གློག་རྡུལ་རྩེད་མོའི་ནང་བོད་དར་ཤར་བར་སྐྱོན་བརྗོད་བྱེད་ཀྱི་འདུག

ཨ་རིའི་གློག་རྡུལ་རྩེད་མོ (video Game) བཟོ་སྐྲུན་ཁང་ཌེག་ནེན་ (Deck Nine) གྱིས་བཟོ་སྐྲུན་བྱས་ཞིང་ཉི་ཧོང་གི་སི་ཁོ་ཝེར་ཨེ་ནིག་སི་ (Square Enix) གློག་རྡུལ་རྩེད་མོ་བཟོ་གྲྭས་ཚོང་འགྲེམས་བྱས་པའི་སྒྲུང་གི་རྣམ་པར་བཅོས་པའི་བརྙན་རྩེད་ཅིག་གི་ནང་བོད་ཀྱི་རྒྱལ་དར་འཆར་བ་དེར་རྒྱ་རིགས་རྩེད་མོ་བ་ཚོས་ངོ་རྒོལ་སྐྱོན་བརྗོད་བྱེད་ཀྱི་ཡོད་ཀྱང་རྩེད་མོ་བ་སྤྱི་བྱིངས་ནས་སྐྱོན་བརྗོད་དེ་དག་རྒྱུ་མཚན་དང་གནས་ལུགས་མེད་པ་ཞིག་ཏུ་རྩི་བཞིན་འདུག

ཟླ་འདིའི་ཕྱི་ཚེས་ ༡༠ ཉིན་གློག་རྡུལ་བརྙན་རྩེད་ Life is Strage: True Colors ཞེས་པ་ཞིག་རྒྱལ་སྤྱིའི་ཁྲོམ་རར་ཐོན་པ་དེར་མཆན་ ༦༠༥ སྤེལ་ཡོད་པ་དང་། མཆན་ཕལ་ཆེ་བའི་ནང་བརྙན་རྩེད་དེར་དགའ་མོས་བྱུང་བའི་རྣམ་པ་བསྟན་ཡོད་ནའང་། རྒྱ་ཡིག་སྟེང་ནས་སྤེལ་བའི་མཆན་ ༡༦༠ ལྷག་གི་ཁྲོད་ནས་མཆན་ ༡༡༨ ལྷག་གིས་རྩེད་མོ་དེའི་ནང་བོད་ཀྱི་རྒྱལ་དར་འཆར་ཡོད་པ་དེར་ངོ་རྒོལ་སྐྱོན་བརྗོད་སྤེལ་འདུག དེ་ཡང་མཆན་མང་པོའི་ནང་ “བོད་ནི་རྒྱ་ནག་གི་ཆ་ཤས་ཤིག་ཡིན།” ཞེས་པའི་ཆབ་སྲིད་དྲིལ་བསྒྲགས་རང་བཞིན་གྱི་ཚིག་བརྗོད་སྤེལ་ཡོད་ཅིང་། མཆན་ཞིག་གི་ནང་། གློག་རྡུལ་རྩེད་མོ་བཟོ་སྐྲུན་ཁང་དེས་སྤྱི་ཡོངས་ནས་བརྙན་རྩེད་ཚད་ལྡན་དང་འདོད་བློ་ཁེངས་པ་བསྐྲུན་ཡོད་ནའང་། ཆབ་སྲིད་ཀྱི་གནད་དོན་ཆེད་དུ་བཅུག་སྟེ་རྒྱ་ནག་ལ་ཟུར་ཟ་བྱས་པ་དེར་ངོ་རྒོལ་ཡོད་སྐོར་དང་། རྒྱ་ནག་ཁ་བྲལ་ལ་གཏོང་བའི་བྱ་སྤྱོད་ལ་ནམ་ཡང་གུ་ཡངས་བྱ་རྒྱུ་མིན་པ་དང་། བརྙན་རྩེད་དེས་བོད་རང་བཙན་ལ་སྐུལ་སློང་བྱེད་ཀྱི་ཡོད་ཚུལ་སོགས་བཀོད་འདུག་པ་མ་ཟད། བརྙན་རྩེད་དེ་ཇི་ལྟར་ལེགས་ནའང་རྒྱ་རིགས་ཚང་མས་མཆན་ངན་པ་སྤེལ་དགོས་སྐོར་གྱི་སྐུལ་སློང་ཡང་བྱས་འདུག

