བློ་བཟང་ཆོས་འཛིན།
Mrs Dombo Kyi, the late mother of disappeared Tibetan writer and activist Lingtsa Tseten Dorjee.
ངའི་ཕ་ཡུལ་ནས་འདས་པོ་དག་གི་མིང་ནས་དངོས་སུ་མི་སྨོས་པའི་ཡ་རབས་ཀྱི་གོམས་གཤིས་ཤིག་ཡོད་ཀྱང་། དེ་རིང་དགོས་དབང་གིས་འདས་མོ་ཨ་མ་ལྡོམ་པོ་སྐྱིད་ཀྱི་མཚན་ཐེངས་དུ་མར་འབྲི་དགོས་བྱུང་བས་བཟོད་གསོལ་ཞུ་ཞུ།
ཕྱི་ལོ་ཉིས་སྟོང་བཅོ་ལྔ་ཟླ་བདུན་པའི་ཚེས་ལྔ་ཉིན་དུས་བབ་དྲ་བའི་ཐོག་སྤེལ་ཞིང་ལོ་དུ་མའི་གོང་ནས་བོད་དོན་རྩོད་ཆེད་གར་སོང་མ་ངེས་པའི་གླིང་ཚ་ཚེ་བརྟན་རྡོ་རྗེའི་མ་ཡུམ་ལྡོམ་པོ་སྐྱིད་ལ་བོད་ཀྱི་དུས་བབ་དྲ་བའི་གསར་འགོད་པ་དོན་འགྲུབ་བཀྲ་ཤིས་ཀྱིས་གླིང་ཚའི་སྐོར་དྲི་བ་བྱས་པ་ཞིག་ལྟ་ཀློག་བྱས། བོད་ལ་མཚོན་ན་གནས་རིམ་མཐོ་བའི་མི་ཞིག་གྲོངས་རྗེས་དེའི་ཆེད་དུ་ཡིག་ངག་གཉིས་ཐོག་ནས་རྗེས་དྲན་གྱི་བྱེད་སྒོ་སྣ་ཚོགས་སྤེལ་མཁན་མང་པོ་ཡོད་ནའང་། ཡོད་ཚད་བློས་གཏོང་བྱས་པའི་རླབས་ཆེན་གྱི་བོད་དོན་འཐབ་རྩོད་པ་ཞིག་གི་ཨ་མ་དང་བོད་དོན་ལ་ལྷག་བསམ་དཀར་བའི་བུད་མེད་ཅིག་གྲོངས་རྗེས་སུ་རྗེས་དྲན་གྱི་ཚིག་གཅིག་ཀྱང་བཤད་མཁན་མེད་པ་ནི། དྲིན་ཅན་ལ་དྲིན་ལོག་དང་། གཡང་ལ་རྡོ་ལོག་ཅེས་པའི་དཔེ་རུ་གྱུར་མེད་དམ། ངས་ནི་ཚིག་མཐོ་གང་གིས་དོན་འདོམ་གང་སྟོན་རྒྱུའི་དམིགས་ཡུལ་བཟུང་བ་ཞིག་མིན་པར། བོད་དོན་འཐབ་རྩོད་པ་ཞིག་གི་གནས་བབ་སྡུག་པོ་འདི་མཐོང་ན་དངོས་གནས་ཨ་མ་ལྡོམ་པོ་སྐྱིད་ནི་མ་གླེང་ཐབས་མེད་ཀྱི་བུད་མེད་ཅིག་ཏུ་གྱུར་འདུག་སྙམ་བཞིན་ཡོད།
དྲི་བ་དེ་ཀློག་གིན་ཀློག་གིན་དངོས་གནས་སེམས་ཀྱི་གཏིང་ནས་ཟགས་འོང་བ་འདྲ་བའི་མིག་ཆུའི་ཐིགས་པ་ཞིག་འགྲམ་པའི་མཁུར་མགོར་བརྒྱུད་ནས་པང་དུ་ལྷུང་གྲབས་བྱས་སོང་། ངས་ཁོང་མོ་ཤེས་དགོས་པའི་རྐྱེན་ནི་ཁོང་མོ་གླིང་ཚ་ཚེ་བརྟན་རྡོ་རྗེའི་ཨ་མ་ཡིན་པས་རེད། ཕྱི་ལོ་ཉིས་སྟོང་བཅུ་གཉིས་ཟླ་གསུམ་པའི་ཚེས་བཅུའི་ཉིན་ནས་འགོ་བརྩམས་ཏེ་བསྟུན་མར་ལོ་གཉིས་ལ་བོད་དོན་འཐབ་རྩོད་ཆེད་ཞི་བའི་གོམ་བགྲོད་ཀྱི་ལས་འགུལ་སྤེལ་ཞིང་། སྐབས་དེ་དག་ཏུ་ཨ་མ་ལྡོམ་པོ་སྐྱིད་ནི་གླིང་ཚས་ལས་འགུལ་སྤེལ་སྐབས་རྟག་ཏུ་མཐོང་རྒྱུ་ཡོད་པའི་མི་སྣ་ཞིག་དང་ཁོང་གིས་བོད་དོན་ལས་འགུལ་སྐབས་ཐོག་མཐའ་བར་གསུམ་དུ་རྒྱབ་སྐྱོར་བྱེད་མཁན་གྱི་མི་སྣ་གཙོ་བོ་ཞིག་ཏུ་གྱུར་ཡོད། གླིང་ཚའི་བོད་དོན་ལས་འགུལ་བརྒྱུད་དེ་ཁོང་མོ་ངོ་ཤེས་པ་ནས་བཟུང་དུས་ནས་དུས་སུ་མེག་རྒན་གྱི་ཁྲོམ་གཞུང་དང་གླིང་སྐོར་ད་དུང་གཙུག་ལག་ཁང་གི་ནང་སྐོར་སོགས་ནས་ཐེངས་དུ་མར་མཐོང་མྱོང་། ངས་ཁོང་མོ་མཐོང་ཐེངས་རེར་སེམས་ལ་ཚོར་བ་དམིགས་བསལ་ཞིག་སྟེར་ཞིང་། ཁོང་མོ་ནི་བུད་མེད་གཞན་དང་མི་འདྲ་བའི་ཁྱད་པར་བ་ཞིག་རེད་འདོད། ཁོང་མོའི་གཤིས་སྤྱོད་ལས་འབྲོག་མོ་ངོ་མ་ཞིག་གི་རང་གཟུགས་འབུར་དོད་དུ་མཐོང་ཐུབ་པས་ཀྱང་དོ་སྣང་བྱེད་དགོས་པ་ཞིག་ཏུ་གྱུར་བ་ཡིན་སྲིད། གང་ལྟར་རིམ་གྱིས་དངོས་གནས་ང་ནི་ཁོང་མོ་ལ་ལྷག་པར་སྙིང་ཉེ་བའི་ཚོར་བ་ཞིག་སྐྱེས་སོང་། མཚམས་ལན་རེར་ས་གནས་ག་གེ་མོ་ཞིག་ནས་ཁོང་མོ་དང་འཕྲད་སྐབས་བཀྲ་ཤིས་བདེ་ལེགས་ཀྱི་ཁ་གཡང་རེ་དང་གུས་པའི་རྣམ་འགྱུར་རེ་བསྟན་མྱོང་། ཁོང་མོའི་རྟག་ཏུ་བོད་ལྭ་གྲ་དག་སྤུས་གཙང་ཞིག་གྱོན་ཏེ་ཉིན་ལྟར་གཙུག་ལག་ཁང་གི་ཕྱོགས་སུ་ཕེབས་བཞིན་པ་ལན་མང་མཐོང་། ཡོད་ཚད་གྲ་དག་སྤུས་གཙང་བྱས་ཏེ་ཕེབས་བཞིན་པའི་ཨ་མ་ལྡོམ་པོ་སྐྱིད་ཀྱི་རྣམ་འགྱུར་ལས་ལྷད་མེད་དྭངས་གཙང་གི་སེམས་པ་དང་། མ་བཅོས་ལྷུག་པར་གྲོལ་བའི་འཛུམ་གྱི་པད་མོ་བཞད་པའི་རྣམ་པ་དེ་དག་དྲན་པའི་རྩིག་ངོས་སུ་ཁྲ་ལམ་མེར་འཆར་སྐབས་ང་དང་འདྲ་བར་མང་པོ་ཞིག་ཁོང་གི་གཤིས་སྤྱོད་ལ་དང་བ་སྐྱེས་ཡོད་ངེས་སྙམ།
དེ་རིང་གི་དྲི་བ་དེ་ཀློག་སྐབས་ཁོང་མོས་བུ་གླིང་ཚ་ཚེ་བརྟན་རྡོ་རྗེ་ལ་བཅངས་པའི་བརྩེ་སེམས་ནི་རི་བོ་ལས་བརྗིད་ཆེ་བ། རྒྱ་མཚོ་ལས་འཇིང་ཟབ་པ། བོད་དང་༧རྒྱལ་བ་དོན་གྱི་བདག་པོར་དགའ་ཞེན་བླ་མེད་ཡོད་པའི་བུད་མེད་ཅིག་ཡིན་པའི་ཚོར་བ་ཞིག་ངང་ངམ་ཤུགས་ཀྱིས་སྐྱེས་སོང་། སྤྱིར་འཇིག་རྟེན་ཐོག་གི་མ་ཡུམ་ཚང་མ་ཨ་མ་ལྡོམ་པོ་སྐྱིད་ལྟ་བུ་ཞིག་ཡིན་ངེས་ཀྱང་། ཁོང་མོ་ནི་ཨ་ཡུམ་གཞན་ལས་ཁྱད་དུ་འཕགས་ཤིང་འཇིག་རྟེན་ཐོག་གི་ཨ་མ་ཀུན་གྱི་མིག་དཔེར་འོས་པའི་བུད་མེད་མཛངས་མ་ཞིག་རེད་འདོད། གླིང་ཚ་ཚེ་བརྟན་རྡོ་རྗེས་སྔ་ཕྱི་བསྟུད་དེ་བོད་དོན་ལས་འགུལ་སྤེལ་སྐབས་ཨ་མ་ལྡོམ་པོ་སྐྱིད་ཀྱིས་དཀའ་ངལ་དང་ཉེན་ཁ་གང་ལ་ཡང་མ་འཛེམས་པར་བུ་དང་ལྷན་དུ་སྐྱིད་སྡུག་མཉམ་གཤིབ་བྱས་ཡོད། གཞན་ཚོས་ལམ་གྱི་དཀའ་ངལ་རྣམས་ནི་སྤྱིར་བཏང་གི་དཀའ་ངལ་ཞིག་ཏུ་བརྩི་སྲིད་ཀྱང་། རྒྱ་བལ་གཉིས་ཀྱི་ས་མཚམས་ནས་དཀའ་སྡུག་མྱངས་པ་དེ་སྤྱིར་བཏང་ཞིག་ཏུ་གཏད་ནས་བརྩི་མི་ཐུབ་པ་ཞིག་རེད། དཀའ་ངལ་དེ་འདྲ་ཞིག་བོད་པ་ཞིག་གི་སེམས་ལ་དྲན་སྲིད་ཀྱང་སྙིང་སྟོབས་དང་ཆོད་སེམས་ལྷག་བསམ་བཅས་མེད་ན་ལག་ལེན་ལ་སྟོར་ཐུབ་པ་ཞིག་ག་ལ་ཡིན་ཏེ་ལར་ནས་མ་ཡིན། ལས་འགུལ་དེ་ནི་དངོས་གནས་ཉེན་ཁ་ཆེ་ཞིང་ཛ་དྲག་གི་རང་བཞིན་ཅན་ཞིག་རེད། དྲི་བ་དེའི་ནང་དུ་ཁོང་མོས་འདི་འདྲ་ཞིག་བཤད་འདུག་སྟེ། “ཚེ་བརྟན་རྡོ་རྗེའི་ཁ་སྤུའི་ནང་ནས་དངུལ་ཆུའི་ཐིགས་པ་ཏིག་ཏིག་བྱེད་ཀྱིན་འདུག་ལ། ལྷ་མོ་སྐྱིད་ཀྱི་འགྲམ་རྩ་ནས་ཀྱང་ཚིལ་དྲེག་འདྲེས་པའི་དངུལ་ནག་བཞུར་བཞིན་པ་མཐོང་ན། ངའི་སེམས་ནས་བཟོད་ཀྱི་མི་འདུག་ཀྱང་ཨམ་གཙིགས་བསྡམས་ཏེ་མིག་ཆུ་ཕྱི་ལ་འཐོན་དུ་བཅུག་མེད། སྐབས་དེར་བལ་བོའི་བུད་མེད་དམག་མི་ཞིག་གིས་འགྱིག་དམ་ཆེན་པོ་ཞིག་གི་ནང་ཆུ་འཁྱེར་ཡོང་སྐབས། ལྷ་མོ་སྐྱིད་ཀྱིས་ལག་པ་བརྐྱངས་ཙམ་བྱས་སྐབས། ཆུ་དེ་ང་ཚོར་སྤྲོད་རྒྱུ་གང་ནས་ཡིན། ཚེ་བརྟན་རྡོ་རྗེ་དང་ལྷ་མོ་སྐྱིད་གཉིས་ལག་པའི་ནང་ཡི་གེ་ཞིག་བཟུང་ཡོད་པ་དེ་སྟེང་བླུགས་ཏེ་ཤོག་བུ་ལྡུར་དུ་བཅུག་སོང་། བལ་ཡུལ་གྱི་དམག་མི་དེ་ཚོར་སེམས་ཟེར་བ་ཞིག་མི་འདུག” སྐད་ཆ་འདི་གཟུགས་ཅན་དུ་གྲུབ་སྟེ་མིག་གིས་མཐོང་རྒྱུ་ཡོད་པ་ཞིག་ཡིན་ན། ང་ཚོ་ཡང་མཐའ་སྲུང་རྒྱ་གར་གྱི་དམག་མི་དེ་དག་དང་འདྲ་བར་ལས་འགུལ་དེར་མཉམ་ཞུགས་དང་གདུང་སམས་མཉམ་སྐྱེད། ཁོང་ཅག་ལ་བལྟས་ཏེ་སེམས་ཤུགས་ཤིག་སྐྱེད་དགོས་པའི་གནས་སུ་འགྱུར་ངེས། ཡིད་ཕངས་པ་ཞིག་ལ་སྐབས་དེའི་གནས་སྟངས་ཐབས་རྡུགས་དེ་དངོས་སུ་མཐོང་མཁན་གྱི་བོད་པ་གཅིག་ཀྱང་བྱུང་མེད་པར་ཁོང་མ་བུ་གསུམ་ཕར་བལྟས་ན་མགོན་མེད་ཚུར་བལྟས་ན་སྐྱབས་མེད་པའི་གནས་སུ་གྱུར་འདུག ཨ་མ་ལྡོམ་པོ་སྐྱིད་ཀྱི་སྐད་ཆ་འདི་དག་ཁྱོད་ཀྱི་རྣ་བར་འགྲོ་མིན་བཤད་ཚོད་མི་ཐིག
