ཕྱི་ལོ་ ༢༠༢༢ ལོར་༧དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་འདོན་མཛད་སྒོ་གནང་གཏན་འཁེལ་འདུག

ཕྱི་ལོ་ ༢༠༢༢ ཟླ་ ༣ ཚེས་ ༡༦ ནས་ ༡༧ བར་ཉིན་གྲངས་གཉིས་རིང་པུ་རུ་ཝ་ལར་ཡོད་པའི་ས་སྐྱའི་མ་དགོན་ཐུབ་བསྟན་རྣམ་རྒྱལ་གླིང་དུ་དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་འདོན་མཛད་སྒོ་གནང་གཏན་འཁེལ་ཡོད་པ་རེད།

དེ་རིང་དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་སྟོན་མཛད་སྒོ་ཚོགས་ཆུང་ནས་གསལ་བསྒྲགས་སྤེལ་བ་ལྟར་ན། ༧སྐྱབས་མགོན་༧གོང་མ་ཛྙན་བཛྲ་རིན་པོ་ཆེ་མཆོག་གི་དཔལ་ས་སྐྱའི་ཁྲི་རབས་ཞེ་གསུམ་པའི་ཁྲི་འདོན་མཛད་སྒོ་དེ་བཞིན་ཕྱི་ལོ་ ༢༠༢༢ ཟླ་ ༣ ཚེས་ ༡༦ དང་ ༡༧ བཅས་ཉིན་གྲངས་གཉིས་རིང་པུ་རུ་ཝ་ལ་བོད་མིའི་གཞིས་ཆགས་སུ་ཆགས་པའི་ས་སྐྱའི་མ་དགོན་ཐུབ་སྟན་རྣམ་རྒྱལ་གླིང་དུ་གནང་གཏན་འཁེལ་ཡོད་འདུག

སྤྱིར་དེ་སྔ་ས་སྐྱའི་ཁྲི་འཛིན་ཞེ་གསུམ་པ་ཛྙན་བཛྲ་རིན་པོ་ཆེ་མཆོག་གི་ཁྲི་འདོན་མཛད་སྒོ་དེ་བཞིན། ཕྱི་ལོ་ ༢༠༢༠ ཟླ་ ༣ ཚེས་ ༢༩ དང་ ༣༠ ཉིན་གནང་གཏན་ཁེལ་ཡོད་ནའང་། འདས་ལོའི་ལོ་མགོ་ནས་རྒྱ་གར་ཚུད་པའི་འཛམ་གླིང་ཁྱོན་ཡོངས་སུ་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱི་རྐྱེན་པས་མི་མང་གི་འདུ་འཛོམས་དང་འགྲོ་སྐྱོད་ཚུན་ཆད་ལ་བཀག་སྡོམ་བྱས་ཡོད་པར་བརྟེན། ཁྲི་འདོན་མཛད་སྒོ་དེ་ཉིད་དུས་ལྟར་འཚོགས་ཐུབ་མེད་པ་རེད། ད་ལན་གྱི་གསལ་བསྒྲགས་ཀྱི་མཇུག་ཏུའང་། ཁྲི་འདོན་མཛད་སྒོ་དང་འབྲེལ་བའི་ཞིབ་ཕྲའི་གནས་ཚུལ་རྣམས་ནད་ཡམས་ཀྱི་གནས་སྟངས་ལ་གཞིགས་ཏེ་རྗེས་སུ་རིམ་པས་གསལ་བསྒྲགས་ཞུ་རྒྱུ་ཡིན་སྐོར་འཁོད་ཡོད་འདུག

