སྲིད་སྐྱོང་སྤེན་པ་ཚེ་རིང་མཆོག་ནས་༧གོང་ས་མཆོག་ལ་མཇལ་ཁ་ཞུས།

སྲིད་སྐྱོང་སྤེན་པ་ཚེ་རིང་མཆོག་གིས་༧གོང་ས་མཆོག་ལ་མཇལ་ཁ་ཞུས་ཏེ། ཉེ་ལམ་ལ་དྭགས་ཀྱི་ཕྱོགས་སྐྱོད་དང་དམིགས་བསལ་ད་བར་གྱི་ལས་དོན་ཁག་གི་སྐོར་ལ་སྙན་གསེང་ཞུས་ཡོད་འདུག

དེ་རིང་སྔ་དྲོར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་༸གོང་ས་༸རྒྱལ་བ་རིན་པོ་ཆེ་མཆོག་ལ་དྲ་ལམ་བརྒྱུད་མཇལ་ཁ་ཞུས་ཏེ། སྲིད་སྐྱོང་མཆོག་གི་གཞུང་འབྲེལ་ཕྱོགས་ཕེབས་ཐོག་མ་ལ་དྭགས་སླེ་བྱང་ཁུལ་དུ་ཉིན་གྲངས་བརྒྱད་རིང་བསྐྱངས་པའི་སྐོར་གྱི་གནས་ཚུལ་ཁག་ཅིག་སྙན་གསེང་ཞུས་ཡོད་པ་རེད།

དེ་འབྲེལ་བོད་མིའི་སྒྲིག་འཛུགས་ཀྱི་ངོ་དེབ་སྟེང་སྤེལ་བའི་བརྙན་ཞིག་གི་ནང་། སྐབས་དེར་སྲིད་སྐྱོང་མཆོག་ནས་༧གོང་ས་སྐྱབས་མགོན་རིན་པོ་ཆེ་མཆོག་ལ་སྒོ་གསུམ་གུས་པའི་ཕྱག་གསུམ་དང་མཇལ་དར་ཕུལ་གནང་ཞིང་། ༧གོང་ས་མཆོག་ནས་སྲིད་སྐྱོང་ལ་འཚམས་འདྲི་ཞུས་གྲུབ་མཚམས། སྲིད་སྐྱོང་མཆོག་ནས། ཕྱི་ཚེས་ ༢༠ ནས་ཉིན་གྲངས་བརྒྱད་དང་ཕྱེད་ཀའི་རིང་འོས་བསྡུའི་སྐབས་ནས་གཞིས་ཆགས་ཁག་ལ་སྐོར་ར་བརྒྱབ་པ་ཡིན་ན་ཐོག་མར་དྭགས་ལ་བསྐྱོད་རྒྱུའི་ཁས་ལེན་བྱས་པ་གཞིར་བཟུང་ལ་དྭགས་ལ་ཕྱིན་པ་ཡིན་ལ།  ལ་དྭགས་ནི་བོད་མིའི་གཞིས་ཆགས་ཆེན་པོ་ཞིག་དང་གལ་ཆེན་ཞིག་ཡིན་པས། བོད་མི་འདུས་སྡོད་ཀྱི་ས་ཁུལ་གཅིག་ཀྱང་མ་ལུས་པར་ཚང་མར་སྐོར་ར་བརྒྱབ་ཡིན། ཞེས་སྙན་གསེང་ཞུས་གནང་སོང་།

བོད་མིའི་སྒྲིག་འཛུགས་ཀྱི་དྲ་རྒྱ་ལྟར་ན། ད་རེས་སྲིད་སྐྱོང་སྤེན་པ་མཆོག་གིས་༧གོང་ས་མཆོག་ལ་ལ་དྭགས་ཀྱི་ཕྱོགས་སྐྱོད་སྐོར་དང་ལས་ཁུར་ཞུས་པ་ནས་ད་བར་གྱི་ལས་དོན་ཁག་གི་སྐོར་སྙན་གསེང་ཞུས་ཡོད་འདུག་ལ། འདི་གའི་གསར་འགོད་པས་བོད་མིའི་སྒྲིག་འཛུགས་ཀྱི་བཀའ་དྲུང་སྦྲ་གཉིས་ཚེ་རྒྱལ་ལགས་སུ་ཁ་པར་བརྒྱུད་འབྲེལ་བ་གནང་ཐབས་ཞུས་ནའང་མཐུད་ཐུབ་མ་སོང་།

ད་རེས་ནི་སྲིད་སྐྱོང་སྤེན་པ་ཚེ་རིང་མཆོག་གིས་ལས་ཁུར་ཞུས་ཏེ༧གོང་ས་མཆོག་གི་མཇལ་ཁ་ཐོབ་པ་ཐེངས་གསུམ་པ་ཆགས་ཀྱི་ཡོད་པ་ལྟར། ཉེ་ལམ་ཕྱི་ཟླ་ ༥ ཚེས་ ༢༧ ཉིན་སྲིད་སྐྱོང་གསར་རྙིང་དབར་གྱི་དམ་འབུལ་མཛད་སྒོའི་སྐབས་སྲིད་སྐྱོང་གསར་རྙིང་གཉིས་ལ་༧གོང་ས་མཆོག་ནས་མཇལ་ཁ་གནང་ཡོད་པ་དང་། དེ་བཞིན། ཕྱི་ཟླ་ ༦ ཚེས་ ༢ ཉིན་༧གོང་ས་མཆོག་ནས་བོད་རིགས་གཞོན་སྐྱེས་ཚོར་དམིགས་པའི་ཆོས་འབྲེལ་གྲུབ་རྗེས། སྲིད་སྐྱོང་སྤེན་པ་ཚེ་རིང་མཆོག་སྒེར་ལ་མཇལ་ཁ་དང་བཀའ་སློབ་སྩལ་གནང་ཡོད་པ་རེད།

ཕྱི་ཟླ་ ༨ ཚེས་ ༢༠ ནས་ཉིན་གྲངས་བརྒྱད་དང་ཕྱེད་ཀ་ཙམ་གྱི་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ལ་དྭགས་ལ་ཕྱོགས་སྐྱོད་དུ་ཕེབས་ཏེ། ས་གནས་བོད་རིགས་མི་མང་གི་གནས་སྟངས་ལ་རྒྱུས་ལོན་གཙོས་ས་གནས་རྒྱ་གར་གྱི་གནད་ཡོད་མི་སྣ་དང་མི་མང་བཅས་ལ་དྭགས་ཕྱོགས་ཀྱི་བོད་མི་འདུས་སྡོད་ཀྱི་ས་ཁུལ་ཡོངས་ལ་ཕྱོགས་སྐྱོད་གནང་སྟེ་ཕྱིར་བཞུགས་སྒར་དུ་ཕེབས་གནང་ཡོད་པ་རེད།

གསར་འགོད་པ། སྐལ་བཟང་སྦྱིན་པ།