ད་དུང་དྲི་བ་དེའི་མཇུག་རྫོགས་པ་མིན་པར་འདི་ལས་ལྷག་པའི་དོན་རྐྱེན་ཤ་གཟེར་རུས་གཟེར་འོང་བ་མང་དུ་ཡོད། “ཕྱི་དྲོའི་ཆུ་ཚོད་ ༦ ཡས་མས་ལ་གློ་བུར་དུ་གནམ་ངོ་རུབ་སྟེ་རླུང་ཆེན་གཡུགས་སོང་ལ། ཆུ་ཚོད་ཕྱེད་ཙམ་རྗེས་དྲག་ཆར་བབས་ཏེ་ཆུ་ལོག་རྒྱུག་སོང་། མཚམས་ཤིག་ལ་གཞུང་ལམ་སྟེང་ཆུ་ལོག་རྒྱུག་སྟེ་ང་ཚོའི་སྐེད་པའི་མཚམས་ན་ལྷོག་ལྷོག་བྱེད་ཀྱི་འདུག བལ་ཡུལ་དམག་མི་ཚོས་ཁང་པའི་ནང་ནས་ལྟད་མོར་ལྟ་སྡོད་པ་ལས་ཁ་ཡ་བྱེད་ཀྱི་མི་འདུག་ཀྱང་། རྒྱ་གར་དམག་མི་ཚོ་ཐེངས་ཁ་ཤས་ལ་ཡོང་ནས་ང་ཚོར་ཞི་བའི་ངག་བཅད་མཚམས་འཇོག་རོགས་ཟེར་ནས་ཞུ་བ་བྱས་སོང་། དེ་ནས་རིམ་གྱིས་ཆར་བ་མཚམས་ཆད་དེ་དགོང་མོའི་ཆུ་ཚོད་ ༡༠ ཟིན་སོང་། ཆར་བ་ཤུགས་ཆེན་བབས་པའི་དབང་གིས་དགོང་མོ་དེར་ས་མཚམས་ལ་གློག་ཀྱང་མི་འདུག” ཅེས་ཡིག་ཐོག་གི་སྐད་ཆ་འདི་མཐོང་སྐབས་ཀློག་པ་པོ་ཁྱེད་ཀྱི་སེམས་ལ་ཚོར་བ་གང་འདྲ་ཞིག་སྐྱེས་སོང་། ཁྱོད་གླིང་ཚ་ཚེ་བརྟན་རྡོ་རྗེ་ཡིན་ན་སྐབས་དེར་ཅི་ཞིག་བྱེད་རྒྱུ་ཡིན་ནམ། གཅིག་ཐོག་གཉིས་བརྩེགས་ཀྱི་དཀའ་ངལ་འདི་དག་ཅི་ཞིག་གི་ཆེད་དུ་མྱོང་དགོས་བྱུང་བ་རེད། དེ་ནི་གླིང་ཚ་མ་བུ་ཚོའི་ཆེད་དུ་ཡིན་ནམ་ཡང་ན་གླིང་ཚ་སྒེར་གྱི་དོན་བྱ་ཞིག་གི་ཆེད་དུ་རེད། གླིང་ཚ་མ་བུའམ་ཁོ་སྒེར་གྱི་ཆེད་དུ་དཀའ་ངལ་འདི་འདྲ་ཞིག་གཏད་ནས་མྱོང་མི་སྲིད་དེ། ལར་རིགས་ཞེན་ཆེ་ཞིང་མིག་རྒྱང་རིང་བའི་མི་རྣམས་ཀྱི་རང་དོན་ལས་གཞན་དོན་སྟེ་རྒྱལ་ཁབ་དང་མི་རིགས་ཀྱི་ཆེད་དུ་ཡོད་ཚད་བསྔོ་ཕོད་པ་ནི་དཔའ་བོ་རྣམས་ཀྱི་ཆོས་ཉིད་རེད། ཁོང་ཚོ་དང་འདྲ་བའི་སྐྱེས་བོ་རླབས་ཆེན་མང་པོ་ཞིག་འཛམ་གླིང་འདིར་བྱོན་མྱོང་ཞིང་གླིང་ཚ་མ་བུ་རྣམས་ནི་མི་དེ་དག་གི་ཁྲོད་ཀྱི་གཅིག་རེད་ཅེས་སྨྲས་ན་སྨྲ་རིན་མ་ཆོག་པ་ཅི་ཡང་མི་འདུག
གོང་དུ་དྲངས་པའི་ཨ་མ་ལྡོམ་པོ་སྐྱིད་ཀྱི་སྐད་ཆ་དུམ་བུ་གཉིས་བཀླགས་གྲུབ་རྗེས་མཁྱེན་ལྡན་ཁྱེད་ཀྱི་ལུས་སེམས་གཉིས་ཀྱི་ཚོར་བ་རྒྱུན་ལྡན་མིན་པ་ཞིག་ཏུ་གྱུར་སོང་ངམ། ཁྱེད་ཀྱིས་གར་སོང་ཆ་མེད་དུ་གྱུར་བའི་གླིང་ཚ་ཚེ་བརྟན་རྡོ་རྗེ་དང་ཕྱི་མའི་ལྔ་ལམ་དུ་གྱུར་བའི་ཨ་མ་ལྡོམ་པོ་སྐྱིད་གཉིས་ལ་གདུང་སེམས་མཉམ་སྐྱེད་ཅིག་བྱེད་འདོད་པའི་ཚོར་སྣང་ཞིག་བྱུང་སོང་ངམ། དེ་འདྲ་འགྱུར་བ་གང་ཡང་ཕྱིན་མེད་ན་ཁྱེད་ཀྱི་སེམས་ནི་ཇི་འདྲའི་སྲ་ཞིང་མཁྲེགས་པའི་རྡོ་ལྟ་བུ་ཞིག་རེད་ཨང་། དེས་ན་ངས་བསྐྱར་དུ་ཁོང་མོའི་སྐད་ཆ་ཞིག་འདྲེན། “ས་རུབ་སྟེ་ནག་ཁུང་ཆགས་མ་ཐག་བལ་ཡུལ་གྱི་དམག་མི་མང་པོ་ཞིག་ཡོང་ནས་ང་ཚོ་ས་འདྲུད་རྡོ་འདྲུད་བྱས་ཏེ་གཞན་དུ་འཁྲིད་རྩིས་བྱས་སོང་། ང་ཚོས་མུ་མཐུད་ངག་བཅད་ལས་འགུལ་མཚམས་མ་བཞག་པར་ཕན་ཚུན་ལ་འཐམ་ནས་བསྡད་པར། དམག་མི་གཟིགས་སྟོབས་ཅན་ཞིག་གིས་ཚེ་བརྟན་རྡོ་རྗེ་ཡར་བཀྱགས་ཏེ་ཆུ་འདམ་ནང་ཐེངས་ཁ་ཤས་ལ་བརྡབ་སོང་། ཚེ་བརྟན་རྡོ་རྗེ་ཅི་ཙམ་བརྡབ་ཀྱང་ཨ་མའི་ཁོག་པ་ནས་བཙེས་མ་ཐག་པའི་རྟོལ་ལེ་ཞིག་དང་འདྲ་བར། བོད་ལ་དང་སྐྲ་རིང་པོའི་གསེང་ནས་ཆུ་རྙོག་འཛར་འཛར་ཡར་ལངས་ཡོང་གི་འདུག ཉིན་དེའི་གནས་ཚུལ་ད་ལྟ་དྲན་ན་རུས་གསེང་ལ་ཟུག་གཟེར་རྒྱག་གི། མཚམས་ཤིག་ལ་དམག་མི་བུད་མེད་གཉིས་ཀྱིས་ང་ལ་འཐམ་ནས་ཤུགས་ཀྱིས་ཕར་དྲུད་དེ་ངའི་སྐེད་པའི་ཤ་ཡང་བསྣུར་སོང་། སྐབས་དེར་ཚེ་བརྟན་རྡོ་རྗེ་ཡིས་ངག་སྒོ་ཕྱེ་ནས་སྐད་ཤུགས་ཆེན་པོས་མང་པོ་ཞིག་བཤད་སོང་ཡང་། རྗེས་སུ་ལྷ་མོ་སྐྱིད་ཀྱིས་བཤད་པར། ཁྱེད་ཅག་ལའང་ཨ་མ་རེ་ཡོད་པ་རེད། ངའི་ཨ་མར་དཀའ་སྡུག་པོ་གཏོང་བའི་ཚབ་ཏུ་ང་རང་ལ་ཉེས་རྡུང་གཏོང་རོགས། ཞེས་ལབ་སོང་ཟེར།” སྐྱབས་མེད་མགོན་མེད་དུ་གྱུར་བའི་བོད་དོན་ལས་འགུལ་བ་མ་བུ་གསུམ་གྱི་ཐོག་ཏུ་དཀའ་སྡུག་ཁུར་བོ་ལྕི་མོ་འདི་འདྲ་ཞིག་བྱུང་བ་ཐོས་སྐབས། མང་གཙོའི་རྒྱལ་ཁབ་ཁག་གི་ནང་དུ་ཆུ་ཚོད་རེ་འགའི་རིང་སྐད་འབོད་ཅིག་བྱས། བོད་དར་འཕྱར་བཞིན་གོམ་བགྲོད་ཡ་མ་ཡུན་ཞིག་བྱས་པ་དེ་ཆེས་སྤྱིར་བཏང་གི་ལས་འགུལ་སྤེལ་སྟངས་ཤིག་དང་། མི་ཐོག་ནས་མི་ཐོག་བརྒྱུད་ཅིང་ཕྱི་རབས་པ་རྣམས་ཀྱིས་ལག་ལེན་འདྲ་ཆགས་པོ་ཞིག་བྱེད་དགོས་པའི་ཆོ་ག་ཙམ་ཞིག་ཡིན་པའི་རྟགས་གསལ་བོ་རྟོགས་འོང་། བཙན་བྱོལ་དུ་སྡོད་མཁན་གྱི་བོད་མི་ཆིག་འབུམ་ལྷག་ཡོད་ཀྱང་དེ་དག་གི་ནང་ནས་མི་རིགས་ཀྱི་ལས་དོན་ཆེད་ལྷག་བསམ་དག་པའི་ལས་འགུལ་སྤེལ་མཁན་ནི་གླིང་ཚ་ཚེ་བརྟན་རྡོ་རྗེ་དང་ཨ་མ་ལྡོམ་པོ་སྐྱིད་སོགས་མི་སྣ་ཆེས་ཉུང་ཤས་ཤིག་ལས་མེད་པ་ནི་བཙན་བྱོལ་བ་ཚོས་ངོས་ལེན་བྱེད་མི་འདོད་ཀྱང་མི་བྱེད་ཀ་མེད་ཀྱི་གནས་སྟངས་ཉག་ཕྲ་བ་ཞིག་ཡིན།