དེ་སྔོན་ཕྱི་ལོ་ ༢༠༡༤ ཟླ་ ༥ ཚེས་ ༨ ཉིན་དཔལ་ས་སྐྱའི་ཕུན་ཚོགས་ཕོ་བྲང་དང་སྒྲོལ་མ་ཕོ་བྲང་གཉིས་ནས་དཔལ་ས་སྐྱའི་བསྟན་བདག་ཁྲི་འཛིན་གྱི་མཚན་གནས་བཞེས་ཕྱོགས་སྐོར་ལ་གྲོས་མཐུན་གྲོས་ཆོད་ཅིག་གཏན་འབེབ་གནང་བ་གཞིར་བཟུང་། དཔལ་ས་སྐྱ་པའི་བསྟན་བདག་ཁྲི་པའི་མཚན་གནས་དེ་བཞིན་སྒྲོལ་མ་ཕོ་བྲང་དང་ཕུན་ཚོགས་ཕོ་བྲང་གཉིས་ཀ་ཁྱད་མེད་ཀྱི་གདུང་སྲས་བགྲེས་རིམ་བཞིན་གནང་རྒྱུ་དང་། བསྟན་བདག་ཁྲི་པའི་ཐུགས་འགན་བཞེས་པར་དཔལ་ས་སྐྱའི་ལུགས་ཀྱི་ཆོ་ག་ཕྱག་ལེན་གྱི་རིམ་པ་གཞི་རིམ་སློབ་ཚན་གཞིར་བཟུང་ལེགས་ཐོན་ཐོག་གཞུང་ལུགས་སློབ་གཉེར་གསན་བསམ། ཡབ་ཆོས་གསུང་ངག་རིན་པོ་ཆེ་ཚོགས་སློབ་གཉིས་ཀྱི་མཚོན་ཟབ་ཆོས་དབང་ལུང་མན་ངག་གལ་ཆེའི་རིགས་གསན་བསམ་གྲུབ་པ་དང་། དཔལ་ཀྱེ་རྡོ་རྗེའི་གཞི་བསྙེན་གཙོ་བོར་གྱུར་བའི་ལྷག་ལྷ་གལ་ཆེའི་རིགས་ཀྱི་ལྗགས་བསྙེན་གྲུབ་པ་བཅས་དགོས་ཀྱི་ཡོད་པ་རེད་འདུག ཁྲི་པའི་དུས་ཡུན་ཡང་ལོ་གསུམ་རེ་དང་། ལོ་གསུམ་རེ་རྫོགས་མཚམས་རེས་མོས་སུ་ཡིན་ལ་རྩིས་སྤྲོད་གནང་དགོས་པ་དང་། བསྟན་བདག་ཁྲི་པའི་ཐུགས་འགན་བཞེས་པའི་རིང་དཔལ་ས་སྐྱའི་ཡབ་ཆོས་ཐུན་མོང་མ་ཡིན་པའི་གསུང་ངག་རིག་པོ་ཆེ་ཚོགས་སློབ་གཉིས་དང་། སྒྲུབ་ཐབས་ཀུན་བཏུས། རྒྱུད་སྡེ་ཀུན་བཏུས་སོགས་གསུང་ཆོས་གལ་ཆེའི་རིགས་རེ་གནང་ཐུབ་པ་དགོས་ཀྱི་ཡོད་འདུག

དཔལ་ས་སྐྱ་པའི་གྲོས་ཆོད་དེའི་མགོར། ས་སྐྱ་པའི་ཆོས་བརྒྱུད་འདི་བཞིན་ཐོག་མར་འཁོན་སྟོན་དཀོན་མཆོག་རྒྱལ་པོས་དབུ་བརྙེས། དཔལ་བརྩེ་བ་ཆེན་མོས་སྲོལ་གཏོད། ཆོས་རྗེ་ཁུ་དབོན་གྱིས་དར་རྒྱས་སུ་མཛད་ནས་སྤྱི་ལ་དབང་བའི་གདུང་རབས་བཅུ་གཅིག་གི་གདན་ས་སྐྱོངས་གནང་མཛད། དེ་རྗེས་བླ་བྲང་བཞིར་གྱེས་ནས་རྒྱུན་བསྐྱངས་ཤིང་། མཐར་དུས་མཆོད་བླ་བྲང་གི་གདུང་རབས་ད་ལྟའི་བར་རིམ་བྱོན་གྱིས་བསྟན་སྲིད་ཀྱི་མཛད་འཁུར་རྒྱ་ཆེ་བསྐྱངས་ཤིང་། འཇམ་མགོན་དབང་འདུད་སྙིང་པོར་གདུང་སྲས་བཞི་བྱུང་བ། བླ་བྲང་སོ་སོར་བཞུགས་ཀྱང་། གཉིས་རྟེན་རབ་བྱུང་ཡིན་སྟབས་བཞུགས་པའི་ཡུན་ལས་རྒྱུན་གནས་མེད་ཅིང་། གཉིས་གདུང་འཛིན་མཛད་པ་ནས་སྒྲོལ་མ་ཕོ་བྲང་དང་། ཕུན་ཚོགས་ཕོ་བྲང་ཞེས་ད་ལྟ་ཡོངས་གྲགས་གཉིས་ནས་བསྟན་བདག་ཁྲི་པའི་མཚན་གནས་ཕོ་བྲང་གཉིས་རེས་མོས་དགུང་ནའི་བབས་བསྟུན་གྱི་མཛད་བཞིན་པ་ནས་ད་ཆ་ཕོ་བྲང་ཁག་གཉིས་ཀྱི་གདུང་སྲས་རྣམས་གསན་བསམ་རྒྱ་ཆེ་མཛད་དང་མཛོད་བཞིན་པ་མ་ཟད། ཕོ་བྲང་རྣམ་གཉིས་ཐུགས་མཐུན་དམ་གཙང་ཐུགས་སྣང་སྣོད་བཅུད་གཅིག་གྱུར་རྫོགས་ལྡན་གསར་པའི་དུས་རབས་ལྟ་བུའི་སྐབས་འདིར། ཞེས་བཀོད་ཡོད་འདུག

༧སྐྱབས་མགོན་འཁོན་གདུང་ཛྙ་ན་བཛྲ་རིན་པོ་ཆེ་ནི། ཡབ་ས་སྐྱ་༧གོང་མ་ཁྲིི་ཆེན་ཞེ་གཅིག་པ་ཆེན་པོ་མཆོག་དང་། རྒྱལ་ཡུམ་བཀྲ་ཤིས་ལྷ་སྐྱིད་གཉིས་ཀྱི་སྲས་སུ་བོད་རྒྱལ་ལོ་ ༢༡༠༦ ས་ལུག་བོད་ཟླ་ལྔ་པའི་ཚེས་བཅུ་སྟེ་སློབ་དཔོན་ཆེན་པོ་པདྨ་འབྱུང་གནས་ཀྱི་དུས་ཆེན་དགེ་བའི་ཉིན་ཕྱི་ལོ་ ༡༩༧༩ ཟླ་ ༧ ཚེས་ ༥ དེཧ་རཱ་དུན་དུ་སྐུ་འཁྲུངས། དེ་མ་ཐག་ཡབ་རྗེ་མཆོག་གིས་གོང་མའི་ཕྱག་སྲོལ་ལྟར་ལྗགས་ལ་དྷཱི་ཡིག་འབྲི་བ་དང་ལེགས་སྦྱར་སྐད་དུ་ཛྙ་ན་བཛྲ་སྟེ། ཡེ་ཤེས་རྡོ་རྗེ་ཞེས་པའི་མཚན་གསོལ། མཚན་མཆོག་གསུམ་ལྡན་གྱི་གདུང་བརྒྱུད་རིན་པོ་ཆེ་འདི་ཉིད་ནི་ཐོག་མར་འོད་གསལ་ལྷ་ལས་བྱུང་ཞིང་། གཟུགས་ཁམས་ལྷ་གནས་ཀྱི་སྤུན་བདུན་ཡོད་པའི་ནང་ནས་བྱུང་བ་ཞིག་ཡིན་ལ། གདུང་བརྒྱུད་འདིར་དུས་རབས་བརྒྱད་པའི་ནང་ཨོ་རྒྱན་གུ་རུ་རིན་པོ་ཆེ་ཞལ་བཞུགས་སྐབས་ནས་འཁོན་ཀླུའི་དབང་སྲུང་བ་སོགས་མཁས་གྲུབ་མང་པོ་བྱོན་ཏེ་བོད་ཀྱི་ནང་བསྟན་ལ་མཛད་རྗེས་ཆེན་པོ་བཞག་ཡོད།

གསར་འགོད་པ། པ་སངས་ཚེ་རིང་།