མང་གཙོའི་དུས་ཆེན་ཐེངས་ ༦༡ པའི་གཞུང་འབྲེལ་མཛད་སྒོ་འཚོགས་གནང་སོང་།

སྲིད་སྐྱོང་མཆོག་གིས་སྤྱི་ལྷན་གྱི་དཀའ་རྙོག་དང་འབྲེལ་བོད་ཀྱི་ལོ་རྒྱུས་དང་མི་རིགས་ལ་འགན་ཁུར་པའི་ཐོག་ནས་བསམ་ཞིབ་གདམ་ག་མ་ནོར་བ་གནང་དགོས་པའི་དུས་ལ་བབས་ཡོད་སྐོར་གསུངས།

དེ་རིང་སྔ་དྲོ་ཆུ་ཚོད་ ༩།༣༠ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་༧གོང་ས་རྒྱལ་བ་རིན་པོ་ཆེ་མཆོག་ནས་རང་རིགས་བོད་མི་རྣམས་ལ་མང་གཙོའི་གསོལ་རས་སྩལ་ཏེ་ལོ་ངོ་ ༦༡ འཁོར་བའི་གཞུང་འབྲེལ་དུས་དྲན་སྲུང་གཙི་ཞུས་གནང་སོང་བ་དང་། མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཁྲིམས་ཞིབ་པ་རྣམ་པ། དེ་བཞིན་བོད་མི་མང་སྤྱི་འཐུས་དང་བོད་མིའི་སྒྲིག་འཛུགས་ཀྱི་ལས་ཁུངས་ཁག་གི་དྲུང་ཆེ་དང་དྲུང་ལས། སྲི་ཞུའི་ལས་བྱེད་པ་དང་སློབ་ཕྲུག་བཅས་འཛོམས་འདུག

མཛད་རིམ་གྱི་ཐོག་མར་བོད་ཀྱི་ཟློས་གར་ཚོགས་པས་རོལ་ཆས་དཀྲོལ་རྡུང་གི་དབུ་འཛུགས་འོག བོད་རྒྱལ་ཁབ་ཆེན་པོའི་རྒྱལ་གླུ་དང་མང་གཙོའི་གླུ་གཞས་གྱེས་ཤིང་། ཕྱི་ལོ་ ༢༠༡༠ ལོར་༧གོང་ས་རྒྱལ་བ་རིན་པོ་ཆེ་མཆོག་ནས་བོད་རྒྱལ་ཡོངས་གཞུང་མང་ཚོགས་ཆེན་ཐེངས་དང་པོའི་མཇུག་སྡོམ་མཛད་སྒོའི་སྟེང་སྩལ་བའི་བཀའ་སློབ་ཅིག་གཟིགས་འབུལ་ཞུས་གྲུབ་མཚམས། སྲིད་སྐྱོང་མཆོག་ནས་ཞབས་ལོ་ཉེར་ལྔའི་རིང་སྲི་ཞུ་ཞུས་མྱོང་བའི་ལས་བྱེད་གཅིག་དང་། ཕྱི་ལོ་ ༢༠༢༡ ལོར་རྒྱ་གར་རྒྱལ་ཡོངས་ཡིག་རྒྱུགས་ཁྲོད་བརྒྱ་ཆ་ ༩༥ ཡན་ལོན་མཁན། འཛིན་རིམ་བཅུ་གཉིས་པའི་སློབ་མ་གྲངས་ ༢༧ དང་འཛིན་རིམ་བཅུ་བའི་སློབ་མ་གྲངས་ ༦ བཅས་ལ་སྲིད་སྐྱོང་སློབ་ཡོན་གཟེངས་རྟགས་ཕུལ་བ་དང་། སྲིད་སྐྱོང་མཆོག་གི་ལེགས་གསོལ་བྱ་དགའ་ཐོབ་མཁན་འཛིན་རིམ་བཅུ་གཉིས་པའི་སློབ་མ་གཉིས་དང་བཅུ་བའི་སློབ་མ་གཅིག དེ་བཞིན། སྲིད་སྐྱོང་རིགས་གཅིག་རྐང་འཛིན་ཆེད་བསྟོད་བཞེས་མཁན་འབུམ་རམས་པ་ ༤ བྱུང་བ་དང་། འདི་ལོར་དགའ་ལྡན་ཕོ་བྲང་གི་བྱ་དགའ་ཐོབ་མཁན་སློབ་མ་བཅུ་བཅས་ལ་གཟེངས་བསྟོད་བྱ་དགའ་སོགས་ཕུལ་གནང་སོང་། ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས། བདེན་རྒྱབ་རྩོམ་སྒྲིག་ཚོགས་ཆུང་ནས་དཔར་བསྐྲུན་ཞུས་པའི་སྐུའི་གཅེན་པོ་བཀའ་བློན་ཁྲི་ཟུར་རྒྱལ་ལོ་དོན་གྲུབ་མཆོག་གི་སྐུ་ཚེའི་ལོ་རྒྱུས་ ༼བོད་ཀྱི་ཁྲག་དང་མིག་ཆུའི་ལོ་རྒྱུས་ལས་བརྒྱུས་པའི་རྒྱ་ལོ་དོན་གྲུབ༽ ཞེས་པའི་དཔེ་དེབ་དབུ་འབྱེད་གནང་སོང་།སྲིད་སྐྱོང་སྤེན་པ་ཚེ་རིང་མཆོག་ནས་བོད་མིའི་མང་གཙོ་དབུ་བརྙེས་ཏེ་ལོ་ངོ་ ༦༡ འཁོར་བའི་བཀའ་ཤག་གི་གསུང་བཤད་སྒྲོག་སྤྱངས་གནང་སྐབས། ཕྱི་ལོ་ ༡༩༦༠ ཟླ་ ༢ ཚེས་ ༣ ཉིན་བཙན་བྱོལ་བོད་མི་རྣམས་རྡོ་རྗེ་གདན་དུ་འཛོམས་ཏེ་མནའ་གན་མཐུ་མོ་ཆེ་འབུལ་སྐབས། ༧གོང་ས་མཆོག་ནས་མང་གཙོ་གཞུང་ཞིག་འཛུགས་རྒྱུའི་དགོངས་དོན་འོག ཕྱི་ལོ་ ༡༩༦༠ ཟླ་ ༩ ཚེས་ ༢ ཉིན་ཆོས་བརྒྱུད་ཆེན་པོ་བཞི་དང་ཆོལ་ཁ་གསུམ་ནས་འཐུས་མི་གསུམ་རེ་འོས་བསྡུའི་ལམ་ནས་བསྐོ་གཞག་དགོས་པའི་བཀའ་སློབ་སྩལ་དོན་ལྟར་དམ་འབུལ་ཞུས་པ་དང་ཕྱི་ལོ་ ༡༩༧༥ ལོར་བཀའ་ཤག་གིས་དགུ་བའི་ཚེས་ ༢ ཉིན་བོད་ཀྱི་མང་གཙོའི་ཉིན་མོར་གཞུང་འབྲེལ་གཏན་འབེབས་བྱས་པ་སོགས་ཀྱི་བརྒྱུད་རིམ་ངོ་སྤྲོད་དང་སྦྲགས།
ཕྱི་ལོ་ ༡༩༧༤ ལོར། བོད་ཀྱི་གཞོན་ནུ་ལྷན་ཚོགས་ནས་ཆོལ་ཁ་སོ་སོའི་སྤྱི་འཐུས་འོས་གཞི་ལ་ཆོལ་ཁ་གསུམ་གའི་འོས་འཕེན་པས་འོས་བསྡུ་བྱེད་དགོས་པའི་བསམ་འཆར་ཕུལ་ཏེ། མཇུག་སྐྱོང་སྙན་ཞུ་རིམ་ཅན་དུ་ཕུལ་མཐར། ༡༩༨༡ ལོར་ཆེས་མཐོའི་རྒྱུན་ལས་ལྷན་ཚོགས་ནས་བསམ་ཚུལ་ངོས་བཞེས་དང་། སྒྲིག་གཞིར་བསྐྱར་བཅོས་གནང་ཡོད་ནའང་། ༡༩༨༢ ལོའི་སྐབས་ ༨ པའི་སྤྱི་ལྷན་འོས་བསྡུའི་ལས་རིམ་ནང་། མདོ་སྟོད་དང་། རྙིང་མའི་སྤྱི་འཐུས་རྣམས་འོས་གཞིའི་ཁོངས་ནས་རྩ་དགོངས་ཞུས་ཏེ། སྔོན་འགྲོའི་འོས་བསྡུའི་གྲུབ་འབྲས་ཁོངས་ཡེ་ཤེས་དབྱིངས་དཔྱད་གནང་སྐྱོང་གི་གསོལ་འདེབས་ཞུས་ཤིང་། ༡༩༨༤ ལོར་སྤྱི་ལྷན་སྐབས་ ༩ པའི་འོས་བསྡུའི་ལས་རིམ་ནང་མདོ་སྟོད་ཆོལ་ཁ་མཉམ་ཞུགས་མ་གནང་བའི་གླེང་ལྷག་དབང་གིས། ཡེ་ཤེས་དབྱིངས་དཔྱད་ཡོང་བའི་གསོལ་འདེབས་ཞུས་པ་དང་། སྤྱི་ལྷན་སྐབས་ ༡༠ པར་ཡང་རྙིང་མ་དང་། མདོ་སྟོད་གཉིས་ཀའི་སྔོན་འགྲོའི་འོས་དམིགས་སུ་ཉུང་མཐའི་གྲངས་ཚད་མ་ལོངས་པར། ཆེས་མཐོའི་རྒྱུན་ལས་ལྷན་ཚོགས་ནས་སྐབས་སྔ་མའི་སྤྱི་འཐུས་རང་འཇགས་སྡོད་དགོས་པའི་གྲོས་ཆོད་༸སྙན་གསན་ལྟར་བྱེད་དགོས་བྱུང་འདུག

དེ་བཞིན་དུ་ ༡༩༧༧ ལོ་སྟོད་ནས་བཟུང་། ༸གོང་ས་མཆོག་གིས་བཀའ་ཤག་དང་རྒྱུན་ལས་ལྷན་ཚོགས་སུ། ༸གོང་ས་མཆོག་གི་དབུ་ཁྲིད་འོག་དང་། བཀའ་ཤག་གི་གོང་དུ་མི་གཅིག་བསྐོ་གཞག་དང་། བཀའ་བློན་ཡོང་ཁུངས་དང་། ལས་ཡུན་ཚོད་འཛིན་ཇི་ལེགས་ཀྱི་བཀའ་སློབ་བསྩལ་འདུག་ཅིང་། ༡༩༨༩ ལོའི་སྲི་ཞུའི་ཚོགས་ཆེན་ཐེངས་ ༡༦ པའི་སྟེང་། ཆབ་སྲིད་ཀྱི་འགོ་ཁྲིད་མི་མང་གིས་འོས་བསྡུའི་ལམ་ནས་ཡོང་རྒྱུ་ཡོད་པ་ཞིག་བཟོ་དགོས་པའི་བཀའ་སློབ་ཕེབས་འདུག་ཀྱང་། ཚོགས་འདུ་དེ་དག་ནས་བཀའ་བཞིན་སྒྲུབ་པའི་བསམ་ཚུལ་རྩེ་མཐུན་ཞིག་འབུལ་ཐུབ་མེད།

ཕྱི་ལོ་ ༡༩༩༠ ལོར། བཀའ་ཤག་དང་སྤྱི་འཐུས་ལྷན་ཚོགས་ཕྱིར་བསྡུ་གནང་སྟེ། ཕྱི་ཟླ་ ༥ ནང་བཙན་བྱོལ་བོད་མིའི་མི་འཐུས་ ༣༦༩ ཙམ་འདུས་པའི་དམིགས་བསལ་ཚོགས་ཆེན་སྡུད་སྐོང་དང་། དེར་མཐུད་༸གོང་ས་མཆོག་གིས་རྩ་ཁྲིམས་ཟིན་བྲིས་བསྐྱར་ཞིབ་ཚོགས་ཆུང་ཐད་བསྐོས་བསྐྱངས་ཏེ། ཕྱི་ལོ་ ༡༩༩༡ ཟླ་ ༦ ཚེས་ ༡༤ ཉིན་སྐབས་ ༡༡ པའི་བོད་མི་མང་སྤྱི་འཐུས་ལྷན་ཚོགས་སུ་བཙན་བྱོལ་བོད་མིའི་བཅའ་ཁྲིམས་གཏན་འབེབས་མཛད་པའི་ནང་མང་གཙོའི་ཀ་བ་གསུམ་དང་། རང་དབང་ལྡན་པའི་སྡེ་ཚན་གསུམ་ཚང་བར་བགྱིས་ཤིང་། ཕྱི་ལོ་ ༢༠༠༡ ལོར། བཀའ་བློན་ཁྲི་པ་མང་ཚོགས་ཀྱིས་ཐད་ཀར་འདེམས་བསྐོའི་ལམ་སྲོལ་བཙུགས་ཏེ། ༸གོང་ས་༸སྐྱབས་མགོན་ཆེན་པོ་མཆོག་ཕྱེད་བགྲེས་ཡོལ་གྱི་ཚུལ་དུ་བཞུགས། ༢༠༡༡ ལོར་བཅའ་ཁྲིམས་བསྐྱར་བཅོས་ ༢༥ པ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་གི་ཆབ་སྲིད་དང་འཛིན་སྐྱོང་གི་འགན་དབང་རྣམས་བོད་མིའི་སྒྲིག་འཛུགས་ཀྱི་འགོ་ཁྲིད་ཚོར་ཆ་བགོས་ཀྱིས་གསོལ་བསྩལ་གནང་ནས་ད་ལྟ་ང་ཚོས་ལག་བསྟར་བྱེད་བཞིན་པ་འདི་ཡིན།

མང་གཙོའི་ལམ་ལུགས་ཀྱི་སྙིང་པོ་ནི། ཨ་རིའི་སྲིད་འཛིན་ཨབ་ར་ཧིམ་ལིན་ཁོན་མཆོག་གིས་གསུངས་པ་ལྟར། སྲིད་གཞུང་དེ་ཉིད་མི་མང་ལ་བདག་ཅིང་། མི་མང་གིས་དབང་བསྒྱུར་བྱེད་དགོས་པ་དང་། མི་མང་གི་ཆེད་དུ་བཙུགས་པ་ཞིག་ཡིན་དགོས། དེ་ལྟར་ཡོང་བ་ལ་ཁྲིམས་ཀྱིས་དབང་བསྒྱུར་གྱིས་ཁག་ཐེག་བྱེད་དགོས་ཤིང་། ཁྲིམས་ཡིག་མཐའ་དག་གི་ཕྱི་མོ་རྩ་ཁྲིམས་ (བཅའ་ཁྲིམས།) ཡིན་པ་དེའི་ནང་དོན་གཙོ་བོ་ནི། གཞུང་གི་བྱེད་སྒོ་མཐའ་དག་ཁྲིམས་ཀྱི་རྒྱ་ལས་མི་འགོངས་པའི་ཚོད་འཛིན་དང་། མི་མང་གི་གཞི་རྩའི་ཐོབ་ཐང་ཁག་ལ་དོ་ཕོག་མི་འབྱུང་བའི་འགན་ལེན་བྱེད་དགོས་པ་དེ་ཡིན། རྩ་ཁྲིམས་ཀྱི་ནང་དོན་ནི་མང་ཚོགས་ཀྱི་མངོན་འདོད་ཡིན་པས། ལས་ཀྱི་སྣེ་མོ་བ་ཚོས་དེ་ལ་འགལ་ལྡོག་བྱེད་མི་ཆོག་པ་དང་། སླ་འཆོས་ཀྱི་སྒོ་ནས་རྩ་ཁྲིམས་ཀྱི་ནང་དོན་བསྒྱུར་བཅོས་བྱེད་ཆོག་པ་ཞིག་ཀྱང་མིན། དེར་བརྟེན། སྐབས་གསར་པའི་བཀའ་ཤག་གི་སྤྱི་སྙོམས་དྲང་བདེན་གྱི་བསྒྲགས་ཚིག་འདིའི་སྙིང་པོ་ཁྲིམས་ཀྱིས་དབང་བསྒྱུར་ཡིན་ཟེར་དོན་ཡང་རྒྱུ་མཚན་དེར་ཐུག་ཡོད། ཅེས་གསུངས།

ཡང་གསུང་བཤད་ནང་། དེ་རིང་ང་ཚོས་མང་གཙོའི་དུས་ཆེན་གྱི་མཛད་སྒོ་བརྩི་སྲུང་ཞུ་བཞིན་པའི་སྐབས་འདིར། གཞིས་བཞུགས་སྤུན་ཟླ་རྣམ་པར་དུས་ཆེན་གྱི་འཚམས་འདྲི་ཞུ་བ་དང་སྦྲགས། ཉེ་ལམ་རྒྱ་གཞུང་གིས་རྒྱབ་ཤ་དཀར་པོའི་དེབ་སྔ་རྗེས་བཀྲམ་སྟེ་བཅོས་སྒྲུང་སྣ་ཚོགས་རྩོམ་སྒྲིག་དང་། བོད་ཞི་བའི་བཅིངས་འགྲོལ་བཏང་ནས་ལོ་ངོ་ ༧༠ འཁོར་ཡུན་རིང་ཡར་རྒྱས་ཇི་སོང་གི་རྫུན་སྒྲོགས་བྱེད་ཚུལ་དེ་རིགས་ལ་མ་ལྟོས་པར། བོད་མི་རིགས་ཀྱི་ངོ་བོ་གཏོར་བཤིག་གི་གདུག་རྩུབ་སྲིད་ཇུས་ཡུན་བསྟུད་དམ་དྲག་ཆེ་བ་དེ་ལྟའི་འོག ཁྱེད་ཅག་གིས་བོད་ཀྱི་ཆོས་རིག་དང་། སྐད་ཡིག ཡུལ་གོམས་གཤིས་ལུགས་བཟང་པོ་སྲུང་སྐྱོབ་ཀྱི་སེམས་ཤུགས་བསྐྱེད་དེ་ཕྱོགས་ཡོངས་ནས་འབད་བརྩོན་གནང་བཞིན་པ་དེར་སྙིང་དབུས་ནས་བཀའ་དྲིན་ཚོར་བཞིན་ཡོད་པ་དང་། དེ་ནི་བཙན་བྱོལ་བོད་མི་རྣམས་འཚོ་གནས་ཀྱི་སྲོག་དབང་མཐུད་སྣེ་ཡིན་པ་དང་། བོད་དོན་འཐབ་རྩོད་ཀྱི་སྙིང་སྟོབས་འཁྱིལ་ས་ཡིན་པས། གཞིས་བྱེས་ལྷན་འཛོམས་ཀྱི་སྐལ་བཟང་མྱུར་དུ་བཞད་པའི་རྨི་ལམ་འདི་ང་ཚོ་ཐུན་མོང་གི་བྲང་དབུས་སུ་རུམ་བཞིན། ཕུགས་རེ་མངོན་འགྱུར་གྱི་ཕྱོགས་སུ་གོམ་པ་མདུན་སྤོའི་སེམས་ཤུགས་མ་ཆག་པ་གནང་རོགས་ཞེས་ཞུ་རྒྱུ་ཡིན།

ད་ལྟའི་ཆར་འཛིན་སྐྱོང་གི་ངོས་ནས་ལས་དོན་བྱེད་སྒོ་ཁག་འཐུས་ཤོར་མེད་པར་སྒྲུབ་མུས་ཡིན་ནའང་། བོད་མི་མང་སྤྱི་འཐུས་ལྷན་ཚོགས་ཚུགས་མ་ཐུབ་པར་བརྟེན། གྲོས་ཚོགས་ཀྱི་ཁྲིམས་བཟོའི་ལས་འགན་དང་རྒྱུན་ལས་ལྷན་ཚོགས་ཀྱི་ལས་འགན་ཡོངས་རྫོགས་འགག་ཡོད་པ་མ་ཟད། རྒྱ་ནག་གི་གནས་སྟངས་དང་རྒྱལ་སྤྱིའི་འགྱུར་འགྲོས་ལ་བསྟུན་པའི་འཆར་འཕར་ལས་དོན་རྩོམ་པའི་གོ་སྐབས་མང་དག་ཅིག་ཡོད་པ་རྣམས་གྲོས་ཚོགས་ཀྱི་ངོས་ནས་ལེན་ཐུབ་ཀྱི་མེད། རྒྱ་གཞུང་ནས་གནད་དོན་དེ་བེད་སྤྱོད་ལོག་པར་བཏང་སྟེ་བོད་ནང་གནས་ཚུལ་རྫུན་སྒྲོག་དང་། བཙན་བྱོལ་ནང་དབྱེན་དཀྲུག རྒྱལ་སྤྱིའི་ཐོག་བེད་སྤྱོད་ལོག་པར་གཏོང་བཞིན་པའི་གནས་ཚུལ་ཇི་སྙེད་ཅིག་བཀའ་ཤག་ལ་སྙན་གསན་ཞུ་མཁན་བྱུང་བ་དང་། དེའི་ཐོག་རང་ཅག་ལ་མཛའ་སེམས་འཆང་མཁན་གྱི་གཞུང་དང་གྲོས་ཚོགས། བོད་དོན་རྒྱབ་སྐྱོར་བ་མང་པོ་ཞིག་གིས་སེམས་འཚབ་དང་བློ་གཡེང་བྱེད་བཞིན་འདུག་ཅིང་། བོད་ནང་ནས་དཀའ་རྙོག་དེ་འཕྲལ་དུ་སེལ་མ་ཐུབ་ཚེ་རྩ་དོན་ལས་འགུལ་སྤེལ་མཚམས་འཇོག་རྒྱུ་ཡིན་ལུགས་ཀྱི་བརྡ་ལན་བཏང་འབྱོར་བྱུང་ལ། རང་རེའི་སྤྱི་ཚོགས་ཆུང་ངུ་འདིའི་ནང་དུའང་འཁོས་བག་མ་ཕེབས་པའི་སེམས་ཚོར་སྟོན་མཁན་འདྲ་མིན་ཡོང་བཞིན་ཡོད་པ་ཚང་མས་མཁྱེན་གསལ་ལྟར་རེད།