བོད་དོན་ཞེས་ཁ་ནས་གླེང་མཁན་མང་པོ་ཡོད་ཅིང་དེ་ཡི་ཆེད་དུ་ཅིག་ཅིག་ཉིག་ཉིག་བྱེད་དགོས་པ་རེད་ཅེས་ཁ་ཚོད་ཡོད་ནང་ནས་ཚིག་ཚོད་མེད་བཤད་མཁན་ཡང་མང་། དོན་དམ་དུ་བོད་དོན་ལས་འགུལ་སྤེལ་བའི་སྙིང་སྟོབས་ཅན་ཞིག་དང་དེའི་ཆེད་དུ་ཡོད་ཚད་གཏོང་ཕོད་པའི་ཆོད་སེམས་ཅན་ཞིག་ཉིན་མོའི་སྐར་མ་ལྟར་འགྱུར་བཞིན་ཡོད། ཉེ་བའི་ལོ་བཅུ་ཕྲག་ཁ་ཤས་ཀྱི་ནང་དུ་བོད་དོན་ནི་འཛམ་གླིང་གི་རྒྱལ་ཁབ་ནུས་སྟོབས་ཅན་དང་དེའི་འབངས་མི་སེར་གྱི་མིག་ལམ་ནས་ནམ་མཁའི་འཇའ་ཚོན་བཞིན་ཡལ་འགོ་རྩོམ་བཞིན་ཡོད། དེའི་རྒྱུ་མཚན་ཅི་ཞིག་ཡིན་མིན་ཞིབ་ཏུ་བཤད་ན་མང་པོ་ཡོད་ངེས་ཀྱང་གཅིག་ནི་བོད་པ་རང་ཉིད་ཀྱིས་བོད་དོན་ལས་འགུལ་སྤེལ་སྟངས་དེ་སྐྱ་ཟད་སྔོ་རྡུགས་སུ་གྱུར་བ་དང་། སྐད་འབོད་ཙམ་དང་ཁུ་ཚུར་གྱེན་དུ་འདེགས་པའི་དཔའ་ཉམས་ཤིག ཞི་བའི་གོམ་བགྲོད་དུ་བཏགས་པའི་སྐྱུར་ལུག་གི་ལས་འགུལ་བཅས་བོད་མི་ཚོས་ཁྲལ་དང་སླ་ཆོས་ཁོ་ནར་བརྩིས་པའི་མཇུག་འབྲས་ཤིག་རེད། དེ་བས། བོད་མི་རྣམས་ཀྱིས་བོད་དོན་ལས་འགུལ་སྤེལ་སྟངས་དེ་ཉིད་ད་ཆ་ནུབ་ཕྱོགས་པ་སོགས་མང་གཙོའི་རྒྱལ་ཁབ་དང་དེའི་གཞུང་མང་གཉིས་ཀྱི་མིག་ལམ་དུ་ཆེས་རྙིང་གོག་བེམ་གཟུགས་སུ་གྱུར་བར་བརྟེན། བོད་དོན་སྔར་ལས་ཤུགས་ཇེ་ཆུང་དུ་འགྲོ་རྒྱུ་ཡིན་པ་ནི་མིག་མཐོང་ལག་ཟིན་གྱི་བྱུང་བ་དམར་རྗེན་ཞིག་རེད།
འོན་ཀྱང་། ཁ་ཡོད་ལག་ཡོད་ཅེས་པའི་དཔེ་ལྟར་བོད་དོན་ལ་ནུས་པ་བླ་ལྷག་ཅིག་འཐོན་དགོས་ན་གླིང་ཚ་མ་བུ་རྣམས་ཀྱི་ལས་འགུལ་དེ་འདྲ་ནི་དངོས་གནས་བོད་དོན་ལས་འགུལ་སྤེལ་ཐབས་ལེགས་ཤོས་ཤིག་རེད་ཅེས་སྨྲ་འདོད། གླིང་ཚ་མ་བུ་རྣམས་ཀྱིས་ལས་འགུལ་སྤེལ་སྐབས་ལམ་གྱི་དཀའ་བ་དང་མཐའ་མཚམས་ནས་ཐེག་དཀའ་བའི་སྡུག་བསྔལ་སྣ་ཚོགས་དང་དུ་ལེན་དགོས་བྱུང་ཡོད་ཀྱང་། སེམས་ཤུགས་ལ་ནམ་ཡང་ཞུམ་པ་མེད་པའི་གླིང་ཚ་མ་བུ་གཉིས་ཀྱིས་ཇི་སྲིད་སྒྱུ་ལུས་འཇིག་རྟེན་འདིའི་ཐོག་ནས་མ་འཇིག་པར་བོད་དོན་ལས་འགུལ་སྤེལ་རྒྱུ་གཏད་ནས་མཚམས་མ་བཞག