བོད་རིགས་བུ་མོ་ཨ་མཚོ་མེར་སྲེག་གཏོང་མཁན་རྒྱ་རྒན་དེར་ཁྲིམས་ཐག་ད་དུང་བཅད་མི་འདུག

བོད་རིགས་བུ་མོ་ཨ་མཚོ་མེར་སྲེག་གཏོང་མཁན་རྒྱ་རྒན་དེར་ད་དུང་ཁྲིམས་ཐག་གང་ཡང་བཅད་མེད་འདུག

ཟླ་འདིའི་ཕྱི་ཚེས་༡༤ཉིན་རྒྱ་ནག་པེ་ཅིན་གྲོང་ཁྱེར་དུ་རྟེན་གཞི་བྱས་ཡོད་པའི་ཧོང་ཀོང་(凤凰网)ཞེས་པའི་རྒྱ་ཡིག་གསར་ཁང་ཞིག་གིས་གནས་ཚུལ་སྤེལ་བ་ལྟར་ན། སྔར་ལོའི་ཕྱི་ཟླ་༩་ཚེས་༡༤་ཉིན་གྱི་དགོང་མོར། བོད་ཀྱི་རྒྱལ་རོང་ཁྲོ་སྐྱབས་ཐུགས་རྗེ་ཆེན་པོའི་དུ་མུ་ས་ཆ་ནས་ཡིན་པའི་བོད་རིགས་བུ་མོ་ཨ་མཚོ་ལགས། སྔར་གྱི་ཁོ་མོའི་བཟའ་ཟླ་རྒྱ་རིགས་སྐྱེས་པ་དེས་ཡ་ང་སྙིང་རྗེ་མེད་པར་མེར་སྲེག་བཏང་ཡོད་པ་དང་། དོན་རྐྱེན་དེ་བྱུང་ནས་ལོ་གཅིག་འགྲོ་བཞིན་ཡོད་ཀྱང་། ད་དུང་ཁྲིམས་ཁང་གིས་ཉེས་དོན་དེར་ཁྲིམས་བཤེར་་བྱས་ཏེ་ལག་དམར་ལ་ཁྲིམས་ཐག་གང་ཡང་བཅད་མེད་སྟབས། འདས་མོ་ཨ་མཚོའི་སྤུན་མཆེད་སྒྲོལ་མས་ངུ་ངག་དང་བཅས་གསར་འགོད་པར་ཁོ་མོས་མུ་མཐུད་ཁྲིམས་ཁང་གིས་ཁྲིམས་ཞིབ་བྱེད་པར་སྒུག་ནས་ཡོད་ལ། ཁྲིམས་ཁང་གིས་ཁྲིམས་ཞིབ་དེ་དྲང་བདེན་ཞིག་ཡོང་བའི་རེ་བ་བྱེད་བཞིན་ཡོད་སྐོར་བརྗོད་འདུག

དེ་འབྲེལ་གྱི་བརྙན་ཐུང་ཞིག་བཏང་ཡོད་པའི་ནང་། འདི་ལོའི་ཕྱི་ཟླ་༩ཚེས་༡༤་ཉིན་ནང་མི་ཚོས་ཨ་མཚོ་དམར་གསོད་བཏང་ནས་ལོ་གཅིག་འཁོར་བའི་འདས་མཆོད་ཡིན་པ་དང་། བུ་མོ་སྒྲོལ་མས་ཨ་མཚོའི་དོན་རྐྱེན་ཐད་ཁྲིམས་བཤེར་གནད་དོན་ཐག་གཅོད་ཅིག་བྱུང་རྗེས། ཨ་ཕ་དང་ང་གཉིས་ཀྱིས་ཨ་མཚོའི་རུས་ཐལ་ཁུར་ནས་ཨ་མཚོའི་མི་ཚེའི་ནང་གི་རེ་འདུན་སྐོང་ཐབས་སུ་བོད་ཀྱི་རྒྱལ་ས་ལྷ་སར་མཇལ་སྐོར་ཆེད་འགྲོ་རྒྱུ་ཡིན་སྐོར་བརྗོད་ཡོད་པ་དང་། གསར་ཁང་དེས་བྲིས་པའི་གནས་ཚུལ་ནང་ཨ་མཚོ་འདས་གྲོངས་སུ་སོང་བ་ནས་སྒྲོལ་མ་དང་ནང་མི་ཚོ་ཁྱིམ་མེད་མགོན་མེད་ལྟ་བུའི་གནས་སུ་ལྷུང་ཡོད་པ་མ་ཟད། སྒྲོལ་མས་སེམས་ཁམས་ཀྱང་བདེ་ཐང་མེད་པ་ཞིག་ཏུ་ཆགས་ཀྱི་ཡོད་སྐོར་སོགས་བཀོད་འདུག