སྐབས་གསར་པའི་བཀའ་ཤག་གི་ངོས་ནས་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་དང་མཐུན་པའི་ཐབས་ཚུལ་གང་ལའང་མཐུན་འགྱུར་རྒྱབ་སྐྱོར་ཞུ་ངེས་ཡིན་པ་དང་། འབྲེལ་ཐོགས་སོ་སོས་ཀྱང་འདི་མུར་གནས་ན་ཁེ་གྱོང་ཇི་ཆགས་དགེ་སྐྱོན་གཞལ་བསྡུར་གྱིས། ལོ་རྒྱུས་དང་མི་རིགས་ལ་འགན་ཁུར་པའི་ཐོག་ནས་བསམ་ཞིབ་གདམ་ག་མ་ནོར་བ་བྱེད་དགོས་པའི་དུས་ལ་བབས་འདུག་ཅེས་གོ་སྐབས་འདི་བརྒྱུད་ནས་ཞུ་འདོད་བྱུང་ཞིང་། བཅའ་ཁྲིམས་དང་མཐུན་པར་གྲོས་ཚོགས་ཚུགས་མ་ཐག་ཏུ་བཀའ་ཤག་གིས་སྤྱི་འཐུས་ལྷན་ཚོགས་དང་མཉམ་དུ་བཅའ་ཁྲིམས་ཀྱི་ལས་བགོས་གཞིར་བཟུང་བོད་སྤྱི་པའི་རྩ་དོན་དང་། མང་ཚོགས་ཀྱི་བདེ་དོན་ཐོག་ཐུན་མོང་གིས་འབད་བརྩོན་ཞུ་རྒྱུའི་གྲ་སྒྲིག་ཨང་གསར་དང་ཆོད་སེམས་བརྟན་པོ་ཡོད། དེ་མིན་འདི་མུར་མཁྲེགས་རེངས་ངང་ལྷག་ཚེ། དེའི་མཇུག་འབྲས་ནི་བོད་མིའི་སྒྲིག་འཛུགས་སྦོ་ལུག་རྒྱུ་ཉག་ཅིག་ལས་མེད་པས། བོད་མི་སུ་ཞིག་གིས་ཀྱང་མཐའ་འབྲས་དེ་ལྟ་བུ་ཞིག་མཐོང་འདོད་མེད་ཅིང་། འབྲས་བུ་དེ་ལྟ་བུ་ལས་བོད་མི་སུ་ལའང་ཁེ་ཕན་འཐོབ་མི་སྲིད།
མཐའ་དོན། རང་ཅག་བཙན་བྱོལ་བོད་མིར་མཐུན་འགྱུར་རྒྱབ་སྐྱོར་རྒྱུན་མཐུད་གནང་མཁན་རྒྱ་གར་དང་། ཨ་རིས་གཙོས་པའི་རྒྱལ་ཁབ་ཁག་དང་། འཛམ་གླིང་ཁྱོན་དུ་གནས་པའི་བོད་དོན་རྒྱབ་སྐྱོར་བ་རྣམ་པར་དུས་ཆེན་གྱི་འཚམས་འདྲི་དང་མཉམ་དུ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་མཛད་འཕྲིན་རྒྱས་ཤིང་། ཐུགས་བཞེད་ལྷུན་འགྲུབ་ཡོང་བ་དང་། བཙན་བྱོལ་བོད་མིའི་མང་གཙོའི་ལྗང་མྱུག་འདིར་གསོན་ཤུགས་ལྡན་པའི་ལོ་འདབ་རབ་ཏུ་རྒྱས་པའི་སྨོན་འདུན་ཞུ་གི་ཡོད། ཅེས་འཁོད་འདུག

གསར་འགོད་པ། སྐལ་བཟང་སྦྱིན་པ།