བརྙན་རྩེད་དེ་ནི་རྟོག་བཟོའི་སྒྲུང་གི་རྣམ་པར་བཅོས་པའི་བརྙན་རྩེད་ Life is Strange ཞེས་པའི་འདོན་ཐེངས་ལེའུ་གསུམ་པ་དེ་ཡིན་འདུག་པ་དང་། བརྙན་རྩེད་ནང་གི་རྟོག་བཟོའི་གྲོང་ཚོ་ཧེ་ཝན་སི་པི་རིང་ (Haven Springs) ཞེས་པ་རྒྱ་ལམ་གྱི་གཡས་ཕྱོགས་སུ་བོད་ཀྱི་བང་མཛོད་ (Treasures of Tibet) ཅེས་པའི་ཚོང་ཁང་ཆུང་ཆུང་ཞིག་ཡོད་ཅིང་། ཚོང་ཁང་དེའི་སྒོ་བྱང་སྟེང་དབྱིན་ཡིག་ཐོག་བོད་ཀྱི་བང་མཛོད་ཅེས་པའི་མིང་དང་བོད་ཀྱི་རྒྱལ་དར་གྱི་རི་མོ། སྒོའི་མདུན་ཐོག་དེར་ཚོན་མདོག་ལྔ་ཅན་གྱི་རླུང་རྟ་དར་ལྕོག་དང་། ད་དུང་ཚོང་ཁང་གི་གཡས་ཕྱོགས་སུ་བོད་ཀྱི་རྒྱལ་དར་ཞིག་ཀྱང་དཔྱངས་ཡོད་འདུག

ད་ལྟའི་ཆར་ཌེག་ནེན་གློག་རྡུལ་རྩེད་མོ་བཟོ་སྐྲུན་ཁང་གི་ངོས་ནས་ད་ལན་གྱི་གནས་ཚུལ་དེར་གསལ་བཤད་སོགས་གང་ཡང་བྱས་མེད་ཀྱང་།  Steam (https://store.steampowered.com/) ཞེས་པའི་བརྙན་རྩེད་དང་འབྲེལ་བའི་དྲ་རྒྱ་དེར་རྒྱ་རིགས་མཆན་འདེབས་པ་རྣམས་ཀྱི་མཆན་ལ་ཕར་རྒོལ་གྱི་མཆན་འདེབས་མཁན་མང་པོ་འདུག་པ་མ་ཟད། མང་པོ་ཞིག་གིས་རྒྱ་རིགས་རྣམས་ཀྱི་མཆན་རྣམས་ “རྩེད་མཚར་ (Funny)” ཞེས་པའི་སྡེ་ཚན་ནང་བཅུག་ཡོད་འདུག དེ་ནི་མཆན་དེ་དག་བརྙན་རྩེད་རང་དང་འབྲེལ་མེད་དོན་གཞན་ཡིན་པ་དང་། མཆན་ནང་འཁོད་པའི་གནས་ཚུལ་ལ་ངོས་ལེན་མེད་པའི་དོན་ཡིན་འདུག དེ་བཞིན་གྷུ་གྷལ་ (Google) ནང་བརྙན་རྩེད་དེར་སྐར་མ་ ༥ ནས་ ༤།༣ ཐོབ་ཡོད་ཅིང་། གྷུ་གྷལ་བཀོལ་སྤྱོད་པ་བརྒྱ་ཆ་ ༩༣ གྱིས་དགའ་རྟགས་སྤྲད་ཡོད་འདུག

