ཨ་རི་དང་རྒྱ་དཀར་ནག་གཉིས་བཅས་རྒྱལ་ཁབ་གསུམ་ཙམ་གྱི་ཐོབ་ཐང་ལག་ཁྱེར་ལྡན་ཞིང་མིང་ལ་ཆོས་འབྱོར་འོད་ཟེར་ཞེས་པའི་མི་ཞིག་རྒྱ་བལ་གཉིས་ཀྱི་ས་མཚམས་ནས་འཛིན་བཟུང་བྱས་ཏེ་འདྲི་རྩད་བྱེད་ཀྱི་ཡོད་འདུག
Shutterstock
ཁ་སང་ཕྱི་དྲོའི་ཆུ་ཚོད་ ༧ ཙམ་གྱི་སྟེང་བལ་ཡུལ་དང་རྒྱ་གར་གྱི་ས་མཚམས་སྟེ། རྒྱ་གར་ཕྱོགས་ཀྱི་རྡོར་གླིང་རྫོང་ཁོག་གི་པ་ནེ་ཊན་ཀེ་ (Panitanki) ཡི་ས་མཚམས་ནས། མིང་ལ་ཆོས་འབྱོར་འོད་ཟེར་ཟེར་ཞིང་། ཨ་རིའི་མི་སེར་ལག་ཁྱེར་ལྡན་པའི་ཡུལ་མི་ཞིག་ཁྲིམས་འགལ་ཐོག་ས་མཚམས་བརྒལ་ནས་བལ་ཡུལ་ནང་འགྲོ་ཐབས་བྱས་སྐབས། རྒྱ་གར་གྱི་ས་མཚམས་སྐོར་སྲུང་བས་འཛིན་བཟུང་བྱས་ཏེ་ད་ལྟ་བཀག་ཉར་འོག་བཞག་ཡོད་འདུག
ས་མཚམས་སྐོར་སྲུང་བས་རྟོག་ཞིབ་བྱེད་སྐབས། ཆོས་འབྱོར་འོད་ཟེར་ནི་རང་ལོ་ ༤༦ ཡིན་པ་དང་ནེའུ་ཡོག་ཏུ་རྟེན་གཞི་བྱས་པའི་པ་བློ་བཟང་ཕུན་ཚོགས་ཀྱི་བུ་ཡིན་ཞིང་། ཁོ་བོད་དུ་སྐྱེས་ཤིང་ཨ་རིའི་མི་སེར་ལག་ཁྱེར་ཡོད་མཁན་ཞིག་ཡིན་པ་དང་། འཛིན་བཟུང་བྱས་སྐབས་ཁོའི་ལུས་སྟེང་དུ་ཨ་རིའི་གྲོང་ཁྱེར་ནེའུ་ཡོག་གི་རླངས་འཁོར་ཁ་ལོ་བའི་ལག་ཁྱེར་ཞིག་དང་ཧིན་སྒོར་ ༧༦༠༠ དང་བལ་སྒོར་ ༡༡༡༢༥ ཙམ་ཡོད་འདུག་པ་མ་ཟད། ཕྱི་ལོ་ ༢༠༢༦ བར་བོད་ནང་གི་དགོན་པ་ཞིག་ཏུ་སློབ་སྦྱོང་བྱ་ཆོག་པའི་ཐོངས་མཆན་ཞིག་ཀྱང་ཡོད་པ་རེད།
ས་མཚམས་སྐོར་སྲུང་བས་ཆོས་འབྱོར་འོད་ཟེར་དང་ལྷན་དུ། སི་ལི་གྷུ་རི(Siliguri) ས་ཁུལ་ནས་ཡིན་པདྨ་བྷི་ཊི་ཡ་ཟེར་བའི་མི་ཞིག་འཛིན་བཟུང་བྱས་ཡོད་པ་དང་། ཁོས་གཙོ་བོ་ཆོས་འབྱོར་འོད་ཟེར་ཁྲིམས་འགལ་ཐོག་ས་མཚམས་བརྒལ་ཏེ་བལ་ཡུལ་ནང་སྐྱེལ་ཐབས་བྱས་པས་ཡིན་འདུག་ལ། ད་རེས་ཁོ་གཉིས་འཛིན་བཟུང་བྱས་མ་ཐག ཁོ་གཉིས་ཀྱིས་ས་མཚམས་ཕར་ཕྱོགས་ནས་མི་ཞིག་གི་ལག་ནས་དངུལ་ཅུང་ཙམ་ཞིག་ལེན་ཆེད་དུ་འགྲོ་ཡི་ཡོད་སྐོར་བརྗོད་ཡོད་ཀྱང་། ཆོས་འབྱོར་འོད་ཟེར་གྱི་ཁ་པར་ཞིབ་བཤེར་བྱས་པ་བརྒྱུད་ཁོ་པ་བལ་ཡུལ་མཐའ་མཚམས་གནམ་ཐང་ (Bhadrapur) ནས་རྒྱལ་ས་ཀ་ཐི་མན་ཌི་བར་གནམ་གྲུའི་འཛིན་བྱང་ཉོས་ཡོད་པ་ཤེས་རྟོགས་བྱུང་ཡོད་འདུག
རྒྱ་གར་གྱི་ས་མཚམས་སྐོར་སྲུང་བས་ཕྱིས་སུ་ཁོ་གཉིས་ས་གནས་ཉེན་རྟོག་པར་རྩིས་སྤྲོད་བྱས་ཤིང་། ཆོས་འབྱོར་འོད་ཟེར་ལ་ཨ་རིའི་མི་སེར་དང་རྒྱ་ནག དེ་བཞིན་རྒྱ་གར་གྱི་པན་ཀ་ཊི་ (Pan Card) སོགས་ཐོབ་ཐང་ལག་ཁྱེར་མང་པོ་ཡོད་པར་བརྟེན། རྒྱ་གར་ཉེན་རྟོག་པས་ཆོས་འབྱོར་འོད་ཟེར་གྱི་རྒྱབ་ལྗོངས་སོགས་ལ་རྟོག་ཞིབ་དང་དོགས་གཞི་བྱེད་ཀྱི་ཡོད་འདུག
གཞན་ཡང་། ད་ལྟ་ཆོས་འབྱོར་ཟེར་བའི་མི་དེ་བོད་མི་ཡིན་དང་ཡང་ན་རྒྱ་མི་ཞིག་ཡིན་སུས་ཀྱང་གསལ་བོ་ཤེས་རྟོགས་ཐུབ་ཀྱི་མེད་ནའང་། རྡོར་གླིང་ཕྱོགས་ཀྱི་གསར་ཁང་མང་པོས་དོགས་གཞི་ཅན་གྱི་རྒྱ་རིགས་ཤིག་ཡིན་སྐོར་བསྒྲགས་འདུག
གསར་འགོད་པ། སྐལ་བཟང་སྦྱིན་པ།
བོད་པ་ཞིག་ཡིན་ན་རེད་འདུག་ཟེར་དགོས་པ་ལས་མི་རིགས་གཞན་ཞིག་ཡིན་ས་རེད་ཅེས་འཁྱོག་བཤད་བྱེད་མི་ཉན།