རྒྱ་ནག་གཞུང་གིས་རྫ་དབོན་པོ་དགོན་ནས་ཡང་བསྐྱར་དགེ་འདུན་པ་ ༦ དང་མི་སྐྱ་བུད་མེད ༢ བཅས་བོད་མི་ ༨ འཛིན་བཟུང་བཙན་འཁྲིད་བྱས་ཡོད་འདུག
![](https://tibettimes.net/wp-content/uploads/2021/09/Night-in-Dza-Wonpo-scaled.jpg)
དེ་རིང་འདི་གའི་གསར་འགོད་པར་ཁུངས་ལྡན་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས ༣ ཉིན་རྫ་སྨད་དབོན་པོ་དགོན་དགའ་ལྡན་མདོ་སྔགས་བཤད་སྒྲུབ་དར་རྒྱས་གླིང་གི་དགེ་འདུན་པ་ ༦ རྫ་སྨད་སྲིད་གཞུང་དུ་ཡོང་དགོས་པའི་བཀའ་ཁྱབ་འབྱོར་ཡོད་པ་མ་ཟད། དགེ་འདུན་པ་རེ་རེ་ལ་ཉེན་རྟོག་པ་དྲུག་ཙམ་རེ་བཀོད་སྒྲིག་བྱས་ཏེ། གྲྭ་ཤག་རེ་རེ་བཞིན་སྔོག་བཤེར་ནན་མོ་བྱས་རྗེས་ཁོང་ཚོ་དྲུག་བཙན་འཁྲིད་བྱས་ཡོད་པ་དང་། དེ་བཞིན་དབོན་པོ་སྡེ་བའི་བུད་མེད་ ༢ ཀྱང་སེར་ཤུལ་རྫོང་དུ་བཙན་འཁྲིད་བྱས་ཡོད་འདུག གནས་ཚུལ་མཁོ་སྤྲོད་པས་དབོན་པོ་སྡེ་དགོན་གཉིས་ནས་སེར་ཤུལ་རྫོང་དུ་བཙན་འཁྲིད་བྱས་པ་རྣམས་བཀག་ཉར་ཡོད་པ་མ་ཟད། ད་ལྟ་བར་དུ་བོད་མི་བརྒྱ་ལྷག་དེ་གང་དུ་ཡོད་མེད་དང་གནས་སྟངས་ག་འདྲ་ཆགས་ཡོད་མེད་སོགས་ཀྱི་གནས་ཚུལ་གང་ཡང་ཐོན་མེད་སྐོར་བརྗོད་བྱུང་།
ཡང་གནས་ཚུལ་མཁོ་སྤྲོད་པས། ཉེ་ལམ་རྒྱ་ནག་གཞུང་གིས་བོད་ས་ཡོངས་སུ་སྐད་གཉིས་སློབ་འཁྲིད་ཐབས་ལམ་ཟེར་བ་ལག་བསྟར་བྱེད་པའི་སྲིད་ཇུས་གཏིང་ནག་ཅིག་བཙན་བཀོལ་བྱས་ཏེ། བོད་ཁུལ་གྱི་སློབ་གྲྭ་ཁག་གི་ནང་དུ་བོད་ཡིག་གི་སློབ་ཚན་ཇེ་ཉུང་དུ་གཏོང་མུས་ཡིན་སྟབས། བོད་ཀྱི་རོང་འབྲོག་མང་ཚོགས་ཀྱི་ཁྲོད་དུ་བོད་ཀྱི་སྐད་ཡིག་ལ་དོ་སྣང་ཆེར་སྐྱེད་ཀྱིས་དྭང་བླང་གི་ཐོག་ནས་བོད་ཀྱི་སྐད་ཡིག་སློབ་ཁྲིད་བྱེད་པར་ཕྱོགས་ཀུན་ནས་འབད་བརྩོན་བྱེད་བཞིན་པ་ལྟར། རྫ་སྨད་དབོན་པོ་ཁུལ་དུའང་དྭང་བླང་ཐོག་ནས་བོད་སྐད་བོད་ཡིག་སློབ་ཁྲིད་ལག་བསྟར་བྱས་ནས་ཡུན་རིང་ཕྱིན་ཡོད་པ་ལྟར། ཉེ་ལམ་རྒྱ་ནག་གཞུང་གིས་འཛིན་བཟུང་བྱས་པའི་སྐྱ་སེར་གྱི་ཁྲོད་དུ། དྭང་བླང་གི་ཐོག་ནས་བོད་ཀྱི་སྐད་ཡིག་སློབ་ཁྲིད་བྱེད་མཁན་དང་དེ་བཞིན་ཕ་སྐད་སྲུང་སྐྱོབ་ཚོགས་པ་ཞེས་པའི་བོད་ཀྱི་སྐད་ཡིག་སྲུང་སྐྱོབ་ཀྱི་ཚོགས་པ་ཞིག་ཡོད་པ་དེའི་ཚོགས་མི་དང་ལས་གཞི་དེར་རོགས་རམ་བྱེད་མཁན་མང་པོ་ཞིག་ཀྱང་ཡོད་སྐོར་བརྗོད་བྱུང་།
ཕྱི་ཟླ་ ༨ ཚེས་ ༢༥ ནས་ ༢༩ བར་དུ། རྒྱ་ནག་གཞུང་གིས་རྫ་དབོན་པོ་སྡེ་བའི་ཁྱིམ་ཚང་རེ་རེ་དང་མི་སྒེར་གྱི་ཁ་པར་སོགས་ཀྱི་ནང་སྔོག་བཤེར་ནན་པོ་བྱས་པ་བརྒྱུད། ༧གོང་ས་རྒྱལ་བ་རིན་པོ་ཆེའི་སྐུ་པར་ཉར་ཚགས་བྱས་པ་དང་། ཕྱི་ལོག་གི་མི་ལ་འབྲེལ་འདྲིས་བྱས་པའི་ཉེས་མིང་འོག བསྐྱར་དུ་བོད་མི་ ༥༣ ཙམ་འཛིན་བཟུང་བཀག་ཉར་བྱས་ཡོད་པ་དང་། ཕྱི་ཟླ ༨ ཚེས་ ༢༢ ནས་བཟུང་སྔ་གཞུག་ཏུ་ཉེས་མིང་དེའི་འོག རྫ་སྨད་དབོན་པོ་སྡེ་དགོན་གཉིས་ནས་དགེ་འདུན་པ་ ༡༩ དང་བུད་མེད་བཞི་ཚུད་པའི་མི་སྐྱ་ ༤༠ མ་ཟིན་ཞིག་བཅས་སེར་སྐྱ་ ༦༠ ཡས་མས་ཤིག་སེར་ཤུལ་རྫོང་དུ་བཙན་འཁྲིད་བྱས་ཡོད་པ་ལྟར། ཉེ་སྔོན་སྔ་གཞུག་ཏུ་རྫ་སྨད་དབོན་པོ་སྡེ་དགོན་གཉིས་ནས་དེ་རིང་བར་དུ་ཁྱོན་སྐྱ་སེར་གྲངས་ ༡༢༡ ཙམ་ཞིག་འཛིན་བཟུང་བཙན་འཁྲིད་བྱས་ཡོད་འདུག་ལ། རྒྱ་ནག་གཞུང་གིས་མུ་མཐུད་དུ་རྫ་དབོན་པོ་དགོན་སྡེ་གཉིས་སུ་དམ་བསྒྲགས་ནན་མོ་བྱས་དང་བྱེད་མུས་ཡིན་འདུག
དཔལ་ལྡན།