ལག་དམར་རྒྱ་རྒན་དེར་ཁྲིམས་བཤེར་མི་བྱས་པའི་རྒྱུ་མཚན་དང་། ཁྲིམས་ཁང་གང་ཞིག་ཏུ་ཞུ་གཏུགས་བྱས་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་མེད་ཀྱང་། གསར་འགྱུར་དེའི་འོག་ཏུ་མཆན་བཀོད་མཁན་ཚོས་ཨ་མཚོའི་ཁྲིམས་བཤེར་ལ་དྲང་བདེན་ཡོང་དགོས། ཁོ་མོ་དམར་གསོད་གཏོང་མཁན་སྐྱེས་པ་དེ་སྔར་བཞིན་བདེ་མོ་བྱས་བསྡད་ཡོད་པ་དང་། དེ་འདྲའི་དམར་གསོད་ཀྱི་དོན་རྐྱེན་ཆེན་པོ་ཞིག་ལ་ད་དུང་ཁྲིམས་ཐག་མི་གཅོད་པའི་རྒྱུ་མཚན་ག་རེ་ཡིན་སོགས་ཀྱི་འདྲི་རྩད་དང་སྐྱོན་བརྗོད་བྱེད་ཀྱི་འདུག་ལ། སྒྲོལ་མས་ཨ་མཚོ་འདས་གྲོངས་སུ་ཕྱིན་པ་ནས་དེ་སྔ་བདེ་སྐྱིད་ལྡན་པའི་ང་ཚོའི་ཁྱིམ་ཚང་དེ་ད་ལྟ་སྙིང་བོ་གང་ཡང་མེད་པ་ཆགས་སོང་། ང་རང་རྒྱུན་པར་ཨ་མཚོའི་འདྲ་པར་མདུན་དུ་བསྡད་དེ་ད་ལྟ་ཁོ་མོ་བདེ་ཐང་གི་ས་ཆ་གཞན་ཞིག་ནས། འཚེ་བ་དང་གནོད་འཚེ་བྱེད་མཁན་མེད་པའི་སྨོན་ལམ་བརྒྱབ་བཞིན་ཡོད་སྐོར་བརྗོད་འདུག

བོད་རིགས་བུ་མོ་ཨ་མཚོ་ནི་རྒྱལ་རོང་ཁྲོ་སྐྱབས་ཀྱི་ཞིང་བའི་ཁྱིམ་ཚང་དཀྱུས་མ་ཞིག་གི་བུ་མོ་ཡིན་པ་དང་།ཁོ་མོ་དེ་སྔ་རྒྱ་རིགས་སྐྱེས་པ་ཞིག་དང་གཉེན་སྒྲིག་བྱས་རྗེས་བུ་ཕྲུག་གཉིས་སྐྱེས་ཡོད་ན་ཡང་།རྗེས་སུ་སྐྱེས་པ་དེས་ཁོ་མོར་གནར་སྡུག་དང་བཅར་བརྡུང་སོགས་རིམ་པར་བྱས་རྐྱེན།ཁོ་མོ་རྒྱ་རིགས་སྐྱེས་པ་དེ་དང་བཟའ་མཐོར་གྱིས་ཕྱིར་ནང་དུ་ལོག་ཡོད་ན་ཡང་།རྒྱ་རིགས་སྐྱེས་པ་དེས་ཁོ་མོའི་ནང་ཡོང་སྟེ་ཁོ་མོས་སྤྱི་ཚོགས་དྲ་ལམ་བརྒྱུད་ཐད་གཏོང་བྱེད་བཞིན་པའི་བར་བརླགས་ནས་ལུས་པོར་ སྣུམ་བླུགས་ནས་མེར་སྲེག་བཏང་ཡོད་པ་རེད་ལ། དེ་མ་ཐག་འབར་ཁམས་སྨན་ཁང་དུ་འཁུར་ནས་མྱུར་སྐྱོབ་བྱས་ཡོད་ཀྱང་ཕྱི་ཟླ་༡༠་ཚེས་༡་ཉིན་འདས་གྲོངས་སུ་ཕྱིན་ཡོད་པ་རེད།

ཨ་མཚོ་ལགས་ནི་ཕྱི་ལོ་༡༩༩༠ལོ་སྐྱེས་ཤིང་། ཁོ་མོའི་དྲྭ་མིང་ལ་བུ་མོ་ནག་པོའམ་ལྷ་མོ་དང་། ཁོ་མོས་ཐུགས་རྗེ་ཆེན་པོའི་ལྕགས་ཟམ་ཁར་མོ་རང་གིས་ཚོང་ཁང་ཆུང་ཆུང་ཞིག་ཕྱེ་ནས་ཚོང་ལས་ལ་གཉེར་ཞོར་དུ་དབྱར་ཁར་རི་འགོར་བུད་ནས་སྤྲུ་ནག་དང་ལྕུམ་རྩ།དབྱར་རྩྭ། ད་དུང་རྩྭ་སྨན་དང་སྔོ་སྨན་གྱི་རིགས་སོགས་འདྲ་མིན་བརྐོས་ནས་ཞོར་ལས་བྱེད་ཞོར། ཁོ་མོའི་དངོས་ཡོད་འཚོ་བ་དང་འབྲེལ་བའི་རིགས་དྲ་ལམ་ཁག་ཏུ་ཐད་གཏོང་བྱས་པས། ཁོ་མོར་དྲ་ལམ་ཐད་གཏོང་ནང་ལྟ་མཁན་མི་གྲངས་༩༠ཙམ་ཡོད་པ་དང་། ཨ་མཚོ་ལགས་མེར་སྲེག་གཏོང་སྐབས་དྲ་ལམ་མི་གྲངས་ཁྲི་སྟོང་མང་པོས་རང་འགུལ་ཁོ་མོའི་སྨན་བཅོས་ཆེད་ཞལ་འདེབས་ཕུལ་ཡོད་པ་རེད་ལ།རྗེས་སུ་དྲ་ལམ་ཁག་ཏུ་ཁོ་མོའི་དོན་རྐྱེན་ལ་དྲང་བདེན་དགོས་པ་སོགས་བརྒྱུད་སྤེལ་བྱེད་མཁན་ཤུགས་ཆེར་བྱུང་ཡོད་པ་རེད།

རྒྱ་གར་ལྷོ་ཕྱོགས་གསར་འགོད་པ་དོན་འགྲུབ་བཀྲ་ཤིས།