བགྲོ་གླེང་ཐོག་ནས་བློན་ཆེན་དམ་པ་ཝར་བྷ་དྷཱ་རཱ་སིང་མཆོག་ལ་རྗེས་དྲན་མྱ་ངན་ཞུས།

ཧི་མ་ཅལ་གྱི་བློན་ཆེན་ཟུར་བ་དམ་པ་ཝར་བྷ་དྷཱ་རཱ་སིང་མཆོག་དགོངས་པ་རྫོགས་ཏེ་ཞག་ཞེ་དགུ་འཁོར་བ་དང་བསྟུན། བོད་དང་ཁུ་ནུ་བར་གྱི་འབྲེལ་ལམ་སྐོར་ལ་བགྲོ་གླེང་འཚོགས་ཏེ་རྗེས་དྲན་མྱ་ངན་ཞུས་གནང་སོང་།

དེ་རིང་སྔ་དྲོ་ཆུ་ཚོད་ ༩།༣༠ སྟེང་སྲིད་སྐྱོང་ཚོགས་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་འོག ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་བ་སྐུ་ཞབས་ཝར་བྷ་དྷཱ་རཱ་སིང་མཆོག་དགོངས་པ་རྫོགས་ནས་ཞག་ཞེ་དགུའི་སྨོན་ལམ་དང་བསྟུན་  ༼ཁུ་ནུ་དང་བོད་དབར་གྱི་ལོ་རྒྱུས་ཀྱི་འབྲེལ་བ། ༽ཞེས་པའི་བརྗོད་གཞིའི་ཐོག་བགྲོ་གླེང་ཞིག་འཚོགས་སོང་བ་དང་། མཛད་རིམ་སྟེང་གནས་ཆུང་རྡོ་རྗེ་སྒྲ་དབྱངས་གླིང་གྲྭ་ཚང་གི་དགེ་འདུན་པ་ཁག་ཅིག་གིས་སྨོན་ལམ་གསུངས་གནང་ཞིང་།  བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས། མཆོད་འབུལ་སྨོན་ལམ་དང་འབྲེལ་ནས་བགྲོ་གླེང་གོ་སྒྲིག་ཞུ་དགོས་པའི་རྒྱུ་མཚན་ངོ་སྤྲོད་དང་། འགན་འཛིན་གཞོན་འཛམ་ལྷ་བསྟན་པ་རྒྱལ་མཚན་ལགས་ཀྱིས་སྤྱི་ཡོངས་ནས་མཛད་རིམ་ངོ་སྤྲོད་གནང་སོང་ལ། ད་རེས་བགྲོ་གླེང་སྟེང་སྲིད་སྐྱོང་མཆོག་གི་ལམ་སྟོན་འོག ཁུ་ནུ་ཕྱོགས་ཀྱི་བླ་ཆེན་དང་མཁས་དབང་སོགས་གནད་ཡོད་མི་སྣ་གང་མང་ནས་མཉམ་ཞུགས་ཐུབ་ཐབས་སུ་འབད་བརྩོན་ཞུས་ཡོད་ཀྱང་། དུས་ཡུན་ཐུང་དྲགས་པའི་རྐྱེན་གྱིས་ཐོག་མའི་བསམ་འདུན་བཞིན་བྱུང་ཐུབ་མེད་པ་དང་། མ་འོངས་པར་ཁུ་ནུའི་བླ་ཆེན་རྣམ་པའི་དབུས་མཁས་དབང་རྣམས་ལ་འབྲེལ་བ་ཞུས་ཏེ་ཡིག་ཐོག་ནས་བགྲོ་གླེང་ཐོག་གསུང་བཤད་གནང་བའི་འབོད་སྐུལ་ཞུ་རྒྱུ་ཡིན་འདུག

དེ་རིང་མཛད་སྒོའི་སྟེང་བོད་ཀྱི་སྲིད་བྱུས་ཉམས་ཞིབ་ཁང་གི་ལས་བྱེད་རྣམས་གཙོས་པའི་སྲི་ཞུ་ལས་བྱེད་པ་དང་གསར་འགོད་པ་བཅས་འཛོམས་ཡོད་པ་དང་། སྐབས་དེར་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་ཀྱིས་བགྲོ་གླེང་གོ་སྒྲིག་གི་དགོས་དམིགས་སྐོར་ལ་གསུང་དོན།  གླང་ཆེན་ཁ་འབབ་ཀྱི་འབབ་རྒྱུན་དུ་གནས་པའི་ཁུ་ནུ་ནི་མི་རིགས་དང་སྐད་ཡིག ཆོས་ལུགས་སོགས་གང་ཐད་ནས་བོད་དང་འབྲེལ་བ་ཧ་ཅང་དམ་པོ་ཡོད་པའི་ཡུལ་ལུང་ངམ་རྒྱལ་ཕྲན་ཞིག་ཡིན། དུས་རབས་བཅུ་བདུན་པའི་ལོ་རབས་བརྒྱད་ཅུའི་ནང་བོད་ཀྱི་དམག་དཔོན་ཆེན་པོ་དགའ་ལྡན་ཚེ་དབང་ལགས་དང་ཁུ་ནུའི་རྒྱལ་པོ་རྗེ་སེངྒ་མཆོག་རྣམ་གཉིས་ནས་མ་ཧ་གུ་རི་ཤཱཀྱ་མུ་ནི་འོག་དཔང་བཙུགས་ནས་གནའ་དམ་མཛད་པར་བརྟེན། གངས་རིནཔོ་ཆེའི་དཀར་པོ་གངས་བཞུར་བ་དང་མ་ཕམ་གཡུ་མཚོའི་ཆུ་སྐམ་པ། བྱ་ཕོ་རོག་ལ་སྐྲ་དཀར་པོ་སྐྱེས་པ་མ་གཏོགས། སྐལ་བ་མ་སྟོང་གི་བར་དུ་མཛའ་མཐུན་བྱ་རྒྱུའི་ཆོད་དོན་བཅད།

དེ་ནས་བཟུང་བོད་དང་ཁུ་ནུ་བར་གྱི་འབྲེལ་བ་དེ་ལོ་རྒྱུས་རིང་པོར་གཞི་བཞག་ནས་ལྷག་པར་དམ་ཟབ་ཏུ་ཕྱིན་ཡོད་པ་དེང་སང་མཁས་དབང་ཁག་གིས་གསུང་ངེས་ཡིན་པ་ལྟར། ཚང་མས་མཁྱེན་གསལ་ནི་ཁུ་ནུ་པའི་ནང་བོད་ཀྱི་ཆོས་དང་རིག་གཞུང་ལ་ཕན་རླབས་ཆེན་པོ་གནང་བའི་བླ་ཆེན་དང་མཁས་པ་མང་པོ་བྱུང་མྱོང་བ། དཔེར་ན་༧གོང་ས་སྐྱབས་མགོན་ཆེན་པོ་མཆོག་གི་ཟབ་ཆོས་ཞུ་ས་གཙོ་བོ་ཁུ་ནུའི་བླ་མ་བསྟན་འཛིན་རྒྱ་མཚོ་ལྟ་བུ་དང་། དེ་བཞིན་དེང་རབས་ཀྱི་བོད་ཡིག་ཚགས་ཤོག་འདོན་མཁན་ཐོག་མ་ཁུ་ནུ་བ་ཡིན་པ་དང་བོད་རྩིས་ཀྱི་ལོ་ཐོ་འདོན་པ་ལོ་རྒྱུས་ཐོག་བྱུང་མྱོང་ཡོད་ཀྱང་།  ཚོན་དྲ་ནས་བརྒྱུད་འགྲེམས་སྤེལ་ཞུས་པ་ནི་ཁུ་ནུའི་ལོ་ཐོ་ཞེས་སྐད་གྲགས་བྱུང་བ་དེ་ཕལ་ཆེ་ཐེངས་དང་པོ་ཡིན་ཞིང་། ཁུ་ནུའི་ལོ་ཐོ་ཐོག་མར་བཏོན་པའི་ལོ་ཚིགས་ནི་བོད་གཞུང་སྨན་རྩིས་ཁང་གི་ལོ་ཐོ་འདོན་པ་ལས་སྔ་བ་ཡོད་པ་ཡིན། དེ་འདྲ་བའི་ལོ་རྒྱུས་རིང་མོ་གཞི་བཞག་སྟེ། དེ་རིང་ང་ཚོ་འདིར་འཛོམས་པ་ནི་ཐོག་མར་དུས་རབས་བཅུ་བདུན་པའི་ནང་བོད་དང་ཁུ་ནུ་བར་ཆིངས་ཡིག་འཇོག་མཁན་ཁུ་ནུའི་རྒྱལ་པོ་རྗེ་སེངྒ་མཆོག་གི་རྒྱུད་པ་སྟེ། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་བ་སྐུ་ཞབས་ཝར་བྷ་དྷཱ་རཱ་སིང་མཆོག་ཚེ་ལས་འདས་པར་བློ་ཕམ་དང་ཞག་ཞེ་དགུ་ཚང་བར་སྲུང་གཙིའི་མྱ་ངན་གུས་འདུན་ཞུ་བཞིན་ཡོད། ཅེས་དང་། འདས་པའི་ལོ་དྲུག་ཅུ་ལྷག་རིང་འདས་པོ་དམ་པ་སྐུ་ཞབས་་ཝར་བྷ་དྷཱ་རཱ་སིང་མཆོག་ནས་བོད་དང་ཁུ་ནུ་བར་གྱི་ཆིངས་ཡིག་གི་ནང་དོན་གཞིར་བཟུང་མཛའ་མཐུན་རྒྱུན་སྐྱོང་དང་ལྷག་པར་༧གོང་ས་མཆོག་གི་དབུས་སྐྱབས་བཅོལ་བོད་མི་རྣམས་ལ་ཕྱོགས་གང་ཐད་ནས་རྒྱབ་སྐྱོར་གནང་ཡོད་པ་སོགས་ལ་བརྟེན་ནས་མཆོད་འབུལ་སྨོན་ལམ་དང་འབྲེལ་ནས་བགྲོ་གླེང་གོ་སྒྲིག་ཞུས་ཡིན་སྐོར་སོགས་གསུངས་སོང་།

ཐེངས་འདིའི་ཉིན་གཅིག་གི་བགྲོ་གླེང་སྟེང་སྐྱབས་རྗེ་ལོ་ཆེན་རིན་པོ་ཆེ་མཆོག་གི་དབུས་མཁས་དབང་ཤེས་རབ་ཆོས་འཕེལ་ལགས་དང་། དགེ་རྒན་ཆེན་མོ་སེམས་དཔའ་རྡོ་རྗེ་ལགས། ཨཅཱརྱ་རོ་ཤན་ལཱ་ནེ་གེ་ལགས་སོགས་མཁས་དབང་བཅུ་ནས། བོད་དང་ཁུ་ནུའི་འབྲེལ་བ་སྤྱི་བཤད་དང་། དུས་རབས་བཅུ་བདུན་པའི་ནང་བོད་དང་ཁུ་ནུའི་དབར་གྱི་ཆིངས་ཡིག ཁུ་ནའི་ནང་དགེ་ལུགས་པའི་དགོན་པ་དང་འབྲུག་པ་བཀའ་བརྒྱུད་པའི་དགོན་པ། ཁུ་ནུ་དང་བཀྲ་ཤིས་ལྷུན་པོ། མཚོ་པདྨ་དང་འབྲེལ་བའི་སྐོར་སོགས་བརྗོད་གཞི་མི་འདྲ་བ་བཅུའི་ཐོག་གཏམ་བཤད་གནང་གི་ཡོད་པ་རེད།

གསར་འགོད་པ། སྐལ་བཟང་སྦྱིན་པ།