གླིང་ཚ་རྣ་ཐོད་ལ་ནས་གར་སོང་ཆ་མེད་དུ་གྱུར་རྗེས་ཨ་མ་ལྡོམ་པོ་སྐྱིད་ཀྱིས་སྤྱིར་བོད་དོན་ཆེད་རང་ལུས་ཞུགས་ལ་ཕུལ་བའི་དཔའ་བོ་རྣམས་དང་དེ་བཞིན་ཆབ་སྲིད་ཀྱིས་བཙོན་དུ་ཚུད་པ་བཅས་ཀྱི་ཆེད། སྒོས་སུ་གླིང་ཚའི་ལས་འགུལ་མཇུག་སྐྱོང་གི་ཆེད་དུ་དམིགས་ནས་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ཉེ་འགྲམ་ནས་བཞུཊ་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་བར་བརྐྱངས་ཕྱག་འཚལ་ཏེ་བོད་དོན་ལས་འགུལ་སྤེལ་བ་དང་། བོད་ཀྱི་དམངས་གཙོ་དུས་ཆེན་དང་སྟབས་བསྟུན་དུས་ཡུན་ཉིན་གསུམ་རིང་ཟས་བཅད་ངོ་རྒོལ་བྱས་པ་བཅས་ནི་མི་གཅིག་གམ་ཡང་ན་གླིང་ཚ་མ་བུ་རྣམས་ཀྱི་ལྟོ་རྒྱབ་ཀྱི་ཆེད་དུ་མིན་པ་ནི་བོད་མི་ཀུན་གྱིས་ཤེས་དགོས་པའི་གནད་དོན་ཞིག་མ་རེད་དམ། ལྷག་བསམ་དག་པའི་བོད་དོན་སྒྲུབ་མཁན་རྣམས་ལ་རྒྱབ་སྐྱོར་བྱེད་པ་ནི་རང་གིས་མི་ནུས་ནའང་གཞན་གྱི་བྱ་བ་ལ་རྗེས་སུ་ཡི་རང་བྱས་པ་ཞིག་ཏུ་གྱུར་ཡོད་པས། རྒྱལ་གཅེས་དཔའ་བོ་རྣམས་ཀྱི་དགེ་རྩར་འགྲོ་ཞིང་ཁོང་ཅག་གི་ཐུགས་བཞེད་འགྲུབ་པའི་རྒྱུ་རུའང་འགྱུར་བ་ནི་དགེ་ལ་རྗེས་སུ་ཡི་རང་མཆོག་ཅེས་གསུངས་པ་མིན་ནམ། དེའི་ཚིག་འབྲེལ་ནི་གཞན་གྱིས་དགེ་སྒྲུབ་ལ་རང་གིས་རྗེས་སུ་ཡི་རང་བྱས་ན་གཞན་གྱིས་གང་བསགས་པའི་དགེ་རྩ་དེ་རང་ལ་འཐོབ་ཅེས་པའི་གནས་ལུགས་ལ་སོམས་ཤིག
ད་ཆ་བཙན་བྱོལ་བོད་མི་རྣམས་ཀྱིས་དེ་འདྲའི་ཀུན་སློང་ཅིག་འཆང་ཡང་བོད་དོན་ལས་འགུལ་དུ་ངོས་འཛིན་བྱེད་དགོས་པའི་ཚད་དུ་བསླེབས་ཡོད། ཨ་མ་ལྡོམ་པོ་སྐྱིད་ཀྱི་བློས་གཏོང་དང་ཆོད་སེམས་དང་མ་བུའི་མཛའ་བརྩེ་བཅས་ལ་མིག་གིས་རིག་རིག་དང་སེམས་ཀྱིས་རེག་རེག་བྱས་ན་ཟགས་ལ་ཁད་ཀྱི་མིག་ཆུ་དེའང་མཁུར་མགོ་བརྒྱུད་ནས་བྲང་གཞུང་དུ་ལྷུང་ངེས་ཀྱི་གནས་སུ་བསྐྱལ་སོང་། ད་ལྟ་རྩོམ་ཡིག་ཕུང་གསུམ་པ་འདི་འབྲི་བཞིན་པའི་སྐབས་ཁོང་མོའི་སྔ་ཕྱི་བར་གསུམ་དུ་བོད་དོན་ལས་འགུལ་སྤེལ་བ་དང་། གླིང་ཚ་རྣ་ཐོད་ལ་ནས་གར་སོང་མ་ཤེས་པའི་རྗེས་ནས་མ་ངོ་བུ་ངོ་ཐུག་ཆེད་ཉི་མ་རེ་རེ་གྲངས་ལ་འདེབས་བཞིན་ཡོད་པའི་སྐད་ཆ་བཅས་ཡིད་ལ་དྲན་ན་དངོས་གནས་སྨྲ་བསམ་བརྗོད་འདས་ཀྱི་ཚོར་བ་ཞིག་གིས་སྒྲོག་ཏུ་བཙུད་པ་ལྟར་གྱུར་སོང་། ཕྱི་ལོ་ཉིས་སྟོང་བཅོ་བརྒྱད་ཟླ་དགུ་བའི་ཚེས་དྲུག་གི་མཚན་མོ་ཁོང་མོ་རྒྱུ་རྐྱེན་བཤད་དུ་མེད་པར་རང་ཁྱིམ་ནས་ཕྱི་མའི་གཟིགས་མོར་ཕེབས་པའི་གསར་འགྱུར་དེ་མཐོང་སྐབས། བློ་ཡུལ་ལས་འདས