དང་། ཕྱི་ལོ་ ༡༩༩༩ ལོར་དགུང་ལོ་ ༡༤ བཞེས་སྐབས་རྒྱ་གར་ནང་བཙན་བྱོལ་དུ་ཕེབས་རྗེས། བཞུགས་སྒར་དྷ་རམ་ས་ལའི་ཉེ་འཁྲིས་རྒྱུད་སྟོད་དགོན་དུ་ཡུན་རིང་བཞུགས་ཡོད་པ་རེད། ཕྱི་ལོ་ ༢༠༡༧ ལོར་ཡུ་རོབ་དང་ཨ་རིའི་ནང་ཕེབས་རྗེས་ཕྱིར་ཆིབས་བསྒྱུར་བསྐྱངས་ཐུབ་མེད་པ་རེད།
གསར་འགོད་པ། བསྟན་འཛིན་ཕུར་བུ། དཔལ་ལྡན།
Good News! Wonderful and all the best! ༧རྒྱལ་དབང་ཀརྨ་པ་མཆོག་བོད་ནས་རྒྱ་གར་དུ་ཕེབས་དགོས་དོན་གཙོ་བོ་ནི། ༧གོང་ས་མཆོག་རྒྱ་གར་ལ་བཞུགས་ཡོད་པ་དང་། རྒྱ་གར་ནི་སངས་རྒྱས་ཀྱི་འཕགས་པའི་ཡུལ་ཡིན་པ། སྐུ་གོང་མའི་གདན་ས་ལ་སོགས་པ་གཙོ་བོ་འབྲས་ལྗོངས་དང་རྒྱ་གར་ནང་ཆགས་ཀྱི་ཡོད་པའི་དགོས་དམིགས་ཐོག་ནས་རྒྱ་གར་དུ་ཕེབས་པ་དང་བཞུགས་པ་རེད། ཁོང་རྒྱ་གར་དུ་མ་ཕེབས་པའི་རྣམ་པ་རྩ་བ་ཉིད་ནས་ཡོད་མ་རེད་ལ། མུ་མཐུད་རྒྱ་གར་དུ་ཕེབས་རྒྱུ་དང་ཐུགས་འདོད། རེ་བ། འདོད་མོས་དེ་ག་རང་གནང་གི་ཡོད་པ་རེད། 🙂
ཁྱེད་ཀྱིས་གོང་ས་མཆོག་གི་དབུ་འོག་དཔུང་འདེགས་གནང་ཏེ།
སྔར་གྱི་རྒྱལ་ཕྲན་འདྲ་བའི་ཆོས་རྒྱུན་ཁག་གི་གདུལ་བྱར་བཀའ་སློབ་ལམ་སྟོན་གནང་ཏེ་ཆོས་གང་བྱེད་རང་དབང་ཡིན་ནའང་གཞུང་ས་མཆོག་གཅིག་ལས་མེད་པ་ཉིད་ངེས་ཤེས་བརྟན་པོ་བཟོས་གནང་དགོས་གལ་ཡིན་པར་མ་གཏོགས།
ད་ལྟ་ཡང་ཆོས་རྒྱུན་ཁག་ནི་སྔར་གྱི་རྒྱལ་ཕྲན་དང་མཚུངས་པའི་དབང་ཤེད་ཀྱིས་འཚོ་ཡོད།
གཞུང་ལའང་ཀྱོག་འཐེན་འབའ་ཞིག་གིས་དུས་འདས་པར་བྱས་ཏེ་འདུག་ཡོད་པ་མཁྱེན་ནོ།
གཏམ་བཟང་རྣ་བའི་མགྲོན་དུ་བསུ་།
དད་ལྡན་ཀུན་གྱིས་སྨོན་པ་འགྲུབ་།
ལེགས་ཚོགས་རྩ་བ་དད་དམ་གཙང་།
ཀརྨ་པ་མཁྱེན་ནོ་། ཀརྨ་པ་མཁྱེན་ནོ་། ཀརྨ་པ་མཁྱེན་ནོ་།