རྒྱལ་སྤྱིའི་བཟོ་སྐྲུན་ཁང་དང་སྤྱི་གཉེར་ཁང་གང་རུང་ཞིག་གིས་རྒྱ་ནག་ལ་སྐྱོན་བརྗོད་ཀྱི་ཚིག་བརྗོད་དང་རྣམ་འགྱུར་བསྟན་པའི་ཚེ། དེར་རྒྱ་ནག་གཞུང་གིས་མངོན་གསལ་དོད་པོའི་ཐོག་ནས་ངོ་རྒོལ་བྱེད་པ་དང་། རྒྱ་རིགས་མང་ཚོགས་ངོས་ནས་དྲ་ལམ་སྟེང་ནས་སྤྱི་གཉེར་ཁང་དེར་ཁ་བརྡུང་དང་ཟུར་ཟ། སྐབས་རེར་སྤྱི་གཉེར་ཁང་དེའི་ཐོན་རྫས་བཀོལ་སྤྱོད་མི་བྱ་རྒྱུའི་ལས་འགུལ་སྤེལ་བ་སོགས་དང་། ལྷག་པར་དུ་རྒྱ་ནག་གཞུང་གི་ཟུར་ལྔའི་དྲ་དམག་གིས་རྒྱ་ནག་ཕྱི་ནང་གཉིས་སུ་རྒྱ་ནག་གཞུང་གི་དྲིལ་བསྒྲགས་ཁྱབ་སྤེལ་བྱེད་པ་ནི་རྒྱུན་གཏན་ལྟ་བུ་ཡིན་པ་རེད། དེ་ཡང་ཕྱི་ལོ་ ༢༠༡༩ ལོར་ཐའེ་ཝན་ནས་བཟོ་སྐྲུན་བྱས་པའི་བརྙན་རྩེད་ཅིག་ངི་ནང་། རྒྱ་ནག་གི་སྲིད་འཛིན་ཞི་ཅིན་ཕིང་ནི་འགུལ་བརྙན་ནང་གི་ Winnie the Pooh ཞེས་པའི་དོམ་སེར་དེ་ཡིན་སྐོར་འཁོད་པར་བརྟེན། རྒྱ་ནག་ནང་གི་རྩེད་མོ་བ་རྣམས་ཀྱིས་སྐྱོན་བརྗོད་དང་ངོ་རྒོལ་ཤུགས་ཆེན་པོ་བྱས་ཡོད་ཅིང་། མཐར་བརྙན་རྩེད་བཟོ་སྐྲུན་ཁང་དེས་བརྙན་རྩེད་ཀྱི་ཆ་ཤས་དེ་ཕྱིར་འཐེན་བྱེད་དགོས་ཁེལ་ཡོད་པ་རེད། གཞན་ཡང་འདས་ལོའི་ཕྱི་ཟླ་ ༤ པའི་ནང་ཧོང་ཀོང་གི་དམངས་གཙོའི་ལས་འགུལ་བ་རྣམས་ཀྱིས་རྒྱལ་སྤྱིའི་བརྙན་རྩེད་བཟོ་སྐྲུན་ཁང་ཆེ་གྲས་ནིན་ཊན་ཌོ་ (Nintendo) ཡིས་བཟོ་སྐྲུན་བྱས་པའི་བརྙན་རྩེད་ Animal Crossing ཞེས་པ་དེ་ཉིད་བརྒྱུད་ཧོང་ཀོང་གི་དམངས་གཙོ་དྲིལ་བསྒྲགས་ཀྱི་ཆེད་དུ་བཀོལ་སྤྱོད་བྱས་པར་བརྟེན། བརྙན་རྩེད་དེ་ཉིད་རྒྱ་ནག་གི་ཁྲོམ་རའི་ནང་བཀག་སྡོམ་བྱས་ཡོད་པ་རེད།

གསར་འགོད་པ། པ་སངས་ཚེ་རིང་།