་པ་ལྟ་བུ་ཞིག་བྱུང་ནའང་ང་ལྟ་བུ་མི་དཀྱུས་མ་ཞིག་གིས་ཁོང་མོའི་ཆེད་དུ་ཅི་ཞིག་བྱེད་ཐུབ་ཨང་། ངས་གླིང་ཚ་ཚེ་བརྟན་རྡོ་རྗེ་མིང་ཐོས་ཐེངས་རེར་ཐོག་མར་སེམས་ལ་དྲན་སླ་བ་ནི་ཨ་མ་ལྡོམ་པོ་སྐྱིད་ལགས་རེད། ཁོང་མོའི་མ་བཅོས་རང་བབས་སུ་བྱུང་བའི་གཤིས་སྤྱོད་དེ་དག་རེད། ད་ནི་ཁོང་མོ་འཇིག་རྟེན་དཀར་ངོགས་འདི་དང་བྲལ་ནས་བགྲང་བྱ་གསུམ་ལྷག་འགྲོ་བཞིན་འདུག ཁོང་མོས་གླིང་ཚ་རྙེད་པའི་སླད་དུ་དྷ་སའི་ཁྲོམ་གཞུང་གཡས་གཡོན་ལ་མི་འཚོལ་གྱི་གསལ་བསྒྲགས་སྦྱར་ནས་གཏམ་བཟང་ངན་གང་རུང་ལ་རེ་ལྟོས་བྱས་ཀྱང་། གར་ཡོད་འདིར་འདུག་གི་གནས་ཚུལ་གསལ་བོ་གཅིག་ཀྱང་ཐོས་ལོང་མ་བྱུང་། བཙན་བྱོལ་བོད་གཞུང་དང་ཚོགས་སྡེ་ཁག་ལ་མི་འཚོལ་གྱི་སྐབས་འཇུག་ཞུས་ཀྱང་དོན་སྨིན་གྱི་འབྲས་བུ་ཅི་ཡང་མ་བྱུང་། མདོར་ན་ཁོང་མོས་གང་ནུས་ཅི་ལྕོགས་ཀྱིས་མཐའ་འབྲས་ཤིག་འཚོལ་འདོད་པའི་བོད་དོན་དང་བུ་གླིང་ཚའི་སྐོར་གྱི་སྐད་ཆ་གསལ་བོ་གཅིག་ཀྱང་མ་མཐོང་བར་ཕྱི་མའི་ལྔ་ལམ་དུ་ཕེབས་པ་ནི་ཇི་འདྲའི་ཡིད་སྐྱོ་བ་ཞིག་རེད་ཨང་།
༢༠༢༡།༩།༧ ཨ་མ་ལྡོམ་པོ་སྐྱིད་གྲོངས་ཏེ་ལོ་གསུམ་དང་ཉི་མ་གཅིག་སོང་པའི་ཉིན་མོར་བྲིས།
ཚིག་གཅིག་ཀྱང་བཤད་མཁན་མེད་ཟེར། དུས་བབ་བཀླགས་པ་ལས་འཕྲོས་པའི་གཏམ། ཞེས་པ་བྲིས་མྱོང་ཡོད།
ཁྱེད་ཅག་ལའང་ཨ་མ་རེ་ཡོད་པ་རེད། ངའི་ཨ་མར་དཀའ་སྡུག་པོ་གཏོང་བའི་ཚབ་ཏུ་ང་རང་ལ་ཉེས་རྡུང་གཏོང་རོགས།
གླིང་ཚ་ཚེ་བརྟན་རྡོ་རྗེའི་བོད་བོད་དོན་ལས་འགུལ་དང་ཨ་མ་ལྡོམ་པོ་སྐྱིད་ལྷག་བསམ་དང་བྱམས་བརྩེ་ལ་རྗེས་སུ་ཡིད་རང་དང་། གླིག་ཚའི་མཐའ་མའི་ལས་འགུལ་སྐབས་ཡིག་ཆ་གལ་ཆེན་ཞིག་སྐབས་དེའི་དུས་ཀྱི་མདོ་སྨད་སྤྱི་འཐུས་ཞིག་རྒྱུད་སྲིད་སྐྱོང་ལ་ཕུལ་ཀྱང་། ཡིག་ཆ་དེ་བོར་རླག་ཏུ་ཤོར་ནས་ད་ཆ་སུའི་ལག་ཏུ་ཡོད་མེད་གསང་བ་ལྐོག་ཏུ་འགྱུར་བ་ནི་བློ་ཕམ་གྱིས་གནས་སུ་ལྷུང་།
རྨོམ་པ་པོ་ལགས་ལ་བསྔགས་བརྗོད་ཞུ།་དོན་དངོས་ཐོག་རྗེས་དྲན་ཞུས་འོས་མི་སྣ་ཅིག་གི་དངོས་བྱུང་ལོ་རྒྱུས་ཞིབ་ཁྲ་བཀོད་འདུག་པས་བཀའ་དྲིན་ཆེ་ཞུ།།།་ཕྲན་ཡང་དུས་རྒྱུན་ཨ་མ་འདོམ་པ་སྐྱིད་དང་གླིང་ཚའི་བོད་དོན་ལས་འགུལ་ལ་རིན་ཐང་རྩི་མཁན་ཞིག་ཡིན་པས་གློ་འགྱོད་ཤིན་ཏུ་ཆེ།